Lik - 2013 WBT (NT) Non Drama

Lik - 2013 WBT (NT) Drama

Yesus arye el yupu peterenmok talak ara, ton nang arye ayupu nyabik. “Galilea tam nang, ton nang ara, ‘Nun malye winin ning Allah arye namin kipnamsile’ tenen, kam un ning obuka, Allah ati arinmek noutam ara, Pilatus arye nyapdeibukura, el yin talin nang arye aGalilea tam nang oplobik. Oplobikura, anang sik ining ap, sikce, ‘Allah arepnamap’ tenen, obuka arinmek ning ining ap, tabakuka ansinibuka biyuke,” nyanmek. Nyanmekura, Yesus kekebukce, ‘Ayupu nyapmaniyak nang ara, sik Galilea tam oplobik nang ara, pia malye ulamika deice arye oplobik, tenepmakce nyanmaniyake,’ tenebukura, ayupu nyabuk.
“Sikda, yuk nang ton weik ulamik bukni, ‘Sik Galilea tam akunum oplobik nang ara, pia malye winilamika ati, oplobike,’ tenepmalum ning ara, kume. Na dipkoprop nyapsine. Anggun babye, anggun malye winilulum ning batakuka, kanye tamuna kumopura, aminyan ara Allah arye oplopsilibuk dipmunyopura, ila tamubuka tonap kam pia kum upnamlume.” Yesus arye ayupu nyabuk.
Nyabukopura, ayupu tonap nyabuk. “Tonda, Siloam mutuku noutamak, weik cang aik domikbuk, lokuka bayukce, 18 nang obuk ning ara, Yerusalem mutuku ulamik nang ton mitik malye ubuka, ulamik nang ton aulamikbuk, ‘Anyaik lokuka obuk nang ara, pia malye winilamika arye,’ teneluluma ara, kume. Na dipkoprop nyapsine. Anggun babye, anggun malye winilulum ning batakuka, kanye tamuna kumopura, aminyan ara Allah arye oplopsilibuk, dipmunyopura, ila tamubuka tonap, kam pia kum upnamlume,” Yesus arye nyabuk.
Ayupu akunum nyabukopura, adiparyuk adomon yupu ton nyabuk.
Tonoknye bira, el wa wiamuk noutamak arye kwarang yo tonok kuamuk. Kouamukce daulamuka ani, ‘Duk moupmanil do?’ tenen, tuba-tuba dilbalamuk. Dilbalamuk bukni, duk pia kum mulamuk.
Duk kum moubuka ati, el wa wibuka kouamukbuk, melibuka dola kwelamuknye ati, ayupu nyabuk. “Keting tamun winilye deice arye, ‘Akwarang yo duk moupnamnil’ tenen, pia dilyangalamse bukni, duk tonok babye, kum moubuka ati, adiparyuk weploplyame. Tuku teleb ak koupse bukni, talye bokuk bolula ati, weploplyame,” nyabuk.
Nyabukura, el melibuka awa dola kwelamuknye birye tamubuka nyabuk. “Kume naio, ayo dawamlya ani, ‘Orkiting tamun duk moupnamle do’ tenen, narye tuku palibuka ap nirye, pinga deipdenibuk, orketing tamun duk mouplyopura, ‘Na’ tenen, daupnamle. Kumopura, anyapmanilam touk, weplopnamne,” nyabuk. Yesus arye, adomon yupu nyabuk.

Yuk talak ara, sik Yahudi yala nang Allah kina ati, pil dona kumce dikdik selamik sum, Sabat sum deice Yesus arye, Yahudi yala nang sik Allah yupu peterena aik wekelbiyukce, Allah yupu peterenmok. Yesus arye peterenmok talak, anyaik noutamak tonok kil isa talyamuka deice arye, nong amnyok dukamuk kil unmok. Akil ara, keting tamun yupa weik 18 tahun deice arye pia amnyok dukamuk arye, amnyok sisikuka tikropman kumto ulamuk. Yesus peterenmok aik ara akil bukmokak eibukce, “Abukmek nang urasin dam tikilyayo,” nyabukura, tikilyayuk. Tikilyayukopura, akil ati ayupu nyabuk. “Akilo, isa talipkukbuk, amnyok dukamkuk ara, akunum kwetepkine,” nyabuk. Yesus arye ayupu nyabukopura, akil nong deice taruk deibukura, adiparyuk akil sisikuka amnyok tikrobukce, Allah si erenmokce, Allah ati, “Telebe,” nyabuk.
Yesus arye akil kwetebukura, anyaik Allah yupu peteren aik talibuka ulamuka deiyoknye birye eibuk akarye, anyaik bukmek nang ati nyabuk. “Nagup sum deice aryuk pil donyapa noutam arye, ‘Anyaik pum kwetepsutue’ tenen, yangana teleb bukni, nun Allah si erena ati, dikdik senyap sum ara, ninye kwetelina ara, pil dona atonun anya arye, ‘Sabat sum deice arye kwetepnusile’ tenen, anyaik yangana kume,” nyabuka wenebuk. Nyabukura, Yesus arye anyaik deiyoknye biti tamubuka nyabuk.
“Anggun Farisi nang ara, anggun kanye talima noutamak pia malye ning aupmasilibuk, ‘Yuk nang arye nunti, teleb nang unyake, tenepnamsiyak’ tenen, nong bol deiceuk teleb winilalum nang atia. Anggun nirya ara, Sabat sum deice babye, anggun sapi basam ap, anggun keledai basam ap, aik dongopmamunya ani, ‘Mek dipnul’ tenen, aik buplan kukuka mek kin kum kirikilbalulum do? Diba anggun weilulum kam un ning nirya ara, sabat sum aupmalye babye, melibuka teleb kibuka melilulume.
Diba anggun aning awinilulum touk, Abraham yala nang arye deiamik kil ara, keting tamun 18 tahun deice arye isa talyamuk arye, amnyok dukamuk ak, kwetepmana ati, malye tenepmaluma ara, yata ati do? Sabat sum deice babye, anggun keledai basam lobuka, mek kin kirikilbalalum atonun, aisa talyamuk kil ara, yata ati, Sabat sum deice kum kweteptinye do?” Yesus arye anang ati, ayupu nyabukce wenebuk.
Nyabuka wenebukopura, Yesus yupu yanipmek nang kekebikce, alye ubukura, tunim abuka wekmek bukni, yuk nang ara, Yesus arye apia teleb pil donmokak eipmek nang, sik nirya arye, Yesus ati pia kanye deibik.


Yesus arye ayupu nyabukopura, awekuka kekenmek nang ati, adomon yupu tonap nyabuk.
“Ara, Allah arye ninye nirya lyeplirye, anggun talima talinamsila ara, ‘Anggun tenepnamlum’ tenen, winipmanto yupu ton nyapnusine. Allah arye ninye talinamsil atonun ning ara, ani.
Tonoknye birye, kabalye yo duk mitik bukni, wa wibukce, dokamukbuk, akabalye kwakuka nebukura, akabalye kwa lekukce, weik nebukura, maka yala-yala nirya ataruk deiceuk malyangalamik. Kabalye yo duk mitik bukni, weik nelamle touk, Allah arye ninye weik lyeplirye, sik kanya talima talipnamla ara, ninye yupa pia weik upninbanamle.” Yesus arye nyabuk.
Ayupu nyabukopura, adomon yupu ton nyabuk. “Allah arye ninye lyeplirye, anggun talima talinamsil atonun ning ton nyapnusine. Tonok kil arye, ‘Roti dapnun’ tenen, roti nena deiyok ning mitik tonun dobuka aroti bun deipmoka noutamak dongobukura, danmoka ani, aroti ara, weik arye nebuk. Ara roti nena deiyok ning ara, pia mitik ninguk bukni, aning weik nelamle touk Allah arye ninye lyeplirye, nirya talinamla ara, ninye yupa pia weik upninbanamle.” Yesus arye nyabuk.

Atalak arye dipdongobuka, Yesus arye, ‘Yerusalem mutuku obinamne,’ tenebukce, bisik mapnin banmok talak ara, mitik asik dolamikak ap, weik asik dolamikak ap, mapnin balamukce peterepnin banmok. Bisik mapnin banmokce, peterepnin banmok talak ara, tonoknye birye Yesus ati asipdeyuk. “Naio, Allah arye ninye mitik anunuk lyepnamle do, weik do?” nyabuka asipdeyuk. Nyabuka asipdeyukura, Yesus arye ayupu kekenmek nang nirya ati tamubuka nyabuk.
Na dipkoprop nyapsine, Allah arye ninye lyeplirye, sik kanya talima talinamsil talak ara, ninye weika arye, ‘Se, nun ton wektibye’ tenen, piripdenamak bukni, kum wekmanto upnamake. Allah ap neika unamabak ara, wekna buplan bisik ara, buplan pum pia mitik anya arye, ‘Anyaik wektinye’ tenen, pia pi deibuka mikip deice arye piripdenamlume.
Anyaik deiyoknye birye buplan akunum dekdongoplyopura, anggunda, buru tam buplan dam tikilbimunce, ‘Naio nun ton wektibye’ tenen, patapsila anya arye, “Nunti buplan kukdeipsilyame,” nyabuka, lorum-lorum abuka weik arye moropnamlum bukni, anyaik deiyoknye birye tamubuka, “Anggun dan mutuku arye yanmalum nang do? Na ap neika kum ulamubu ati, anggunda na pia walwale. Na tam nang kum ululume,” nyapsilirye, bataknamsile.
Nyapsilyopura, anggunce tamubuka nyapnamlume. “Kume naio, nunda an ap ulamubu talak ara, din ning ap, mek ap, neika dilamuburye, nun asik dam Allah yupu peterelamsulumura, kekelamupe,” nyapnamlume. Nyapnamlum bukni, adeiyoknye birye tamubuka nyapnamsile. “Anggun dan mutuku arye yanmalum nang do? Na ap neika kum ulamubu ati, anggunda na pia walwale. Na tam nang kum ululume. Anggunda, pia malye winilalum nang anya arye, anggun adiparyuk yuk-yukak bindoplulume. Na dam kum unamlume,” nyapnamsile.
Nyaplirye, pia buru tam dopkwetepsilye karen, yukak bimunyopura, Abraham ap, Isak ap, Yakup ap, Allah yupu laka nyalamik nang sik nabi-nabi nirya ap, Allah pia talinamsilak neika unamaba eipmunce, pia imun kanye bobuka, gisok talibuka engepmunce, yuk anye bopnamlume. Anggun Farisi nang ara, pia buru tam dopkwetepnamsilbuk, yuk nang ara, keting yangan tam ap, keting wekelban tam ap, dabu tam ap, iknapye tam ap, yanganamake. Yakceura, Allah ninye nirya talinamsilak kwalibuka deiplyeura, ‘Dinamak’ tenen, Allah arye akunum kintinepdeipsuk ak, bulyanganamake.
Tonda aning ton nyapsine. Wini talak ninye arye, ‘Anang ara mambul kum nang’ tenen, sikda bicoto ubuka amuak unyak nang ara, aminyan talak ara, Allah arye anang ereiplirye, pia sisin nang kipdeipnamle. Aning atonun, wini talak yuk nang arye, ‘Anang ara sisin nang’ tenen, erenang kipdeibiceba unyak nang ara, aminyan talak ara Allah arye amu tam kipdeipleba, sikda mambul kum nang unamyake. Yesus arye nyabuk.

Yesus arye ayupu nyabuk talak ara, sik Farisi nang Yesus dam yayikce, ayupu nyabik. “Amutuku weik deiyoknye Herodes arye, ‘Anye bira, optine,’ tenekulule anya arye, amutuku batakuka yukak binamlyame,” nyabik. Nyabikura, Yesus arye anang ati tamubuka nyabuk. “Herodes ara, tenepce arye talye yupu nyaltakalulnye ati, na nyapnusin yupu dobuka, el dam laka nyalbinamlulume.”
“Yesus arye anti nyakelule, ‘Narye, arup ap, ambusum ap, orsum ap ara, ninye talyamuk isa yakuka dolkwetena ap, ninye uk kwetena ap, unamne. Winipnin balamnya ani, na tenepse pil sirya binuka daknamne,’ nyalule. Yesus arye ayupu nyapdeibuk. Ayupu bobuka, Herodes dam nyalbinamlulume,” Yesus arye nyabuk. Nyabukce, ayupu ton nyabuk. “Herodes arye nati ‘Anye bira optinye,’ tenepnutu bukni, na kabula, min kum opnamnile. Na pil dopnin balamnya ani, Yerusalem mutuku dipkoprop binamne. Ara talye ati kum nyapne. Allah yupu lak kibuka laka nyanyak nang sik nabi-nabi nang ara, yuk mutuku kum onyake. Yerusalem mutuku noutamuk onyaka ati, Yerusalem mutuku noutam binamnarya nyapne,” Yesus arye nyabuk.
Nyabukopura, ayupu tonap, dukdongobuka nyabuk.
Ara, anggun Yerusalem mutuku ululum ninye ara, Allah yupu laka nyabuka peteren nang Allah arye nabi-nabi nang weik, anggun dam dolkwetelul bukni, anggunce anabi sik nong deice keil dobuka ona ap, tonda, talye oltakana ap winilulume. Narye anggun Yerusalem mutuku ululum nang ati, ‘Ayam amaka el mapu irilamle touk, na wiamse kili sal, kalikuka melipnamsin’ tenen, patasiliba anggunti tuba tenesinye bukni, anggun Yerusalem deiyok nang arye, ‘Anye Yesus bira nun lik’ tenen, batakanululume.
Aning ati ara, anggun Allah ati arilbalalum aik ara, Allah arye bataklyeura, anyaik ara talye louk upnamle. Ara talye ati kume. Narye anggun batakuka bisinyopura, dotalak nirya ara, na ton kum eipnamnulume. Daulamunya ani, na si erenamnulum talak ara eipnamnulume. Atalak ara, anggunce, ‘Se, Ninye Lyenanye, Mesias nyanyapnye akunum yanmasile,’ tenen, biknamnulum talak ara, ayupu nyapnamnulume. ‘Allah el mikip ap, el si ap deice arye yanmasilinye bira, weik mambulnye anya arye, pia telebuk unamle,’ nyabuka, na si erenamnulum talak ara, atalakuk eipnamnulume. Yesus arye sik Farisi nang ati nyabuk.

Geere nke a ntị Lukas 13