Matiw 3
3
Yohanna Gu-Baptisma dhakk arr ji khi Jesu
(Mar 1:1-8; Luk 3:1-18; Yoh 1:19-28)
1Dhighin shiiy'teer mhizeh ni mwopp, bhi Yohanna Gu-Baptisma ji y'aa satt pwooNaan dhighin dh'em, yill Yahudiya. 2Kihh le, “Wu tu'wapp, p'ee dhenglong khi Naan wull kuss.” 3A a'n a gwooh Ishaya gu'wanggshiiy kadpwoo kaah le,
“Dhekheh m'ee gurum kihh peetpee dhighin dh'em le,
‘Wu dhakk arr Daah Naan,
Wu zan arr ni lhidum fyaatd!’ ”#3:3 Ishaya 40:3
4Gyet Yohanna ni kihh rwan a looh w'u mwopp raah sh'i shoop brihngg'tukhus, yakhal kihh bwakhat zaall shi'm bwoonn niy. Kihh so a shebhell yakhal kihh mwak a mwoon w'u mwopp shwat dh'em tong diy. 5Gurum mwopp mwan pwat Urshalima, kihh yill Yahudiya kihhdihng, kihh gaar'yill w'u koghob Dungg Urdu weett mwopp duam kihpee nyi diy. 6Mwopp kihh lapp'iih shigbis keeru, bhi kihh sh'in baptisma mwopp Kihgoon Urdu.
7Kaarooh naah Farisiiy mwopp kihh Sadusiiy mwopp kihh ja nhighin pee w'u nyi diy sh'in baptisma, bhi satt mwopp le, “Zhepp khi zom wu'bis! A wuyeh shep satt kihhkangg wunn tihh wu shwa diy kihh tukhupdyeell khi Naan w'u kihh ji ayeh? 8Pee'mhinyi bhi wu sh'in dhakk'wurett w'u tihh kamm diy le tu'wapp keewu ni a zeenn. 9Tapp wu kihh ryeeh seh wu le, ‘Ai munn kihh Ibrahim a puup mu’. Ih kihh satt nah wunn, Naan kihh mak shikhir kihh pangg mhize tihh mwopp buakhar zhepp khi Ibrahim diy.#Yoh 8:33 10Kooh mwasseh kihhshe maah, bhi baa seb a sh'i kug sheep ni mwopp. Pee'mhinyi, bhi kooh a sheep wu'rangg w'u baah la zhepp wu'rett mou, bhi mwopp p'ee eep nyi ming dhighin wus.
11“Wu'an phi sh'in baptisma wunn a sh'i a'm p'ee tu'wapp. Dhangg bwoon ji m'aan bhi m'ee gwooh mett wu'an kudyi p'ee ji; m'ee gwooh wu'an ih mak dheeh kromm w'u pee kok kwaghashag khinyi maah mou. A nyi p'ee sh'in baptisma wunn sh'i Riin Wu'bhangg, kihh wus zag. 12Nyi kihh kihhtut keeniy nyakk sarr niy tihh f'ii laapp keeniy diy bhangg-bhangg, yakhal tihh shwan y'ee dhebhenn keeniy diy looh dyaarr, bhi shaan flipp ni mwopp sh'i wus w'u kihh p'in pid mou.”
Yohanna sh'in baptisma Jesu
(Mar 1:9-11; Luk 3:21-22)
13Jesu tong Galili sam phi Kihgoon Urdu kihpee Yohanna diy tihh Yohanna sh'in baptisma diy nyi. 14Dhangg Yohanna kihh t'ang d'aam nyi, satt le, “Wu'an sh'i kaah nah ih kihh t'ang tihh a gha ghi sh'in baptisma a'n, dhangg waa a gha ghi ji kihpee na tihh ghi lapp baptisma diy -ng?”
15Jesu pring nyi satt le, “Yet tihh bii mihhse dhen kihhsheh, p'ee rett tihh mu gam kapp dhakk-shigrett.” Bhi Yohanna g'ung dh'om sh'in baptisma dhak nyi.
16Kaarooh Yohanna sh'in baptisma Jesu, bhi Jesu put dhighin a'm ni k'aa phi'kihng. Abet bhi dhengNaan wangg, bhi Jesu naah Riin khi Naan kihh tong sam kaa duu'duu se, sam l'ang kaah niy. 17Bhi m'ee dhekheh tong put kih dhengNaan satt le, “Mihhse a L'aa keena w'u a Phikrihpp nah; ih klihngshangg kihh nyi pwetd.”
Chwazi Kounye ya:
Matiw 3: Chakfem
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©️2022 Luke Initiative for Scripture Translation