If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

तब पवित्र आत्मा ईशु नु बरब्याना मां गेहती गेला कि शैतान ओची परीक्षा गिहो। ईशु चालीस ङिओ, ते चालीस रात, उपवास करला, आखिर मां ओनु भोक्‍क लाग़ली। बल्ति परखणे आले शैतान ने गोढु आती कर केहले, “अगर तु नरीकारा चा पूत छी, तां केहती ङे, कि ये पत्थर रोटीया बणती जाओ।”
पर ईशु ने ओनु उत्तर ङिला, “पवित्रशास्त्र मां लिखले आले छै, ‘बन्दे सेर्फ रोटी लारे ही कोनी, पर नरीकारा चे मुँहा कनु निकड़ले आले हर हेक वचना लारे जीते रिही।’ ”
बल्ति शैतान ओनु पवित्र शहर यरुशलेम मां गेहती गेला ते मन्दरा चे कंगूरे उपर खड़े करले, ते शैतान ने ओनु केहले, “अगर तु नरीकारा चा पूत छी, तां आपणे आप नु तले ढाती नाख, कांकि लिखले आले छै, ‘ओ दुधे बारे मां आपणे स्वर्ग़दूता नु हा आज्ञा ङी, ते वे तनु हाथो हाथ चती गिहे, कङी इसड़े ना हो कि दुधे पग़्ग़ा नु पत्थरा लारे ठोकर लाग़ो।’ ” ईशु ने उत्तर ङिला, “ईं वी पवित्रशास्त्रा मां लिखले पले, ‘तु प्रभु आपणे नरीकारा ची परीक्षा ना कर।’ ”
बल्ति शैतान ओनु हेक ब़ोहत बङे पहाड़ा उपर गेहती गेला ते सारे जग़त चे राज़ ते वांची शोहरत ङिखाणती कर, ओनु केहले, “अगर तु माये आग़ु ढेती कर प्रणाम करी, तां मैं ईं सब कोच्छ तनु ङिती ङी।”
बल्ति ईशु ने केहले, “शैतान, दूर हुती जा! कांकि पवित्रशास्त्रा मां लिखले पले, ‘तु प्रभु आपणे नरीकारा नु प्रणाम कर, ते सेर्फ ओची ही उपासना कर।’ ”
बल्ति शैतान ओनु छोड़ती कर चाह्‍ला गेला, ते ङेखा, स्वर्ग़दूत आती कर ओची सेवा करु लाग़ले।


ईशु ने जिसे बेले सुणले कि यूहन्‍ना पकड़ीती चुकला ते ओ गलील प्रदेस सनु चाह्‍ला गेला। पर ओ नासरत मां कोनी रुकला ते जती कर कफरनहूम शहरा मां, जको जबूलून ते नप्ताली क्षेत्र मां गलील ची झील चे गोढु हुता, रिहुं लाग़ला। ईं ऐवास्ते हुले कि नरीकारा ने भविष्यवक्‍ता यशायाह चे जरिये जको केहले हुते, ऊं पुरे हो। कि “जबूलून ते नप्ताली चे देश, झील चे मार्ग़ कनु यरदन नदी चे पक्षिम मां, नेरीया जातिया चे देश गलील मां। जको लौक अन्धारे मां जई पलते वाणे हेक बङे सोज़ले ङेखले। ते जको लौक मौत कनु ङरती कर जीवी पलते, वांचे उपर, बङे सोज़ले पड़ले।”
ओ समय कनु ईशु ने सुसमाचार चा प्रचार करना ते ईं केहणे शुरु करले, “आपणे पापा कनु मन फिरावा कांकि स्वर्ग़ चा राज़ गोढु छै।”


ईशु ने गलील ची झील चे किनारे फिरते हुले ङुंहु भावां नु यानि शमौन नु जको पतरस किहवावे, ते ओचे भऊ अन्द्रियास नु झील मां जाल नाखते ङेखले, कांकि वे मछुवारे हुते। ईशु ने वानु केहले, “माये भांसु चाह्‍ले आवा, तां मैं तम्हानु नरीकारा चे गोढु लौका नु गेहती आणने आले इन्सान बणावी।” वाणे तुरन्त आपणे-आपणे जाला नु छोड़ती कर ओचे भांसु टुरती पले।
ते उठु उग़ते बधती कर, ओणे नेरे ङुंहु भावां यानि जबदी चा पूत याकूब ते ओचा भऊ यूहन्‍ना नु आपणे ब़ा जबदी चे लारे ब़ेड़ी मां ब़ेसती कर आपणे जाल सुधारते ङेखले, ते वानु वी हकारले। ते वे हेकदम ब़ेड़ी ते आपणे ब़ा नु छोड़ती कर ओचे भांसु टुरती पले।


ईशु सारे गलील प्रदेस मां फिरता हुला वांचे प्राथनाघरा मां उपदेश करता, ते नरीकारा चे राज़ चा सुसमाचार प्रचार करता, ते लौका ची हर-प्रकार ची बिमारी ते कमजोरी नु दूर करता रेहला। सारे सीरिया देशा मां ओचा समाचार फैलती गेला ते लौक सारा बिमारा नु, जको हर तरह चीया बिमारीया मां ते ङुखा मां जकड़ले आले हुते, ते जाये मां दुष्टात्मा हुतीया, ते मिर्गी आले, ते लकवे चे मारले आले हुते, ओचे गोढु गेहती आले, ते ओणे वानु ठीक करले। गलील ते दिकापुलिस, यरुशलेम ते यहूदिया ते यरदन नदी चे पार कनु भीड़ ची भीड़ ओचे भांसु टुरती पली।

Geere nke a ntị मत्ती 4