 If you would like a copy of this version please contact info@davaraudiobibles.org

Dagara Old Testament

La Bible en Dagara © Alliance Biblique du Burkina Faso, 2013.

«Nyɩ taa maalɛ ŋmɩn-bɛlɛbɛlɛ a nyɩ ƴãw ɛ. Nyɩ taa bine tɩbɛ nɩ kʋsɛ-teli ɛ. Nyɩ taa bine kʋsɛ-wiri a nyɩ tẽw pʋɔ mɩ́ gbĩ dume gũu tɩ tɔ tẽw puori a ɩ. Bʋ̃ʋ n'ʋ vɛ̃, mãa n'ɩ a Sore nyɩ Naaŋmɩn.»
«Nyɩ mɩ́ pɩ̃ɛnɩ a pɩ̃ɛnʋ-bibir, ɛ́ ƴãwnɛ a ɩ̃ zi-sõw. Mãa n'ɩ a Sore.»

«Nyɩmɛ wa tuur a ɩ̃ wulu a, nyɩmɛ wa tɛr a ɩ̃ nɛ-ƴãwnɩ vla ɛ́ sàwr a a, ɩ̃ na mɩ́ kʋ̀ nyɩ nɩ a saa a ʋ daar. A tẽsɔw bʋ̃-kʋ́ɔrɩ na mɩ́ maal'a, ɛ́ a tɩɩr wɔ̃ a wɔmɛ. A nyɩ zie a, nyɩ na mɩ́ va n a bʋ̃-varɩ tɩ ta n a divɛ̃ tɩɩr wɔmɛ pɔrʋ daar, ɛ́ pɔr a divɛ̃ tɩɩr wɔmɛ tɩ ta n a bʋ̀rʋ daar. A bʋ̃-dɩrɩ na mɩ́ ʋr'a, ɛ́ nyɩ ɓãá ƴãw kpɩɛr a tẽw. Ɩ̃ na ƴãw nɩ ƴã-ɓaarʋ a tẽw pʋɔ: nyɩmɛ wa gã a, bom bɛ waar wa damnɛ nyɩ ɛ. Ɩ̃ na ɩ na a dʋ̃-faar bɔr a tẽw pʋɔ. Nɩr bɛ waar wa ŋmaarɛ nɩ nyɩ zɛbr ɛ. Nyɩ na mɩ́ diw nɩ a nyɩ dɔ̃ dem bɛ zɔ, nyɩ na mɩ́ gɔr bɛ na lɔb nɩ a nyɩ zɛbr-sɔ-bɛrɛ. A nyɩ nɩbɛ anũu na mɩ́ diw nɩ dɔ̃ dem kʋba (100) bɛ zɔ, ɛ́ a nyɩ nɩbɛ kʋba diw dɔ̃ dem tùr-pie (10 000), nyɩ na mɩ́ gɔr bɛ na lɔb nɩ a nyɩ zɛbr-sɔ-bɛrɛ. Ɩ̃ na jɩ́r nyɩ na kaa, ɩ̃ na kʋ̀ nyɩ nɩ bibiir bɛ yãwmɛ, ɛ́ maal tɛr a ɩ̃ wõ-taa nɩ a nyɩɩm. Nyɩ na mɩ́ de nɩ a bʋ̃-dieri yaga za, mɩ́ tɩ cãà tɛr bʋ̃-kore dɩrɛ. A na mɩ́ fɛr'a nyɩ yaw a bʋ̃-kore ɛ́ su a bʋ̃-paalɛ. Ɩ̃ na ƴãw nɩ a ɩ̃ kpɛb zie a nyɩ sɔgɔ, ɛ́ kʋ̃ jɛ nyɩ bɛr ɛ. Ɩ̃ na be n a nyɩ zie kʋralɛ ɩ a nyɩ Naaŋmɩn, ɛ́ nyɩ ɩ a ɩ̃ nɩ-bʋʋrɛ. Mãa n'ɩ a Sore nyɩ Naaŋmɩn na ɩ kɛ̀ nyɩ yi zaa a Eziptɩ nɩbɛ tẽw pʋɔ, kɛ́ nyɩ ta cãà ɩ a bɛ gbãgbaar a. Ɩ̃ ɩ na a Eziptɩ tẽw dem gãdaalʋ baarɩ a nyɩ zu, ɛ́ ɩ nyɩ bɛr vĩ ɛ́ cere.»

«Nyɩmɛ bɛ wa bɛrɛ wone a ɩ̃ ƴɛ̀rʋ, ɛ́ bɛ sàwr a ɩ̃ nɛ-ƴãwnɩ a, nyɩmɛ wa zawrɩ a ɩ̃ nɛ́ɛ bɛr, nyɩmɛ bɛ wa nɔnɛ a ɩ̃ tub ɩ̃ na ƴãw a, nyɩmɛ bɛ wa sàwr a ɩ̃ nɛ-ƴãwnɩ, sãw a wõ-taa ɩ̃ na maal'ɩ nyɩ a bɛr a, nyɩ nyɛ̃ a lɛ ɩ̃ na na ɩ nyɩ a:
Ɩ̃ na ƴãw na a pʋl-vʋ̃ɔ, a kõwfʋ nɩ a ƴã-tʋlʋ wa a nyɩ ƴãw wa ɩ nyɩ lo mimie ɛ́ sɩrɛ cere. Nyɩ na mɩ́ bʋ̀r'ɩ a nyɩ póru zawla, bʋ̃ʋ n'ʋ vɛ̃, a nyɩ dɔ̃ dem nɛbɛ na mɩ́ cɛ̀ a. Ɩ̃ na ìr'ɩ a nyɩ ƴãw, ɛ́ a nyɩ dɔ̃ dem na tʋ̃ɔ́ nyɩ na. A bɛlɩ dem na hɩ̃ɛn nyɩ a na so nyɩ na, ɛ́ nyɩ na mɩ́ lɩɛb'a zɔrɛ nɩr saa bɛ diwr nyɩ a.
Nyɩmɛ cãà bɛ wa bɛrɛ wone a ɩ̃ ƴɛ̀rʋ a, ɩ̃ na dɔwrɩ nyɩ nɩ gb'a ayopõi dɔwlɩ a nyɩ yel-bebe zũú. Ɩ̃ na ɩ na a nyɩ kpɛnʋ pɔ̀l-ɩb baarɩ, ɩ̃ na ɩ na a nyɩ salom kpɛmɛ mɛ̃ kure a, ɛ́ a nyɩ tẽsɔwr kpawlɩ kpɛmɛ mɛ̃ kur-zɩɛ a. Nyɩ na mɩ́ bàl'ɩ nyɩ tʋɔra zawla: a tẽsɔw bʋ̃-kʋ́ɔrɩ za kʋ̃ mɩ́ lɛb maalɩ ɛ, ɛ́ a tẽw tɩɩr kʋ̃ cãà wɔnɛ ɩ.
Nyɩmɛ bɛ wa bɛrɛ wone a ɩ̃ ƴɛ̀rʋ, zawrɩ a ɩ̃ tub a, ɩ̃ na bãwnɩ nɩ a nyɩ yel-bebe, dɔwrɩ nyɩ gb'a ayopõi dɔwlɩ. Ɩ̃ na ƴãw na wɛ-dʋn wa a nyɩ ƴãw, wa kʋ a nyɩ bibiir, kʋ a nyɩ dʋn pàw pɛr, ɛ́ baarɩ nyɩ, bɛ bɛ mɩ́ cãà nyɛ̃ nɩr sɔ́r zu ɛ.
Nyɩmɛ cãà bɛ wa sàw a ɩ̃ kpãàfʋ, cãà zawrɩ a ɩ̃ tub a, a mãa mɩ̀ a, ɩ̃ na zawr'ɩ a nyɩ tub, ɛ́ lɛb maal dɔwrɩ nyɩ gb'a ayopõi dɔwlɩ a nyɩ yel-bebe zũú. Ɩ̃ na ɩ na zɛbr lo a nyɩ zu a ɩ̃ wõ-taa nyɩ na ɩ k'ʋ sãw a ƴãw. Nyɩ na zɔ na kpɛ a nyɩ tẽ-bɛrɛ pʋɔ. Ɩ̃ na ɩ na a jɛ̀lmɛ̃ bàalʋ páw nyɩ, ɛ́ a nyɩ dɔ̃ dem na so nyɩ na. Ɩ̃ na sɩb nyɩ nɩ a bʋ̃-dɩrɩ. Pɔwbɛ pie na mɩ́ tʋ̃ɔ́ na sɛ̃ a nyɩ dipɛ̃ dam-been yõ pʋɔ, bɛ na mɩ́ wa n na a bɛ saalɩ ɛ, nyɩ 'wɔb bɛ tɩw ɛ.
À á ŋá za wa ɩ, ɛ́ nyɩ cãà bɛ bɛrɛ wone a ɩ̃ ƴɛ̀rʋ, ɛ́ cãà zawrɩ a ɩ̃ tub a, a mãa mɩ̀ a, ɩ̃ na nyɛ̃ nɩ suur yaga zawrɩ a nyɩ tub, mãa mɩŋa na dɔwrɩ nyɩ nɩ gb'a ayopõi dɔwlɩ, a nyɩ yel-bebe zũú. A na fɛr'a nyɩ 'wɔb a nyɩ bidɛbr nɩ a nyɩ pɔwyaar ƴã-gã-nɛnɛ. Ɩ̃ na sãw nɩ a nyɩ maalʋ-ziir bɛr, ɩ̃ na ŋmɛr'ɩ a nyɩ bàwr-maal-kube al zu nyɩ na mɩ́ nyɩw a parfɛ̃ a bɛr, ɩ̃ na gbõ n a nyɩ kũuni taa a tɩbɛ na ŋmɛr ŋmɛr ɛ́ kar kar a zu. A ɩ̃ pʋɔ kʋ̃ nɔ̃w nyɩ towtow ɛ. Ɩ̃ na ŋmɛr'ɩ a nyɩ tẽ-bɛrɛ bɛr, ɛ́ nɩr kʋ̃ cãà be a nyɩ zi-son pʋɔ ɩ. Ɩ̃ kʋ̃ cãà sàwr a nyɩ bagɛ zʋ̀ʋ́r na nyùur nʋ̃ɔ̀ nʋ̃ɔ̀ a ɩ. Mãa mɩŋa na sãw nɩ a nyɩ tẽw bɛr kɛ̀ nʋɔr ɓãá a nyɩ dɔ̃ dem na wa kɛ́ bɛ wa kpɛ a ʋ pʋɔ a. Ɩ̃ na vʋ̃ɔ nɩ a zɛbr-sɔ-kpɛ̃ɛ a nyɩ ƴãw, ɛ́ diw nyɩ yaarɩ a nɩ-bʋʋr-yoru pʋɔ. A nyɩ tẽw na lɩɛb'ɩ wɛja-kpalɛ, ɛ́ a nyɩ tẽ-bɛrɛ lɩɛbɩ debo-bɛrɛ.
Lɛ n'a a yome al nyɩ na na be a nyɩ dɔ̃ dem ten pʋɔ a, a nyɩ tẽsɔwr nyɩ na cen kɛ́ bɛr a na pɩ̃ɛnɩ, yáa a zɩ̃-pɩ̃ɛnʋ voru al nyɩ na bɛ tɩ sàw tu a san. A tẽsɔw na pɩ̃ɛnɩ na lɩɛrɩ a pɩ̃ɛnʋ voru al nyɩ na bɛ sàw ʋ pɩ̃ɛnɩ a lɛn daar nyɩ na tɩ kpɩɛr a ʋ pʋɔ a.
A bɛlɩ dem nãà wa cãà vʋʋrɛ a bɛ dɔ̃ dem tẽw pʋɔ a, ɩ̃ na ƴãw bɛ nɩ pʋl-vʋ̃ɔ: váar na lore a damnʋ tɛwr na mɩ́ ɩ na bɛ nyɔw zɔba. Bɛ na mɩ́ zɔ na mɛ̃ dɔ̃ sob niŋé fʋ na zɔrɛ a, ɛ́ bɛ na mɩ́ lo na, nɩr za saa bɛ diwr bɛ a. Bɛ na lore na dine taa mɛ̃ a lɛn daar fʋ na mɩ́ zɔrɛ dɔ̃ sob niŋé a, ɛ́ nɩr kʋ̃ diwr bɛ mɩ̀ ɛ. Bɛ kʋ̃ tʋ̃ɔ́ mɩ́ bà gbɛ́r a bɛ dɔ̃ dem niŋé ɩ. Tẽ-yũo pʋɔ n'a bɛ na kpi, a bɛ dɔ̃ dem ten n'a na baarɩ bɛ. A bɛlɩ dem nãà wa cãà vɩrɩ vʋʋrɛ a nyɩ dɔ̃ dem ten pʋɔ a, kʋ̃ tɛr fãw ɛ, a bɛl mɩŋa yel-bebe nɩ a bɛ sãàkʋm-kore yel-bebe zũú.»

«Ɛcɛ a bɛlɩ dem nãà wa cãà vʋʋrɛ a na sàw na kɛ́ bɛlɛ nɩ a bɛ sãà mɩnɛ maal'ɩ yel-bier, kɛ́ bɛ sãw mɛ̃ nɩ yaga, ɛ́ zawrɩ a ɩ̃ tub. Bɛ na bãwnɩ a pɛr, ɩ̃ na zawrɩ na tu bɛ, ɛ́ tɛr bɛ a bɛ tẽw yi cen nɩ a bɛ dɔ̃ dem tẽw pʋɔ a. Bɛ na siwr'ɩ bɛ tʋɔra, bɛ na bɛ tu a ɩ̃ pùor a ƴãw, ɛ́ bɛ na sàw nɩ a bɛ sãwna dɔwrʋ. Lɛ n'a ɩ̃ na lɛb bãwnɩ a wõ-taa ɩ̃ na maal'ɩ a bɛ sãàkʋm-kore Zakɔb, Ɩzaakɩ nɩ Abraham a. Ɩ̃ mɩ̀ na lɛb'a bãwnɩ k'ɩ̃ɩ ƴãw nɩ nʋɔr k'ɩ̃ɩ na kʋ̀ bɛ nɩ a tẽw ŋa. À ŋá n'a bɛlɛ bɛ wa cãà a tẽw ŋa pʋɔ a, a tẽw na tʋ̃ɔ́ pɩ̃ɛnɩ. A lɛn daar a, bɛ na nyɛ̃ nɩ a bɛ dɔwrʋ, bɛ na bɛr a ɩ̃ nɛ́ɛ ɛ́ lɔb a tub na yi a ɩ̃ zie bɛr a ƴãw. Ɛcɛ a lɛn daar bɛ na na saa cãà be a bɛ dɔ̃ dem tẽw pʋɔ a, ɩ̃ kʋ̃ jɛ bɛ bɛr ɛ, ɩ̃ kʋ̃ hɩ̃ɛn bɛ ɩ, ɩ̃ kʋ̃ kʋ bɛ pàw pɛr ɛ, ɩ̃ɩ kʋ̃ sãw a ɩ̃ wõ-taa bɛr ɛ, ɩ̃ na ɩ a Sore bɛ Naaŋmɩn a ƴãw. A bɛ maalʋ ƴãw a, ɩ̃ na lɛb'a bãwnɩ a wõ-taa ɩ̃ na maal'ɩ a bɛ sãàkʋm-kore a, a bɛl ɩ̃ na ɩ bɛ yi a Eziptɩ tẽw, a nɩ-bʋʋr-yoru niŋé, k'ɩ̃ɩ ɩ a bɛ Naaŋmɩn a. Mãa n'ɩ a Sore.»
A nɛ́ɛ, a tub nɩ a wulu n'ɩ à á ŋá na be a Sore nɩ Ɩsɩrayɛl nɩbɛ cara pʋɔ a. A Sore mɩŋa n'ʋ tɩ ƴãw a Moyiir tɩr a kʋ̀ bɛ a Sinayi tãw zu.

Geere nke a ntị Levitɩ mɩnɛ 26