Դարձի՛ր Ազդեցիկ ՄարդՕրինակ

Բարության անհաղթահարելի ուժը…

Սիրելի՛ բարեկամ, ուզու՞մ ես մյուսների հանդեպ լինել բարի, բարյացակամ ու առատաձեռն։ Ուզո՞ւմ ես իմանալ, թե ինչպես անել դա:

Ե՛կ մի փոքր անդրադարձ կատարենք բառի ստուգաբանությանը: Բարյացակամություն բառը երկու արմատ ունի՝ բարի և կամենալ: Բարյացակամությունը մյուսների հանդեպ կամավոր կերպով բարին գործելու փափագն է, բարին գործելու կամքը, ուրիշներին օրհնելն ու քաջալերելը:

Արտասահմանում ապրող մի հովիվ մի անգամ պատմում էր, որ որոշ հավատացյալներ ցանկություն են ունեցել նամակ գրել ոստիկաններին ու ասել, որ շնորհակալ են նրանց, իրենց արած գործի համար և որ երախտապարտ են նրանց: Դա բավականին շատ էր հուզել ոստիկանապետին: Նա չէր հասկացել ոստիկանների հանդեպ սիրո այս դրսևորումը և ասել էր. «Մեզ ամեն օր անպատվում են: Երբեք չենք հանդիպել մեզ քաջալերող մարդկանց` հատկապես մեր գործունեության հետ կապված հարցերում»:

Աստվածաշնչում` Եփեսացիս 5․9 խոսքում կարդում ենք. «․․․որովհետև Հոգու պտուղը ամեն բարության, արդարության և ճշմարտության մեջ է»:

Բարի գործերը խոսուն են, իրավիճակ են փոխում: Դա մի բան է, որ մեզնից յուրաքանչյուրը կարող է անել: Սիրելի բարեկամ, դու կանչված ես օրհնության անոթ լինելու համար: Մի՛ վարանիր օգտվել առիթից և առանձնահատուկ բարի գործեր գործել այսօր:

Ի՞նչ կարող ես դու այսօր անել.

· Հպվել մարդկանց սրտերին այնպես, ինչպես Աստված է դա անում՝ սիրով ու հարգանքով։

· Խոսել այնպես, ինչպես Աստված է խոսում՝ պարզ ու զորեղ։

· Քայլել քո ընթացքն այնպես, ինչպես Աստված է քայլում՝ ուժեղ և վստահ։

· Սիրել դիմացինիդ այնպես, ինչպես Աստված է սիրում՝ առանց պայմանների ու սահմանների։

Արդյո՞ք նման խոնարհությունն ունենալը հնարավոր է: Անկասկած` այո՛: Սակայն միմիայն Սուրբ Հոգու օգնությամբ: Նա լցնում է քեզ, ուղղորդում, խոսում է քեզ հետ և տանում է այն ուղղությամբ, որի կարիքը ունես:

Եվ հենց սա՛ է աստվածային լեցունությունը՝ երբ մենք ուրիշների հանդեպ բարին ենք գործում, ապա մտնում ենք մեր իրական առաքելության մեջ:

Ե՛կ միասին ցնծանք այսօր՝ հիշելով, թե որքա՜ն բարի է եղել Տերը մեր հանդեպ, և մենք էլ բարի ու ներող, օգնող ու կարեկից լինենք մեզ այսօր հանդիպած բարի ու ոչ այնքան բարի մարդկանց հանդեպ։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը