Matayo 2
2
Bhatua magezi̱ ndibha bhai̱ya lami̱a Yesu
1Yesu ndia abhokotiana ka tau̱ni̱ ndia ka Bbetelehemu ka kyalo ndia ka Yu̱deya, bwile Helude ndia abhi̱ sali̱a, Bhamagi̱#2:1 Ka Ku̱gi̱li̱ki̱, Bhamagi̱ bhabhi̱ bhaluku bhatua magezi̱. bhatuka kindia mani aki̱hu̱eli̱aga nibhaki̱ya ka Yelusalemu 2toli̱ nibhakiolu̱li̱a bhiyo; “Sali̱a mindia Bhayu̱daya mindia abhokotiani̱o ali mani? Kintangi̱ tanga-tanga mindia ani̱si̱ bhokotiana ndiaki du̱mbi̱ ni̱ki̱ki̱bi̱ka lami̱aki.” 3Sali̱a Helude ndia aoka ndia bhaluku bhatua magezi̱ bhaonga, ye imamoti̱ na bhakpa bhoponi ndibha ka Yelusalemu nki̱li̱ nakintina. 4Ndia abhueka bhangbekua bhabhembi̱ bhoponi ndibha Mambombi̱ na bhaegesi̱ sa kilagilo ndia Mambombi̱ ampesi̱a Musa, abhuolu̱li̱a kindia Masiya akibhokotiana. 5Nibhaki̱nsi̱ki̱aku̱ bhiyo; “Akibhokotiana ka Bbetelehemu ndia ka Yu̱deya, nanga yoho andu̱lu̱ ndia nabbi̱ ahandika bhiyo;
6‘Bhenu̱ bhakpa ndibha ka Bbetelehemu ka kyalo ndia ka Yu̱da
tau̱ni̱ ndianu̱ andu̱lu̱ tau̱ni̱ nke ka ntu̱la poni ndia ka Yu̱da,
akituka kau̱ sali̱a mindia akibhulema bhakpa ndibhamo Bhaisaleli̱.’#Mi̱ka 5:2”
7Du̱mbi̱ sali̱a Helude nakibhueka bhaluku bhatua magezi̱ bhehe ka si̱dha-si̱dhana sa nsobho nakibhuolu̱li̱a bwile toto ndia tanga-tanga aenikilianaku̱. 8Du̱mbi̱ sali̱a Helude nakibhutika bhaluku bhatua magezi̱ ka Bbetelehemu bhiyo; “Bhu̱ye bhunkabhe bhiani mi̱ki̱ minjo, bhukuntangia, bhunitolie andu̱lu̱ nemi dhe ni̱ye nimulami̱e.”
9Ndia bhaoka ndia sali̱a abhulagilia, nibhaki̱ya toli̱ tanga-tanga mindia bhabha nibhantangi̱ ahu̱wa naki̱bhu̱ya namusa doi̱sa ndia asu̱ngeli̱a ka ndabho kindia mi̱ki̱ abhi̱o. 10Ndia bhantangia tanga-tanga, bhadhedelua si̱ni̱. 11Toli̱ ndia bhagodha ka ndabho, bhantangia mi̱ki̱ nali na amaki Mali̱ya du̱mbi̱ nibhaki̱su̱ku̱mana lami̱aki. Du̱mbi̱ nibhaki̱oku̱dha ku̱nda ndiabho nibhakibhuaku̱ kisembo sa feza na kabbani̱ na mi̱la nibhaki̱mpesi̱a mi̱ki̱. 12Bhasi̱ki̱a kindiabho ka nsi ndiabho nibhakoli̱li̱ ka nesi̱yo ndietolo nanga Mambombi̱ yabhulagi̱li̱ ka ndoti̱ eti bhakalaki̱si̱ki̱a kindia Helude.
Yozefu naki̱mu̱i̱sa Yesu na Mali̱ya ka Mi̱si̱li̱
13Bhaluku bhatua magezi̱ ndia bhasi̱ki̱aku̱, malai̱ka mindia Mambombi̱ nakimuenikiliana Yozefu ka ndoti̱ nakingia bhiyo; “Omu̱i̱se mi̱ki̱ na amaki ka nsi ndia ka Mi̱si̱li̱, bhu̱li̱keku̱ doi̱sa kindie nikukutolilia eti bhu̱si̱ki̱eku̱, nanga Helude ali kaya lagilia bhasilikale ndibhaki kabhaga mi̱ki̱ minjo andu̱lu̱ bhamuole.” 14Yozefu amu̱i̱sa mi̱ki̱ na amaki ka Mi̱si̱li̱ ki̱li̱ya, 15kindia bhali̱ka doi̱sa Helude ndia aku̱wa. Akola yoho tu̱mi̱sa ndia Sali̱a Mambombi̱ ndia aonga kolilia kowa nabbi̱ eti; “Nimueka mi̱ki̱ mindiamo mu̱lu̱ku̱aki tukaki ka Mi̱si̱li̱.”#2:15 Hoseya 11:1.
16Helude ndia ai̱ba eti bhaluku bhatua magezi̱ bhandimagia, nakizigidhiluwa si̱ni̱ toli̱ nakilagilia eti bhabhuole bhani̱ki̱ bhabenje bhalu̱ku̱abho bhoponi ndibha bhakakoli̱ ka mwaka bhali sa kungbeku ka Bbetelehemu na ka kyalo ndia ali bi̱ya na Bbetelehemu, sigikilia ka bwile ndia bhaluku bhatua magezi̱ bhantoliliaku̱. 17Yoho naki̱tu̱mi̱sa ndia nabbi̱ Yelemiya aonga bhiyo;
18“Ki̱oki̱ laso ndia nkpa tukai̱ ka Lama,
sa ngamu na zigidhiluwa si̱ni̱.
Lakeli̱ nali kagamia bhani̱ki̱ ndibhaki
toli̱ ndia kakabhi̱ nkpa poni si̱ki̱saki̱ku̱ mani̱
nanga bhoponi bhabha nibhasweki̱.”#Yelemiya 31:15
Yozefu kasi̱ki̱sa Mali̱ya na Yesu ka Isaleli̱
19Helude ndia aku̱wa, malai̱ka mindia Mambombi̱ amuenikiliana Yozefu ka ndoti̱ nali ka Mi̱si̱li̱ 20nakingia bhiyo; “Omu̱i̱se mi̱ki̱ na amaki bhu̱ye ka Isaleli̱ nanga bhenjo ndibha bhabhi̱ kakabha ola mi̱ki̱ bhoponi bhaku̱wa.”
21Yozefu naki̱mu̱i̱sa mi̱ki̱ na amaki ka Isaleli̱. 22No Yozefu ndia aoka eti Ali̱keli̱yo mukwa Helude asi̱ki̱a ndiye kaʼnga abaki bhia sali̱a ka Yu̱deya, nakitiya yaki̱ku̱. Malai̱ka mindia Mambombi̱ abha nalamulagi̱li̱ ka ndoti̱ eti kala ki̱ya ka Yu̱deya, du̱mbi̱ naki̱ya ka kyalo ndia ka Galilaya. 23Du̱mbi̱ ndia ai̱ya naki̱li̱ka ka tau̱ni̱ ndia ka Nazaleti̱, naki̱tu̱mi̱sa ndia bhanabbi̱ bhaonga nibhakigia bhiyo; “Bhakingiaku̱ Munazaleni̱.”
Chwazi Kounye ya:
Matayo 2: KWAMBA
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., 2025