ཡུ་ཧན་ན། 21
21
ཡི་ཤུ་གི་ རོ་ཀ་སློ་མ་ཟུམ༌ག་ མཇལ་ཁ་གནང་མ༌ལ།
1ཨོ་ཉ་ཚི་ངེ་ ཏི་བེ་རི་ཡཱས་ག་མཚོ་ནབ་ཀ་ ཡི་ཤུ་རོག་ཏེན་གི་ རོ་ཀ་སློ་མ་བ་ཀ་ མཇལ་ཁ་གནང་མ༌ལ། ཨུ་ཉུ་ཤོ་ ཨོ་ཐེན་ཇུང་མ་གི་ཝ༌ལ། 2སི་མོན་པ་ཏྲུས་དང་ ཙེ་མ་དག་ཉི་ར་ཁཱན་ཐོ་མ་ ཉི་ག་ལིལ་ཀ་ན་དག་ས་གེ་ ན་ཐ་ནེལ་དག་ཁཱན་དང་ ཇབ་དི་ཡ་ག་ཟ་ཉིག་ཙིང་ ཉི་ཨོམ་ཆང་རང་ བཱརའ་སློ་མ་ཉིག་ཙིང་བུ་ ཏབ་ཐུར་ཅ་གི་ཝ༌ལ། 3སི་མོན་པ་ཏྲུས་གི་ རོག་ཏེ་བ་ཀ་ ཇང་ང་ཙུང་མེ་དིན་ཅ་དག་ཉི་ ཡེག་པ་ཀབ་ཉི་ ཨ་ཧ་བ་བུ་ ནཱན་ཀབ་ཉི་དི་ལེ་དག་ཉི་ རོག་ཏེ་བ་ཀི་ཡེག་པ༌ལ། ཉི་རོག་ཏེ་བ་ཕིས་ཀ་དིན་ཐཱན་ གྲུ་ནང་ཀ་ནུ་ཕ༌ལ། དག་པ་ཀབ་ཉི་ ཨོ་ཉ་བི་ནང་ག་ རོག་ཏེ་བ་ཀི་ ང་ཐུར་རང་མ་ཉོང་པ༌ལ། 4ཝུན་བེད་པེ་རང་ ཡི་ཤུ་མཚོ་ནབ་ཀ་ཐིང་ཉི་ བཞུགས་པ་གི་ཝ༌ལ། དག་པ་ཀབ་ཉི་ སློ་མ་བ་ཀི་ རོག་ཡི་ཤུ་གི་ལ་དག་ཉི་ གུམ་ཡེ་ལེ་མར་བ༌ལ། 5རོ་ཀི་ རོག་ཏེ་བ་ཀ་ཇི་མ་ལ་ ཇ་རོ་བ་ ན་ཤི་ང་ཙུང་ཉི་ཉོང་པ་སྨོ་དག༌ཉི། མ་ཉོང་ཅི་དག་ཉི་ རོག་ཏེ་བ་ཀི་ རོ་ཀ་ཞུ་ཝ༌ལ། 6གྲུ་ག་ལ་ཉོང་ལོ་ཀ་ཏཱན་ ན་ཧ་ཅོང་ཚབ་ཅོ་ ཉི་ན་ཤི་ང་ཉོང་པེ་དག་ཉི་ རོ་ཀི་ རོག་ཏེ་བ་ཀ་གསུངས་མ༌ལ། ཉི་རོག་ཏེ་བ་ཀི་ ཅོང་ཚ་ཕ་ཀབ་ཉི་ ང་མང་པུ་ཆོ་ཝ་ཨ་དེན་གེ་ རོག་ཏེ་བ་ཀི་ ཅོང་ཇང་པེ་མར་བ༌ལ། 7ཉི་ཡི་ཤུ་གི་ཕང་ཁཱན་སློ་མ་གི་ པ་ཏྲུས་ག་ཡེག་པ་ལ་ རོག་ཤོ་ གཙོ་བོ་གི་ཝ་ལ་དག༌ཉི། ཨོ་ཐེན་ན་ཐ་ལ་ཀབ་ཉི་ པ་ཏྲུས་གི་ ཕིས་ཀ་ཁ་མུང་ཡེན་ཐཱན་ (རོ་ཀ་ཁ་མུང་ཕེག་པ་ཆོ་ཝ༌ལ།) མཚོ་རི་ནང་ཀ་ཏཱན་ ལིན་པ༌ལ། 8ཉི་བཱརའ་སློ་མ་བ་ཤོ་ གྲུ་ག་རང་ཆོན་ཐཱན་ ང་གི་ཕུང་ཁཱན་ཅོང་ མཚོ་ནེ་མ་ག་ཏཱན་ཇང་པ༌ལ། ཧང་ཡ་དག་ནེ་ལ་ རོག་ཏེ་བ་ཤོ་ ས་ར་ག་རང་ཅ་གི་ཝ༌ལ། ཉི་རོང་ནང་ 50 ཕང་དབ་ཏུར་ཤ་ ཇང་ཀིན་ཆོ་ཝ༌ལ། 9རོག་ཏེ་བ་ མཚོ་ནེ་མ་ག་ཤེག་ཉི་ གོད་པ་ཀབ་ཉི་ རོག་ཏེ་བ་ཀི་ མི་སིང་ཉི་ མི་ཙང་ཁེ་ཝ་ཅ་གི་ཝ༌ལ། ཉི་ཨོ་ཉ་མི་ཙང་ག་ ང་དང་ཀེབ་ཏང་ ཐ་ཝ་ཆོ་ཝ༌ལ། 10ན་ཤི་ཨོ་མ་ཙུང་ཁཱན་ ང་ཚེ་བང་ཕའི་དག་ཉི་ ཡི་ཤུ་གི་ རོག་ཏེ་བ་ཀ་གསུངས་མ༌ལ། 11སི་མོན་པ་ཏྲུས་ ལོག་ཉི་གྲུ་ནང་ཀ་དིན་ཐཱན་ ཅོང་མཚོ་ནེ་མ་ག་ཏཱན་ ཇང་པ༌ལ། ཉི་ང་ཆི་ལུ་ཆི་ལུ་ཨ་ཝ་ 153 ཆོ༌ཝ། ཨོ་ཉེ་རང་གི་ནེ་བུ་ ཅོང་མ་རེ་པ༌ལ། 12ཡི་ཤུ་གི་ རོག་ཏེ་བ་ཀ་གསུངས་མ་ལ་ ཨུན་ཐཱན་ཆང་པུ་ཟའི་དག༌ཉི། རོག་ཏེ་བ་ཀི་ རོག་ཤོ་ གཙོ་བོ་གི་ལ་དག་ཉི་ སེ་ཝ་ཨ་དེན་གེ་ ནཱན་ཨི་བི་ཡ་དག་ཉི་ སློ་མ་ཐུར་གི་རང་ ཇི་མེ་མར་བ༌ལ། 13ཡི་ཤུ་བྱོན་ཐཱན་ ཀེབ་ཏང་བསྣམས་པ༌ལ། ཉི་ཨོ་ཉ་ཀེབ་ཏང་ རོག་ཏེ་བ་ཀ་གནང་མ༌ལ། ཉི་ང་ཀབ་ཉི་བུ་ ཨུ་ཉུ་པུརུས་ཀིན་ཨ་ཉི་རང་ གནང་མ༌ལ། 14ཡི་ཤུ་གཤགས་པ་གེ་ ལོག་ཉི་བཞེངས་ཏེན་གེ་ རོ་ཀ་སློ་མ་བ་ཀ་ མཇལ་ཁ་གནང་ཉི་ ཨུ་ཐུ་ཨ་ལ་ཀབ་ཉི་ ཤེབ་སམ་དིན་ཅ་གི་ཝ༌ལ༎
ཡི་ཤུ་དང་པ་ཏྲུས།
15རོག་ཏེ་བ་ ཟ་ཉི་ཆུམ་དེན་གེ་ ཡི་ཤུ་གི་ སི་མོན་པ་ཏྲུས་ག་གསུངས་མ་ལ་ ཡུ་ཧན་ན་ག་ཟ་སི་མོན་ ནཱན་གི་ ཇང་ཏེན་ཏེན་ཨ་ཉི་རང་ རོག་ཏེ་བ་ཀེ་མང་པུ་ ཕང་ཅ་སྨོ་དག༌ཉི། ཕང་ཅ་གཙོ་བོ་ ཇི་གི་ནཱན་ཕང་ཅ་གི་ལ་དག་ཉི་ ནཱན་གི་བུ་མཁྱེན་ཅ་དག་ཉི་ པ་ཏྲུས་གི་ཞུ་ཝ༌ལ། ཉི་ཡི་ཤུ་གི་ རོ་ཀ་གསུངས་མ་ལ་ ཇ་ག་ཤི་ཤ་བ་ཀ་ ཙི་བི་དག༌ཉི། 16ཉི་ཨོམ་ཆང་རང་ ཡི་ཤུ་གི་ རོ་ཀ་གསུངས་མ་ལ་ ཡུ་ཧན་ན་ག་ཟ་སི་མོན་ ནཱན་གི་ ཇང་ཏེན་ཏེན་རང་ ཕང་ཅ་སྨོ་དག༌ཉི། ཕང་ཅ་གཙོ་བོ་ ཇི་གི་ནཱན་ཕང་ཅ་གི་ལ་དག་ཉི་ ནཱན་གི་བུ་མཁྱེན་ཅ་དག་ཉི་ པ་ཏྲུས་གི་ཞུ་ཝ༌ལ། ཉི་ཡི་ཤུ་གི་ རོ་ཀ་གསུངས་མ་ལ་ ཇ་ག་ཤི་ཤ་བ་ཀ་ བདག་འཛིན་ཨའི་དག༌ཉི། 17ཉི་ཨོམ་ཆང་རང་ ཡི་ཤུ་གི་ རོ་ཀ་གསུངས་མ་ལ་ ཡུ་ཧན་ན་ག་ཟ་སི་མོན་ ནཱན་གི་ཇང་ཕང་ཅ་སྨོ་དག༌ཉི། ཡི་ཤུ་གི་རོ་ཀ་ ནཱན་གི་ཇང་ཕང་ཅ་སྨོ་དག་ཉི་ ཤེབ་སམ་ཇི་མ་ཨ་དེན་གེ་ པ་ཏྲུས་ཁོ་དང་ཆཱད་ཉི་ ཞུ་ཝ་ལ་ གཙོ་བོ་ ནཱན་གི་ ཐམས་ཅན་རང་མཁྱེན༌ཅ། ཉི་ཇི་གི་ ནཱན་ཕང་ཅ་གི་ལ་དག་ཉི་བུ་ ནཱན་གི་མཁྱེན་ཅ་དག༌ཉི། ཉི་ཡི་ཤུ་གི་ གསུངས་མ་ལ་ ཇ་ག་ཤི་ཤ་བ་ཀ་ ཙི་བི། 18ཇི་གི་ ན་ག་དེན་པ་ཡེག་ཅ་ ནཱན་ཡོན་མ་ཨ་ཉི་ཆོ་ལེ་གང་ཀ་ ནཱན་ནཱན་ཏེན་གི་རང་ ཁ་མུང་ཡེན་ཐཱན་ ཨོ་ག་དི་ལེ་ལ་མ་ཐུར་ དིན་ཆོ༌ཝ། དག་པ་ཀབ་ཉི་ ནཱན་གཱན་ཏེན་གེ་ལ་ ནཱན་གི་ ན་ག་ག་དང་ཉིག་ཙིང་རིང༌ཅ། ཉི་བཱརའ་སོ་ངོ་ཐུར་གི་ ཁ་མུང་ཡེ་ཉི་བིན༌ཅ། ཉི་ནཱན་དི་ལེ་ མ་ལམ་ས་ག་ཏཱན་ དི་ལེ་རིག་ཅ་དག༌ཉི། 19དཀོན་མཆོག་ག་ གཟི་བརྗིད་ཕུལ་བེ་དེན་གེ་ པ་ཏྲུས་ཤི་ལ་ཀབ་ཉི་ ཧང་ཏེན་ཤི་ལེ་གི་ལ་སྨོ་ གེན་མེ་དེན་གེ་ ཡི་ཤུ་གི་ ཨོ་ཐེན་གསུངས་མ་ཆོ་ཝ༌ལ། ཨོ་ཐེན་གསུངས་ཉི་ཆུམ་དེན་གེ་ རོ་ཀི་པ་ཏྲུས་ག་ གསུངས་མ་ལ་ ཇ་ག་ཚིང་ཚིང་ཨོ་དོ་དག༌ཉི། 20པ་ཏྲུས་གི་ གིར་ཉི་གོད་པ་ཀབ་ཉི་ ཡི་ཤུ་གི་ཕང་ཁཱན་སློ་མ་གི་ རོག་ཉིག་ཙིང་ག་ ཚིང་ཚིང་ཨོ་ཕ་ཐོང་མ༌ལ། ཉི་རོག་ཤོ་ ཚོགས་བཞེས་ལེ་གང་ཀ་ ཡི་ཤུ་ག་ཏེས་ཐཱན་ གཙོ་བོ་ ཨི་བི་གི་ ན་ག་མགུ་སྐོར་ཕི་ལེ་ཡ་དག་ཉི་ ཇིམ་ཁཱན་གི་ཝ་ཆོ་ཝ༌ལ། 21ཉི་པ་ཏྲུས་གི་ཐོང་མ་ཀབ་ཉི་ གཙོ་བོ་ རོ་ཀ་ཤོ་ ཧང་ཇུང་མེ་ཡ་དག་ཉི་ ཞུ་ཝ༌ལ། 22ཡི་ཤུ་གི་ རོ་ཀ་གསུངས་མ་ལ་ ཇང་མ་ལོག་པ་སག་པུ་ རོག་གསོན་པོ་ཨ་ཉི་རང་ཐ་ལེ་ག་ ཇ་ག་སེམས་ཆོ་ནེ་ལ་ ནཱན་ཧང་ཨ་ཉི་ སྡུག་བསྔལ་ཨ་ལེ་ཁེ་ཝ་ཅ་ཡ། ནཱན་ཤོ་ ཇ་ག་ཚིང་ཚིང་ཨོ་དོ་དག༌ཉི། 23ཨོ་ཉི་ཨ་དེན་གེ་ ཨོ་ཉ་སློ་མ་ ཧ་ལ་རང་མ་ཤི་ལ་དག་ཉི་ དད་པ་ཨ་ཁཱན་བ་ཀ་པོང་ཀ་ ཚང་དིར་པ༌ལ། དག་པ་ཀབ་ཉི་ ཡི་ཤུ་གི་ ཨོ་ཉ་སློ་མ་མ་ཤི་ལ་དག་ཉི་ མ་གསུངས་ཤི། རོ་ཀི་ ཨོམ་ཏུར་ཤ་གསུངས་མ་ ཇང་མ་ལོག་པ་སག་པུ་ རོག་གསོན་པོ་ཨ་ཉི་རང་ ཐ་ལེ་ག་ ཇ་ག་སེམས་ཆོ་ནེ་ལ་ ནཱན་ཧང་ཨ་ཉི་ སྡུག་བསྔལ་ཨ་ལེ་ ཁེ་ཝ་ཅ་ཡ་དག༌ཉི། 24ཨོ་ཐ་སློ་མ་ཤོ་ ཨོ་ཉ་བ་ཇུང་མ་ཀབ་ཉི་ ཐོང་ཁཱན་དང་ འབྲི་ཉི་ཐ་ཁཱན་གི༌ལ། ཉི་རོ་ཀི་འཛོམས་དཔང་ཨ་ཁཱན་ཤོ་ དེན་པ་གི་ལ་དག་ཉི་ ཨ་ཤི་སེན༌ཅ། 25ཡི་ཤུ་གི་ བཱརའ་ཕྱག་ལཱ་བ་བུ་ མང་པུ་ཐུར་མཛད༌པ། ཉི་ཨོ་ཉ་བ་ ཐམས་ཅན་རང་ འབྲི་བ་ད་བུ་ཨ་ནེ་ལ་ ཨོ་ཉ་འབྲི་ཁཱན་དཔེ་ཆ་བ་ ཨོ་ཐ་འཛམ་གླིང་ནང་ཀ་བུ་ མ་ཤོང་པེ་ཆོ་ཝ་དག་ཉི་ ཇི་གི་མི་ན༎
Trenutno odabrano:
ཡུ་ཧན་ན། 21: TNTB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tshangla New Testament
© 2023, The Bible Society of India
all rights reserved