Genesis 1
1
Nan Logina
1:1—2:4
1Isdin loglogina ay esapay mawada nan am-in ay wada et binoliw Apo Dios nan daya ya nan batawa. 2Nan batawa et egay kaoolnos ay baken kaneg nan ilana id wani nodi menbolinget ya nalilikmot is danom ya napigsa nan dalloyon. Nan panakabalin Apo Dios et wada isnan osona. 3Dat kanan Apo Dios, “Mawadaka ay silaw.” Dat mawada. 4Men-gasing isnan inilana ay silaw danat teknen nan menpat-a ya nan menbolinget. 5Danat ngadanan nan menpat-a is kag-aw ya nan menbolinget is labi. Nakwas nan sinlabiyan dat mawakgat et siya di nan damo ay agew.
6Dat kanan Apo Dios, “Mawadaka ay mangsiyan isnan danom ta mentetee nan amasna id ngato isnan liboo ya nan amasna isnan gowabna.” 7Dat maikkan tay inpasiyana nan danom. 8Danat ngadnan nan ngato is daya. Nakwas nan sinlabiyan dat mawakgat et siya di nan maikadwa ay agew.
9Dat kanan Apo Dios, “Maponokka ay danom isnan nakakaongan tasiyay maila nan lota.” Dat maikkan. 10Danat ngadanan nan lota is batawa ya nan danom ay naponok is baybay et men-gasing isnan inilana.
11Dat kanan Apo Dios, “Mawada kayo am-in ay tomobo isnan lota dakayot bomgas is nabobowaan ta waday esa tomobo kasin.” Dat maikkan. 12Tinmobo nan am-in ay wada isnan batawa dat men-gasing si Apo Dios isnan inilana. 13Nakwas nan sinlabiyan dat mawakgat et siya di nan maikatlo ay agew.
14Dat kanan Apo Dios, “Mawada kayo ay silaw isnan daya ay mangipaila isnan kag-aw ya labi ya mangipagtek isnan agew, bowan ya nan tew-en 15dakayopay mensilang id daya ta masilawan nan batawa.” Dat mawada 16tay sinapona nan dowa ay dadadakke ay silaw. Nan kadakkelan isnan dowa et siya nan mensisilaw isnan kag-aw ya nan esa et siya nan mensisilaw isnan labi. Binoliwna gedan nan talaw. 17Binoliwna nan kasilasilaw id daya ta silawanda nan batawa 18et mensilawda isnan kag-aw ya labi. Siya nan mailasinan di menpat-a ya nan menbolinget. Dat men-gasing si Apo Dios isnan inilana. 19Nakwas nan sinlabiyan dat mawakgat et siya di nan maikap-at ay agew.
20Dat kanan Apo Dios, “Mawada kayo ay nateketeken ay matagtago isnan danom ya mawada kayo ay koyat id ngato.” 21Dadat mawada tay binoliw Apo Dios nan dadadadakke ay matagtago ay kaneg nan bowaya ya nan am-in ay nateketeken ay mentetee isnan danom ya nan am-in ay wada nan payakna. Dat men-gasing si Apo Dios isnan inilana. 22Danat bindisyonan am-in daida ay mangwani isnan mentetee isnan danom en omad-adoda ta mapno nan baybay ya omad-ado gedan nan koyat. 23Nakwas nan sinlabiyan dat mawakgat et siya di nan maikalima ay agew.
24,25Dat kanan Apo Dios, “Mawada isnan batawa nan am-in ay menkiwkiwi ay amo ya atap, dadakke ya teteen.” Dadat mawada tay binoliw Apo Dios daida am-in. Dat men-gasing isnan inilana.
26Dat kanan Apo Dios, “Id wani mensapowak is ipogaw is kanegko. Et wada nan kalebbengana isnan am-in ay menkiwkiwi ay amo ya atap, ay dadakke ya teteteen, nan ikan ya nan koykoyat.” 27Danat boliwen nan ipogaw is kanegna et lalaki ya babai nan binoliwna. 28Danat bindisyonan daida ay mangwani, “Maganak kayo tasiyay omad-ado nan ap-oyo ta maiwakatda isnan batawa ta menkowada. Dakayo ay ipogaw nan men-apo isnan ikan isnan baybay, isnan koykoyat ya isnan am-in ay matagtago isnan batawa. 29Nan begas nan naayda ay molmola et da tona nan itedko ken dakayo ta siya nan menkatagoyo 30ngem nan toboda ya nan logam et siya nan menkatagon nan am-in ay animal, koykoyat ya nan am-in ay menkodkodong isnan batawa.” Dat maikkan. 31Inilan Apo Dios nan am-in ay binoliwna et ostoosto dat men-galalasing. Nakwas nan sinlabiyan dat mawakgat et siya di nan maikan-em ay agew.
Nke Ahọpụtara Ugbu A:
Genesis 1: xnn
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.