Markus 3
3
Isaye kam mukkonju canaa isangaduwu
(Mat 12.9-14; Luk 6.6-11)
1Koro Isa walde dandallo kǝrgawo. Nadǝn kam laa mukko canaa mbeji. 2Am laa ye Isaro ayau gǝnaduwu caraana nangaro hangalnjayen tia ninijai, yim tustuyeaman kamdǝa isangayeyenoaro. 3Daji Isa kam mukko canaadǝro: «Cine dawunden dane!» yeno. 4Koro jamadǝro: «Yim tustuyea ngǝla kǝndo ra diwi kǝndoma halal wo? Ro njǝkkawo ra ro tuluwoma halal wo?» cǝne kiworo. Amma gǝm kedo. 5Isa gǝrgaje kǝla karwukibbanjayen karwunju jauro kuttaje tayia ninije kamdǝro: «Mukkonǝm sane!» yeno. Sayenniya, mukkonju kǝlewa salairo walyeno. 6Farisawadǝ dandaldǝn keluwunniyama, lejane am Mai Hirudusse-a rokko sawardane jawal Isaa njejoye mayera.
Jama kadaye Isaa ga
(Mat 4.23-25; Luk 6.17-19)
7Daji Isa-a fuwurawanju-a cijane ci bǝrǝmbero leyera. Cidi Galileyen am kada kadami tia geya. Koro am lardu Yahudiyaye-a 8Jerujalembe-a lardu Idumiyaye-a cidi adinnam bǝrǝm Jordaniye-a cidi bǝrni Tirre-a Sidonne-ason kada kadami ye awo Isa cǝdisodǝa fanjane nanjuro kadira. 9Adǝgaima Isaye fuwurawanjuro bare am kada captanadǝ tia gǝgǝrǝpcaganniro maara tiro dabbarjaa yeno. 10Isa am kada isangajǝgǝna nangaro, am kasuwaasodǝ tia lejaro gǝgǝrǝptagai. 11Sedanso ye tia caruiya, fuwunjun tungurumjane ngujane yiljane: «Ni Tada Alaye!» cani. 12Amma bare tia isanojaganniro tayiro jauro kikkado.
Isaye kǝngayamba mewun yindindǝa galadu
(Mat 10.1-4; Luk 6.12-16)
13Daji Isa kǝla kauyero juwane am tayilan mǝradunjuadǝa bowoje nanjuro kadira. 14Curonjan mewun yindin kǝreje tayia kǝngayambanjuro galayeno. Nianjudǝ ti-a rokko napca, tayia cunodo leja kawuɍinjua jamaro wuljaa, 15kǝnduwo sedan dudaye cawando. 16Akko am mewun yindin galajǝnadǝ, tayima Siman kam tiro cu Biturus cakkǝnadǝ, 17Yakuba tada Jabadiye, yanjugǝna Yahaya-a, tayi yindi yero cu Bonaji cakkǝna, maananjudǝ tadawa raduye,#3.17 tadawa raduye - Am ro doia. 18koro Andarawus, Filibus, Bartolomi, Matiyu, Toma, Yakuba tada Alfawusse, Tadawus, Siman kam Kan’anaye,#3.18 kam Kan’anaye - Kam lardunju rawoma. 19Yahusa Iskariyot kam mukko kǝladowayero Isaa sǝrǝttuwumadǝ.
Kǝnduwo Isaye ndaran isi?
(Mat 12.22-32; Luk 11.14-23)
20Daji Isa fadoro wallada. Jama kada ye caye gai captane, har Isa-a fuwurawanju-aro masǝna kǝmboro katkero. 21Kǝramiyanju adǝa fangeranniya, tia taro leyera, hangal tia maujǝna cani nangaro. 22Koro malǝmba Attauraye Jerujalemlan isanadǝye: «Beljabul#3.22 Beljabul - Mai sedannaye tiro Yiwulis cani. tia cǝdana! Kǝnduwo mai sedannayen sedannaa duji,» yera. 23Daji Isa tayia bowoje misalnin tayiro wuljiye: «Awiawin Yiwulis rakce Yiwulissa duji? 24Kǝrmai duwon kǝlanjuro yaktiyia, rakce dǝgaiwawo. 25Fado duwon kǝlanjuro yaktiyia, fadodǝ ye rakce dǝgaiwawo. 26Yiwulis ye kǝlanju lawalaje yaktiyia, rakce dǝgaiwawo, dunonju cerǝna. 27Wunduma rakce fado kam dunoayero ngaye kǝndanju cǝmoyiwawo, sai kam dunoadǝa cikkeriya duwon. Cikkeriya, kǝndanju cǝmoyi.
28«Jiremaro nayiro wulnjagakki, biwu dio-a Alaa bastu-a samma kambo gawurdiyi. 29Amma kam Ruhu Alayea bassimadǝ, tǝmmaro tiro gawurdiyiwawo. Biwu har abadaro gawurdiwawo cǝdo!» yeno. 30Adǝa wuldunjudǝ, ti karuwama cani nangaro.
Isaye yanju-a yanjugǝnaso-a
(Mat 12.46-50; Luk 8.19-21)
31Isaye yanju-a yanjugǝnaso-a isane ci fadoyen dajane am tia bowojaro kenodo. 32Am kada ye Isaa dirijane kǝljane napcana duwon, tiro: «Yanǝm-a yanǝmgǝnaso-a deyan nia manjai,» yera. 33Isaye tayiro: «Wunduso yani-a yanigǝnaso-adǝ wo?»#3.33 Wunduso yani-a yanigǝnaso-adǝ wo? - Isa yanjua fagatto nojǝna yaye, na Alayen nankǝramidǝ buye gǝni, Ala-a Almasiwunju-aa kasattuye. yenniya, 34am nadǝn napcanadǝa ninije: «Akko yani-a yanigǝnaso-adǝ! 35Wundu duwon awo Ala cǝraanaa cǝdimadǝ, tima yani-a yanigǝna-adǝ wo!» yeno.
Nke Ahọpụtara Ugbu A:
Markus 3: kby
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active), SIM International