Մտքի Նորոգության ՃանապարհըՕրինակ

Դուրս շպրտի՛ր բոլոր բացասական մտքերը

Աստծո համար թանկ ու սիրելի զավա՛կ, իսկ դու ի՞նչ ես անում, երբ քո գլխում բացասական մտքեր են հայտնվում։ Արդյոք թույլ ես տալի՞ս, որ դրանք ներս ներխուժեն ու հաստատվեն քո ներսում, թե՞ այս մտքերն անցկացնում ես Աստծո Խոսքի և քո կյանքի համար Նրա կամքի մաղով։ Դու պետք է հստակ իմանաս, որ այդ բացասական մտքերը չպե՛տք է ուղղորդեն քո կյանքը։ Ավելին, դու իշխանություն ունես որոշելու, թե ուր ուղարկես այդ մտքերը: Դու կարո՛ղ ես վանել այս բացասական մտքերը, վռնդի՛ր դրանք և այնուհետև որոշի՛ր, որ դրանց տեղը դատարկ չմնա, այլ դրանց փոխարինեն դրական մտքերը, որոնք համահունչ են Աստծո կամքին։

«Ես միշտ սխալ որոշումներ եմ կայացնում…»: «Իսկ եթե այս հիվանդությունից չլավանա՞մ․․․»: «Ես վախենում եմ, որ ամենը վատ ընթացք կունենա»: «Ամբողջ կյանքումս կարիքի մեջ եմ լինելու․․․»:

Սիրելի բարեկա՛մ, իսկ ինչպիսի՞ն են քո բացասական մտքերը։ Ինչի վերաբերյալ էլ դրանք լինեն, միշտ հիշի՛ր, որ բացասական մտքերը մակաբույծներ են, որոնք գողանում են մեր խաղաղությունը, ուրախությունն ու վստահությունը։ Դրանք կարող են նաև գողանալ քո առողջությունն ու հարաբերությունները։ Եվ եթե դու ոչինչ չանես դրանց հետ ու հարամարվես դրանց ներակայությամբ կենսակերպին, ապա բացասական մտքերը կարող են ընդմիշտ հաստատվել քո ներաշխարհում և սարսափելի վնաս հասցնել քո կյանքին։

Սակայն կարող ես վստահ լինել, որ կա՛ լուծում։ Դու կարո՛ղ ես ազատվել քեզ այցելած բոլոր բացասական մտքերից:

Աստվածաշունչը հորդորում է քեզ «մերժել չարի փաստարկները» և «գերի բռնել յուրաքանչյուր միտք դրանք Քրիստոսին հնազանդեցնելու համար»:

Ահա թե ինչ ենք մենք այստեղ կարդում Սուրբ Գրքում. «․․․քանդում ենք ծածուկ մտքերը և ամեն բարձունք, որ Աստծու գիտության դեմ է գոռոզանում, ու գերում ենք ամեն միտք՝ Քրիստոսին հնազանդեցնելու համար» (Բ Կորնթացիներին 10․4-5)։

Իրականում, որպեսզի այս մտքերը չվերադառնան, դրանք պետք է փոխարինվեն դրական մտքերով: Իսկ դրական մտքերը չեն գալիս ինքնաներշնչանքով կամ ինքնահամոզմամբ։ Դրա համար մենք մեր հայացքը պետք է ուղղենք Տեր Հիսուսին:

Հիշեցրո՛ւ ինքդ քեզ նորից ու նորից, որ խաչի վրա Տերը հաղթել է չարին, և հաղթանակը քոնն է նաև Տերը Հիսուսի հանդեպ հավատքի շնորհիվ։

Միշտ հիշի՛ր աստվածաշնչյան այս ճշմարտությունները․

Նրա խոստումները քո կյանքի համար բարի են (Սաղմոս 105․8 և Սաղմոս 119․114)։

Նա անվերապահ սեր ունի քո հանդեպ (Երեմիա 31.3)։

Նա ուրախության ծրագրեր ունի քեզ համար քո յուրաքանչյուր օրվա համար (Հոբ 22.21)։

Այսօր թույլ մի՛ տուր, որ բացասական մտքերը ապակայունացնեն և խաթարեն քո ներաշխարհը… Մերժի՛ր դրանք Տեր Հիսուսի անունով:

Թող քո միտքը լցվի Աստծո Խոսքի բժշկարար ներկայությամբ:

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։