Mark 14
14
1Soðlice þa æfter twam dagen wæren eastren ⁊þa sohten þa heahsacerdes ⁊þa boceres hu hyo hine mid facne namen ⁊ofslogen. 2Þa cwæðen hy næs na on freolsdaige þy læs þas folces gehlyd wurðe. 3and þa se hælend wæs on bethania on symones huse anes hreofelen ⁊þær sæt. Þa com an wif ⁊hæfde hire sealfebox deorewurðe nardes ⁊tobrokene sealfboxe ofer his heafed aget. 4Sume hit unwurdlice forbæren ⁊betweoxe heom sylfen cwæðen. for hwi wæs þises sealfe forspillednyss geworðen. 5þeos sealfe mihte beon geseald to þrem hund panegen ⁊beon þearfen geseald ⁊yrseden agen hy. 6Þa quoth. se hælend. Læted hyo hwi synde ge hire grame. god werc hyo on me worhte. 7Soðlice symble ge hæbbed þearfen mid eow ⁊þanne ge willeð ge magen heom tæle don. me ge symble næbbeð. 8þeos sealde þt hyo hæfde. hyo com to smeriene minne lichame on berigenne. 9Soðlice ich eow segge swa hwær swa þis godspell geboded byo on eallen middenearde byð geboded þt hyo þis on his geminde dyde. 10Ða iudas scarioth þt is wiðersace an of þam twelfen ferde to þam heahsacerden þt he hine heom beleawde. 11Ða hyo þis geherden hyo fageneden ⁊beheton him feoh to syllene ⁊he smaigde hu he hine digelice sealde. 12And þam formen daige azimorum. þa hyo eastren offredon. his leorningcnihtes him saiden hwider wilt þu þt we faren ⁊gegærewian þe þt þu eastren æte. 13Þa sende he twegen of his leorningcnihten ⁊sæden heom. Gað on þas cestre ⁊ginc agen yrnð sum man berende sume wæterflaxan. Folgieð him. 14⁊swa hwider swa he ingað segged þas huses hlaferde. Ure lareow sægð hwær is min gysthus ⁊min gereord. hwær æte ic eastren mid minen leorningcnihten. 15And he inc geswuteleð micele halle geþefte ⁊gegerewiað us þare. 16þa ferden his leorningcnihtes ⁊comen on þare cestre ⁊funden hit eall swa he saigde ⁊gegarewedon þa eastren. 17Soðlice þa æfen com heom twelf mid him. 18sittende ⁊etende sæde se hælend. Soðlice ic eow segge. þt eower an þe mid me æt gesyld me. 19þa ongunnen hio beo dreorige ⁊betwuxe heom cwæðen. cwedst þu eom ic hit. 20Ða sæde he heom. an of eow twelfen me sylð. Se þe his hand on disce mid me dypd. 21Ænd witodlice mannes sune gað swa be hym awriten is. Wa þam men þurh þane þe mannes sune beoð geseald. betere hym wære þt se man akenned nære. 22Heom þa ætende afeng se hælend hlaf ⁊hine bletsiende bræc ⁊sealde heom ⁊þus cwæð. nymed þis is min lichame. 23⁊onfeng calice ⁊gode þances dyde ⁊sealde heom ⁊ealle heon ofdruncen. 24Ða saide he heom þis is min blod þare nywe cyðnissan. þt beoð for manigen agoten. 25Soðlice ic eow segge þt ic henen forð ne drince of þises wingeardes kynne. oððe þanne daig þanne ic hine neowe drince on godes rice. 26Ænd gecweðenen lofe hyo ferdon on elebergene munt. 27Þa quoth se hælend ealle ge beoð geuntreowsede on þisse nihte. for þam þe hit awriten is. ic slea þanne heorde ⁊beoð þa scep todræfde. 28Ac æfter þan þe ic arise ic cume beforen eow. on galilea. 29Þa saide petrus him. þeah þe ealle swician. ne swicige ic þe na. 30Ða cwæð se hælend. Soðlice ic þe segge. þt þu on þisen nihte ær coc twewe cræwe þreowe wiðsæcst min. 31⁊he þæs þe mare spæc ⁊þah me geberige mid þe to sweltene. ne ætsace ic þin ⁊swa hyo cwæðen ealle. 32Ða comen hyo to anen tune þas nama wæs getsemani ⁊he cwæð to his leorningcnihten. Sitteð her oð þt ic me gebidde. 33⁊he nam þa mid him petrum ⁊iacobum ⁊iohannem þa ongan he forhtigen ⁊sarigen. 34⁊sæde heom. Vnrot is min sawle odðe deað gebiddeð her ⁊wakieð. 35Ða he lithwon forðstop. he astrehte hine ofer þa eorðan ⁊gebæd. gyf hit beon mihte. þt he on þare tide fram him gewite. 36⁊þa quoth. he. abba. þt is fader on ure geþeode alle þing þe sende mihtilice afyrre þisne calic fram me. ac na þt ic wille ac þt þu. 37Ða com he ⁊funde hyo slæpende ⁊cwæð to petre. Simon slæpst þu. ne mihtest þu ane tide wacien. 38wacieð ⁊gebiddað þt ge on costnunge ne gan. witodlice se gast is geare. ac þt flæsc is untrum. 39And eft he gebæd þa ylcen spæce. 40⁊þa he hine eft agen bewende. he funde hyo slæpende. heore eagen wæren gehefegede ⁊hyo nyston hwæt hyo him andswereden. 41Þa com he ðriddan siðe ⁊sæde heom slæpeð nu ⁊resteð genoh hit is. time is cumen nu is mannes sune geseald on synfulre hande. 42arised uten gan. nu is gehende se þe me syld. 43him þa þe gyt spræcende com iudas scarioth þt is wiðersaca. an of þam twelfen ⁊mid him mycel manige. mid sweorden ⁊mid sahlen. fram heahsacerden ⁊bokeren ⁊ealdren. 44Soðlice his læwa heom taken sealde ⁊þus cwæð. Swa hwilcne swa ic kysse. se hit ys nymeð ⁊lædeð hine wærlice. 45⁊sone swa he com he genehlacte hine to ⁊cwæð. Lareow; ⁊cyste hine. 46⁊hyo heore hande on hine wurpen ⁊namen hine. 47Soðlice an of þam þe þær embeuten stoden his sweord abræd ⁊slog þas sacerdes þeow ⁊his eare of acarf. 48Ða cwæð se hælend heom andsweriende. Swa swa to anen scæðan ge ferden mid sweorden ⁊treowen me gefon. 49þanne ic daighwamlice mid eow wæs on temple lærende ⁊ge me namen. ac þt þa gewrite syen gefellde. 50Ða forleten his leorning cnihtes ealle hine ⁊flugen. 51Sum gungling him fylgde mid ane scytan bewæfed nacod ⁊hy name hine. 52þt wærpendre þare scete nacod he heom fram fleah. 53⁊hy lædden þanne hælend to þam heahsacerde ænd comen ealle þa sacerdes. ænd bokeres ⁊ealdres. togædere. 54Petrus heom felgede ferren oð þas heahsacerdes cæfertun. and he set mid þam þenum ⁊wermden hine æt þam fyre. 55Ða heahsacerdas sohten ⁊eall geþeaht. tale agen þanne hælend. þt hyo hine to deaðe sealden ⁊hyo ne fundon. 56Manege sæden lease cyðnyssen agen hine ⁊þa cyðnisse næren þaslice. 57Ða arise sume ⁊saigden lease cydnysse agen hine ⁊þus cwæðen. 58Sodes we gehyrden hine seggen ic toweorpe þis handworhte temple ⁊æfter þrem dagen ic oðer unhandworht getimbrige. 59⁊heore cydnysse næs þasgelic. 60Ða aras sum heahsacerd on heora midlene ⁊acxode þanne hælend. Ne andswerest þu nan þing agen þt þas þe onweorped. 61he swegede ⁊naht ne andswerede. Eft hine axode se heahsacerd. Ert þu crist. Þas gebletsedes godes sune. 62Þa sæde se hælend ic eom ⁊ge geseoð mannes sune on swiðren healfe sitten. his maignes ⁊cumende mid heofenes genipen. 63Ða cwæð se heahsacerd his reaf slytende. hwi wilnige we gyt cyðera. 64ge geherden his bismer. hwæt þincð eow. Ða hyrden hyo ealle hine ⁊cwæðen. þt he wære deaðes scyldig. 65Ænd sume agunnen hym on spæten ⁊oferwreon his ansiene ⁊mid festen hine beaten ⁊him to cwæðen. Ared ⁊þa þenas hine mid handen beoten. 66⁊þa petrus wæs on cæfertune þa com to him an þinen þas heahsacerdes. 67⁊þa hye geseah petrum wermende þa cwæð hy. Þu wære mid þam nazareiscen hælende. 68Ða ætsoc he ⁊cwæð. Ic nat ne ic kan hwæt þu saigst ⁊he eode þa of þam cæfertune ⁊se coc creow. 69Eft þa hine cneow oðer þinen ⁊hyo ongan cweðen to þam þe þær abuten stoden. Soðlice þes is of þam. 70⁊he eft ætsoc. Ænd eft þa embe litel þa þe eft stoden cwæðen to petre. Soðlice þu ert of þam galileisc þu ert. 71Ða ætgan he ofsacan ⁊swerien. soðes ne can ic þanne man þe ge seggeð. 72⁊þa eft sone creow se coc. Ða gemunde petrus þas hælendes word þe he him saide. ær se coc creowe twige. þrewe þu me ætsæcst. þa ongan he wepen.
Trenutno odabrano:
Mark 14: ASxG
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The Four Gospels in AngloSaxon (Old English) were translated from Latin by Abbot Ælfric of Eynsham, probably some time within the period 990 – 1010.