If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

“ଲକ୍‌ମ୍‍ନ୍‌କେ ଦ୍‍କାଇ ଅଉତାର୍ ଗିନେ ସେମ୍‍ନ୍‍କାର୍ ଲ୍‌ଗେ ଦ୍‌ର୍‌ମାର୍ କାମ୍ କ୍‍ରାନାଇ, ନ୍‌ଇଲେକ୍ ସ୍‌ର୍‌ଗାର୍ ଉବାର୍ ତ୍ଇହ୍‍ଣି ତୁମାର୍‌ମ୍‌ନ୍‌କାର୍ ଇନାମ୍ ନାଇ, ଇତାର୍‍ଗିନେ ତୁମିମ୍‍ନ୍ ସାବ୍‍ଦାନ୍ ଅଇରିଆ। ସେତାକ୍ ଦାନ୍ ଦକିଣା ଦେତାବ୍‍ଳ୍ ଅକାରିଆ ମ୍‌ନ୍‌କାର୍ ହର୍ ନିଜାର୍ ଲ୍‌ଗେ ମରି ହୁକି ଦ୍‍କାଇ ଅଉଆନାଇ। ସେମ୍‍ନ୍ ଲକ୍‍ମ୍‍ନ୍‍କାର୍ ତ୍‌ଇ ଗ୍ଉରବ୍ ହାଉତାର୍ ଗିନେ ପାର୍‌ତେନା ଗ୍‍ରେ ଆର୍ ସକ୍‍ଳିୟେ, ସେନ୍‍କ୍‌ରି କ୍‌ର୍‌ତି। ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ସେମ୍‍ନ୍ ନିଜାର୍ ନିଜାର୍ ଇନାମ୍ ହାଇଲାଇ ଆତ୍‍ତି।
ମ୍‍ତର୍ ତୁମି ଦାନ୍ ଦକିଣା ଦେତାବ୍‍ଳ୍ ତୁମାର୍ ଡେବ୍‍ରିଆତ୍ କାଇରି କ୍‌ରୁଲି ସେରି ତୁମାର୍ କାତାଆତ୍ ନ୍‍ଜାଣେ, ଜ୍‌ନ୍‌କ୍‌ରି ତୁମାର୍ ଦାନ୍ ଦକିଣା ଲୁକ୍‍ଣେ ଅଇଦ୍, ଆରେକ୍‌ ତୁମାର୍ ଉବା ଇଶ୍ୱର୍‌ ଯେ ଲୁକ୍‍ଣେ ଦ୍‍କ୍‌ତି, ସେ ତୁମୁକେ ତାର୍ ହ୍‍ଳ୍ ଦେଇଦ୍।”


“ପାର୍‌ତେନା କ୍‌ର୍‌ତାବ୍‌ଳ୍ ଅକାରିଆ ମ୍‌ନ୍‌କାର୍ ହର୍ ଅଉଆନାଇ, କାଇତାକ୍ ସେମ୍‍ନ୍ ଲକ୍ ଦ୍‍କାଉତାର୍ ଗିନେ ପାର୍‌ତେନା ଗ୍‍ରେ ଆର୍ ବାଟ୍ ଚକାର୍ କନେ ଟିଆଅଇ ପାର୍‌ତେନା କ୍‌ରୁକେ ବ୍‍ଲ୍ ହାଉତି। ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ସେମ୍‍ନ୍ ନିଜାର୍ ନିଜାର୍ ଇନାମ୍ ହାଇଲାଇ ଆତ୍‍ତି। ମ୍‍ତର୍ ତୁମି ପାର୍‌ତେନା କ୍‌ର୍‌ତାବ୍‌ଳ୍ ତୁମାର୍ ଲୁକିରିଲା ବିତୁର୍ ଗ୍‍ରେ ହୁରା, ଆରେକ୍‌ ତୁମାର୍ କାହାଟ୍‍କେ ବ୍‌ନ୍ଦ୍‌କ୍‌ରି ତୁମାର୍ ଲୁକିରିଲା ଉବାର୍ ମୁଏ ପାର୍‌ତେନା କ୍‍ରା। ଆର୍ ତୁମାର୍ ଉବା ଯେ କି ଲୁକିରିଲା କ୍‌ତା ଦ୍‍କେଦ୍, ସେ ତୁମୁକେ ହ୍‍ଳ୍ ଦେଇଦ୍। ଆରେକ୍‌, ପାର୍‌ତେନା କ୍‌ର୍‌ତାବ୍‌ଳ୍ ଯିହୁଦି ଚାଡି ବିନ୍‍ଜାତିର୍ ଲକ୍‍ମ୍‍ନ୍‍କାର୍ ହର୍ ଗଟେକ୍ କ୍‌ତାକେ ବାର୍-ବାର୍ କ୍ଉଆନାଇ, କାଇତାକ୍ ସେମ୍‍ନ୍ ବେସି କ୍‌ତା କଇଲେକ୍ ତାକାର୍ ପାର୍‌ତେନା ଶୁଣା ଅଇଦ୍ ବ୍‍ଲି ମ୍‌ନେ ବାବ୍‍ତି।
ସେତାକ୍ ସେମ୍‍ନ୍‍କାର୍ ହର୍ ଅଉଆନାଇ, କାଇତାକ୍ ତୁମାର୍‌ମ୍‌ନ୍‌କାର୍ କାଇରି ଦ୍‌ର୍‌କାର୍ ସେରି ମାଗ୍‌ତା ଆଗେ, ସେରି ତୁମାର୍ ଉବା ଇଶ୍ୱର୍‌ ଜାଣେଦ୍। ତ୍‍ବେ ତୁମିମ୍‍ନ୍ ଅନ୍‌କ୍‌ରି ପାର୍‌ତେନା କ୍‍ରା, ‘ଏ ଅମାର୍ ସ୍‌ର୍‌ଗାର୍ ଉବା, ତୁମାର୍ ନାଉଁ ପବିତର୍‌ ବ୍‍ଲି ମାନ୍ୟ ଅଉଅ।
ତୁମାର୍ ରାଇଜ୍ ଆସ। ଜ୍‌ନ୍‌କ୍‌ରି ସ୍‌ର୍‌ଗେ, ସେନ୍‍କ୍‌ରି ହୁର୍‌ତିବି ତ୍‌ଇ ତୁମାର୍ ଇଚ୍ଚା ହୁରା ଅଉଅ।
ଆଜି ଅମାର୍ ଦ୍‌ର୍‌କାର୍ ରିଲା କାଦି ଅମୁକେ ଦିଆ।
ଅମିମ୍‍ନ୍ ଜ୍‌ନ୍‌କ୍‌ରି ନିଜାର୍ ନିଜାର୍ ଦସି ମ୍‌ନ୍‌କେ କେମା କ୍‌ରିଆଚୁ, ସେନ୍‍କ୍‌ରି ଅମାର୍ ଦସ୍ ସ୍‍ବୁ କେମା କ୍‍ରା।
ଶଇତାନାର୍ ପରିକ୍ଯାଇ ଅମୁକ୍ ଆଣାନାଇ, ମ୍‍ତର୍ କ୍‌ରାପ୍‌କାମେ ହ୍‍ଣି ଉଦାର୍ କ୍‍ରା। ତୁମାର୍ ରାଇଜ୍, ସ୍‍ବୁ ବ୍‍ଡ୍ ଶ୍‌କ୍‌ତିର୍ କାମ୍ ଆର୍ ଗ୍ଉରବ୍ ଯୁଗ୍ ଯୁଗ୍ ତୁମାର୍ ଅଉଅ। ଆମେନ୍।’
କାଇତାକ୍ ତୁମି ଜ୍‍ବେ ଲକ୍‍ମ୍‍ନ୍‍କାର୍ ଦସ୍‌କେ କେମା କ୍‍ରାସ୍, ତ୍‍ବେ ତୁମାର୍ ସ୍‌ର୍‌ଗାର୍ ଉବା ହେଁ ତୁମୁକ୍‌ମ୍‌ନ୍ କେମା କ୍‍ରେଦ୍। ମ୍‍ତର୍ ଜ୍‍ବେ ତୁମି ଲକ୍‍ମ୍‍ନ୍‍କାର୍ ଦସ୍ କେମା ନ୍‌କେରାସ୍, ତ୍‍ବେ ତୁମାର୍ ଉବାଦି ହେଁ ତୁମାର୍ ଦସ୍ ସ୍‍ବୁ କେମା ନ୍‌କେରେ।”

“ଉପାସ୍ କ୍‌ର୍‌ତାବ୍‌ଳ୍ ଅକାରିଆ ମ୍‌ନ୍‌କାର୍ ହର୍ ଅଉଆନାଇ, କାଇତାକ୍ ସେମ୍‍ନ୍ ଉପାସ୍ କ୍‌ରୁଲାଇ ବ୍‌ଲି ଲକ୍‍ମ୍‍ନ୍‍କାର୍ ଆଗେ ଦ୍‍କାଇ ଅମ୍‍କେ ନିଜାର୍ ନିଜାର୍ ମୁଉ ସୁକାଉତି। ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ସେମ୍‍ନ୍ ନିଜାର୍ ନିଜାର୍ ଇନାମ୍ ହାଇଲାଇ ଆତ୍‍ତି। ମ୍‍ତର୍ ତୁମି ଉପାସ୍ କ୍‌ର୍‌ତାବ୍‌ଳ୍ ତୁମାର୍ ମୁଣ୍ଡେ ଚିକାଣ୍ ଲାଗାଉଆ ଆର୍ ମୁଉ ଦ୍‌ଉଆ, ଜ୍‌ନ୍‌କ୍‌ରି ତୁମି ଉପାସ୍ କ୍‍ରୁଲାସ୍ ବ୍‌ଲି ଲକାର୍‌ ଆଗେ ଦ୍‍କାଇ ନଅଇ ମ୍‍ତର୍ ଲୁକି କ୍‌ରିରିଲା ତୁମାର୍ ଉବାର୍ ଲ୍‌ଗେ ଦ୍‍କାଇ ଅଉଆ। ଆର୍ ତୁମାର୍ ଉବା ଯେ ଲୁକିକ୍‌ରି ଦ୍‍କେଦ୍, ସେ ତୁମୁକେ ହ୍‍ଳ୍ ଦେଇଦ୍।”


“ଜୁଇତି କିଳା ଆର୍ କିଲୁଆ କାଇଦ୍ ଆରେକ୍‌, ଚର୍‍ମ୍‍ନ୍‍ କ୍‌ତି ବାଙ୍ଗି ଚର୍ କ୍‌ର୍‌ତି, ଅନ୍‌କ୍‌ରି ହୁର୍‌ତିବି ନିଜାର୍ ନିଜାର୍ ଗିନେ ଦ୍‍ନ୍ ସ୍‌ମ୍‍ପତି ଗାଦା କ୍‍ରାନାଇ। ମ୍‍ତର୍ ଜୁଇତି କିଳା ଆର୍ କିଲୁଆ ନ୍‍ଷ୍ଟ ନ୍‌କେରେ ଆର୍ ଚର୍‍ମ୍‍ନ୍‍ କ୍‌ତି ବାଙ୍ଗି ଚରି ନ୍‌କେର୍‌ତି, ମ୍‍ତର୍ ବ୍‌ଲ୍‌କାମ୍‌କ୍‍ରି ସ୍‌ର୍‌ଗେ ନିଜାର୍ ନିଜାର୍ ଗିନେ ଦ୍‍ନ୍ ସ୍‌ମ୍‍ପତି ସ୍‍ଙ୍ଗାଉଆ, କାଇତାକ୍ ଜୁଇତି ତୁମାର୍ ଦ୍‍ନ୍ ର୍‌ଇଦ୍, ସେତି ହ୍‌କା ତୁମାର୍ ମ୍‌ନ୍ ର୍‌ଇଦ୍।”


“ଆକି ଗ୍‍ଗାଳାର୍ ଗିନେ କୁପି ହର୍। ତ୍‍ବେ ତୁମାର୍ ଆକି ଯ୍‌ଦି ନିର୍‌ମୁଳ୍ ର୍‌ଇଦ୍, ତ୍‍ବେ ତୁମାର୍ ସ୍‍ବୁ ଗ୍‌ଗାଳ୍ ଉଜାଳ୍ ଅଇଦ୍। ମ୍‍ତର୍ ତୁମାର୍ ଆକି ଜ୍‍ବେ କ୍‍ରାପ୍ ର୍‌ଇଦ୍, ତ୍‍ବେ ତୁମାର୍ ସ୍‍ବୁ ଗ୍‌ଗାଳ୍ ଅନ୍ଦାର୍ ଅଇଦ୍। ଯ୍‌ଦି, ଜ୍‍ବେ ତୁମି କ୍‍ରାପ୍ କ୍‌ତା ବାବାସ୍ ଆର୍ ଉଜାଳେ ଆଚି ବ୍‌ଲି କ୍ଉଆସ୍, ମ୍‍ତର୍ ତୁମି ବେସି ଅନ୍ଦାରେ ସେ ରିଆସ୍‌, ହ୍‌ଚେ ତୁମାର୍ ବିତ୍‌ରେ ଅନ୍ଦାର୍ ଆର୍ ବେସି ଅନ୍ଦାର୍!”


“କୁଇଲକ୍ ଗଟେମାଡେ ଜଳେକ୍ ମାପ୍‌ରୁର୍ ଦାସ୍ ଅମ୍‌ନାହାରେ। ଗଟେକ୍ ଲକ୍‌କେ ଲାଡ୍ କ୍‍ରେଦ୍ ଆରେକ୍‌ ଗଟେକ୍ ଲକ୍‌କେ ଲାଡ୍ ନ୍‌କେରେ, ଗଟେକ୍ ଲକାର୍‌ କାମ୍ ବ୍‌ଲ୍‌ବାବେ କ୍‍ରେଦ୍ ଆର୍ ଆରେକ୍‌ ଗଟ୍‌ଲକାର୍ କାମ୍ ବ୍‌ଲ୍‌ବାବେ ନ୍‌କେରେ। ତ୍‍ବେ ତୁମିମ୍‍ନ୍ ଇଶ୍ୱର୍‌ ଆର୍ ହୁର୍‌ତିବିର୍ ଦ୍‍ନ୍ ଇ ଦୁଇଲକାର୍ ଚାକର୍ ଅମ୍ ନ୍‌ହାରାସ୍।”


“ଇତାର୍‍ଗିନେ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ବାଚ୍‍ତାର୍ ଗିନେ ଦ୍‌ର୍‌କାର୍ ରିଲା କାଦିର୍ ବିଷୟେ ଆର୍ ଗ୍‍ଗାଳାର୍ ଗିନେ ହ୍‌ଚିଆର୍ ବିଷୟେ ବାବିକ୍‌ରି ଚିନ୍‍ତା କ୍‍ରାନାଇ। କାଦି ତ୍‌ଇହ୍‌ଣି ଜୀବନ୍ ଆର୍ ହ୍‍ଚିଆ ତ୍‌ଇହ୍‌ଣି ଗ୍‌ଗାଳ୍ କି ବ୍‍ଡ୍‍ନଇ? ଆକାଶାର୍ ଚେଳେ ମ୍‌ନ୍‌କେ ଦ୍‌କା, ସେମ୍‍ନ୍ ବିଆନ୍ ନ୍‍ବୁଣ୍‍ତି କି ନ୍‍କାଟ୍‌ତି କି ହାଲାଇ ନ୍‍ସେଙ୍ଗାଉତି, ମ୍‍ତର୍ ସ୍‌ର୍‌ଗାର୍ ଇଶ୍ୱର୍‌ ସେମ୍‍ନ୍‍‍କେ କାଦି ଦେମ୍‍ଲା। ଆର୍ ତୁମିମ୍‍ନ୍ କାଇରି ଚେଳେ ମ୍‌ନ୍‌କାର୍ ତ୍ଇହ୍‍ଣି ଅଦିକ୍ ମୁଲ୍ୟବାନ୍ ନଇ?
ଆରେକ୍‌, ତୁମାର୍‌ମ୍‌ନ୍‌କାର୍ ବିତ୍‌ରେ କେ, ଚିନ୍‍ତା କ୍‍ରି କ୍‍ରି ନିଜେ ବେସିଦିନ୍‌ ଜୁମ୍‌ ହାରାସ୍? ଆର୍ ହ୍‌ଚିଆର୍ ଗିନେ କାଇତାକ୍ ଚିନ୍‍ତା କ୍‍ରୁଲାସ୍? ବଗିଚାର୍ ହୁଲ୍ ମ୍‌ନ୍‍କାର୍ ବିଷୟେ ଚିନ୍‍ତା କ୍‍ରି ଶିକ୍ୟା କ୍‍ରା, ସେ ହୁଲ୍ ବୁଟାମ୍‍ନ୍ କ୍‍ନ୍‍କ୍‍ରି ବାଡେଦ୍। ସେ ସ୍‍ବୁ କ୍‌ଷ୍ଟ ନ୍‌କେର୍‌ତି, କି ସୂତା ନ୍‍କାଟ୍‌ତି, ଅଇଲେକ୍ ହେଁ ମୁଇ ତୁମୁକ୍ କ୍‌ମ୍‌ଲେ, ଯେ ର୍‍ଜା ଶଲୋମନାର୍ ଅତେକ୍ ଦ୍‍ନ୍ ସ୍‌ମ୍‍ପତି ରେଇକ୍‍ରି ହେଁ, ହୁଲାର୍ ସୁନ୍ଦୁର୍ ହ୍‍ର୍ ଗଟେକ୍ ହେଁ ବିଷୟ୍ ତାର୍ ଲ୍‌ଗେ ନ୍‌ରିଲି। ମ୍‍ତର୍ ହ୍‍ଦାର୍ ଜୁଇ ର୍‍ନ୍ ଆଜି ଆଚେ, ଆର୍ କାଲିକେ ଚୁଲାଇ ହ୍‌କା ଅଇଦ୍, ତାକେ ଜ୍‍ବେ ଇଶ୍ୱର୍‌ ଅନ୍‌କାର୍ ରୁପ୍ ଦେଇଦ୍, ତ୍‍ବେ, ଏ ଅଳକ୍ ବିସ୍‍ବାସି ମ୍‌ନ୍, ସେ କାଇରି ତୁମୁକ୍ ସ୍‌ତ୍‌କ୍‌ରି ଅଦିକ୍ ହିନ୍ଦୁକେ ନ୍‍ଦେଇଦ୍? ସେତାକ୍ କାଇରି କାମା? କି କାଇରି ଡୁକୁମା? କି କାଇରି ହିନ୍ଦୁମା? ଇରି କ୍ଇ ଚିନ୍‍ତା କ୍‍ରାନାଇ।
କାଇତାକ୍ ଯିହୁଦି ନ୍‌ଇଲାଲକ୍ ଇ ସ୍‌ବୁ ବିଷୟ୍ କଜି ବୁଲ୍‌ତି। ଆର୍ ଇ ସ୍‌ବୁ ବିଷଇ ଯେ ତୁମାର୍ ଦ୍‌ର୍‌କାର୍ ଆଚେ, ସେରି ତୁମାର୍ ସ୍‌ର୍‌ଗାର୍ ଉବା ଜାଣେଦ୍। ମ୍‍ତର୍ ହ୍‌ର୍‍ତୁ ତୁମିମ୍‍ନ୍ ଇଶ୍ଵରାର୍ ରାଜିର୍‌ ଆର୍ ଗଟେକ୍ ଦ୍‌ର୍‌ମ୍ ଜୀବନେ ଜିଉଁକେ ଚେଷ୍ଟାକ୍‌ରା, ଆର୍ ଇ ସ୍‌ବୁ ବିଷଇ ହେଁ ତୁମୁକ୍‌ମ୍‌ନ୍ ଦିଆଅଇଦ୍। ତ୍‍ବେ କାଲିର୍ ଗିନେ ଚିନ୍‍ତା କ୍‍ରାନାଇ, କାଲି କାଲିର୍ ଗିନେ ନିଜାର୍ ଚିନ୍‍ତା ନିଜେ କ୍‍ରେଦ୍। ଆଜିର୍ କ୍‌ଷ୍ଟ ଆଜିର୍ ଗିନେ ବେସି।”

Geere nke a ntị ମାଥିଉ 6