N. Matu 11
11
XI. CAIB.
Eoin a cur a dheisciopul gu Criosta; Criosta toirt achasain do na h-Iudhaich air son am mi-chreidimh, ʼsa gairm h-uige na feadhnach a bha anrach.
1Agus thachair, nuair chriochnaich Iosa a chomhairleachadh a dhà dheisciopul diag, gun dʼfhalbh e á sin a theagasg ʼsa shearmonachadh sna bailtean aca.
2A nis nuair a chual Eoin sa phriosan oibrichean Chriosta, chuir e dithis dhe dheisciopuil ga ionnsuidh,
3Us thuirt e ris: An tu esan a tha ri tighinn, no am bi duil againn ri fear eile?
4Agus Iosa a freagairt, thuirt e riu: Falbhaibh agus innsibh do dhʼEoin na nichean a chuala ʼsa chunnaic sibh.
5Tha na doill a faicinn, na bacaich a g-imeachd, na lobhair air an glanadh, na bodhair a cluinntinn, na mairbh a g-eirigh a rithist, ʼs an soisgeul air a theagasg do na bochdan.
6Agus is beannaichte esan nach gabh sgainneal asamsa.
7ʼS an deigh dhaibh-san falbh, thoisich Iosa ri labhairt ris an t-sluagh mu Eoin: Ciod a chaidh sibh a mach do ʼn fhasach a dhʼfhaicinn? an e cuilc air a crathadh leis a ghaoith?
8Ach ciod a chaidh sibh a mach a dhʼfhaicinn? an e duine air eideadh an aodach mìn? seall, tha iadsan, a tha caitheamh aodach mìn, an tighean righrean.
9Ach ciod a chaidh sibh a mach a dhʼfhaicinn? an e faidh? Se, tha mi g-radh ribh, us tuilleadh na faidh.
10Oir se so esan mu bheil e sgribhte: Fiach, tha mise cur mʼaingil romh do ghnuis, a reiticheas do rathad romhad.
11Gu deimhinn tha mi g-radh ribh: Cha dʼeirich de shliochd nam ban nas mua na Eoin Baiste: ach an t-aon is lugha an rioghachd neamh se is mua na esan.
12Agus bho lài Eoin Baiste gus a nis, tha rioghachd fhlathanais a fulang ainneirt,#11.12 XI.12. Fulang ainneirt. Cha choisnear i ach le fior neart, le fein-chlaoidh, ʼs le cur an aghaidh ar n-ana-miannan. agus ʼsiad luchd an ainneirt a bheir a mach i.
13Oir bha na faidhean uile agus an lagh ri faisneachd gu linn Eoin.
14Agus ma ʼs math leibh a chluinntinn, se so Elias, a bha ri tighinn.
15Am fear aig a bheil cluasan gu eisdeachd, eisdeadh e.
16Ach co ris a shamlaicheas mi an ginealach so? Tha e coltach ri cloinn ʼnan suidhe sa mhargadh, ʼsa g-eigheach riʼn companaich,
17A g-radh: Sheinn sinn dhuibh, agus cha do dhanns sibh: rinn sinn cumha, agus cha do ghuil sibh.
18Oir thainig Eoin cha n-ann a g-icheadh no g-ol, ʼs tha iad a g-radh: Tha deomhan aige.
19Thainig Mac an duine a g-icheadh ʼsa g-ol, ʼs tha iad a g-radh: Seall, fear a tha ʼna gheocaire, ʼs ʼna phoitear fiona, ʼna charaid chismhaor us pheacach. Agus tha gliocas air a firinneachadh le cloinn fhein.
20An sin thòisich e ri cronachadh nam bailtean anns an dʼrinneadh a mhor chuid dhe mhiarailtean, a chionn nach dʼrinn iad aithreachas.
21Mo thruaighe thu, Chorosain; mo thruaighe thu, Bhethsaida: oir nam bʼann an Tirus no an Sidon, a dhiante na miarailtean a rinneadh unnaibhse, is fhada bho na ghabhadh iad aithreachas an cainb-aodach ʼs an luath.
22Ach tha mi g-radh ribh: Gum fiachar tuilleadh baigh do Thirus ʼs do Shidon latha bhreitheanais, na dhuibhse.
23Agus thusa, Chapharnaum, an e gun togar suas gu ruig neamh thu? theid thu sios gu ruig iutharna. Oir nan diante na miarailtean a rinneadh unnadsa ann an Sodom, theagamh gum maireadh e gus an latha an diugh.
24Ach tha mise g-radh ribh, gum bithear nas iochdoire latha bhreitheanais ri talamh Shodoim na riutsa.
25San àm sin fhreagair Iosa, us thuirt e: Tha mi toirt buidheachais dhut, O Athair, a Thighearna neamh agus talmhuinn, a chionn ʼs gun dʼfhalaich thu na nichean so bho dhaoine glice agus tùrail, agus gun do thaisbean thu iad do leanabanan.
26Seadh, Athair: a chionn gun robh sin taitneach ad shuilean-sa.
27Liubhradh a h-uile ni dhomhsa le mʼAthair. ʼS cha n-aithne do dhuine air bith am Mac, ach do ʼn Athair; ʼs cha mhua is aithne do dhuine air bith an t-Athair, ach doʼn Mhac, ʼs an neach dha ʼn deonaich am Mac a thaisbeanadh.
28Thigibh gam ionnsuidhse uile, a tha ri saothair, agus fo eallaich, us bheir mise furtachd dhuibh.
29Togaibh mo chuing oirbh, us ionnsuichibh bhuam-sa, chionn gum beil mi ciuin us iriosal an cridhe, agus gheobh sibh fois dha ʼr n-anmannan.
30Oir tha mo chuing mìn, agus mʼeallach aotrom.
Nke Ahọpụtara Ugbu A:
N. Matu 11: MacETN
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Scottish Bible Society 2017
© Comann Bhìoball na h-Alba 2017