लूका 20
20
येशूजे हकजे बारेने ल्वेब
मत्ती २१:२३-२७; मर्कूस ११:२७-३३
1तीया मन्दिरने येशूदे मीयूने शिक्षा पीन्न ख्य, मेस्ये थमयूने सूगब खबर प्रचार चीन्न ख्य। धर्म-गुरुयूप्रे केन् पूस्र्यायू मेस्ये पन्डेयू ङू ट्याने रदे, 2येशूने लोत्दे, “ङीने य, कम्ब हकदे नदे अम्ब काम चीन्न, या नने अम्ब हक पीनब सू ख्यङ्?”
3येशूदे थमयूने जवाफ पीन्दे, “ङैदेये नमयूने पो त्या लोक्क्य, ङैने जवाफ पीन्। 4यूहन्नादे पीनब बप्तिस्मा स्वर्गदे ख्यङ्, यी मीदे ख्यङ्?”
5थमयू त्यात्या मोतो चेमेदे, “ ‘स्वर्गदे’ येके यलो, ‘नमयूदे ङूने चैने विश्वास अन्चे?’ यदेबे ङूदे यीय।
6‘मीदे’ ये यलो, मीयू क्वादेने ङीने लूङ्दे ठरीय, चेनेयलो यूहन्ना अगमवक्ता यदेबे थमयूने पक्क विश्वास ख्य।”
7होरेक्यूत्देबे थमयूदे जवाफ पीन्दे, “ङी अन्स्ये, केर्दे रदे।”
8होर्दे येशूदे थमयूने यदे, “होरे यलो ङ कम्ब हकदे अम्ब कामयू चीक्क्य, ङैये नमयूने अन्-य।”
अध्या फरबयूजे उखान
मत्ती २१:३३-४६; मर्कूस १२:१-१२
9 #
यशैया 5:1
येशूदे मीयूने अम्ब उखान स्योत्दे: “मीत्यादे अङ्गुरजे बली लैदीदे, मेस्ये अध्या फरब मीयूने पीन्देबे कूम दिनजे लागि फी देश गीलीदे। 10अङ्गुर लोदेबे तामेस्ये रङ्ने सी प्लेने अङ्गुरजे मालिकदे ङूजे त्वो त्या अध्या फरब मीयू ट्याने कूल्बीदे। तर थमयूदे ङूने ठरीदेबे ला थैन्देन्ने कूल्बीदे। 11ङूदे फेरि सूजो त्वोने कूल्बीदे, तर थमयूदे ङूनेये ठरीदेबे नपूत्देबे ला थैन्देन्ने कूल्बीदे। 12ङूदे तेस्रोनेये कूल्बीदे। तर थमयूदे ङूनेये घाइते बन्दीदेबे योम्बीदे।
13“होर्दे अङ्गुरजे मालिकदे यदे, ‘जेम्से ङ केर्चे? ङैजे छेब च कूल्बीय। कादेये ङूने थमयूदे गेसेन् चीस्स्ये।
14“तर रङ् अध्या प्वेब मीयूदे ङूने तङ्देबे पो चीत्दे, ‘ङू हक लादेब मी ख्यङ्। ङीनदे ङू सेदे, मेस्ये सम्पत्तिजे हक ङीनजे क्यूक्क्य।’ 15होर्दे थमयूदे ङूने अङ्गुर रङ्जे फीने कूदीदेबे सेत्दे।
“जेम्से मालिकदे थमयूने चम चीक्क्य? 16ङू रदेबे हम्ब अध्या फरब मीयू सेक्कीय, मेस्ये रङ् सूजोयूने पीन्क्य।”
मीयूदे अम्ब पो तदेबे यदे, “येर कलङ्बेये अन्क्यूस्स्य।”
17 #
भजनसंग्रह 118:22
तर येशूदे थमयूतेले लेत्देबे यदे, “अम्ब लिख्दीयब च स्व?
‘कम्ब लूङ् कीम् बन्दे मीयूदे अन्ज्य यदेबे छाबीदे, हम्ब कूनजे सूर्-लूङ् क्यूत्दे।’
18हम्ब लूङ् फ्याने क्यर्ब मी सूनेयली टुक्रा-टुक्रा क्यूप्पीय, तर सूफ्याने हम्ब तल्रीय हम्बदे ङूने ता चीक्कीय।
19होर्दे पन्डेयू मेस्ये पूस्र्या केन्यूदे हम्ब बीलने येशूने चूङ मैदे। थमयूने था ख्यङ् यी अम्ब उखान थमयूजे विरुद्धने य ख्यङ् तर थमयू मीयूप्रे फख्य।
कैसरने फाब स्यर्म
मत्ती २२:१५-२२; मर्कूस १२:१३-१७
20थमयू मौका लेन्न ख्य, मेस्ये नङ्सू धर्मी चे त्वेबयूने नङ्सू च्यूव चेबयूने ङूट्याने कूल्पीदे। येशूदे यब पोनेने ङूने फस्तीदेबे हक प्रेबयू मेस्ये हाकिमजे लाने ङूने सूम्दीबेब दाऊने थमयू ख्य। 21थमयूदे ङूने लोत्दे, “गुरुज्यू, ङीदे स्येख्यङ्, न ज्य क्यम ख्यङ् मेस्ये ज्य लोम्मे ख्यङ्, मेस्ये सूजेये सागपूजा अन्ची, तर तम्दम्ने परमेश्वरजे लम्जे पो लोम्मे ख्यङ्। 22ङीदे कैसरने स्यर्म फाब ठीक ख्यङ् यी त्वो?”
23तर येशूदे थमयूजे छल्जे सेम् था प्रेत्देबे थमयूने यदे, 24“ङैने रोमी मन्द्रामूली त्या तन्। अम्बने सूजे फोटो मेस्ये सूजे मीन् खोप्तीये ख्यङ्?”
थमयूदे यदे, “कैसरजे।”
25येशूदे थमयूने यदे, “होरेयलो कम्ब कैसरजे ख्यङ् कैसरनेने पीन् मेस्ये कम्ब परमेश्वरजे ख्यङ् परमेश्वरनेने पीन्।”
26मीयूजे खूम्ने थमयूदे येशूने चैपोनेये फस्ते अन्खू, मेस्ये ङूजे जवाफ तङ्देबे थमयू हार्मन्दीकदेबे पारा अम्पूल्लाबे टूङ्दे।
सीबदेबे फेरि सोम्बो क्यूरब मेस्ये ङ्येन्जे बारेने
मत्ती २२:२३-३३; मर्कूस १२:१८-२७
27 #
मूल स्यूस्स्यायूजे कामजे किताब 23:8
होर्देमेस्ये येशूट्याने कोइ सदुकीयू रदे। सीयेबदे मी फेरि साम्बो क्यूत्देबे अन्लङ् यदेबे थमयूदे य ख्य। थमयूदे ङूने लोत्दे, 28#व्यवस्था 25:5“गुरूज्यू, मोशादे ङीने लिख्दीये ख्यङ्, अतजे ङ्येन् चीत्देबे च-चीमी अन्क्यूरने सीबदेयलो, च्योन्बदे ङूजे मजने ङ्येन् चीत्देबे ङूजे अतजे लागि च-चीमी जन्मीदेपर्दीय। 29ख्ये ङ्यी ख्य। जेठदे मज चङ्देबे च-चीमी अन्क्यूरने सीइ। 30मेस्ये मइलादे, 31होर्दे साइलदे ङूने ङ्येन् चीत्दे। होर्प्रने थमयू ख्ये ङ्यीजेने च-चीमी अन्क्यूरने सीइ। 32ङ्येदे हम्ब मदीये सीइ। 33ख्ये ङ्यीदेने हम्ब मदी ङ्येन् चीक्कदे जेम्से सीबदे सोम्बो क्यूत्देबे लङ्रब हम्ब मदी सूजे मज क्यूक्क्य? चेनेयलो हम्ब मदी ख्ये ङ्यीप्रेने ङ्येन् चीक्क ख्यङ्।”
34येशूदे थमयूने यदे, “अम्ब जूग्जे मीयू ङ्येन् चीक्क्य, मेस्ये ङ्येन् चीम्मीय। 35तर हम्ब जूग्सेमे फ्योब लायकजे मीयूदे, मेस्ये सीबदे सोम्बो क्यूत्देबे लङ्रब लायक क्यूरबयूदे ङ्येन्ये अन्ची, चीस्सेये अम्पीन्। 36थमयू फेरि अन्सीब, चेनेयलो थमयू स्वर्गदूतयूप्र क्यूक्क्य, मेस्ये सीबदे सोम्बो क्यूरब च-चीमी क्यूरबदे परमेश्वरजे च-चीमी क्यूक्क्य। 37#प्रस्थान 3:6तर सीयेबयू सोम्बो क्यूत्देबे लङ्क्य यब पो मोशादे चेलाबे पीने ख्यङ्। प्ल्याङ्नब पोथ्राजे बारेने ङूदे प्रभु परमेश्वरने ‘अब्राहामजे परमेश्वर, इसहाकजे परमेश्वर, मेस्ये याकूबजे परमेश्वर’ यदेबे गोम ख्यङ्। 38परमेश्वर सीयेबयूजे परमेश्वर दी, तर सोम्बोयूजे परमेश्वर ख्यङ्, चेनेयलो ङूजे लागि क्वाने सोम्बो ख्यङ्।”
39होर्दे पन्डेयूनङ्ने कोइ-कोइदे यदे, “गुरूज्यू, नदे सोरो ज्यने यदे।” 40होर्देङ्येदे फेरि सूदेये येशूने पोयू ल्वेब आँट चे अन्खू।
ख्रीष्ट सूजे च?
मत्ती २२:४१-४६; २३:१-७; मर्कूस १२:३५-४०
41तर येशूदे थमयूने यदे, “ख्रीष्ट दाऊदजे च यदेबे थमयू केर्बे यीय स्व? 42#भजनसंग्रह 110:1चेनेयलो भजनजे किताबने दाऊद रङ्सेदेने य ख्यङ्,
‘परमप्रभुदे ङैजे प्रभुने यदे, “न ङैजे स्येत्तेयोर् टूङ्,
43कन्छ्वासेमे ङैदे नैजे शत्रुयूने
नैजे तोप् नङ्ने अन्ही”।’
44येर्बे दाऊददे ङूने ‘प्रभु’ यीय यलो, फेरि ङू केर्बे दाऊदजे च क्यूत्दे?”
45होर्दे मीयू क्वादेने ङ्यीन्नूब येशूदे रङ्से स्यूस्स्यायूने यदे, 46“कोला रेङ होत्देबे तीछो प्रेनब, मेस्ये बजारने नमस्कार मैब, सभा-कीम्यूने ज्य टूङ ने मेस्ये भात्यार्ने गेसेन् चेब ने सेम्पर्देब पन्डेयूप्रे होस्स्यार क्यूर्। 47थमयूदे प्ल्यङ् सीयेब मदीयूजे कीम्नम् लूर्तीय, मेस्ये मीने तनजे लागि रेङ प्रार्थना चीक्क्य।” होरयूदेने कूम दण्ड प्रेक्क्य।”
Nke Ahọpụtara Ugbu A:
लूका 20: सर् कबुल
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Ghale New Testament © Nepal Bible Society, 2011.