Gbaya Northwest - 1995 - BSCAM NT Drama

KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.

O bíí kura lɛŋ, ɓɛɛ wa mgbɔ a̧ nɛnɛ si ti Pilat. Ɓɛɛ wa ku̧ naŋ ɓira wen e nú-a hee mɔ'ɔ ga: «Ɛɛ kpaa wi’ɛ fara a wen ha̧ tugun bíí k’ɛɛ mɛ de ŋgazu, a̧ dora o bíí tɛ gboo garama ha̧ Sezar, in a̧ tɔ̧ɔ̧ mbɛt ndé: A̧ nɛ́ Mɛsii, a̧ nɛ́ wannu.» Ɓɛɛ Pilat ak a̧: «Mɛ́ nɛ́ wannu ko o Juif nde?» Jesu kifa nú: «Nɛ́ mɛ́ a̧ tɔ̧.» Pilat tɔ̧ɔ̧ ha̧ o gasa wan-ɗafi-sɔ̧ in giiwi: «Mi kpa kɔ‘m ŋma mɔ tɛ wi’ɛ nɛ̀ nyɛma ha̧ kita mɛ tik a̧ na.» Ɓɛɛ kɔ-wa kànà nɛ́ tɔ̧a̧-a̧‘e: «A̧ á nɛ́ wen ha̧ dukbíí, usi nɛ̀ mɔ nú Judee lɛŋ, ku̧u̧naŋ-a nɛ̀ nú Galilee mɛ hɔ nɛnɛ hɛ̧ɛ̧.»

Pilat zia wen'i ɓɛɛ ak mɔ kà a̧ nɛ́ bòò nɛ́ be Galilee. Ɗoŋ nɛ̀ Pilat iŋa ndé Jesu nɛ́ be-nù ko Herod, a̧ toma a̧ nɛnɛ ha̧ Herod nɛ̀ a̧a̧ so Jerusalɛm tɛ ŋgimbi'i mbɛt. Herod zɔka Jesu, ɓɛɛ kpa desee nyɛmna, wen ɓeemɛ a̧ kɔ̧ɔ̧ so mɛ zɔk Jesu, wen nyɛrɛmɔ ko Jesu n'aa duka so zii; ɓɛɛ a̧ kɔ̧ɔ̧ so mɛ zɔk Jesu fara de mɔɔ-kifi mbɛt. A̧ tuɓa da̧ ak nɛ̀ Jesu, ɓɛɛ Jesu kifi nú ha̧ a̧ kóó war kpɔk na. O gasa wan-ɗafi-sɔ̧ nɛ̀ yaa so hi̧i̧ in o wi-usi-heembea mbɛt ɓira wen de nɛ̀ ŋga ndela e nú Jesu. Herod in o wi-biro kɔ‘i ee Jesu tɛ geemɔ, wa zɛkɛɗa a̧, ɓɛɛ wa pi̧ de gasa toka laa zar-zar tɛ a̧, ɓɛɛ Herod tom a̧ si ɗoŋ tɛ Pilat. Nɛ́ kale wese'i a̧ Herod in Pilat dee nɛ̀ sɛm, wen nɛti wa yaa so nɛ́ o wisɛn.


Pilat saa gasa wan-ɗafi-sɔ̧, in o gasawi gú nɛ̀ o bíí, ɓɛɛ tɔ̧ ha̧ wa: «Ɛnɛ baa wi’ɛ tɛnɛ ha̧‘m'e, a̧ ɔr nɛ́ dukbíí gɔ! Kɔ‘m mi aka a̧ ti'nɛ́, ɓɛɛ mi kpa ŋma ɗaŋmɔ n’ɛnɛ wula a̧ wen-aa ha̧ kita mɛ tik a̧ na. Herod mbɛt kpa ŋma ɗaŋmɔ tɛ a̧ na, wen n'aa toma a̧ pii nɛ̀ ɗoŋ h’ɛ́ɛ́ woyo. Ŋma mɔ n'aa dee nɛ̀ nyɛma ha̧ a̧ mɛ fe wen-aa bo na. Hegɔ, mi tɛ gusi nɛ́ a̧, ɓɛɛ mi siŋa a̧ pi̧ nù.» [ Tɛ́ gbaŋa ɓɔnsɛnɛ, Pilat tɛ gbo kànà ŋma wi-zɔɓɔ kpɔk pi̧ nù ha̧ wa.] Wa lɛŋ ku̧u̧ naŋ hiɗa mɔ nɛ̀ ŋgaya-a tɔ̧ nɛnɛ'ɛ: «Ɛ̀nɛ̀ gbɛ́ wi’ɛ yinɛ, ɓɛɛ ɛ̀nɛ̀ gbó nɛ́ Barabas h’ɛ́ɛ́.» [ Wa pi̧i̧ so Barabas zɔɓɔ wen dika-a nɛ̀ o bíí saaye dika so gɛrɛm ŋma wese, ɓɛɛ bíí fe sɛnɛ mbɛt.] Pilat taa mɔ mɛ gbo Jesu pi̧ nù, ɓɛɛ tɔ̧ wen ha̧ wa woyo, ɓɛɛ wa gai mɔ: «Ɛ̀nɛ̀ mgbóí a̧ zu te-diŋa! Ɛ̀nɛ̀ mgbóí a̧ zu te-diŋa wa!» Pilat tɔ̧ɔ̧ ha̧ wa woyo, war taar-a nɛ́ mɔ‘i: «Wi’ɛ dee nɛ́ ge ɗaŋmɔ ge? Mi kpa ŋma ɗaŋmɔ n'aa dee wen ha̧ a̧ mɛ fe na. Hegɔ, mi tɛ gus'aa, ɓɛɛ mi siŋa a̧ pi̧ nù.» O bíí gaia mɔ siti nɛ̀ ŋgaya-a wen ha̧ a̧ mɛ mgboi Jesu zu te-diŋa; ɓɛɛ gayamɔ kɔ-wa'i de ha̧ Pilat mɛ kpɛk mɔ nɛ̀ o bíí kɔ̧a̧. Ɓɛɛ a̧ tɔ̧‘e, a̧ tɛ de nɛ́ mɔ nɛ̀ wa kɔ̧a̧. Pilat gboo wi nɛ̀ yee so zɔɓɔ wen dee ŋgazu in gbɛɛzu'i, wan nɛ̀ giiwi aka so ha̧ a̧ mɛ gbo a̧ ha̧ wa'i, ɓɛɛ ha̧ Jesu ha̧ wa mɛ de mɔ in a̧ hee mɔ'ɔ nɛ̀ wa kɔ̧ɔ̧ ga.


Wa ɓɔna fara mgbɔɔ Jesu nɛnɛ, ɓɛɛ wa ba ŋma be Sirɛn, nin-a nɛ Simɔŋ; a̧ pii nɛ́ ɗoŋ nɛ̀ kpɛɛfɔ, ɓɛɛ wa ba te-diŋa e gun ger-a ha̧ a̧ mɛ tui nɛnɛ ɗoŋ Jesu.
Gba giiwi nɛɛ ɗoŋ-aa in o okoo mbɛt, mbɛr nɛ̀ yí-see, hí̧í̧ nɛ̀ kɔ̧a̧ wen Jesu. Jesu zika tɛ sitɛ o okoo nɔ‘i, ɓɛɛ tɔ̧ ha̧ wa: «O boko-be Jerusalɛm, k’ɛ́nɛ́ hi̧i̧ am na; ɛ̀nɛ̀ hí̧í̧ nɛ́ tɛ̀‘nɛ́ in o bem k’ɛ́nɛ́ ɛ̧! Wen ŋma ŋgimbi tɛ hɔ nɛ̀‘i tɛ tɔ̧ ndé: ‹O ko-yar-ndɔra, o okoo nɛ̀ ko bem in nɛ̀ ha̧ bere ha̧ bem na, ya kɔ‘i nɛ̀ desee.› Ɓɛɛ o bíí tɛ tɔ̧ ha̧ o kaya: ‹Ɛ̀nɛ̀ tír a zu yɛ!› in ha̧ o zu-tɔ̧́‘e: ‹Ɛ̀nɛ̀ kpé zu yɛ!› Tɔr-te nɛ̀ wa de mɔ in a̧ hegɔ'ɛ, kà bó nɛ̀ kora te nde?» Nɛ́ mɔ'ɔ nɛ̀ wa mgbɔɔ o ɗaŋwi yiitoo nɛnɛ ha̧ wa mɛ gbɛ wa in a̧ mbɛt.
Wa hɔɔ fara nɛ wa sa'e «Koŋgoi-zu» kaɗi, ɓɛɛ wa mgboi Jesu zu te-diŋa in o ɗaŋwi nɔ‘i yiitoo'i, kpɔk nɛ̀ war wii-er Jesu, ɓii-aa nɛ̀ war gale. Ɓɛɛ Jesu tɔ̧: «Dáà, ɛ̀nɛ̀ é ɗaŋmɔ kɔ-wa ha̧ wa, wen wa iŋ mɔ nɛ̀ wa de na.» Wa mɔi̧a laa kɔ̧-a̧, ɓɛɛ wa bi nɛ̀ mbaɗi. O bíí yaa hi̧i̧ zɔk nɛ̀ mɔ; o gasawi zɛkɛɗa a̧ tɔ̧ nɛnɛ‘e: «A̧ baa kpasi o ŋma bíí, ɓɛɛ a̧ a̧ kpásí tɛ-a nɛ̀ tɛ-a kà a̧ nɛ́ bòò nɛ́ Mɛsii nɛ̀ Sɔ̧ hoka tom tɛnɛ.» O wi-biro mbɛt zɛkɛɗa a̧; wa ɗɔŋa siti mɛ ha̧ kpa̧i̧a̧-dɔ̧ɔ̧ ha̧ a̧, ɓɛɛ wa tɔ̧: «Kà mɛ nɛ́ bòò nɛ́ wannu ko o Juif, mɛ̀ kpásí tɛ-mɛ nɛ̀ tɛ-mɛ h’ɛ́ɛ́ zɔ́k!» Wa yɔra mɔ e zu-a mbɛt hee mɔ'ɔ ga: «Wi’ɛ nɛ́ Wannu ko o Juif.» Kpɔk mgbara o ɗaŋwi yiitoo nɛ̀ wa mgboia zu te-diŋa nɔ‘i da̧a̧ Jesu mbɛt, a̧ tɔ̧a̧: «Mɛ́ bó nɛ́ Mɛsii na nde? Mɛ̀ kpásí tɛ-mɛ nɛ̀ tɛ-mɛ, ɓɛɛ mɛ̀ kpásí yɛ mbɛt gɔ!» Ɓɛɛ ɓii wi gai a̧, tɔ̧ nɛnɛ‘e: «Mɛ́ zɔ́k nɛ́ kpɔk bɔnɛ hee a̧ ga, ɓɛɛ mɛ yu Sɔ̧ na? War k’ɛɛ nyɛma sɛnɛ, wen ɛɛ kpaa nɛ́ mɔɔ-oi-tom k’ɛɛ, ɓɛɛ nɛ̀ kɔ̧-a̧, a̧ de ŋma ɗaŋmɔ na.» Ɓɛɛ a̧ tɔ̧: «Jesu, tɛ-mɛ a̧ mbáŋ ɗoŋ am ŋgimbi nɛ̀ mɛ tɛ pii nɛ̀ ɗoŋ mɛ ɔ wan!» Ɓɛɛ Jesu kifi nú ha̧ a̧: «Nɛ́ kpasawen a̧‘m tɔ̧ ha̧ mɛ, sɔsɔɔ‘i mɛ tɛ duk in am yiwese mɛ.»


Wese hɛɗa see-zu, ɓɛɛ tum ba nù lɛŋ hɔ gira-wese; mɔ kpee yí wese, ɓɛɛ babir laa kɔ̧́ Tua ko Sɔ̧ a̧k tan see-a. Nɛ́ mɔ'ɔ nɛ̀ Jesu hiɗa mɔ nɛ̀ ŋgaya-a tɔ̧ nɛnɛ‘e, «Dáà, mi e sɔ̧-tɛ‘m kɔ̧ er'nɛ́.» A̧ tɔ̧ɔ̧ wen'i kaɗi, ɓɛɛ a̧ fe. Ŋma wi-duk-zu wi-biro gɔmŋmaa zɔka mɔ nɛ̀ yaka'i, ɓɛɛ gasi Sɔ̧ tɔ̧ nɛnɛ‘e: «Nɛ́ kpasawen, wi’ɛ duka so nɛ́ wi-de-mɔ nɛ̀ yuwar-a.» O giiwi lɛŋ nɛ̀ gara mɛ zɔk mɔ‘i zɔka mɔ lɛŋ nɛ̀ yaka, ɓɛɛ si ɗoŋ si tɛ̀ kɔ-wa mbɛr nɛ̀ yí-see-wa. O bíí nɛ̀ iŋa so Jesu lɛŋ in o okoo nɛ̀ tɛɛ so in a̧ nɛ̀ Galilee mɛ yaa nɛ̀ nyɛi̧a-a zɔk nɛ̀ mɔ.


Nɛ́ mɔ'ɔ nɛ̀ ŋma bíí hɔa, nin-a nɛ́ Jozɛf, be Arimatee, ŋma gasa ye ko o Juif; a̧ nɛ́ ŋma kpɔk mgbara o gasa wi-gɔn-kita ko o Juif. A̧ nɛ́ ŋma wi-de-demɔ in wi-de-mɔ nɛ̀ yuwar-a; a̧ duka so pɛm nɛ̀ Wan ko Sɔ̧, ɓɛɛ a̧ kpɛk baa keta ko o Juif in mɔ nɛ̀ wa dea'i na. Wi’ɛi nɛɛ tɛ Pilat, ɓɛɛ ak wɔr Jesu. Nɛ́ mɔ'ɔ n'aa baa wɔr yinɛ tɛ diŋa, ye a̧ nɛ̀ bu ndɔmbɔ, ɓɛɛ nɛ́ɛ̀ gun a̧ kɔ̧́ pɛsi nɛ̀‘i za̧a̧ so kɔ̧́ ta, nɛ̀‘i tɛ gun fio sɛnɛ nɛti hɔ̧ɔ̧ na. Ŋgimbi'i duka so nɛ́ wese-ɗafi-mɔ, ɓɛɛ wese-ɔm-tɛ hɛɗa kaɗi.
O okoo nɛ̀ tɛɛ so in Jesu nɛ̀ Galilee nɛ̀ɛ́ ɗoŋ Jozɛf; wa nɛ̀ɛ̀ zɔk pɛsi in wa zɔka hee mɔ'ɔ n'aa guna nɛ̀ Jesu ga mbɛt. Nɛ́ mɔ'ɔ nɛ̀ wa sii ɗoŋ ɗafi fuu-nyama in nɔ̧́-nyama, ɓɛɛ wa ɔm tɛ-wa wese-ɔm-tɛ nyɛm nɛ̀ ɗoŋ heembea.

Geere nke a ntị LUK 23