Oyohana 5
5
Oyesu Dase Ogege Okunu Kogo ki Inyo.
1Ishi oye Oyesu go Ojerusele ebe ki Imya kase ko Oyahuda. 2Ipu ko Ojerusele ogo kinyo ni yo pee kpofunu koda kikpowu ni aba yogwu okwunu ki ibru mo Obeseda, ni agwinu to ni. 3Kweyi ase ni gbo ogege lo ni bya awopywiyi, awopyepu-agye kpa awo ngmonyodu nwashika bebeni. 4Ishi shishini oyoleho ka Adole yawa yinyo yaya. Kweyi kpiri kase ni gbo ginyo ishini oya yinyo ya ya ni ikyikyo, oya pyo ogege. 5Ongo oye yebe ni, ni gbose, oya gege ko nyiso lo ishayi aweta ayahata. 6Ishini Oyesu mo gutagye ebe ni, ogye mo oya mowe kpere gbeji wa, odoka mo, <<Oya yimu ko pyo ogege?>>
7Ini kere kyogwu mo, <<Ngba ashishe ko tumabo ko gipu ko ogo kinyo ishini inyo ya ni lo. Ishini nyya takirikwu ko gbo ginyo, ashe ya kwobonu dami.>>
8Ebeni Oyesu kamo, <<Nyiso! Sho lote wo shini oyawu.>> 9Ebebeni ongo ni pyogege, oyote nu la kweyi yawu.
Eno ni oza mani gbodagye ni we Eno ko Minyo, 10ebe ni awoteyi ko Oyahuda ka do ongo ni pyo ogege ni mo, <<Owe Eno ko Minyo, ono kaha wobi koni oya zote shini oyawu ni.>>
11Anu ke kyogwu mo, <<Ase ni dami ogege ni ka dami mo, <Zote wo na shini oyawu.>>> 12Adoka mo, <<Anoho ka dawo mo, lote wo sho yawu?>>
13Ongo ni odanu ogege mani gyase ni owe ni lo, Oyesu kwobonu gebi shuwiyi ipu kewa.
14Kee Oyesu wa mo ipu ko Ole ko Owuso kweyi oka danu mo, <<Ma, opyo ogege. Owoni oshozalabi bita lo oni sho omani ki yawa tawo.>> 15Ongo mani ga ka da awoteyi ko Oyahuda mo Oyesu pini danu ogege la.
Oshu ko Oyi ko Owuso
16Ikweyi koni Oyesu ya ya awoza mani Eno ko Minyo ni, koni Ase ko Oyahuda danu egye. 17Oyesu ka dawa mo, <<Ada hin yipu koko nu, kwikyikyeni, kweyi ami yipu koko ya ya mamani.>> 18Ikweyi koni Ase ko Oyahuda ba tikpo ko owe wonyonya ko yongmo, omani wi ikweyi koni odase ogege Eno ko Minyo kin lalo, ke wi ikweyi koni omo Owuso wa Ada nu ni, oziyinu gyogye kpo Owuso.
19Oyesu ka dawa mo, <<Nyya kadala okwokwoshi, Oyi ya gege ko kwiyinu yoza kin lo, oya gboza ni Ada nu ya ya ni la, ikweyi koni ojoji ni Ada ya ya, Oyi ya ya mamani. 20Koni Ada ya yimu ko Oyi nu kweyi oki shiyanu oza kpiri ni oya ya ni. Kweyi oki ya shiyanu oza nwashika shini igbashi na ya ala kwu. 21Byoni Ada ya ya awase ni gekwu ni ba nyiso amiri ni kweyi ba gbo olayi ni, mamani Oyi ya da awase ni nyya yimu ni olayi. 22Ada abiyinu kwashishe epwo lo, oke yoshu ko kwepwo yi do Oyi nu, 23shini kpiri kase na mo gyiyi byoni aba ma Ada nu gyiyi ni. Ase ni mo Oyi gyiyi lo oya ma Ada ni toleho ni ya gyiyi lo.
24Nyya ka dala okwokwoshi, kpiri kase ni pwela hin kweyi okyogwu kpase ni tumoleho ni oya gbo olayi ko gbogbo-gbogbo kweyi aba kwepwo lo, osheyi kikwu gipu ko olayi. 25Nyya ka dala okwokwoshi, ishi yawa ba kweyi okwobonu wa wa ni ase ni gekwu ba pwoko ko Oyi ko Owuso, kweyi awase ni pwoko nu aba pyo olayi. 26Byoni Ada gbo olayi ipu nu ni, oyo Oyi gbo olayi ipu nu mamani. 27Oki danoshu ko kepwo koni owo Oyi ka Asuse ni.
28Igbashi naka kwala ikweyi koza mani lo, koni ishi yawa ba ni kpiri kawase ni ba amiri wa ni ba pwoko nu 29kweyi awase ni yoza neshi ba nyiso kweyi ba gbo olayi, kweyi awase ni yobibi aba kwuwepwo. 30Ami gboshu ko yojije abiyun lo, nyya kepwo byoni Owuso ka dami ni la, epwo koka hin wa kokwokwoshi, koni nyya tikpo ko yoza ni shumotu ni la lo, ke wako shase ni tumoleho ni otu ni la.
Olobene Ikweyi ko Oyesu
31Owoni nyyo olobene ikweyi kiyun, olobene hin wo kwokwoshi lalo. 32Ashe yaba ni yolobene ikweyi hin ni, ngye molobene ni oya ikweyi hin kpiri ni wo kwokwoshi.
33Ala toleho gebe ko Oyohana, kweyi oyolobene kokwokwoshi. 34Owotiri shina kyogwu kpolobene kasuse lalo, ami ke ka mani shini ana ngmala. 35Oyohana lema bye emu ni wa yu dala ni, kweyi ala kyogwu kishi gbayayi ko monye koyoyu nu.
36Ami ke gbo olobene ni shoni Oyohana yani. Oko ni Ada dami ni mo na yi ya kweyi, anu pini nyya ya ma kweyi oya shiyase ma Ada pini tumoleho la. 37Kweyi Ada ni tumoleho ni abiyinu kokwokwoshi ikweyi hin, kwigboye ala pwoko nu kwe mo iyi kpi iyi lo, 38ala zela nu ipu kotu kala lo, koni ala kyogwu kpase ni otoleho ni lo. 39Ala yiyi kwokpa neneshi, ikweyi koni ala yotuse mo oya dala olayi ko gbogbo-gbogbo. Okpa mani ke yolobene ikweyi hin la, 40kwikyikyeni ala tela ko webe hin shini ala pyo olayi.
41Nyya tikpo kiye shosha kasuse lo, 42ami ke gyala. Ngye mo ala gbi imu ko Owuso ipu kotu kala lo. 43Nwa ipu kiye ka Ada hin, kweyi ala kyogwu kpa ami lo, owoni ashe ke wa kela ikweyi kiyinu, ala ba kyogwu kpanu. 44Ala ba yamoji ba kyogwu kpami, koni ala ba kyogwu kpiye shosha ni ala ba shiyi kala ni? Ala ke tikpo kigyashi ni yawa bwebe ko Owuso ni lo.
45Ala ke ka ma byami pini ya ga sha Ada epwo mala tela ko yoza neshi lalo. Omusa ni ala yotuso ni, anu pini yawa rotu kala la. 46Owoni ala kyogwu kpo Omusa, ala bi ba kyogwu kpami, koni otenena ikweyi hin. 47Byoni ala ke kyogwu kpoza ni ota ni lo ni, ala ba ya moji ba kyogwu kpoza ni nka ni?>>
Chwazi Kounye ya:
Oyohana 5: ALA
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
THE WORD FOR THE WORLD INTERNATIONAL, THE WORD FOR THE WORLD NIGERIA