ሉቃሳ 8
8
ዬሱሳ ካሌዳ ማጫዋንታ
1ዬሱሲ ሃዋፔ ሲሚዴ፥ ሳባኪዲኔ ፆሳ ካዉቴ ሚሺራቹዋ ቃላ ካታማኒኔ ሄራን ኦዲዴ ኣዳ። ታማኔ ላዑ ዬሱሳ ካሊያዋንቱካ ኣናና ኢቲፔ ዴዒኖ። 2ኢታ ኣያናፔኔ ዎልቃማ ሃርጊያፔ ፓፄዳዋንቱ ኢቲ ኢቲ ማጫዋንቱካ ዴዒኖ። ሄዋንቱካ፡ ላፑ ፃላሂ ኬሴዳ ማግዳላ ጌቴቲያ ካታማፔ ዬዳ ማይራሞኔ፥ 3ሄሮዲሳ ጎሊያን ሱን ጊዴዳ ኩዛ ማቻቲ ዮሃኖ፥ ሶሲና ጌቴቴዉናኔ ሃራ ጮራቱዋና ኢቲፔ ጊዲዴ፥ ዬሱሳኔ ኣ ካሊያዋንታ ሚሻን ማዴዲኖ።
ዜሬ ሌሚሱዋ
(ማት 13፡1-9፤ ማር 4፡1-9)
4ጮራ ኣሳይ ዳሮ ካታማቱዋፔ ሺቂዴ፥ ዬሱሳኮ ዬዳ ዎዲያን ሌሚሱዋን፥ 5«ዜሪያዌ ዜሬ ዜራናው ኬሴዳ። ዜሪያ ዎዴ ኢቲ ኢቲ ዜሬይ፥ ኦጊያ ዶናን ዎዴ ዬቴዳ። ያቲና ሳሉዋ ካፉ ሄዋ ሜዳ። 6ሃራይ ቃይ ዛላ ቦላ ዎዴ ዶሌዳ ዎዴ ኮሺያ ሃ ዴሜና ዲራው ሜሌዳ። 7ሃራ ዜሬይ ኣጉን ጋርሳን ዎዳ። ኣጉንይ ኢቲፔ ዲጪዴ ሚቴዳ። 8ሃራይ ሎዒያ ቱዔ ቢታን ዎዳ። ዶሎዋፔ ጉዪያን፥ ዜሬቶዋፔ ፄቱ ኩሺያ ዳኩዋ ሞኬዳ» ያጌዳ።
ዬሱሲ ሌሚሱዋን ሃሳዬዳ ጋሱዋ
(ማት 13፡10-17፤ ማር 4፡10-12)
ዬሱሲ ሃዋ ሃሳዪዴ፥ «ሃይይ ዴዒያ ኡባይ ሲሶ» ያጊ ቃላ ቁ ኡዲዴ ዋሴዳ።
9ኣ ካሊያዋንቱ፥ «ሃ ሌሚሱ ኣያ ጉሴ?» ያጊ ኣ ኦቼዲኖ። 10ኢካ ዛሪዴ፥ #ኢሳ 6፡9
«ሂንቴንቶ ፆሳ ካዉቴ ፁራ ኤራይ ኢሜቴዳ፤ ሺን ሃራቶ፥ ፄሊዲካ ኤሬና ማላ፥ ሲሲዲካ ኣኬኬና ማላ ሌሚሱዋን ኦዳይ» ያጌዳ።
ዬሱሲ ዜሬ ሌሚሱዋ ቢሊዴ ኦዴዳ
(ማት 13፡18-23፤ ማር 4፡13-20)
11ዬሱሲ፥ «ዜሬ ሌሚሱ ሃዋ፡ ዜሬይ ፆሳ ቃላ። 12ኦጊያ ጋፃን ዎዳ ዜሬይ፥ ጉ ዎዴው ቃላ ሲሲያ ኣሳ፤ ኤሌካ ፃላሂ ዪኔ፥ ኡንቱንቱ ሲሶዋን ኣማን ኣቴና ማላኔ ቃላይ ዎዛናፔ ዶጌታና ማላ ኦ። 13ዛላ ቦላን ዎዳ ዜሬይ፥ ኮይሮ ቃላ ናሼቻን ሲሲያዋንታ። ሄዋንቱካ ጉ ዎዲያ ኣማኒኔ ፓጪ ጋኪያ ዎዲያን ፃጱ ባንታ ዲራው ኤሌካ ኣማኑዋ ካዲኖ። 14ኣጉን ጋርሳን ዎዳ ዜሬይ፥ ቃላ ሲሲያዋንታ፤ ሺን ዴዑዋ ሂርጋይኔ ዱሬቴ ኢሻሉ ጩሌዳዋንታ። ሄዋንቱ ሎዖ ኣይፊያ ኢማናው ዳንዳዪኪኖ። 15ሎዖ ቱዔ ቢታን ዎዳ ዜሬይ ቤሲያዌ፥ ሎዓኔ ፂሎ ዎዛናን ቃላ ሲሲዴ ናጊያ ኣሳኔ ሄ ቃላን ሚኒ ኤቂዴ ሎዖ ኣይፊያ ኣይፊያዋንታ።
ፆምፒያ
(ማር 4፡21-25)
16«ፆምፒያ ሳዴ ኢቲባን ቁምዒ ኣጊያዌ ዎይ ኣርሳፔ ጋርሳና ዎያዌ ኦኒኔ ባዋ። #ማት 5፡15፤ ሉቅ 11፡33 17ቆንጬናን ቆሱዋን ኣቲያባይ ኢቲ ዬዉኔ ባዋ። ኤሬቴናኒኔ ቤቲያሳ ኬሴናን ኣታናባይ ኣይኔ ባዋ። #ማት 10፡26፤ ሉቅ 12፡2 18ሄዋ ጊዲያ ዲራው ሎይ ኣኬካን ሲሲቴ። ዎዛናፔ ሲሲያዎ ኡባው ጉጂ ኣኬካይ ኢሜታና፤ ኣኬኬናዋፔ ሄ ኣው ዴዒያዋ ማላቲያ ኣኬካይካ ኣኬታናዋ» ያጌዳ። #ማት 25፡29፤ ሉቅ 19፡26
ዬሱሳ ዳዮኔ ኣ ኢሻቱዋ
(ማት 12፡46-50፤ ማር 3፡31-35)
19ሄ ዎዲያን ኣታኔ ኢሻቱ ዬሱሳና ጋኬታናው ኣኮ ዬዲኖ፤ ሺን ኣሳ ጮራቴፔ ዴንዶ ጋሱዋን ኣ ዴማናው ዳንዳይቤይኪኖ። 20ኢቲ ቢታኒ፥ «ኔ ዳያኔ ኔ ኢሻቱ ኔናና ጋኬታናው ኮዮ ዲራው ካሬን ዪዴ ኤቄዲኖ» ያጊ ኦዴዳ።
21ኢካ፥ « ታ ዳያኔ ታ ኢሻቱ፥ ፆሳ ቃላ ሲሲዴ ኦሱዋ ቦላን ፔሺያዋንታ» ያጊ ዛሬዳ።
ዬሱሲ ቤታ ጮዑ ኦዳ
(ማት 8፡23-27፤ ማር 4፡35-41)
22ኢቲ ጋላሲ ዬሱሲ ባሬና ካሊያዋንቱና ኢቲፔ ዎንጊሪያ ጌሊዴ፥ «ኣባፔ ሄፊን ቦይቴ» ጌዳ። ኡንቱንቱካ ዴንዲዴ ሃሜታ ዶሜዲኖ። 23ፒኒ ዴዒያ ዎዴ፥ ዬሱሲ ጌሚዒሼዳ። ኣባን ጎቱዋ ጫርኩ ዴንዶ ዲራው፥ ዎንጊሪያ ጋርሳን ሃይ ኩሚና ዳሮ ሜቶቴዲኖ። 24ኡንቱንቱ ዬሱሳኮ ሺቂዴ፥ «ጎዳው፥ ጎዳው! ኑኒ ባዮይቴቴ!» ያጊዴ ኣ ቤጎዲኖ።
ኢካ ቤጎቲዴ ጎቱዋኔ ሃ ቤታ ሴሪና፥ ጎቱኔ ሃ ቤታይ ኤቄዳ፤ ኡባባይካ ጮዑ ጌዳ። 25ኢካ፥ «ሂንቴንቶ ኣማኑ ሃቃን ዴዒ?» ያጌዳ።
ኡንቱንቱካ ያዪ ማላሌቲዴ ኢቱ ኢቱዋ፥ «ሃዋዳን ጫርኩኔ ሃይ ጮዑ ጊቴ ጊና ኣዛዜቲያዌ ሃዌ ኦኔ?» ያጌቴዲኖ።
ዬሱሲ ፃላሂ ኦይቄዳ ቢታኒያ ፓዳ
(ማት 8፡28-34፤ ማር 5፡1-20)
26ጋሊላ ኣባፔ ሄፊንና ዴዒያ ጌርጌሴኖና ጌቴቲያ ጋዲያ፥ ዬሱሲኔ ኣ ካሊያዋንቱ፥ ዎንጊሪያን ፒኒዴ ጋኬዲኖ። 27ሄ ሃፔ ፒኒ ሳዓ ዎ ዎዴ፥ ኢታ ኣያናን ኦይቄቴዳ ኢቲ ቢታኒ፥ ካታማፔ ኬሲዴ ኣናና ጋኬቴዳ። ዳሮ ዎዲያፔ ዶሚዴ ማዩዋ ማዬናን ካሎ ጎሊያ ኣጊዴ ዱፉዋን ዴዔ።
28ዬሱሳ ዴሞዋፔ ጉዪያን፥ ዋሲ ኣ ሲንን ጉፋኒዴ ዎልቃማ ኮሻን፥ «ዎልቃማ ፆሳ ናዓ ዬሱሳ፥ ታዉኔ ኔው ኣይቤ ኢቲፔቴይ ዴዒ? ታና ዋዪሶፓሪኪ፤ ታ ኔና ዎሳይ» ያጌዳ። 29ኢ ሄዋ ኣዪሲ ጌዴ ጎፔ፥ ቢታኒያ ዬጊ ኬሳና ማላ ዬሱሲ ኣ ኣዛዞ ዲራሳ።
ኢታ ኣያናይ ቢታኒያ ኦይቆዴፔ ዳሮ ዎዴ ጊዶ ዲራው፥ ቢራታ ሳንላታን ጌዲያኔ ኩሺያ ቃሼቲዴ ናጌቴ። ሳንላታ ዱ ኣኪዴ ኢታ ኣያናይ ካሌና ባዙዋ ቤ።
30ዬሱሲካ፥ «ኔ ሱንይ ኦኔ?» ያጊ ኦቼዳ። ኢካ ጮራ ኢታ ኣያናይ ጌሊ ኡቶ ዲራው፥ «ሌጊዮና» #8፡30 ሌጊዮና፡ ሃ ሱንይ ጊሪኬ ጌቴቲያ ቃላፔ ኣኬቴዳ። ሱን ቢሌይ «ጮራ» ጉሳ። ያጌዳ። 31ባሬንታ ዬሱሲ፥ «ሂኒ ጪሞ ኦላ ቢቴ» ያጌና ማላ ዎሴዲኖ።
32ሄዋን ዴዒያ ዞዚያ ጋፃን ሄሜቲያ ጮራ ጉዱንቱ ዴዒኖ። ጮራ ቱና ኣያናቱ፥ ሄ ጉዱንቱዋ ጋርሳ፥ «ጌሊቴ» ጋና ማላ ዬሱሳ ዎሴዲኖ። ኢካ፥ «ቢዴ ጌሊቴ» ጌዳ። 33ኢታ ኣያናቱካ ቢታኒያፔ ኬሲዴ ጉዱንቱዋ ጋርሳ ጌሌዲኖ። ጉዱን ዉዲካ ላንቂያፔ ካጆቲዴ ኤሌካ ኣባን ሚቴቴዲኖ።
34ጉዱን ሄሚያዋንቱ ሃኖዋ ኡባ ቤዖ ዎዴ ሃራሳ ቢዴ፥ ሄ ካታማኒኔ ዩሹዋን ሃኖዋ ኦዴዲኖ። 35ኣዬ ሃኔዴንቶ ቤዓናው ኬሲዴ፥ ኣሳይ ዬሱሳኮ ዬዲኖ። ኢታ ኣያናይ ኬሴዳ ቢታኒ፥ ኣ ዎዛናይ ሲሚና ማዩዋ ማዪዴ ዬሱሳ ጌዲያ ማታን ኡቶዋ ቤዒዴ ያዬዲኖ።
36ኢታ ኣያናን ኦይቄቴዳ ቢታኒ ዎቲ ፓፄዴንቶ ቤዔዳ ኣሳይ፥ ሃራ ኣሳው ኦዴዲኖ። 37ጌርጌሴኖና ጋዲያኒኔ ሄ ሄራን ዴዒያ ኣሳይ ኡባይ ዳሪ ያዬዳ ዲራው፥ ዬሱሲ ባሬንቱ ማታፔ ባና ማላ ዎሴዲኖ። ኢካ ዎንጊሪያን ጌሊዴ ቤዳ። 38ኢታ ኣያናይ ኬሴዳ ቢታኒካ ዬሱሳና ባና ጊዴ፥ ኣ ዎሴዳ፤ ሺን ዬሱሲ፥ 39«ኔ ጎሌ ሲማዴ ፆሳይ ኔው ኦ ዎልቃማባይ ኣዬንቶ ማርካታ» ያጊ ዬዴዳ።
ሃይቄዳ ናቶኔ ሳኬቲያ ሚሺራቶ
(ማት 9፡18-26፤ ማር 5፡21-43)
40ዬሱሲ ሲሜዳ ዎዴ ኣሳይ ኡባይ ናጊ ዴዒያ ዲራው፥ ኣ ሞኪ ኣኬዲኖ። 41ሄ ዎዴ፥ ኣዪሁዴ ኣሳ ዎሳ ጎሌው ሱን ጊዴዳ ያዒሮሳ ያጌቲያ ቢታኒ ኣኮ ዬዳ። ኢካ ዬሱሳ ጌዲያ ሲንን ኩንዲዴ፥ ባሬ ጎሌ ጌላና ማላ ዎሴዳ። 42ጋሶቴይካ ታማኔ ላዑ ላይይ ኩሜዳ ኣው ዴዒያ ኢቲ ናታ ሃይቃናው ማታ ኡቶ ዲራሳ።
ዬሱሲ ቢያ ዎዴ ጮራ ኣሳይ ኣ ዩሹዋን ሱጌቲዴ ሜቶዲኖ። 43ሄ ኣሳ ጊዶን ሄ ዎዲያን ታማኔ ላዑ ላይ ኡባ ሱይ ጎጊያ ሚሺራታ ዴዓው። ባሬ ዴዒያ ሻሉዋ ኡባ ሊያ ኤሪያዋንቶ ዉርሲናካ ፓናው ዳንዳዮዌ ኦኒኔ ባዋ።
44ጉዬና ያዴ ኣ ማዩዋ ማጫራ ቦቻዱ፤ ሄ ማንዒያንካ ኢፔ ጎጊያ ሱይ ኤቂ ኣጌዳ። 45ዬሱሲ፥ «ኦኔ ታና ቦቾዌ?» ያጌዳ።
ኡባይ ካዲና ጴፂሮሲ፥ «ጎዳው፥ ኣሳይ ሱጌቲዴ ሜቶያ ዎዴ፥ ‹ኦኔ ታና ቦቾዌ› ያጋይ?» ጌዳ።
46ሺን ዬሱሲ፥ «ኢቲ ኣሳይ ታና ቦቼዳ፤ ዎልቃይካ ታፔ ኬሶዋ ታኒ ኤራይ» ያጌዳ። 47ሚሺራታካ፥ ዬሱሳ ኢዛ ቦቾዌ ኤሬቴናን ኣቲቤናዋ ኤራዴ፥ ኮኮራዴ ዮና ዬሱሳ ሲንን ኩንዳ ኣጋዱ። ኣያ ጋሱዋን ዬሱሳ ቦቻዴንቶ ኢዛ ፓፆዋ ኡባ ኣሳ ሲንን ኦዳዱ።
48ኢካ ኢዚው፥ «ሃ ሚሺራቴ! ኔ ኣማኑ ኔና ፓዳ፤ ሳሮ ባ» ያጌዳ።
49ዬሱሲ ሃሳይ ዴዒሺን፥ ኣዪሁዳ ኣሳ ኣማኒያዋንቱ ሱን ሶዪፔ ኢቲ ቢታኒ ዬዳዌ፥ «ኔ ናታ ሃያዱ፤ ሲሚ ታማሪሲያዋ ሜቶፓ» ያጌዳ።
50ዬሱሲ ሃዋ ሲሲዴ፥ «ያዒሮሳ፥ ኣማናፔ ኣቲን፥ ያዮፓ! ኢዛ ፓፃናዉኑ» ያጊ ዛሬዳ።
51ሶይ ጌሊዴ፡ ጴፂሮሳፔ፥ ያዪቆባፔ፥ ዮሃኒሳፔ፥ ናቲ ኣቡፔኔ ናቲ ዳዪፔ ኣቲን፥ ኦኒኔ ጌላናዳን ኤኖ ጊቤና። 52ኡባይ ሄ ናቲው ዬኪዴኔ ካዮቲዲ ዴዒኖ። ሺን ዬሱሲ፥ «ዬኮፒቴ፥ ጊሳዱፔ ኣቲን ሃያቤይኩ» ያጌዳ።
53ኢዛ ሃይቄዳዋ ኤሪዴ ኣ ቦላ ሚጬዲኖ። 54ጊዶፔ ኣቲን ዬሱሲ ኢዚ ኩሺያ ኦይቂዴ፥ «ሃ ናቴ፥ ቤጎታ!» ያጌዳ። 55ኢዚ ሼምፑካ ሲሚና ኤሌካ ዴንዳ ኤቂና ማናባ ኢማና ማላ፥ ዬሱሲ ኣዛዜዳ። 56ኢዚ ኣቡኔ ኢዚ ዳያ ማላሌቴዲኖ፤ ሺን ዬሱሲ ኡንቱንታ፥ ሃኖ ዬዉዋ ኦሲኔ ኦዴና ማላ ኣዛዜዳ።
Chwazi Kounye ya:
ሉቃሳ 8: dwrENT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.
Aprann plis bagay sou Ooratha Caaquwaa