THILSIEMBUL 28

Jakob Sawlmang na

1Tichun, Isak in Jakob a sama, vang a pie a, a kawmah, Kanaan gam nungak zi a na neih loh ding ahi, ti’n thu a pie a. 2“Kipan inla, Padan-aram gama, na nu pa Bethuel In ah chieh inla, zie chun na nu suohpihpa Laban chanute laka khat va kichênpih ah. 3El Shaddai Pathien chun hun vangsak intin, nam tamtak te pa na hung hihtheihna dingin, suonlepak tamtak hun neihsak in, hun hihpung hen; 4na malzinna gam, Pathien in Abraham a piek hi, na luohna dingin Abraham vangsakna a piek bangin vang hun pie hen la, nang leh na suonte le,” a ti a. 5Tichun, Isak chun Jakob chuh a sawlmang ta a; Padan-aram gama Jakob leh Esau nu Rebekah suohpihpa Bethuel chapa, Laban kawm achun a chieh tai.

Esau in Zi dang a Neih Beh

6Chun, Jakob chuh Isak in a vangsaka, zi nei dingin Padan-aram gam ah a sawl hi tih Esau chun a he ta a. Isak in vang a piek lai khan Kanaan numeite kichênpih lo dingin le thu a piei tih a he a. 7Chun, Jakob chun a nu leh pa thu zawp in Padan-aram gam ah a chieh tai tih le a hedawk ta a. 8Esau chun a pa Isak in Kanaan gam nungakte chuh a deih puoi tih a he a 9Tichun, Esau chuh Ishmael kawmah a va chieh a, Abraham chapa Ishmael chanu Mahalath, Nebaioth suohpih nu chuh a zi neih sate banah zi’n a neih beh lap hi.

Bethel a Jakob Mang

10Chun, Jakob chuh Beer-sheba apat in a pawt a, Haran khaw lam a zuon ta a. 11Chun, khawitak mun ahim khat hi ava tunga, ni atum tâk ziekin zie tak achun a giek ta a; chun, zie muna suong khat chuh a la a, khapchâk in a mang a, ipmu dingin a kuol tai. 12Chun, mang a nei a, lei apat a van chana lei kidawh leh a chunga Pathien vânsâwlchâk te kum leh kal haw chu tawh a mu ta a.#Joh 1.51 13Chun, ngaitie, a sip achun Lalpa a dinga, “Kei hi Lalpa, na pu Abraham Pathien leh Isak Pathien chuh ka hi: na kuolna lei khah nang leh na suonlepak te hun pie’ng ka. 14Chun, na suonte chuh leia pîlnel zah hiu intin, suohlam leh tumlam leh simlam leh mâllam haw ahin hung kithehzak un tin: nang leh na suonte achun khawvel a namtin vangsak in um un au. 15Chun, ngaitie, na kawmah ka um a na chieh na taphawt ah hun vangsak zel ing ka ting, zie gam ahin hun puikit ing ka; Na kawma ka thugen hi ka hih masieh chuh hun thahtham lo hiel ding ka hi,” a ti a.

16Chun, Jakob ipmu chuh a hung khanglo a, “Ka na he puoh na a chuh; zie mun ahin Lalpa chuh a um ngêi hi,” a ti a. 17Tichun, a lau a, “Zie mun hi a lauh-um na e, ziehi mun dang hilo in Pathien In ahi hila, ziehi van kawtkhak ana hi hi uo,” a ti a.

18Chun, Jakob chuh zingkal matak in a tho a, suong khapchâk a a mat chuh a la a, hetzingna dingin a phut a; a sip achun sathau a sung a. 19Zie mun min ding chun Bethel#Bethel = Pathien In a sa a: a khuo min chu vang a tûngin Luz ahi. 20Chun, Jakob in Lalpa kawmah thu a tiem ta a, “Ka kawma na um a, ka zinna lampi ahi nei venbit a, nek ding leh silhlechen nei piek a, 21ka pa In lam a bit taka ka kilehkit chun ka Pathien hi’n la, 22Zie hetzingna suong ka phuhna mun hi nang hun hona mun hi’n tin, nei piek taphawt apat chun sawma-khat pie zel ing ka,” a ti a.

Nke Ahọpụtara Ugbu A:

THILSIEMBUL 28: GANGBSI

Mee ka ọ bụrụ isi

Kesaa

Mapịa