Vèsè popilè nan Bib la ki soti nan Mateo 5

Pataje

In caniꞌ chique winak mta jutij xtiquetzij ta jun candil xtiquijupbaꞌ ta cꞌa jun caxon trij. Ja nqueban, nquetzij ja candil in nquijecbaꞌ utzcꞌa ja winak ja recꞌo pa jay pa sak neqꞌuejeꞌ wiꞌ canojelal. In quirtacꞌariꞌ nuban ja luz ja cꞌo pa tak ewanma ixix chakajaꞌ, tisakirsaj quebey ja winak chiquewach utzcꞌa ja winak tok nquetzꞌat ja rutzil neban, ejeꞌeꞌ xtiqueyaꞌ ta rukꞌij ja Tatixel ewxin ja cꞌo chilaꞌ chicaj.

Ja rixix ix caniꞌ luz, nesakirsaj quebey ja winak chiquewach waweꞌ chwachꞌulew. Caniꞌ tre jun tinamit parwiꞌ jayuꞌ cꞌo wiꞌ mta moda ja maquita ntzꞌattaji.

Congana quiꞌil chique ja winak ja chꞌajchꞌoj canma, congana quiꞌil chique como ejeꞌeꞌ nequitzꞌataꞌ na cꞌa rwach ariꞌ ja Dios.

Congana quiꞌil chique ja winak ja congana nquiyarij nquetzuk ja canma tre ja rutzil xin Dios, congana quiꞌil chique como ja rutzil nquiyarij jariꞌ xtinoj na pa tak canma.

Pro ja ranin nbij chewe, queꞌewajoꞌ ja recꞌulel, ja tok ecꞌoli nebin itzel tak tzij chewe ja cꞌa rixix solo utzlaj tak tzij tebij chique, ja tok ecꞌoli ja xa itzel nixquetzꞌat ja cꞌa rixix solo utzil tebanaꞌ chique, ja tok ecꞌoli nixtzꞌujuwi nixyokꞌowi owi nqueban pokon chewe ja cꞌa rixix tebanaꞌ orar pa quicuenta.

—Congana quiꞌil chique ja winak ja chꞌobtajnak cumal chi ni ncꞌatzin wiꞌ ja rEspíritu Santo chique chi nqꞌuejeꞌ pa tak canma, congana quiꞌil chique como quixin cꞌariꞌ ja gobierno xin chilaꞌ chicaj.

Congana quiꞌil chique ja winak ja nechomin quixin winak, nquechup rwach sícꞌ chꞌaꞌoj, congana quiꞌil chique como ejeꞌeꞌ xqueꞌotakixi chi e ralcꞌwal Dios.

Congana quiꞌil chique ja winak ja netajini neꞌokꞌi in nebisoni, congana quiꞌil chique como nyukbax cꞌa quecꞌuꞌx ariꞌ.

Congana quiꞌil chique ja winak ja nba̱n itzel chique rumac ja rutzil xin Dios nqueban, congana quiꞌil chique como quixin cꞌariꞌ ja gobierno xin chilaꞌ chicaj.

Congana quiꞌil chique ja winak ja nepokonan quewach cach tak winak, congana quiꞌil chique como ejeꞌeꞌ npokonax cꞌa quewach ariꞌ chakajaꞌ.

Congana quiꞌil chewe ja tok nixtzꞌuji nixyokꞌi in tok nba̱n itzel chewe in tok nojel rwach ja ritzelal nbix chewe ja ma katzij ta pro mwal anin tok nba̱n queriꞌ chewe. Ja tok queriꞌ nqueban chewe quixquicoti pro congana quixquicoti como jariꞌ cꞌo jun nimlaj rtojbalil ja nyataj na chewe chilaꞌ chicaj. Quixquicoti como queriꞌ ban chique ja rojer tak profeta chakajaꞌ ban itzel chique.

Congana quiꞌil chique ja winak tok cꞌoli nquewil chipan ja quicꞌaslemal in ejeꞌeꞌ ni pa rukꞌaꞌ Dios wiꞌ nquejach wiꞌ, congana quiꞌil chique como chique nyataj wiꞌ jun herencia. Ja herencia ja nyataj chique jariꞌ ja rwachꞌulew.

Ja rixix ix caniꞌ atzꞌam, neban quiꞌ tre ja quicꞌaslemal ja winak caniꞌ nuban ja ratzꞌam ja nbano quiꞌ tre ja nkatiꞌ. Pro ja ratzꞌam wi xtiyojtaji wi mchita rtzayil ¿nak cꞌa nchomarsbex chic rxin ariꞌ? Ja wi queriꞌ nuban jariꞌ mchita noc wiꞌ, xa nchꞌakixel in npa̱kꞌ chakan cumal winak.

Rmalcꞌariꞌ nbij chewe, caniꞌ rbanon ja Tatixel ewxin ja cꞌo chilaꞌ chicaj ni majun falta tre ja rajoben riꞌil cꞌo tre queriꞌ cꞌa chewe ixix chakajaꞌ rjawaxic chi ni majun falta tre ja rajoben riꞌil cꞌo chewe.

Ja tok wi cꞌo jeꞌe nebij ni tebij rubiꞌ, wi can, can quixcheꞌe, nowi ma can ta, ma can ta quixcheꞌe. Ja cꞌa wi cꞌo juleꞌ chic tzij nebij ja wi ma ja tariꞌ ja can owi ma can ta jariꞌ juleꞌ tzij xa ruqꞌuin diablo penak wiꞌ.

In jun chic ecꞌwaxan ja bitajnak can ojer chi: —Ja wi cꞌo jun xayoj jun rwach queriꞌ nba̱n chawe atat chakajaꞌ, nba̱n rcꞌaxel chawe, nyo̱j jun awach owi cꞌo jun xawasaj jun rey queriꞌ nba̱n chawe atat chakajaꞌ, nba̱n rcꞌaxel chawe, nwasax jun awey. Queriꞌ ja bitajnak can. Pro ja ranin nbij chewe, ma teyaꞌ ta rjil rcꞌaxel chique ja nebanowi ja ritzelal chewe. Ja neban, wi cꞌo jun xuyaꞌ jun kꞌaꞌ xewey teyaꞌaꞌ lugar tre chi nuyaꞌ chic jun chajuparaj.

Ja cꞌa panewach ja cꞌo pan ewiquikꞌaꞌ wi xa rmal tok nixkaj chipan il mac mejor, tecꞌotoꞌel in techꞌakijel. Queriꞌ nbij chewe como más na utz netzꞌilaꞌ jun panewach chwach ja nbe ja recuerpo chi jun pa kꞌakꞌ. In ja rekꞌaꞌ ja rewiquikꞌaꞌ wi xa rmal tok nixkaj chipan il mac mejor, tekupijel in techꞌakijel chakajaꞌ como más na utz netzꞌilaꞌ jun ekꞌaꞌ chwach ja nbe ja recuerpo chi jun pa kꞌakꞌ.