Yohanese 19
19
O Yesusu iwihohowono ato kiani iwihidapakuika o gota isosalioainoka
Matiusu 27:27; Maruku 15:16-20
1Ho o Pilatusu wahuloko ai tentaraika la o Yesusu iwiao de iwipoha-poha, de gea o hohonenge ma boboha kiani yapake.#19:1 Manga boboha gea de ma otinoka o gotaino masara ma boboha o hapi ma kaiino yodiai abe yomabelaka kiani ikurutu. De ahao o hori de o kobongo ma bela-belaka yadiai de o hapi ma kai abe yaregi-regioka de to ena ma barenika ihitopo-topokika de gea idadi manga boboha. De nako de manga boboha gea o nyawa yahipoha manga poretiha ahao awedere manga porete ma roehe. 2De gea o Roma manga tentara iwipoha ibooto de ahao o gumi-gumini abe de ma hihikaka agale-galeino la iwihinoauku ai peauku. Ho ma gumi-guminino gea yodiai hoka o kokoano manga sapeo. De ahao iwihinoaukuoli o baju moi ma wuu-wuu la ato iwihidadi hoka o koanoli ai rupa. 3Ho gea yodiai ibooto de ahao o tentara gea yomakawalimi iwipoka ai himangoko de iwihohedu ato, “Abeika o Yahudioka manga koano! Ngomi duru minigahoko ma owa ngonaika!”
4Ho gea o Yesusu iwipoha de iwihohedu ibooto de ahao o Pilatusu una wohupu ai tau ma goronaka de waino la wabuhukoli o Yahudi ma nyawa abe yomatoomuino genangoka. De watemo onangika wato, “Abeika! Naa Una gea tinihimatoko la ka idadi niwimake de nihioriki moioo de ko tamakeua ai howono abe hiadono kiani tihohowono.” 5Ho ka de o Yesusu wohupuino de ona iwimake de ai sapeo o hihikaino de ai baju ma wuu-wuu. De o Pilatusu ko waniikua manga hininga ho wotemo la wato ngaro ufa iwitoma wato, “Abeika niwimake o nauru naa, ai buturungu duru ko iwa!”
6Ma ka de o Yesusu iwimake de ona o hohidemo Ma Jouiye abe ka onangohi yokurutiye de ona yogoa-goana Ma Jou ai Tau yomulaenge yokokipoa-poaka ato, “Niwihohonenge dika! Niwihidapakuika o gota isosalioainoka!”
De o Pilatusu wapaluhu onangika wato, “Ngini dika niwile de niwihohonenge la iti ngini niwihidapaku angamoi nako ngohi ai howono moioo de ko tamakeua.”
7Masara o Yahudi ma nyawa manga ngoe gea iwiribuutu o Pilatusika ato, “Masara naga to ngomi mia pareta abe nako o nyawa iwingelo Ma Jouika kiani yohonenge ho kiani haniiki mia pareta gea angamoi Una womafetongokau wato, ‘Ngohi naa Ma Jou ai Ngofaka.’” #19:7 Yohanese 5:18 Abe hoka ma dihira o Yahudioka manga dimo-dimono yotemo ato o Yesusu wingelo Ma Jouika abe wifetongo Ma Jou, wato “Ahi Baba” abe ma titi womahingahu wato yomateroino Una de Ma Jou. Gea ma titi hiadono ona yomakoketemo ato, “Kiani hitomaka la hiadono wohonenge.”
8De o Pilatusu wohawanoka o Yesusu wihohonenge, ma ka de woihenoli o Yesusu ai demo abe wato Una Ma Jou ai Ngofaka de ai hawana ka idogo. 9Ho wowohamokali ai tau ma goronaika gea de wileha o Yesusika wato, “Ngona naa o kiaino?” Masara o Yesusu ko wopaluhua. 10Ho o Pilatusu wilehali wato, “Adodoa ho ngohino de noluku nopaluhu? Ko nohiorikua ahi kuaha naga la ka idadi tonihiluasa eko tonihidapakuika o gota isosalioaika?”
11De ahao gea o Yesusu wopaluhu o Pilatusika wato, “Ngona ko kia-kiaua Ngohino nodiai nako ko Ma Jouua wonihidoaka ani kuaha ngonaika. Ho o nyawa gea abe Ngohi ihihidoa-doaka ngonaino naa, nako ona de ngona ka to onangohi manga howono ilamoko.” #19:11 Ko hohiorikua o Yesusu ai demo naa ma dumutu abe gea o Yudasa Isikarioto, eko o Kayafasa, eko o Yahudi ma nyawa mata-mataika.
12Ka de o Pilatusu woihene o Yesusu ai demo gea de wolingiri ma ngekomo la wato o Yesusu wihiluasa ai kangelaino. Ma ka de wohupuoli o tauino de o Yahudi ma nyawa ihigali-gali yopoa-poaka iwihihawana unangika ato, “Unangoo hoka womahidadioka ti nginioo nia koano ho Una o Kaisara ai musu. Ho done sarakia de ngona nato noigo la o Yesusu gea nihiluasa?”
13Ho ka de iwidanauru hokogea de o Pilatusu o Yesusu wihihupu ma tauino de ahao o Pilatusu wogogeruku o hohowono ma kaderaka. Ai kadera gea yakelenga o ngi moioka hoka o mehele masara o hakaru dika yatatorika ihidowoatika. De nako o Yahudioka manga demo ma ngi gea ihiromanga o Gabata. 14De gea ngade-ngade o wange ikorona abe o Jumati ma wangeoka. De ma wange gea ihiromanga o Hidiai ma wange angamoi ma dawangeino adaene manga Hiaini ma wange. De utuoli manga hidiai naga angamoi itigioka abe ona ihirame-rame manga Totilakuru ma rame-rame.
Ho wogogerukuoka o hohowono ma kaderaka de ahao o Pilatusu wahingahu o Yahudi ma nyawa manga ngoeika gea wato, “Abeika, ti ngini nia koano naa.”
15Ma, ka de yoihene o Yesusu widemo hokogea de o Yahudi ma nyawa duru yopoa-poaka ato, “Niwiaoka! Itaiti niwiaoka! Niwihidapakuika dika o gota isosalioaika!”
De o Pilatusu waleha onangika wato, “Mode nia koano tihidapakuika o gota isosalioaika?”
De ona manga hohidemo Ma Jouiye abe yokurutiye ona yopaluhu ato, “To ngomi mia koano wiwihioriki womatengo dika de gea o Kaisara!”
16Ho ma bahaika de o Pilatusu waniikoka manga hininga ho wihidoaka o Yesusu onangika abe ahao ka idadi iwihidapakuika o gota isosalioaika.
O Yesusu iwihidapakuika o gota isosalioaika
Matiusu 27:32-38; Maruku 15:21-27; Lukasa 23:33-34
17De ahao o Roma ma nyawa manga tentara iwihiaturu la o Yesusu iwihimoku ai gota isosalioaino. De ahao wohupu o Yerusaleeme ma kotaino de woiki o ngi moiika abe gea ihiromanga o nyawa manga pea ma kabelanga ma ngi. Abe nako o Yahudioka manga demo ma ngi gea ihiromanga Gologota. 18De genangoka o Yesusu iwihidapaku o gota isosalioaika gea de o gota gea ihigokoiye. De hokogenangoo yodiai de o dorou ma nyawa yahinooto ho yahiketehimomoiika yahidapakuika. De yahinooto gea naga o Yesusu ai datekoka arihonongaka, ho o Yesusu naga manga hidogoronaka.
19De o Pilatusu wahitulihi ma titi o Yesusu ai hohowono de ma dodunguu gea yodiai ibooto de ahao ihidapakuika daku o Yesusu ai gotaka. De wohitulihi ma dodunguuoka wato, “O YESUSU O NASARETINO, UNA O YAHUDI MA NYAWA MANGA KOANO.” 20De naga o Yahudi ma nyawa manga ngoe yobasa o dodunguu gea angamoi o Yesusu iwihidapakuika imahidigi-digino de ma kota. De ma dodunguu gea ihitulihi de o bahasa hange abe ihira yapake o Yahudioka manga demo, de ahao yapake o Roma ma nyawa manga demo de ma bahauku yapake o Yunani manga demo. 21De naga o Yahudi ma nyawa manga hohidemo Ma Jouiye duru ko yosanangiua de ma demo gea abe wotulihika. Ho ona yoiki o Pilatusika de manga hininga ma huha iwihingahu unangika ato, “Mia baluhu, ufa ai dodunguu gea itemo ato, ‘O Yahudi ma nyawa manga Koano,’ masara nohitulihuku hokonaa: ‘Una gea womafetongo wato, Ngohi naa o Yahudi ma nyawa manga Koano.’”
22Masara o Pilatusu wapaluhu onangika wato, “Abe ngohi taputuhoka totulihi, gea dika ma dulihi!”
23Ho o Yesusu o tentara ma nyawa iwihidapakuika ibooto de ahao ai pakeanga mata-mata abe kanganohi akokihuputuku ahao naa o tentara yaiata yomahikodoku ho yomaketemomoi yamake. De ai baju abe ai badangika idateke ena gea ihidatahumuku abe ko iwa ma dabi angamoi yodumo daku de auku hiadono ma barenuku. Ho ai baju genangoo yaleoka la yomahitoona.
24Masara o tentara ma nyawa gea yomakoketemo ato, “Ngaro ufa naa ena hakakihi masara koaho homakamaihi la onaguna iwidaene ma mamaihi, una gea wamake ai baju naa.”
De hokogea o tentara yaiata gea yodiai la ingodumu abe ma dodihiraka atulihuku Ma Jou ai Bukuoka ato,
“Ahi pakeanga yomahikodoku masara de ahi baju yomakamaihi la ihioriki onaguna ahao wamake.” #19:24 Higiriiri 22:18
25De naga o Yesusu ai gota ma datekoka yomaokoino o Yesusu ngoi meme, de to muna ngomi ria-dodoto momatengo, de o ngo Maria abe o Kelopasa ngoi fekata, de o ngo Maria Madalena. 26De o Yesusu womimake ngoi meme de genangoka wimakeoli womatengo winii-niikino abe duru widora. De wotemo ngoi memeika wato, “Ele, ahi dodiawo gea ahao wodadi hoka to ngona ani ngofaka.” 27De ahao witemo winii-niikika gea wato, “Olo, nomigoana nomihidodiai hoka to ngona ma hirete ngoni meme.” Ho duru ma oraha gea de o Yesusu ngoi meme o Yohanese womiao to una ai tauika la ka idadi mogogere genangoka.#19:27 Womatengo iwinii-niikino naa o Yohanese ma angamoi una wotulihi ma ade-ade naa ho ko womafetongua.
O Yesusu wohonenge
Matiusu 27:45-50; Maruku 15:33-37; Lukasa 23:44-46
28Ka de wahibehehongoka onangika ibooto de o Yesusu wohiorikoka ai karajaanga abe o nyawa waduhunu, naa mata-mata wabootoka. De naa o Yesusu wotemo de ai demo duru imakadaene abe ma dihira Ma Jou ai uru ma dodofanga ihitulihukuoka Ma Jou ai Demo-demoka, abe wotemo wato, “Ngohi ahi ngomaha yodudungu.” 29De naga genangoka o mangko moi de o angguru ma suka-suka. Ho yaleino o pahi ma diburu abe ka idadi afifihi ma teongo gea de atonouku o angguru ma suka-sukauku gea. De gea yodiai ibooto de ahao ma diburu gea yatobeika de o gota o hisopo ma jaga de ahao iwihitaanaiye o Yesusu ai uruiye. 30De o Yesusu ka de wafifihi o angguru ma suka-suka gea de wotemo wato, “Naa ibootokau!” De womaponuku de ai ngomaha itoakoka.
31De gea o Hidiai ma wange abe itebini o Yahudi ma nyawa manga Hiaini ma wange ho kiani yomahidiaiohi. De o Hiaini ma wange gea ihiromanga o wange ma amoko angamoi duru adaene o Totilakuru ma rame-rame. Ho mangale gea naga manga dimo-dimono yoiki o Pilatusika de yogahoko ato, “Mia baluhu, itebini mihiromanga o Wange ma Debi-debini. Ho ngomi naa miboa migahoko la ona gea ufa hiadono manga honenge ka nagahi ma gotaka o Wange ma Debi-debinoka. Ho duru migahoko la ona o gotaka gea nohuloko la manga lou akokipoha la manga kobongo ikokitobikoka la itaiti yohonenge. Hokogea kiani nohiaturu la manga honenge ka idadi o wange naa dika de ihikokigutioka.” 32Ho o Pilatusu wohuloko hokogea. De o tentara ma nyawa yoiki iwitihira womatengoika, abe onangoo yahidapakuika de o Yesusu, de to una ai harepa ma kobongo yapoha ho yakokitobikoka. De ahao yoiki womatengoli ai honongaka de to unangoo ai harepa ma kobongo yakokitobikoka. 33Masara ka de yoboa o Yesusino de iwimake wohonengokau, ho ai harepa ko yapohaua. 34Masara la duru ihioriki wohonengoka o tentara ma nyawa womatengo wihakara o Yesusu ai gumurukika de ai hokiiki. De ka de wihakara de o awunu de o akere iuihi ai gumurukino. 35De ngohi naga genangoka ho de ahi lako hinooto tamake mata-mata gea yodiai o Yesusika, ho toade-ade naa duru tagou-goungu tinihingahu la nginioo ka niangaku. 36De mata-mata naa idadi duru imakadaene abe ma dihira Ma Jou ai uru ma dodofanga ihitulihukuoka Ma Jou ai Bukuoka ato,
“Ai kobongo moioo de ko yatobikua.” #19:36 Huhupu 12:46; Gegetongo 9:12; Higiriiri 34:20
37De naga Ma Jou ai Demo-demo utu abe ma dodihiraka yatulihukuoo, de gea itemo ato,
“De ona gea duru iwilega-lega unangika abe iwihakaroka.” #19:37 Sakaria 12:10
O Yesusu iwilungunu
Matiusu 27:57-61; Maruku 15:42-47; Lukasa 23:50-56
38Ho gea ipaha de o Yusupu, abe o Arimatea ma kapongino, una woiki o Pilatusika de wogahoko la o Yesusu ai honenge wile la ka idadi iwinoaika o ngioka ma rupa o aruku. O Yusupu gea unangoo winii-niiki o Yesusu masara ko womahingahu-ngahua angamoi wamodongo o Yahudi ma nyawa manga balu-baluhu. Ho ka de o Pilatusu wihigunoa wato, “Ka idadi” de o Yusupu wosobo la o Yesusu ai honenge ale. 39De naga womatengo o Yusupu widuhunu ai romanga o Nikodemusu, una gea abe ma dihiraino woboa o Yesusino o futu-futuoka. Ho ona yahinooto yomakiniiki ma oraha o Yesusu ai honenge ale. De o Nikodemusu wao o muuru de o bokuwini ihikasapuroka abe ena gea manga biaha yapake la yahiehe o honengika. O muuru de o bokuwini iwigao gea ma dubuho ngade-ngade o kilo moruange de iata. 40De nagali ona iwigao o ngoere ma rorahai ma bela-belaka abe ma guru-gurutu, abe gea o Yahudioka manga biaha yapake la manga honenge ihihawo. Ho yahinooto gea o Yesusu ai honenge yaleoka ho o muuru de o bokuwini gea ka ma moi iwihidahawo de o ngoere ma bela-belaka. Hokogea yodiai de o Yesusu ai honenge iwihihawoka la duru yaniiki itiai o Yahudi ma nyawa manga hirahi nako yalungunu o nyawa manga honenge. 41De ma ngi gea o kiaka o Yesusu iwihidapakuika ena gea imaritonakika de o redi moi. De ma redioka gea naga o lungunu moi abe ma rupa hoka o aruku afaitoka o hakaruika. De o lungunu gea ka ma hungiohi abe ko ma moiuahi o nyawa manga honenge yanoaika genangoka.
42De angamoi o wange gea o Yahudi ma nyawa yomahidiai abe itebinino gea o Hiaini ma wange, de mangale ma lungunu abe hoka o aruku gea imahidigi-digino ho ka genangoka o Yesusu iwihingohama doka ma goronaika de iwikelengauku.
Արդեն Ընտրված.
Yohanese 19: MJDD
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Gereja Firman Allah, Yayasan Misi Masyarakat di Pedalaman