Хьунухь 3
3
Сифтегьан гунагь
1Ребби Аллагьди халкьнавай кьван вири гьайванрикай гъуьлягъ виридалайни амалдарди тир. Ада папавай жузуна: «Аллагьди квез и багъда авай майвайрикай гьич садни недай ихтияр тагун дуьз гаф яни?»
2«Чаз майваяр недай ихтияр ава, – жаваб гана папа. – 3Багъдин юкьвал экъечӀнавай са тарцелай чна адан майваяр тӀуьна жедач, абурук хкӀунани виже къведач, тахьайтӀа чун рекьида лагьана Аллагьди».
4«Рекьидач, – лагьана гъуьлягъди. – 5Аллагьдиз чида хьи, куьне абур тӀуьртӀа, куь вилер ачух жеда ва квекай хъсанвални писвал вуч ятӀа чизвай Аллагь хьтинбур жеда!»
6Папаз аквада хьи, и тарцин майваяр хъсанбур, килигиз хуш къведайбур ва акьул артухардайбур я. Адани са майва атӀана тӀуьна. Гъуьлуьзни ада са майва гана – гъуьлуьни адахъ галаз санал тӀуьна. 7Абурун вилер ачух хьана, чпин кьецӀилвал акуна ва инжилдин пешерикай чпиз юкьвалай агъуз кӀевдай пекер авуна.
8Шагьвар акъатна – абуруз багъда Ребби Аллагь къекъвезвайди ван хьана ва тарарин кьулухъ чуьнуьх хьана.
9«Вун гьина ава?» – эверна Ребби Аллагьди инсандиз. 10«Заз Вун багъда къекъвезвайди ван хьана», – жаваб гана инсанди. – «Заз зун кьецӀил тирди акуна, кичӀ акатна, чуьнуьх хьана». 11«Ваз вун кьецӀил тирди ни лагьана?» – хабар кьуна Ребби Аллагьди. – «Вуна За ваз къадагъа авунвай тарцелай майваяр тӀуьнвани?» 12«Вуна заз ганвай папа – гьа гьада заз и майваяр гана, ва зани тӀуьна», – жаваб гана инсанди. 13«Вуна икӀ вучиз авуна?» – хабар кьуна Ребби Аллагьди папавай. «Гъуьлягъди зун алцурна, зани тӀуьна», – жаваб гана ада.
14Ребби Аллагьди гъуьлягъдиз икӀ лагьана:
«Авур кардай ваз лянет хьурай:
вагьшийринни маларин арада негь хьанвайди,
вун руфун чилелай галчӀуриз фида
ва вири уьмуьр руг нез акъатда.
15Вунни паб за душманар ийизва,
куь балаярни сад садаз душманар я:
адан хци ви кьил яна хада,
вунани адан дабан кӀасда».
16Папаз Ребби Аллагьди лагьана:
«За ваз аял хун азият алайди ийида,
азабра хада вуна аялар.
Гъуьлуьхъ вун датӀана тамарзу жеда:
гъуьл вун патал агъа жеда».
17 Адамаз Ребби Аллагьди икӀ лагьана:
«Папаз яб гана, вуна майва тӀуьна,
За ваз къадагъа авур!
Гила вун себеб яз чил лянетдик акатна:
азиятралди гила вири уьмуьрда вуна адан няметар жагъурда.
18Цацар алай валар ада вун патал чӀехи ийида,
чуьлдин векь ваз тӀуьн жеда
19ва чин гьекьедай хьана жуван фу гъилиз гъида.
Вичяй вун къачунвай
чилик вун хъфидалди,
вучиз лагьайтӀа руг я вун
ва мад руквадиз элкъвен хъийида».
20Инсанди – Адама#3:20 Адам – чувуд чӀалалди «инсан». – вичин папаз Гьава#3:20 Гьава – чувуд чӀалалди «чан алай затӀ» гафуниз мукьва я. лагьана тӀвар гана, вучиз лагьайтӀа ам вири чан алайбурун сифте диде хьана.
21Ребби Аллагьди хамуникай парталар расна ва итимдални адан папал алукӀна. 22Ребби Аллагьди лагьана: «Инсан чакай сад хьтинди хьанва – хъсанвални писвал чизвайди! Ада гьакӀ уьмуьрдин тарцелайни майва атӀун тавурай гьа, ам тӀуьна, ажал авачирдини тежедайвал!»
23Ребби Аллагьди инсан Эдемдин багъдай чукурна – вич халкь авур чилиз зегьмет чӀугурай лагьана. 24Инсан чукурна ва Эдемдин багъдал, рагъэкъечӀдай патахъай къаравулар акъвазарна – херупӀар ва кьуд патахъди ядай ялав квай тур, абуру уьмуьрдин тарцив фидай рехъ хуьн патал.
Nke Ahọpụtara Ugbu A:
Хьунухь 3: ЛезПК
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Институт перевода Библии, 2010-2024