Malukusa 1
1
Euvifo lyaYohanesa Omushashi
(Mateusa3:1-12; Lukasa3:1-18; Yohanesa1:19-28)
1Mbu owo omukalo nghee Onghundana Oiwa tai popi Yesus Kilistus Omona waKalunga ya tameka. 2Ngahnyi sha shangwa kuYesaya omuhunganeki waKalunga ta ti,
“Kalunga okwa ti, ‘Onghee hano andi tumu omutumwa wange,
e mu tetekele, opo e mu opalekele ondjila.’
3Ewi lyanakwiingiva mombuwa ali ti,
‘Longekivileni Omwene ondjila,
nye mu ukililife omalila yaye.’ ”
4Yohanesa Omushashi okwa ya mombuwa, ndele ta uvifa kutya aanhu naa efe okulonga oulunde, ndee taa shashwa, opo Kalunga a vime po eendjo vao. 5Aanhu oyendji ya za moitopolwa ayihe yaYudea, noko shilando Yelusalema oya ya kuYohanesa yeke mu pwaikina. Oya hokolola mo eendjo vao, ndele taa shashwa kuYohanesa, momulonga waYoldan. 6Yohanesa okwa li a zala onguwo yomafufu yoshinamwenyo hashiifanwa ongamelo, nomwiya woshipa moshiya, ndele oikulya yaye oya li omapahu nomaavi yeenyiki. 7Okwa li ta uvifa ta ti, “Ngu te ya konima yange, omunaenghono e vule nge, naame inandi wana okupetama ndi mangulule eemwiya veenghaku vaye. 8Ame onde mu shasha nomeya, ndele ye oteke mu shasha nOmhepo Ondjapuki.”
Eshasho nemakelo lyaYesus
(Mateusa3:13—4:11; Lukasa3:21-22; 4:1-13)
9Konima yomasiku, Yesus okwa za kuNasaleta moshitopolwa shaGalilea, nokwa shashwa kuYohanesa momulonga waYoldan. 10Nanhyi Yesus ali ta zi momeya, okwa mona eulu lya yeuluka, nOmhepo Ondjapuki oya wila kombada yaye molupe lwonghuti. 11Nomeulu omwa za ewi lya ti, “Ooye Omona wange Omuholike, onde ku panda. 12Viyaviya Omhepo oye mu fala mombuwa, 13mu a kala omasiku omilongo ne, ta makelwa kuSatana. Omwa li mu na noilikama ndele aayengeli yaKalunga oye ya, ndee taye mu kwafele.”
Yesus ta ifana aakwati yeehi yane
(Mateusa4:12-22; Lukasa4:14-15; 5:1-11)
14Konima nhyi Yohanesa a ivililwa movologo, Yesus okwa ya kuGalilea, ndele ta uvifa onghundana oiwa ya za kuKalunga 15ta ti, “Efimbo olya fika, Ouhamba waKalunga owe ya popepi, itevululeni nye mwiitaele onghundana oiwa.”
16Nhyi Yesus ali ta ende komukunghulo wefuta lyaGalilea, okwa mona aamwainafana, Simoni naAndiliasa, taa umbile onhete mefuta, shaanhyi oya li aakwati yeehi. 17Yesus okwa ti kuyo, “Landuleni nge, andi mu ningi aakwati yaanhu” 18Meendelelo oya efa eenhete vao, ndele taye mu landula.
19Nhyi a ya kokule kashona, okwa mona Yakopo naYohanesa oyanamati yaSebedeus, ya li mowato, taa longekiva eenhete vao. 20Yesus okwe ya ifana meendelelo ye mu landule. Oya fiya mo he Sebedeus mowato pamwe naalumenhu yoilonga, ndele taa landula Yesus.
Omulumenhu e na omhepo ya kaka
(Lukasa4:31-37)
21Yesus naalongwa yaye oye ya moshilando shaKapelenaum, ndele mEsiku Lyevululuko, Yesus okwa ya mehala mu Aayuda haa ongala opo ya yalikane, hali ifanwa Oshinagoga, kokutya Oshinyanga, ndele ta tameke okulonga. 22Aanhu oya li ya kumwa kelongo lyaye, shaanhyi okwa li ta longo neenghono noufemba, kaishi nganhyi aalongimhango.
23Pefimbo mho, mOshinagoga omwe ya omulumenhu e na omhepo ya kaka noya ingiva mopale, 24ya ti, “Yesus Omunasaleta, owe tu halela shi? Owe ya u tu hanaune po? Ondi ku shi kutya, ooye Omuyapuki waKalunga!”
25Yesus okwa ngada omhepo ya kaka, a ti, “Mwena filu, ndele to zi mo muye!”
26Omhepo ya kaka oye mu mbugaambuga, yo tai ingiva mopale, ndele tai zi mo muye. 27Aanhu ayehe oya li ya kumwa, ndele taa tameke okupulafana taa ti, “Oshishi nhyi? Hano ndi elongo opo lye ya ko? Omulumenhu ngu oku na eenghono nepangelo, ta lombwele eemhepo va kaka, ndele avi vulika kuye!”
28Meendelelo, oshiningwanima nhyi, kombiga yaYesus osha tandaela momikunda avihe vomuGalilea.
Yesus ta eluva aanhu oyendji
(Mateusa8:14-17; Lukasa4:38-41)
29Viyaviya Yesus naalongwa yaye nhyi ya za mo moshinagoga, oya ya naYakopo naYohanesa molyao ya Simoni naAndiliasa. 30Yinamweno yaSimoni okwa li e li mombete youyehame taaluka olwiivi, ndele Yesus nhyi a fika, aanhu oye mu popya kuye. 31Yesus okwe ya kuye, temu kwata monyala, e mu fikameke, nolwiivi olwa zamo muye, ndele ta tameke oku ya yakula.
32Etango nhyi lya ningina, aanhu oya eta aanauvu ayehe, namba ya kwatwa keemhepo va kaka kuYesus. 33Aanhu ayehe yomoshilando oya ongala posheelo sheumbo. 34Yesus okwa yeluva aanhu oyendji komauvu ya yooloka, ndele ta te mo eemhepo va kaka ovidji, no ina pitika nande eemhepo va kaka vi popye sha, shaanhyi ovi mu shii.
Yesus ta uvifa muGalilea
(Lukasa4:42-44)
35Ongula onene mhanga eluwa inali tenda, Yesus okwa penduka, ndee ta zi mo meumbo. Okwa za mo moshilando a ya kehala lye ikalela, ndee ta yalikana. 36Simoni namba a li nayo oya ya, yaka konga Yesus. 37Nhyi yemu mona, oya ti, “Aanhu ayehe otae ku kongo.”
38Yesus okwa ti kuyo, “Ituyeni momikunda vopoushiinda, opo nayo ndi ke ya uvifile, shaanhyi osho nda endela.”
39Onghee hano, okwa enda muGalilea ashihe, ta uvifa mOinagoga yao, ndele ta te mo eemhepo va kaka.
Yesus ta eluva omunashilundu
(Mateusa8:1-4; Lukasa5:12-16)
40Omunashilundu okwe ya kuYesus, ta tu eengolo te mu indile ta ti, “Nge oweshi hala, oto vulu okuyeleka nge.” 41Yesus okwe mu uvila onghenda, nokwa nana eke lyaye, ndele te mu kwata ta ti, “Onda hala, yela!” 42Viyaviya oshilundu osha za mo momulumenhu ngo, nokwa yela. 43Yesus okwe mu londova neenghono mhanga inemu lekela, 44ta ti, “Pwaikina! Ino shi popya nande okomunhu. Ndele inda ashike u ke iyulike komuyambi, e ku konaakone, opo shi ninge oumbagi kaanhu kutya owa eluvwa, oye uka yandje efikiloyambo lyeyeluko lyoye ndi lya ufwa kuMoses.”
45Ndele omunhu ngu nhyi a ya pondje, okwa tameka ta hokolola oshiningwanima ashihe akuhe. Onghee Yesus ina vula ali okweenda moilando monhaneho yaanhu, ndele okwa kala komahala nghu kaku na aanhu. Ndele nande ongaanhyo aanhu keembiga neembiga oye ya kuye.
Chwazi Kounye ya:
Malukusa 1: MBTP
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Word For The World International