If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

यीशु ने अपणे उपदेस जो जारी रखदे होए तिन्हा लोक्कां जो बोल्लेया “सावधान रेयो! तुसा मणूआं जो दसणे तांइ भलाई रे कम्म मत करो, नी तां तिज्जो अपणे स्वर्ग अन्दर रैह्णे वाले पिता का कोई ईनाम नी मिलणा। इधेरे तांइ जिस बेल्ले तुसा दान करो तां तिसेरा ढिडोंरा मत पिट्टो, जिय्यां कि सभास्थल ते गलियां बिच कपटी मणू भी होर लोक्कां का तारिफ सुनणे तांइ करदे ताकि मणू तिन्हेरी बड़ाई करण, मैं तुसा कने सच बोलदा कि से ही तिन्हेरा ईनाम है। पर जां तुसा दान करो तां लोक्कां जो पता मत लगणा देयो कि तुसा कै देया करदे हिन। ताकि जे दान तू दित्ता से कुसकी जो पता ना लग्गे अते तेरा से परम-पिता जे तिज्जो लुकी करी दिखदा, तिन्हा ने तिज्जो उधेरा ईनाम दैणा।”

“जां तू प्रार्थना करेया करे, तां ढोंगी लोक्कां सांई लोक्कां री तारिफ तांइ सड़कां रे मौड़ां पर ते सभास्थल बिच मत करदा, मैं तुसा जो सच बोलदा कि इय्यां करणे वाले लोक्कां रा ईनाम सिर्फ लोक्कां री तारिफ ही है। पर जां तू प्रार्थना करे, तां अपणे कमरे बिच जा, ते दुआर बांद्द करी के गुप्त बिच अपणे पिता परमेश्वर का प्रार्थना कर जे स्वर्ग बिच हिन, तां परमेश्वर पिता ने तुसा जो ईनाम दैणा जे स्वर्ग का तुसा जो गुप्त रीति कने दिखदे रैहन्दे। ते जां तू प्रार्थना करगा तां गैर-यहूदी लोक्कां साई बे-मतलब री गल्लां जो घड़ी-घड़ी मत बोल, किजोकी तिन्हा लोक्कां जो लगदा कि तिन्हेरे बड़ा जादा बोलणे कने तिन्हेरी प्रार्थना सुणी जाणी। इधेरे तांइ तुसा तिन्हा लोक्कां सांई मत बणो, किजोकी तुसा रा पिता परमेश्वर तुसा रे मंगणे का पैल्ले ही जाणदा कि तुसा री कै-कै जरुरतां हिन।” इधेरे तांइ तुसा इस तरिक्के कने प्रार्थना करेया करो:
ओ असा रे पिता, तुसा जे स्वर्ग बिच हिन, तुसा रा नां पवित्र मन्नेया जाए।
तुसा रा राज आओ जिय्यां तुसा री मरजी स्वर्ग अन्दर पूरी हुंदी,
तिय्यां ही दुनिया पर भी पूरी हो।
असा री दिन भर री रोट्टी अज्ज असा जो देयो।
ते जिय्यां असा ने अपणे गुनेह्गार जो माफ कित्तेया, तिय्यां ही तुसा भी असा रे पाप्पां जो माफ करी देयो,
अते असा जो परखदे मत, पर शैतान का बचाई रख्खेयो,
(किजोकी राज, पराक्रम ते महिमा हमेसा तुसा रा ही है, आमीन)!
“इधेरे तांइ जे तुसा मणूआं रे पाप्पां जो माफ करगे, तां तुसा रे पिता परमेश्वर ने जे स्वर्ग बिच रैहन्दे तुसा जो माफ करी दैणा।” अते जे तुसा मणूआं रे पाप्पां जो माफ नी करगे, तां तुसा रे पिता परमेश्वर ने भी तुसा रे पाप माफ नी करणे।

“जां तुसा ब्रत्त रख्खो, तां ढोंगी लोक्कां सांई तुसा रे मुँह नी उत्तरे रे होणे चाएदे, किजोकी से अपणा मुँह उदास बणाई रखदे ताकि सबणी मणूआं जो पता लग्गो कि तिन्हा ने ब्रत्त रख्खे रा है, मैं तुसा जो सच-सच बोलदा कि तिन्हा जो ईनाम बिच सिर्फ लोक्कां री तारिफ ही है।” जां तू ब्रत्त रख्खो, तां मुँह धोई करी अपणे सर पर तेल मले, ताकि मणूआं जो नी पर तुसा रे पिता परमेश्वर जो जे स्वर्ग का तुसा जो गुप्त रीति कने दिखदे पता चले कि तुसा ब्रत्त रख्खे रा है, ते तिन्हा ने तुसा जो ईनाम दैणा।

“अपणे तांइ दुनिया पर धन-दौलत मत कठेरो, जित्ते कीड़ा लग्गी जान्दा ते जांग कने खराब होई जांदी अते जित्ते चोर सेंध लाई करी चोरी लिन्दे।” पर भले कम्म करी के अप्पु तांइ स्वर्ग अन्दर धन-दौलत कठेरो, जित्ते ना कीड़ा लगदा ते ना जांग कने से खराब हुंदी ते ना चोर सेंध लाई करी चोरी करदे। किजोकी जित्ते तुसा री धन-दौलत होणी तित्ते ही तेरा मन भी लग्गी रैह्णा।

“हाख्खियां सरीर रे दीये सांई हुंदी: ते जे अगर तुसा रे दिखणे रा नजरिया परमेश्वर सांई है तां ए इदेया होणा जिय्यां तुसा रा सारा सरीर रौसनी कने भरे रा हो।” पर जे तेरे दिखणे रा नजरिया बुरा हो, तां ए इदेया होणा जिय्यां तुसा रा पूरा सरीर न्याहरे कने भरे रा हो, इधेरे तांइ से रौसनी जे तेरे अन्दर है जे, से अगर हकीकत बिच अगर न्याहरी होई जाओ तां से न्याहरा कदेया ड्रोणा होणा!

“कोई मणू इक्क समय पर दो मालकां री सेवा नी करी सकदा, किजोकी तिनिए इक्क कने नफरत अते दूज्जे जो प्यार करे, या तिनिए इक्क जणे कने वफादार रैह्णा अते दूज्जे जो नफरत करणी तुसा परमेश्वर ते धन-दौलत, दोन्नां री सेवा नी करी सकदे।”
“इधेरे तांइ मैं तुसा कने बोलदा कि अपणी जिन्दगी री हर जरुरत री फिकर करणा छड्डी देयो कि कै खांगे, कै पींगे या कै पांगे। कै मणू री जिन्दगी रोट्टी का या सरीर कपड़ेयां का बदधी करी नी है?” दिख्खो, आसमान रे चिड़ू-पखेरु ना तां भी बीह् बांदे, ना बडदे, ते ना ही खलाड़े अन्दर कठेरदे, फिरी भी तुसा रा पिता परमेश्वर जे स्वर्ग बिच हिन, तिन्हा जो खुआन्दा। कै तुसा तिन्हा का बधी करी नी हिन? तुसा बिच का इदेया कुण है, जे फिकर करी के अपणी उमर अन्दर इक्क घड़ी भी बद्धाई सकदा हो? कपड़ेयां तांइ तुसा किजो फिकर करदे हिन? जंगली फूलां जो दिख्खो कि से किय्यां बद्धदे, से ना तां कम्म करदे ते ना ही अपणे कपड़े बणांदे, तां भी मैं तुसा जो बोलदा कि राज्जा सुलैमान री इत्तणी महिमा होणे रे बावजूद भी से उन्हा बिच का कुसकी इक्क सांई भी नी सजी सकेया। इधेरे तांइ जां परमेश्वर द्रबड़ री घा जो, जे अज्ज है ते कल भट्टी बिच सूटी दित्ती जाणी, तिसेरा इन्ना ख्याल रखदे, तां ओ घट्ट विश्वास वाले लोक्कों, तां तिन्हा ने तुसा रा तिसका बधी करी ख्याल नी रखणा? “इधेरे तांइ तुसा ए बोल्ली करी फिकर मत करो, असी कै खान्गें या असी कै पिन्गे या कै पान्गें?” किजोकी गैर यहूदी इन्हा सबणी चीजां रे पीच्छे लगे रैहन्दे, पर फिकर मत करो किजोकी तुसा रे पिता परमेश्वर जे स्वर्ग बिच हिन, तिन्हा जो पता है कि तुसा जो इन्हा सबणी चीजां री जरुरत है, पर पैल्ले तुसा परमेश्वर रे राज ते तिन्हेरी धार्मिकता जो महत्व देयो, तां ए सब चीजा तुसा जो मिली जाणियां। “इधेरे तांइ कल री फिकर मत करो, किजोकी कल रा दिन अपणी फिकर अप्पु करी लिंगा अज्ज तांइ अज्ज रा दुख ही बड़ा है।”

Geere nke a ntị मत्ती 6