Malukusa 2
2
Yesus ta eluva omusilombada
(Mateusa9:1-8; Lukasa5:17-26)
1Nhyi pwa pita omasiku omashona, Yesus okwa ya kuKapelenaum, naanhu oya uva kutya opo e li peumbo. 2Aanhu oyendji oya li ya ongala, no kamwa li mu na ehala meumbo noposheelo. Yesus okwa li te ya uvifile eehapu. 3Ongudu yaanhu oya eta omusilombada kuYesus, a hindwa kaalumenhu yane. 4Molwoundji waanhu, oya nyengwa oku mu fikifa puYesus. Onghee oya ulula ombululu kombada yonduda, ya ukilila mha puna Yesus, ndele taa kulukifa omusilombada, a nangala poshiinda shaye. 5Nhyi Yesus a mona eitaelo lyao, okwa lombwela omusilombada, “Mumwange, eendjo voye ova vimwa po.”
6Aalongimhango yamwe mba ya li mo omutumba, oya vilaavila momitima vao, 7“Omolwashi ta popi ngaanhyi? Ota tuku Kalunga! Olye ta vulu okuvima po eendjo, keshi ike Kalunga?”
8Viyaviya Yesus okwa vibulula momhepo yaye, kutya osho taa vilaavila ngaanhyo, ndele ta ti kuyo, “Omolwashi mu na omavilaavilo ya fa mho momitima veni? 9Nhyi oshipu shipi? Okulombwela omusilombada, ‘Eendjo voye ova vimwa po,’ nenge okulombwela omusilombada, ‘Fikama, kufa oshiinda shoye ndele to ende’? 10Andi mu kwashilipaleke mu kale mu shi shii kutya Omona wOmunhu oku na eenghono nepangelo okuvima po eendjo kombada yevu.” Opo nee Yesus okwa ti komusilombada, 11“Andi ku lombwele, fikama, kufa oshiinda shoye, ndele toyi kolyoye.”
12Omulumenhu okwa fikama, ndele ta kufa po oshiinda shaye, ndee ta yi, monhaneho yaayehe. Aanhu ayehe oya li ya kumwa noya hambelela Kalunga ya ti, “Inatu mona nande onale oshiima sha fa mha!”
Yesus ta ifana Levi
(Mateusa9:9-13; Lukasa5:27-32)
13Yesus okwa shuna komukunghulo wefuta lyaGalilea. Aanhu oyendji oye ya kuye, ndee ta tameke oku ya longa. 14Mokweenda kwaye okuya komeho, okwa mona omufendelifi Levi yaAlfeusa e li omutumba ponduda yomafutilo, ndee Yesus ta ti kuye, “Landula nge.” Levi okwa fikama, ndee te mu landula.
15Ongulohi yesiku ndyo, Yesus okwa li omutumba ta li oulalelo meumbo lyaLevi, aafendelifi naalunde oyendji oya lila pamwe naye nonaalongwa yaye, molwanhyi oyendji yomuyo oya li ye mu landula. 16Ndele yamwe yomaalongimhango mba ya li Aafalisai nhyi ya mona Yesus ta lile pamwe naalunde nonaafendelifi oya pula aalongwa yaye ya ti, “Omolwashi Yesus ta lile pamwe naafendelifi naalunde?”
17Nhyi Yesus eshi uva, okwa ti kuyo, “Mba ye na oundjolowele inaa pumbwa omuyeluvi, ndele aanauvu ayeke. Ame inandi ya okwiifana aayuuki, ndele aalunde.”
Elongo kombiga yo kwiivilika oikulya
(Mateusa9:14-17; Lukasa5:33-39)
18Efimbo limwe, aalongwa yaYohanesa nAafalisai oya li haye ivilike okulya. Aanhu yamwe oye ya kuYesus, ndele taye mu pula, “Omolwashi aalongwa yaYohanesa naalongwa yAafalisai haye ivilike okulya, ndele aalongwa yoye ihaye ivilike okulya?”
19Yesus okwe ya yamukula a ti, “Oinghumbi otai vulu ngeepi okwiivilika okulya moshitufihango? Ahawe, ihai vulu! Mhanga omuhomboli e li mokati kao, ihaa vulu okwiivilika okulya. 20Omasiku otaye ya, mha omuhomboli taye mu kufwa, opo nee taye ke ivilika okulya.
21Kaku na ngu ta andeke oshaando oshipe koshikutu oshikulu, nge e shi ninga, oshaando oshipe ashi taula oshikutu, ndele nombululu tai ningi onene yi vulife yonale. 22Kaku na ngu ta zili omaviinyu omape momhunda yoshipa onghulu, shaanhyi omaviinyu mokupya, otaa taula omhunda yoshipa, nomaviinyu nomhunda ayihe otai hepa, ndele omaviinyu omape otaa zilwa momhunda yoshipa omhe.”
Elongo kombiga yEsiku Lyevululuko
(Mateusa12:1-18; Lukasa6:1-5)
23Esiku limwe Lyevululuko lyAayuda hali ifanwa Esabati, Yesus okwa li ta ende mokati komapya yoilya. Mhanga taa ende, aalongwa oya tameke okuteya omitwe voilya. 24Aafalisai oya ti kuYesus, “Tala, oshi li omhinge nomhango, okuninga nhyi ashi ningwa kaalongwa yoye mesiku lyEsabati?”
25Yesus okwe ya yamukula a ti, “Ina mu lesha mboli, nhyi David naanhu mba ya li naye ya ningile nhyi ya li ya sa ondjala? 26David okwa li a ya meumbo lyaKalunga pefimbo lyomuyambi omukulunhu Abiatal, ndele ta li omboloto, ndji inai pitikwa okuliwa kumba kaye shi aayambi pamhango yetu, ndee ta pe namba a li nayo.
27Yesus okwa ti kuyo, “Esiku lyEsabati olya shitilwa ouwa womunhu, ndele omunhu haye a shitilwa esiku lyEsabati, 28onghee hano Omona wOmunhu oye Omwene wEsabati.”
Chwazi Kounye ya:
Malukusa 2: MBTP
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Word For The World International