KEKULI 1

1 # Luk 1.1-4 Kinyiküwa Theofilo: Hi ilesüshen atuwa wi Jisu kekuli nu ma nyu kesansi cüki tsüdi zhütheng, 2tsüna aghatsan na wala Anyiza na ma zanki pi tang wi chiya kesa tsü npi kecu chu cüki. Ma tang wi npi kewa wi Kemetha Ghamu kekhang wina kecükegwe pi ma anyi kessi pi apostel saya kesathu cü. 3Ma keshü seng wi ghanan jügha jü wi ma hangben le kesa kejon tughula mathu tuwi gho, nu ajjügi kejonla pi mathu ccüca. Mathu na ma mu, nu ma Anyiza Kadiyyi cüki khi pi mathu ccüneng. 4#Luk 24.49 Ma mathu gweghe dsajjü keben wi ma hati mathu wi kiza, “Jerusalem nteshila, isala iBa na aju khishi ketheng, hi pi nthu kekiza ajuwa tsü hie ben lalo. 5#Mat 3.11; Mrk 1.8; Luk 3.16; Jhn 1.33 Johan na atssü pi nyu baptaiz sa, isala ghanan keu seng wi Kemetha Ghamu pi nthu baptaiz sa cüaben.

Jisu Zanki pi Tang wi Chiyakesa

6Apostelthu na gho saghu keya wi mathu na Jisu wi keü, “Apvüwa, no khili tsü ha Kadiyyi tsü pi Israel nyi cü neng tendha la?

7Jisu mathu wi khi, “Matsü nu ma tsathang tsüna iBa na ma ketanla ma kekhang wina ssan theng, nu khathansha wi saben khe nthu na kechü-u nye. 8#Mat 28.19; Mrk 16.15; Luk 24.47-48 Isala Kemetha Ghamu na nthu miwi gho lethu kekhang pi nthu pong cüben, nu nthu na Jerusalem, Judea, nu Samaria tsüdi wi nu ayyi ccügwen wi lela ighena chüzathu saben.” 9#Mrk 16.19; Luk 24.50-51 Ma ha kekhi seng wi mathu na ma ghang keben na tang wi ma zankiya nu mathu tuwi na akulukeshü na gho ma shanbhonya.

10Ma wa kesa seng wi mathu na tang wi ghangki ben nan meshu keni athsü kemiki mphi nu wan gho mathu kete wi nganya. 11Manyi na mathu wi, “Nthu Galilee nyithu mangkesa na ciwi ngan nu tang wi ghang ben nu? Nthu wina ssi sen nu tang wi wa kesawa Jisu hana nthu ma tang wi wa keten kemu tsü makesü gho neng ben le!”

Judah Kuti Kesawa Kessikeya

12Tsaseng wi apostelthu na Oliv Yikha wina kheneng sen nu Jerusalem wi gho, tsüna anyunuti manyi jü kilometer kesü-u na ben. 13#Mat 10.2-4; Mrk 3.16-19; Luk 6.14-16Mathu na Jerusalem wi dula mathu na ben keten ajjenshha tangwa wi ben. Tsüthu na Pitor, Johan, James nu Andria, Filip nu Thoma, Bartholoma nu Mathi, Alfa tsawa Jakob, Simon kempvüzawa, nu Jakob tsawa Judah. 14Mathu tsüdi nu nzathu pahan, Jisu jja Maria nu ma cünyuthu tsüdi gweghe nu kekhie saki ben wa.

15Ghanan keu seng wi kenondithu anyi meza nu nkwe ghola mehu keben wi Pitor na shagha ajühkhi. 16Ma kekhi na, “Icünyuthu, kheni na Kemetha Ghamu na David pang wina Judah na nyu ssi wa Jisu ghanya thsüa ketenwa cüki khi ketheng Ntsawajüh tsü nsacenthu yishü. 17Judah na ikhang jawi anyi kesü, kepaghenanye ma kessi pi ikhang gweghe kekuli sa thsü kesalina.”

18 # Mat 27.3-8 (Judah na ma nkemehai kekuli kutimen apisa tsü pi alli kesü sheiya. Ma ciwi shü nu ma pvü nbvü pi ma non wi nkemetha tsüdila amei wi shhughoa. 19Jerusalem wi kahangthu tsüdila tsü cüki zaya nu mathu jüh wina alli tsü pi “Akeldema” ma jjügi “Ajjü lli” isa cia.)

20 # Zak 69.25; 109.8 “Kepaghenanye Zakeci lesüshen wi hati zhütheng,

‘Ma jjen yala kaghacang sa thsülo;

nu thola ciwi nhang thsü lalo.’

Nu hati la zhütheng,

‘Nyu kepa wi ma kuti sala kekuli sa thsülo.’

21-22Tsalina anyi kesü ikhang gweghe nu Apvüwa Jisu hangneng- keshagha tsü chüza nsa thsüthu yishü ben. Ma Jisu na ikhang ssinu cüshu keten wi, aghatsan Johan na ma baptaiz #1.21-22:Johan na baptaiz kesa cüki pi nyu sansi; nyelela Johan na ma baptaiz sa kesa cüki pi nyu kesansi tsü wina ghola ikhang jawi na Jisu zanki pi tang wi chiya kesa kecu matsü tsüdi wi ikhang gweghe keten nyi kesü nsathu yishü.

23Tsalina mathu na meshu keni nyan khi: Josef pi Barsabba le khi ketenwa (Justa lela khiden), nu Mathia manyi. 24Tsaseng wi mathu kekhie sa, “O Apvüwa, no anyi tsüdi leben kechüwa, tsalina pi ikhang ccücalo, no ha manyi khawa kessi pi 25Judah na teshi theng nu ma pen wi wa kesawa tsü mithon wina apostel kesü kekuli sa thsüten khe.” 26Tsaseng wi mathu na manyi ghena akezen sa nu kessi, nu Mathia kessiya, ma pi apostelthu taghakhen tsü wwaya.

Nke Ahọpụtara Ugbu A:

KEKULI 1: RENGNBSI

Mee ka ọ bụrụ isi

Kesaa

Mapịa