Matiw 2
2
M'ee mhi'man mwopp tong koghob Puus'kaa ja diy
1Bwoonrooh mwopp l'aa Jesu Baitalami w'u dhighin yill Yahudiya, yiiy bh'aar khi Miskakhamm Hiridus, bhi m'ee mhi'man mwopp tong pwenn koghob Puus'kaa ja Urshalima. 2Mwopp nang le, “L'aa w'u mwopp l'aa shi seh a nihyeh, w'u a Miskakhamm khi Zhepp Yahuda? P'ee mu naah dhaghar khinyi pwenn koghob Puus'kaa, bhi mu ja tihh mu soyill diy nyi.”
3Kaarooh Miskakhamm Hiridus klihng bii mihhseh, bhi kihr nyi yakhal pwetd kihhsheh kihh mhi mwooh khishikhitt Urshalima kihhdihng'dihng. 4Kaarooh Hiridus peet k'ang mhi prist wu'nan mwopp weett kihh Mhikamm-w'aar mwopp zag, bhi nang pee w'u mwopp p'ee l'aa Kristi diy phi mwopp. 5Bhi mwopp lapp nyi le, “A Baitalami w'u yill Yahudiya, p'ee a bii w'u gu'wanggshiiy gyet ran seh le,
6“ ‘Wu'yi Baitalami yill Yahuda,
baah a yi a w'u kat yangg-yangg dhighin Dazkakhamm khi Yahuda mou;
p'ee m'ee miskakhamm p'ee yakhal a dhighin yi,
Miskakhamm w'u p'ee dhen a gutapp gurum keena Isra'ila mwopp.’ ” #2:6 Mikah 5:2
7A nyi seh bhi Hiridus peet mhi'man ni mwopp dhakhatt, bhi nangshiiy gonggpee w'u dhaghar ni l'ang diy mwoorr phi mwopp. 8Shenn mwopp lhidum Baitalami, satt mwopp le, “Dum wu lyap pee w'u l'aa mihhseh ni diy nett-nett. Mihh wu kad nyi, bhi abet wu ji wu yakshiiy a'n, tihh wu'an zag ih dum ih soyill diy nyi.”
9Kaarooh mwopp klihng bii w'u miskakhamm ni satt runn, bhi mwopp y'aa arr, bhi dhaghar w'u deh mwopp naah pwenn koghob Puus'kaa seh lang'arr kihh mwopp, harr dum dharr kihrr kaah luh w'u l'aa ni diy. 10Kaarooh mwopp naah dhaghar ni, bhi rettyit mwopp pwetd. 11Kaarooh mwopp ja dhel dhighin luh ni, bhi mwopp kad l'aa ni kihhsheh kihh nhikhin khinyi Maryamu nhighin, bhi mwopp chaat yill, mwopp soyill l'aa ni. Bhi mwopp wangg kwachi shaghal keeru, mwopp pihh zhukhum mhi zinarya, kihh loohteghez w'u a frankinsens kihh rooh mwopp kihh peet mirh l'aa ni. 12Dhangg kaarooh m'ee gu'lop khi Naan satt kihhkangg mwopp dhighin shu'khun le tapp nw'aa diy baa'dum kihpee Hiridus diy mou, bhi mwopp mett arr m'ee pee wu'dyikk, mwopp ba duam yill keeru.
Mwopp sh'u dum kihh Jesu yill Masar
13Kaarooh mhi'man ni mwopp dhel, bhi m'ee gu'lop khi Naan dyingg shin Yusufu dhighin shu'khun, satt nyi le, “Yakhal, ghi m'ang l'aa ni kihh nhikhin khinyi ghi dhel kihh mwopp wu dum yill Masar. Wu tong nhighin harr p'ar w'u ih satt diy gha dhangg, p'ee Hiridus kihh t'ang lyap l'aa ni p'ee t'u.” 14A nyi seh bhi Yusufu teer m'ang l'aa ni kihh nhikhin khinyi y'aa arr Masar kihh mwopp. 15Tong nhighin Masar harr bwoon muutt khi Hiridus dhangg. A kihhsheh bhi pwoo w'u gyet Naan satt sh'i pwoo khi m'ee gu'wanggshiiy gam; pwoo w'u satt le, “Ih peet em na lhiput yill Masar.”#2:15 Hos 11:1
16Dhangg kaarooh Hiridus naah kad Mhi'man ni mwopp zhwam riy, bhi tukhup nyi shaan pwetd. A nyi seh bhi gab'waar tihh mwopp twa kapp zhepp wu'daass w'u Baitalami kihh mwooh kapp kwangpee w'u koghob Baitalami ni; zhepp w'u yiiy khimwopp wull vel baa'sam, chiitt kihh yiiy w'u gyet klihng pwoo mihhseh ni diy phi Mhi'man ni mwopp. 17Bhi bii w'u gyet Naan satt sh'i pwoo khi Irmiya gu'wanggshiiy gam, w'u satt le,
18“Mwopp klihng m'ee dhekheh Rama,
wuuh-wuuh kihh wallmaab,
Rahila kaah wuuh-wuuh kopp zhepp rah,
baah dh'om rooh mwopp dwakk rah mou,
p'ee zhepp khinyi mwopp wonn.”#2:18 Irmiya 31:15
Mwopp b'aa ji kihh Jesu Nazaret
19Bwoonrooh Miskakhamm Hiridus m'uut, bhi m'ee gu'lop khi Naan dyingg shin Yusufu dhighin shu'khun nhighin yill Masar. 20Gu'lop ni satt nyi le, “Yakhal, m'ang l'aa ni kihh nhikhin khinyi wu wak wu duam yill Isra'ila, p'ee mwooh gyet phi dyap seen l'aa ni p'ee t'u baa mwopp mwarrap.” 21A nyi seh bhi Yusufu yakhal m'ang l'aa ni kihh nhikhin khinyi, mwopp wak duam yill Isra'ila. 22Dhangg kaarooh Yusufu klihng rooh a Akilawus so-miskakhamm gaar'yill Yahudiya kopp kumm pukhun Hiridus, bhi lukhut t'u nyi. Kaarooh Naan shep satt kihhkangg Yusufu dhighin shu'khun, bhi dhel dum gaar'yill Galili. 23Dum tong m'ee tughuzyill w'u mwopp kihh peet Nazaret. A kihhsheh bhi bii w'u gyet Naan satt sh'i pwoo khi mhi-wanggshiiy mwopp gam; pwoo w'u kihh satt le, “Mwopp p'ee p'ar peet nyi a Gu-Nazaret.#Mar 1:24; Luk 2:39; Yoh 1:45”
Chwazi Kounye ya:
Matiw 2: Chakfem
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©️2022 Luke Initiative for Scripture Translation