Oyohana 6
6
Oyesu Dase Okpaku Eho Ozarore
1Bwebe ni Oyesu sheyi ki ishu-nyakwu ko Ogalili, okwunu kega ko Otiberiya, 2ase lewa gboso ikweyi koni amoza kigbashi ni oya ikweyi kawase ni ba gbere ni. 3Ebeni Oyesu toshi gi ikweyi ke efu ga yagye kpa awogboso. 4Ishi ki Imya ko Sheyi ko Oyahuda yo pee.
5Ishini Oyesu tiyi mase lewa ni ba webe nu ni, oka do Ofilibus mo, <<Ebenya ni aba pyi ikyoga ko dewa kasuse mani shini ana ha?>> 6Odoka mani kin shini ona moma, ikweyi koni okwobonu gyoza ni oya yimu koya ni.
7Ofilibus kyogwu mo, <<Ikwiri niya roza rore dewa kasuse mani ko pyabo oyoye, ya shikwiri koko ke eno ogbogbo epa.>>
8Oye ipu kawogboso, Andru, oyene ko Osimo Obitrus kamo, 9<<Oyi nongo oye gbo Ikyoga eho kpe ebinyi epa yoma. Omani ya yamoji ya fikweyi kewa ni bagye mani?>>
10Oyesu kamo, <<Ala ka dase na bagye.>> Ebeni ikyashi nwashika kweyi aka da ango mo ana bokpagye, awase okpakwu eho. 11Oyesu zo ikyoga kweyi oshotunehe do Owuso, kweyi oda awogboso mana yiko dewa ni bokpagye ni, oki ya mamani kpe ebinyi.
12Ishini kpiri wa roza gyuwa ni, oka da awogboso mo, <<Ala kpashini koza ni are ni tukpa. Shini ojije naka yishi lo.>> 13Oni akpo tukpa ni nwo ogwugwu igwepa kpo ikyoga eho ni aha ni.
14Ishini ase moza kigbashi ni Oyesu ya ni, akamo, <<Ko kwokwoshi omani pini winobane ni ya wese ni la!>> 15Oyesu gye mo aba yimu ko to ose ko oshu, ebe ni okwikye nu gikweyi kefu oye ga yagye fufunu.
Oyesu Yawu Ikweyi ki Inyo
16Ishini eno shani, awogboso go okwunu ki ishu-nyakwu, 17ebe ni agipu ko owu, kweyi asheyi ki ishu-nyakwu go Okapanahu. Ishi oni ebe kwobonu dibu, kweyi Oyesu yipu kowu kpa wa lo. 18Owu ta loshu ikweyi kinyo kweyi ya wu giso. 19Ishini ayawu kigbo eta kwe ene ni, kweyi amo Oyesu yawu ikweyi kinyo ya webe ko owu, kweyi oshi yuwa kwu. 20Oke ka dawa mo, <<Ami la, alaka yoshi lo.>> 21Ebeni azo kpabo pepa ipu kowu, ebebeni owu pwo okwunu kega ebe ni aba yimu ko ga ni.
22Gbebenya, ashishini kase ni hagye pyiyi tega ki ishu-nyakwu ni mo owu oye kponu pini hagye ebe ni la, awogboso ke shokwunu kega bita, Oyesu ke gipu kowu kpa awa ishini aba nyiso ene ni lo. 23Bwebe ni ashishini kowu bwo Otiberiya wa hagye ebe ni ase ho ikyoga ishini Adole shotunehe ni. 24Ishini ewa ma mo Oyesu kpa awogboso bebeni lo ni, agipu ko owu kweyi akwikye go Okapanahu aba tikpo ko Oyesu.
Oyesu wi Ikyoga ko Owushoshu
25Ishini amo okoka ki ishu-nyakwu ni, adoka mo, <<Inofoza, ishi nya no ofebe ni?>>
26Oyesu kyogwu kweyi ka dawa mo, <<Nyya ka dala okwokwoshi, ala ba tikpo hin ikweyi koni ala ma awoza kigbashi ni lalo ke wikweyi koni ala ho ikyoga yipu ni la. 27Ala yoko kozarore ni ya dala olayi ko gbogbo-gbogbo ni, ala ka yoko kozarore ni ya yishi ni lo. Ami Oyi ka Asuse ya dala ozarore mani koni ami pini Owuso Ada dami oshu ko ya la.>>
28Ebeni adoka mo, <<Aha baya moji shini ahan yoko ko Owuso ya?>>
29Oyesu kyogwu kweyi ka dawa mo, <<Oko ko Owuso yoma, ala kyogwu kpase ni otoleho ni.>>
30Aki doka mo, <<Oza kigbashi nya ni oya ya, shini ahan kyogwu kpa awo? Oji ni oya ya? 31Awokyikyi ka aha hozarore ni aba yogwu mo omana ni ipu ko ododa, byoni ayitota ipu ko okpa ni mo, <Odawa ikyoga bwi iso mo ana ha.>>>
32Oyesu ka dawa mo, <<Nyya ka dala okwokwoshi, Omusa pini dala ikyoga bwi iso lalo, Ada hin pini ke dala ikyoga kokwokwoshi bwi iso la. 33Koni ikyoga ko Owuso wase ni bwi iso wo okpagye kweyi wa dase kese olayi ni.>>
34Akamo, <<Adole, bwishi mani gohobwu daha ikyoga mani.>>
35Ebeni Oyesu ka dawa mo, <<Ami pini wo ikyoga ko olayi la. Ase ni webe hin emye ya ngmo lo, kweyi ase ni kyogwu kpami igyini ya ngmo lo. 36Byoni nka dala ni, ala mun kweyi kwikyikyeni ala kyogwu kpami lo. 37Kpiri kase ni Ada dami ya webe hin, kweyi ase ni webe hin nyya nenya lo. 38Koni ami bwi iso wa ko yoza ko otu hin lalo, nke wa ko yoza kotu kase ni tumo oleho ni la. 39Kweyi oza kotu kase ni tumo oleho ni mo, ipu kase ni odami ni ashishe naka gebi lo, na ke dawa olayi eno ko kweyi. 40Oza kotu ka Ada hin wo, ase ni pyiyi mo Oyi mani kweyi kyogwu kpanu oya pyo olayi ko gbogbo-gbogbo, kweyi nyya shiyi eno ko kweyi kese.>>
41Ebeni Ase ko Oyahuda kakakyose ikweyi koni okamo, <<Ami wo ikyoga ni bwi iso wa ni.>> 42Akamo, <<Omani wo Oyesu oyi ki Isu, ni aha gya ada nu kpi inanu ni yo na lo? Ojiya ni oya kamo, <Nbwi iso pini wa la?>>>
43Oyesu kamo, <<Ala sha akyose koka bita. 44Ashishe ya gege ya webe hin lo, owoni Ada ni tumo oleho ni pyo wa lalo, kweyi ami ya shiyi eno ko kweyi kese. 45Ayitota ipu kokpa kawo bane mo, <Owuso ya fase kpiri oza.> Kpiri kase ni pwela ka Ada kweyi ki fu bwebe nu oya webe hin. 46Ashishe ma Ada ebyibye lo, ase ni bwebe ko Owuso, anu kin pini ma Ada la. 47Nyya ka dala okwokwoshi, ase ni kyogwu kpanu ogbo olayi ko gbogbo-gbogbo. 48Ami wo ikyoga ko olayi. 49Awokyikyi kala hoza ni aba yogwu mo omana ni ododa, kwikyikyeni aki gekwu. 50Ikyoga ni ke sa bwi iso ni yoma, ase ni ha oya gekwu lo. 51Ami wo ikyoga ko olayi ni sa bwi iso ni. Ase ni ho ikyoga mani, oya sho olayi ko gbogbo-gbogbo. Ikyoga mani webe kikpiye hin la, ni nyya ze ikweyi kase kese kpiri.>>
52Ebeni Ase ko Oyahuda kwotu ko tawashu kpi iyiwa mo, <<Owe wonya no ongo mani ya daha ebe kikpiye nu ya ha?>> 53Oyesu ka dawa mo, <<Nyya ka dala okwokwoshi, owoni ala hebe ko Oyi ka Asuse kweyi gwoyi nu lalo, ala ba pyo olayi lo. 54Ase ni hebe kikpiye hin kweyi gwo oyi hin oya pyo olayi ko gbogbo-gbogbo, nyya shiyi eno ko kweyi kese. 55Koni ebe kikpiye hin wo ozarore kokwokwoshi oyi hin ki winyi ko okwokwoshi. 56Ase ni hebe kikpiye hin kweyi gwoyi hin oyipu hin, kweyi ami yipu nu. 57Byoni Ada ni ya yase ya gbo olayi ni tumo oleho ni kweyi Ada ki yun ya gbo olayi, ase ni hebe kikpiye hin oya gbo olayi bwebe hin. 58Omani pini wo ikyoga ni bwi iso ni la. Awokyikyi kala ho omana ni kweyi agekwu, ase ni ke ho ikyoga mani oya gbo olayi ko gbogbo-gbogbo.>> 59Oyesu kela mani ishini oya foza ipu ke ekpa ka Ase ko Oyahuda ipu ko Okapanahu.
Awogboso Oyesu Nwashika Kwikye Itikpi
60Ishini awogboso nwashika pwo mani ni akamo, <<Ozafofu mani loshu. Anoho ya kyogwu kpanu?>>
61Oyesu gye mo awogboso ba tawashu ikweyi koza ni apwo ni, oka dawa mo, <<Ela mani yala ba shikawu la? 62Oya lemoji owoni ala mo Oyi ka Asuse kwikye gebe ni oyo ni ome? 63Oza ni ya dase olayi ni wo Omaku, ikpiye gboshu oyoye lo. Ela ni nka dala mani nwonwu kpo Omaku kpo olayi. 64Kwikyikyeni ashishini kala kyogwu lo.>> Bwikyikyo Oyesu gyase ni kyogwu kpanu lo kpase ni wa yo ra ni. 65Okamo, <<Oza ni ya ni nka dala mo ashishe ya webe hin lo, owoni Ada hin danu oshu la lo.>>
66Bwishi oni awogboso nwashika kwikye itikpi kweyi atela ko gboso.
67Oyesu dase igwepa ni oka mo, <<Kwe ala ba ga kala mamani la?>>
68Osimo Obitrus ka danu mo, <<Adole, ebe kanoho ni aba ga? Ogbela ko olayi ko gbogbo-gbogbo. 69Akyogwu aki gye mo owase Sere ko Owuso.>> 70Ebeni Oyesu kyogwu mo, <<Ala wa ase igwepa pini nshala lalo? Kwikyikyeni ashe ipu kala wibiri!>> 71Oya kela ko Oyahuda Iskariyoti, oyi ko Osimo, oye ipu kase igwepa, ni yawa yo ra ni.
Chwazi Kounye ya:
Oyohana 6: ALA
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
THE WORD FOR THE WORLD INTERNATIONAL, THE WORD FOR THE WORLD NIGERIA