ཡུ་ཧན་ན། 20
20
དུར་ཏོང༌པ།
1ཉི་གཟའ་ད་ཝ་ག་ནོང་ཀ་ ཝུན་བེད་པུ་ མིང་མ་ཏེག་པེ་གོ་མ་ མ་རི་ཡམ་མག་ད་ལི་ནི་ དུར་ག་དི་ཉི་ གོད་པ་ཀབ་ཉི་ དུར་ག་ཀོ་རེ་ཉི་ཐ་ཁཱན་ ལུང་ཁེ་པ་ གིར་ཉི་བུ་ཝ་ཆོ་ཝ་གི་ཝ༌ལ། 2ཉི་རོག་ཇུག་ཉི་རང་ ལོག་ཉི་ལོག་ཐཱན་ སི་མོན་པ་ཏྲུས་དང་ ཡི་ཤུ་གི་ཕང་ཁཱན་ སློ་མ་ག་ཏཱན་ཡེག་པ་ལ་ རོག་ཏེ་བ་ཀི་ གཙོ་བོ་ དུར་གེ་ཕིས་ཀ་ཤོ་ཉི་ བུ་ཝ༌ལ། ཉི་རོག་ཏེ་བ་ཀི་ རོག་ཨོ་ག་ཐ་ཝ་ཅ་གི་ལ་སྨོ་ ཨ་ཤི་མ་སེ་ལ་དག༌ཉི།
3ཨོ་ཉི་ཨ་དེན་གེ་ པ་ཏྲུས་དང་ ཨོམ་ཐུར་སློ་མ་དུར་ག་ཏཱན་ དི་ཝ༌ལ། 4རོག་ཉིག་ཙིང་ ཇུག་ཉི་རང་དི་ཝ་གི་ཝ༌ལ། དག་པ་ཀབ་ཉི་ པ་ཏྲུས་ཚིང་ཚིང་ལུས་པ༌ལ། ཉི་ཨོམ་ཐུར་སློ་མ་ཁེ་པ་ དུར་ག་གོ་མ་ཤེག་པ༌ལ། 5ཉི་རོག་ནོང་ཐཱན་ ནང་ཀ་གོད་པ་ཀབ་ཉི་ ཁ་ཤ་བ་ལིང་མིན་ཁེ་པ་ དུར་ནང་ཀ་ཐོང་མ༌ལ། དག་པ་ཀབ་ཉི་ རོག་དུར་ནང་ཀ་ མ་ནུ་ཕ༌ལ། 6རོ་ཀེ་ཚིང་ཚིང་ཆོ་ཁཱན་ སི་མོན་པ་ཏྲུས་ཤེག་ཐཱན་ དུར་ནང་ཀ་ནུ་ཕ༌ལ། ཉི་རོ་ཀི་གོད་པ་ཀབ་ཉི་བུ་ ཁ་ཤ་བ་ལིང་མིན་ཁེ་པ་ དུར་ནང་ཀ་ཐོང་མ༌ལ། 7ཉི་ཡི་ཤུ་ག་དབུ་ཆོམ་ཁཱན་ ཁ་དར་བུ་ ཉ་ག་རང་ཆོ་ཝ༌ལ། དག་པ་ཀབ་ཉི་ ཨོ་ཉ་ཁ་དར་ཁེ་པ་ ཁ་ཤ་བ་ལིང་མིན་ཀབ་ཉི་མང་གི་ཝ་ སོ་སུ་ཨ་ཉི་རང་ ཏབ་ཉི་ཐ་ཝ་ཆོ་ཝ༌ལ། 8ཇུ་ཀ་དག་པ་ཀབ་ཉི་ དུར་ག་གོ་མ་ཤེག་ཁཱན་ ཨོམ་ཐུར་སློ་མ་བུ་ དུར་ནང་ཀ་དི་ཝ༌ལ། ཉི་རོ་ཀི་ཐོང་མ་ཀབ་ཉི་ དད་པ་ཨ་ཝ༌ལ། 9ཨོ་ཉེ་རང་གི་ནེ་བུ་ ཡི་ཤུ་ཤོ་གཤགས་པ་གེ་ ལོག་ཉི་བཞེངས་པེ་ཁེ་ལེ་དག་ཉི་ གསུང་རབ་གེ་ཤོ་ཁཱན་ཁེ་པ་ རོག་ཉིག་ཙིང་གི་ ཧ་མ་གོ་ཝ༌ལ། 10ཉི་གེ་ སློ་མ་ཉིག་ཙིང་ལོག་ཉི་རང་ ཕའི་ག་ཏཱན་དི་ཝ༌ལ༎
ཡི་ཤུ་གི་ མ་རི་ཡམ་མག༌ད༌ལི༌ནི༌ག་ མཇལ༌ཁ་གནང༌མ༌ལ།
11དག་པ་ཀབ་ཉི་ མ་རི་ཡམ་ དུར་ག་ཕིས་ཀ་ཐིང་ཉི་ གེ་ཕ༌ལ། ཉི་རོག་གེབ་ཅ་ཨ་ཉི་ དོང་ཀུར་ཐཱན་ དུར་ནང་ཀ་ཏཱན་གོད་པ་ཀབ་ཉི་ 12བ་ལིང་མིན་ཨ་ཝ་ཡེ་ཁཱན་ ཞིང་ཁམས་ག་འཐེན་པ་ཉིག་ཙིང་ ཡི་ཤུ་ག་སྐུ་ཕུང་ཐ་ས་བཱརང་ཀ་ བཞུགས་པ་ཅ་གི་ཝ༌ལ། ཉི་ཐུར་ཤོ་ དབུ་ལོ་ཀེ་དང་ ཐུར་ཤོ་ཞབས་ལོ་ཀེ་ བཞུགས་པ་ཅ་གི་ཝ༌ལ། 13མེ་ཝག་ཙ་ ནཱན་ཧང་ཨ་ཉི་གེབ་ཅ་ཡ་དག་ཉི་ རོག་ཉིག་ཙིང་གི་ རོ་ཀ་ཇི་མ་ཀབ་ཉི་ རོ་ཀི་ཞུ་ཝ་ལ་ རོག་ཏེ་བ་ཀི་ ཇ་ག་གཙོ་བོ་བུ་ཝ༌ལ། ཉི་རོག་ཏེ་བ་ཀི་ རོག་ཨོ་ག་ཐ་ཝ་ཅ་གི་ལ་སྨོ་ ཇི་གི་མ་སེ་ལ་དག༌ཉི།
14ཨོ་ཐེན་ཞུན་ཐཱན་ ཚིང་ཏ་གིར་པ་ཀབ་ཉི་ ཡི་ཤུ་ཨོ་ཉ་ག་ཐིང་ཉི་ བཞུགས་པ་ཅ་གི་ཝ༌ལ། དག་པ་ཀབ་ཉི་ ཨོ་ཉ་ཐིང་ཁཱན་ཁེ་པ་ ཡི་ཤུ་གི་ཝ་ལ་དག་ཉི་ རོ་ཀི་གུམ་མ་ཡེ་ཝ༌ལ། 15ཉི་ཡི་ཤུ་གི་རོ་ཀ་ ཨུ་ས་ ནཱན་ཧང་ཨ་ཉི་གེབ་ཅ་ཡ། ཉི་ནཱན་གི་ ཨི་བི་ལམ་ཅ་ཡ་དག་ཉི་ གསུངས་མ༌ལ།
དག་པ་ཀབ་ཉི་ མ་རི་ཡམ་གི་ རོག་ལྡུམ་ར་པ་ད་བུ་ཐོང་ཉི་ཞུ་ཝ་ལ་ སློབ་དཔོན་ ནཱན་གི་ རོག་བསྣམས་པ་ཆོ་ནེ་ལ་ རོག་ཨོ་ག་ཐ་ཝ་ཅ་གི་ལ་སྨོ་ ཇ་ག་གསུངས་ཉི་གནང་ཤོ་ ཉི་ཇི་གི་རོག་ ཉ་གེ་བུ་ལེ་དག༌ཉི།
16ཉི་ཡི་ཤུ་གི་རོ་ཀ་ མ་རི་ཡམ་དག་ཉི་ གསུངས་མ་ཀབ་ཉི་ རོག་ཡི་ཤུ་ག་ལོ་ཀ་ཏཱན་གིར་ཐཱན་ ཧི་བུརུ་ག་ལོ་གེ་ རབ་བོ་ནི་དག་ཉི་ཞུ་ཝ༌ལ། (ཨོ་ཉ་དེན་ཐ་ཤོ་ སློབ་དཔོན་དག་པ་གི་ཝ༌ལ།)
17ཡི་ཤུ་གི་ རོ་ཀ་གསུངས་མ་ལ་ ནཱན་གི་ཇང་མ་ཙུང༌ཤོ། ཧང་ཡ་དག་ནེ་ལ་ ཇང་ཨ་པ་ག་སྐུན་མདུན་ག་ཏཱན་ ཨོ་མ་བུ་ ལོག་ཉི་མ་དི་ཝ༌ཅ། དག་པ་ཀབ་ཉི་ ཇ་ག་ཀོ་ཏ་བ་ཆོ་ས་ག་དིན་ཐཱན་ རོག་ཏེ་བ་ཀ་ཡེག༌ཅོ། ཇང་ལོག་ཉི་རང་ ཇ་ག་ཡབ་དང་ ན་ཧ་ཡབ་ ཉི་ཇ་ག་དཀོན་མཆོག་དང་ ན་ཧ་དཀོན་མཆོག་ག་ སྐུན་མདུན་ག་ཏཱན་ དི་ན་དག༌ཉི།
18ཉི་མ་རི་ཡམ་མག་ད་ལི་ནི་དིན་ཐཱན་ སློ་མ་བ་ཀ་ཡེག་པ༌ལ། ཇི་གི་གཙོ་བོ་མཇལ༌བ། ཉི་ཨོ་ཐ་བ་ ཐམས་ཅན་རང་ གཙོ་བོ་གི་ རོ་ཀ་གསུངས་མ་གི་ལ་དག་ཉི་ རོ་ཀི་རོག་ཏེ་བ་ཀ་ ཡེག་པ༌ལ༎
ཡི་ཤུ་གི་ རོ༌ཀ་སློ༌མ༌བ༌ཀ་ མཇལ༌ཁ་གནང་མ༌ལ།
19ཨོ་ཉ་ངེ་རི་ གཟའ་ད་ཝ་ག་ནོང་ཀ་ ཡ་ཧུ་དི་པ་འགོ་དཔོན་བ་ཀེ་ ཡོང་ཁེ་ཝ་ཨ་དེན་གེ་ སློ་མ་བ་ ཀོ་དམ་ཐཱན་ཛོ་མེ་གང་ཀ་ ཡི་ཤུ་བྱོན་ཐཱན་ རོག་ཏེ་བ་ཀ་པོང་ཀ་ ཐིང་ཉི་བཞུགས་པ༌ལ། ཉི་རོ་ཀི་གསུངས་མ་ལ་ ན་ཧ་བ་སྐྱིད་པུ་ཨུན་ཆེན་དག༌ཉི། 20རོ་ཀི་ཨོ་ཐེན་གསུངས་ཐཱན་ རོ་ཀ་ཕྱག་དང་ཐར་ཁང་ རོག་ཏེ་བ་ཀ་གེན་ཉི་ གནང་མ༌ལ། ཉི་སློ་མ་བ་ཀི་ གཙོ་བོ་མཇལ་བ་ཀབ་ཉི་ རོག་ཏེ་བ་ གནམ་མེད་ས་མེད་ ཤོ་ནང་ཕེ་ཝ༌ལ། 21ཉི་ཨོམ་ཆང་རང་ ཡི་ཤུ་གི་གསུངས་མ་ལ་ ན་ཧ་བ་སྐྱིད་པུ་ཨུན་ཆེན། ཉི་ཡབ་གི་ ཇང་ཀུན་ཏི་ཝ་པུརུས་ཀིན་ཨ་ཉི་ ཇི་གི་ན་ཧ་བ་བུ་ ཀུན་ཏིན་ཅ་དག༌ཉི། 22ཨོ་ཐེན་གསུངས་ཐཱན་ རོ་ཀི་ རོག་ཏེ་བ་ཀ་ཐུང་ཀ་ ཤོང་མུ་ཉི་གནང་ཐཱན་ གསུངས་མ་ལ་ དམ་པའི་ཐུགས་ཉིད་ཞུའི། 23ན་ཤི་ཨི་བི་ག་སྡིག་པ་ བཀའ་དྲིན་བསྐྱང་མ་ཐུར་ རོག་ཏེ་བ་ཀ་སྡིག་པ་ བཀའ་དྲིན་བསྐྱང༌མེ། ཉི་ན་ཤི་བཀའ་དྲིན་མ་བསྐྱང་ནེ་ལ་ རོག་ཏེ་བ་ བཀའ་དྲིན་མ་བསྐྱང་མ་དག༌ཉི༎
ཡི་ཤུ་གི་ ཐོ་མ་ག་ མཇལ་ཁ་གནང་མ༌ལ།
24ཉི་ཨོམ་ རོག་ཏེ་སོང་ཉིག་ཙིང་ག་པོང་ཀེ་ ཙེ་མ་དག་ཉི་ར་ཁཱན་ ཐོ་མ་ཁེ་པ་ ཡི་ཤུ་བྱོན་མེ་གང་ཀ་ བཱརའ་སློ་མ་བ་ཀབ་ཉི་ མ་ཝ་ཆོ་ཝ༌ལ། 25ཨོ་ཉི་ཨ་དེན་གེ་ བཱརའ་སློ་མ་བ་ཀི་ རོ་ཀ་ཡེག་པ་ལ་ ཨ་ཤི་གཙོ་བོ་མཇལ་བ་དག༌ཉི།
དག་པ་ཀབ་ཉི་ རོ་ཀི་རོག་ཏེ་བ་ཀ་ ཡེག་པ་ལ་ ཇི་གི་ རོ་ཀ་ཕྱག་ཀ་ཅང་ཟེར་ག་པར་ མ་ཐོང་མ་སག་པུ་དང་ ཅང་ཟེར་བ་ནུབ་ས་ག་ ཇ་ག་ག་དང་བུརུ་མ་ མ་ཙུག་པ་སག་པུ་ ཉི་རོ་ཀ་ཐར་ཁང་ག་ ཇ་ག་ག་དང་མ་ཀེ་བ་སག་པུ་ ཇི་གི་དད་པ་མ་ཨ་ལ་དག༌ཉི།
26ཉི་ཧབ་ཏང་ཐུར་ག་ཚི་ངེ་ ཨོམ་ཆང་རང་ ཕའི་ནང་ཀ་ཛོ་མ༌ལ། ཉི་ཐོ་མ་བུ་ རོག་ཏེ་བ་ཀབ་ཉི་ ཅ་གི་ཝ༌ལ། ཀོ་དམ་པ་ཅ་གི་ཝ་ལ་ ཨོ་ཉེ་རང་གི་ནེ་བུ་ ཡི་ཤུ་བྱོན་ཐཱན་ རོག་ཏེ་བ་ཀ་པོང་ཀ་ཐིང་ཉི་ བཞུགས་ཐཱན་གསུངས་མ་ལ་ ན་ཧ་བ་སྐྱིད་པུ་ཨུན་ཆེན་དག༌ཉི། 27ཉི་གེ་རོ་ཀི་ ཐོ་མ་ག་གསུངས་མ་ལ་ ན་ག་ག་དང་བུརུ་མ་ ཨོ་ཐ་ནང་ཀ་ཙུག་ཐཱན་ ཇ་ག་ག་དང་ཉིག་ཙིང་གོད༌ཅོ། ཉི་ཇ་ག་ཐར་ཁང་ག་ ན་ག་ག་དང་ཀེ་ཉི་གོད༌ཅོ། དོགས་པ་སག་པེ་ནོར་ཐཱན་ དད་པ་ཨའི་དག༌ཉི།
28ཉི་ཐོ་མ་གི་ རོ་ཀ་ཞུ་ཝ་ལ་ ཇ་ག་གཙོ་བོ་ ཇ་ག་དཀོན་མཆོག་དག༌ཉི།
29ཉི་ཡི་ཤུ་གི་ རོ་ཀ་གསུངས་མ་ལ་ ནཱན་གི་ཐོང་མ་ཨ་དེན་གེ་ དད་པ་ཨ༌ཝ། དག་པ་ཀབ་ཉི་ མ་ཐོང་ཐཱན་རང་གི་ནེ་བུ་ དད་པ་ཨ་ཁཱན་བ་ཤོ་ བྱིན་རླབས་ཅན་གི་ལ་དག༌ཉི།
30ཉི་ཨོམ་ ཨོ་ཐ་དཔེ་ཆ་ནང་ཀ་ མ་འབྲི་ཁཱན་བཱརའ་ རྫུ་འཕྲུལ་ག་ རྟགས་མཚན་བ་མང་པུ་ཐུར་ ཡི་ཤུ་གི་ རོ་ཀ་སློ་མ་བ་ཀ་གུབ་ཀ་ གེན་ཉི་གནང་མ༌ཅ། 31དག་པ་ཀབ་ཉི་ ཨོ་ཐ་འབྲི་ཁཱན་བ་ཤོ་ ན་ཤི་ཡི་ཤུ་ཁེ་པ་ཁིརིས་ དཀོན་མཆོག་ག་སྲས་ གི་ཝ་ལ་དག་ཉི་ དད་པ་ཨན་ཆེན། ཉི་ན་ཤི་དད་པ་ཨ་ཉི་ རོ་ཀ་མཚན་ག་ཐུང་ཀེ་ཨ་ཉི་ ཚེ་མ་འགྱུར་བརྟན་པ་ ཉོང་ཅེན་དག་པ་གི་གི༌ལ༎
Trenutno odabrano:
ཡུ་ཧན་ན། 20: TNTB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tshangla New Testament
© 2023, The Bible Society of India
all rights reserved