Iok-hān Hok-im 1

Tō Chiâⁿ-chòe Lâng

1Chhòng-sè í-chêng chiū ū Tō, Tō kap Siōng-tè tông-chāi, Tō sī Siōng-tè. 2I tī chhòng-sè í-chêng chiū kap Siōng-tè tông-chāi. 3Siōng-tè thong-kè I chhòng-chō bān-iú; it-chhè pī-chō ê ta̍k-hāng lóng sī thong-kè Tō lâi chhòng-chō. 4Tī I lāi-bīn ū oa̍h-miā; chit-ê oa̍h-miā sī jîn-lūi ê kng. 5Chit-ê kng tī o͘-àm tiong teh chiò, o͘-àm m̄-bat iâⁿ-kè kng.#1.5 “o͘-àm m̄-bat iâⁿ-kè kng” mā thang e̍k-chòe “o͘-àm m̄ chiap-la̍p kng”.

6Ū Siōng-tè chhe--lâi ê chi̍t ê lâng, miâ kiò-chòe Iok-hān. 7Chit-ê lâng lâi sī beh choh-chèng, ūi-tio̍h kng choh-chèng, beh hō͘ só͘-ū ê lâng thong-kè i lâi sìn. 8I pún-sin m̄-sī hit-ê kng, sī beh ūi-tio̍h hit-ê kng choh-chèng. 9Ū chin ê kng chìn-ji̍p sè-kan lâi chiò choân jîn-lūi.#1.9 Chit-chat mā thang e̍k-chòe “Teh chiò choân jîn-lūi ê chin kng lâi kàu sè-kan.”

10I tī sè-kan; sè-kan thong-kè I lâi chhòng-chō, m̄-kú sè-kan m̄ bat I. 11I lâi kàu ka-kī ê só͘-chāi, ka-kī ê lâng bô chiap-la̍p I. 12Hiah-ê chiap-la̍p I--ê, chiū-sī sìn I ê lâng, I sù in ū koân chiâⁿ-chòe Siōng-tè ê kiáⁿ-jî. 13In m̄-sī tùi hiat-thóng, m̄-sī tùi jio̍k-io̍k, mā m̄-sī tùi ta-po͘-lâng ê ì-liām, sī tùi Siōng-tè siⁿ--ê.

14Tō chiâⁿ-chòe lâng, tiàm tī lán tiong-kan, chhiong-móa un-tián kap chin-lí; goán ū khòaⁿ-kìⁿ I ê êng-iāu, sī Thiⁿ-pē to̍k-it ê Kiáⁿ chiah ū ê êng-iāu.

15 Iok-hān ūi-tio̍h I choh-chèng, hoah kóng, “Chit-ūi chiū-sī góa bat kā lín kóng--ê, I tī góa āu-bīn teh lâi, khiok pí góa khah tōa; in-ūi góa iáu-bē chhut-sì, I chiū chûn-chāi.”

16Tùi I ê hong-hù lán lóng niá-siū un-tián, un-siōng-ka-un. 17Lu̍t-hoat thong-kè Mô͘-se pan-pò͘; un-tián kap chin-lí sī thong-kè Iâ-so͘ Ki-tok lâi--ê. 18Bô lâng bat khòaⁿ-kìⁿ Siōng-tè, chí-ū Pē sim-hoâi tiong to̍k-it ê Kiáⁿ ū kā I hián-sī--chhut-lâi.

Si-sóe-chiá Iok-hān ê Kiàn-chèng

(Thài 3.1-12; Khó 1.1-8; Lō͘ 3.1-18)

19Í-hā sī Iok-hān ê kiàn-chèng: Iâ-lō͘-sat-léng ê Iû-thài-kàu tong-kio̍k phài chè-si kap Lī-bī-lâng khì mn̄g Iok-hān ê sî, kóng, “Lí sī sím-mi̍h-lâng?” 20I bô kū-choa̍t hôe-tap, kong-khai seng-bêng “Góa m̄-sī Ki-tok”.

21In koh mn̄g i, “Nā án-ni, lí sī Í-lī-a sī--bô?” Iok-hān ìn kóng, “Góa m̄-sī.”

In koh mn̄g, “Lí sī hit-ūi Sian-ti sī--bô?” Iok-hān ìn kóng, “M̄-sī.”

22In chiū kā i kóng, “Án-ni lí sī sím-mi̍h-lâng? Chhiáⁿ kā goán kóng, hō͘ goán thang hôe-tap phài goán lâi ê lâng. Lí kóng, tàu-tóe lí sī sím-mi̍h-lâng?”

23 Iok-hān ín-iōng sian-ti Í-sài-a ê ōe, kóng:

Góa chiū-sī tī khòng-iá teh hoah ê siaⁿ, kóng:

Tio̍h ūi Chú siu-ti̍t tō-lō͘.

24Hiah-ê lâng sī Hoat-lī-sài-phài ê lâng chhe--lâi-ê. 25In koh mn̄g Iok-hān, kóng, “Lí nā m̄-sī Ki-tok, m̄-sī Í-lī-a, mā m̄-sī hit-ūi Sian-ti, lí sī-án-chóaⁿ kā lâng sóe-lé?”

26 Iok-hān ìn kóng, “Góa ēng chúi kā lâng sóe-lé; m̄-kú ū chi̍t ūi lín m̄ bat--ê khiā tī lín tiong-kan. 27I tī góa āu-bīn teh lâi, góa liân kā I tháu ôe-tòa to bōe-kham--tit.”

28Chiah-ê sū tī Iok-tàn-hô tang-hōaⁿ ê Pek-tāi-nî hoat-seng, Iok-tàn-hô chiū-sī Iok-hān teh kā lâng sóe-lé ê só͘-chāi.

Siōng-tè ê Iûⁿ-ko

29Keh-ji̍t, Iok-hān khòaⁿ-tio̍h Iâ-so͘ kiâⁿ óa--lâi, chiū kóng, “Lín khòaⁿ, Siōng-tè ê Iûⁿ-ko, I beh tû-khì sè-kan-lâng ê chōe. 30Koan-hē I ê tāi-chì, góa bat kā lín kóng, I pí góa khah bān lâi, chóng-sī pí góa khah tōa, in-ūi góa iáu-bē chhut-sì, I chiū chûn-chāi. 31Góa ka-kī mā m̄ bat I, m̄-kú góa lâi ēng chúi kā lâng sóe-lé, sī beh hō͘ Í-sek-lia̍t-lâng jīn-bat I.”

32 Iok-hān koh choh-chèng, kóng, “Góa ū khòaⁿ-tio̍h Sèng Sîn chhin-chhiūⁿ hún-chiáu tùi thiⁿ kàng--lo̍h-lâi, hioh tī I téng-bīn. 33Góa ka-kī mā m̄ bat I, m̄-kú chhe góa ēng chúi kā lâng sóe-lé hit-ūi Siōng-tè ū tùi góa kóng, ‘Lí khòaⁿ-tio̍h Sèng Sîn kàng lo̍h-lâi hioh tī I téng-bīn hit-ê, I chiū-sī beh ēng Sèng Sîn kā lâng sóe-lé Hit-ūi.’ 34Góa ū khòaⁿ--tio̍h, koh choh-chèng, chit-ūi chiū-sī Siōng-tè ê Kiáⁿ.”

Iâ-so͘ Ho͘-tiàu Thâu Chi̍t Phoe Bûn-tô͘

35Keh-ji̍t, Iok-hān koh kap i nn̄g ê bûn-tô͘ khiā tī hia; 36i khòaⁿ-tio̍h Iâ-so͘ keng-kè, chiū kóng, “Lín khòaⁿ, Siōng-tè ê Iûⁿ-ko!”

37Chit nn̄g ê bûn-tô͘ thiaⁿ-tio̍h i án-ni kóng, chiū khì tè Iâ-so͘. 38Iâ-so͘ oa̍t--kè-lâi, khòaⁿ-tio̍h in teh tè I, chiū mn̄g in, “Lín teh chhē sím-mi̍h?”

In kā I kóng, “Lia̍p-pí, lí tòa tó-ūi?” Lia̍p-pí ê ì-sù sī lāu-su.

39Iâ-so͘ kā in kóng, “Lín lâi khòaⁿ!” In chiū khì khòaⁿ Iâ-so͘ tòa ê só͘-chāi, hit-ji̍t kap I chòe-hé tòa. Hit-sî tāi-iok ē-po͘ sì tiám.

40Thiaⁿ Iok-hān ê ōe lâi tè Iâ-so͘ hit nn̄g lâng, chi̍t ê sī Se-bûn Pí-tek ê sió-tī An-tek-lia̍t. 41I seng khì chhē i ê hiaⁿ-ko Se-bûn, tùi i kóng, “Goán í-keng ū tú-tio̍h Bí-sài-a.” Bí-sài-a ê ì-sù sī Ki-tok. 42I chiū chhōa Se-bûn khì kìⁿ Iâ-so͘.

Iâ-so͘ chù-ba̍k kā i khòaⁿ, kóng, “Lí sī Iok-hān ê kiáⁿ Se-bûn, góa beh kā lí kiò-chòe Ki-hoat.” Ki-hoat kap Pí-tek siâng ì-sù, chiū-sī chio̍h-pôaⁿ.

Iâ-so͘ Ho͘-tiàu Hui-le̍k kap Ná-tàn-gia̍p

43Keh-ji̍t, Iâ-so͘ koat-tēng beh khì Ka-lī-lī. I tú-tio̍h Hui-le̍k, tùi i kóng, “Lâi tè góa!” 44Hui-le̍k sī Pek-sài-tāi-lâng, An-tek-lia̍t kap Pí-tek ê tông-hiong. 45Hui-le̍k tú-tio̍h Ná-tàn-gia̍p, tùi i kóng, “Mô͘-se tī Lu̍t-hoat-su só͘ siá, í-ki̍p sian-ti só͘ kì-chài Hit-ūi, goán í-keng ū tú--tio̍h, chiū-sī Iok-sek ê kiáⁿ Ná-sat-le̍k-lâng Iâ-so͘.”

46 Ná-tàn-gia̍p ìn kóng, “Ná-sat-le̍k hit-khoán só͘-chāi kiám ōe chhut sím-mi̍h hó-mi̍h?”

Hui-le̍k kā i kóng, “Lí lâi khòaⁿ!”

47Iâ-so͘ khòaⁿ-tio̍h Ná-tàn-gia̍p kiâⁿ óa--lâi, chiū kóng, “Lín khòaⁿ, i sī chin-chiàⁿ ê Í-sek-lia̍t-lâng, lóng bô hu-ké!”

48 Ná-tàn-gia̍p mn̄g Iâ-so͘, “Lí ná ōe bat góa?”

Iâ-so͘ kā i kóng, “Hui-le̍k iáu-bē kiò lí, góa chiū khòaⁿ-tio̍h lí tī hit-châng bû-hoa-kó-chhiū kha.”

49 Ná-tàn-gia̍p ìn kóng, “Lia̍p-pí, lí sī Siōng-tè ê Kiáⁿ! Lí sī Í-sek-lia̍t ê Ông!”

50Iâ-so͘ ìn kóng, “In-ūi góa kā lí kóng góa ū khòaⁿ-tio̍h lí tī hit-châng bû-hoa-kó-chhiū kha, lí chiū sìn o͘h? Lí ōe khòaⁿ-tio̍h pí che koh-khah tōa ê sū.” 51Iâ-so͘ koh kā i kóng, “Góa si̍t-si̍t-chāi-chāi kā lín kóng, lín ōe khòaⁿ-kìⁿ thiⁿ khui, Siōng-tè ê thiⁿ-sài tī Jîn-chú ê sin-chiūⁿ chiūⁿ-lo̍h óng-lâi.”

Chwazi Kounye ya:

Iok-hān Hok-im 1: TTVR

Pati Souliye

Pataje

Kopye

Ou vle gen souliye ou yo sere sou tout aparèy ou yo? Enskri oswa konekte

The Bible Society in Taiwan

Aprann plis bagay sou 現代台語譯本羅馬字版

Iok-hān Hok-im 1

Vèsè popilè nan Bib la ki soti nan
Iok-hān Hok-im 1

Bib:

Chinese, Min Nan

Vèsyon: 現代台語譯本羅馬字版 - TTVR

Iok-hān Hok-im 1

Iok-hān Hok-im 1

Vèsè popilè nan Bib la ki soti nan Iok-hān Hok-im 1

Bib:

Chinese, Min Nan

Vèsyon: 現代台語譯本羅馬字版 - TTVR

Iok-hān Hok-im 1

Vèsè popilè nan Bib la ki soti nan
Iok-hān Hok-im 1