यूहन्ना 3
3
येसुए निकोदेमसलाई है ओदोव पाँ
1यहूदीराए घ्योःव याकचरीलाव निकोदेमस यादोज़्याव फरिसी तोबो उलिज़्याव। 2नो मिँ रील अलगज़ा येसुए ल्योक हुद, “गुर्बा, नँ परमेस्वरए ल्योनी गे मिँरालाई परमेस्वरए ओपाँ पैना हुव ज़ लिन्या गेसैंज़्या। नँस परमेस्वर ओमाल्यो ताकिन नँ निताव य़ेनर कातानी नदोधुरिज़्याव,” है ओदोक ते, 3येसुए, “नँलाई साचो है ङादींज़्या, मिँ साःरोल ओमाजर्मिवा पै परमेस्वरए ओराज्या मारँःधुव,” है दोक्यो। 4निकोदेमसए फरी, “मिँ सेर्द कै जैद फरी उजर्मिज़्याव? सैं फरी ओआमाए उफूल पसिद उजर्मिज़्याव?” है ओदोक ते, 5येसुए, “फरी साचो है ङादींज़्या, जो मिँ ऱीनी स़ोनो परमेस्वरए उपुरूसनी माजर्मिए, नो मिँ परमेस्वरए ओराज्याल मापसिधुइ।#तीत ३:५; १ पत्र ३:२१ 6है जैद मिँनी जर्मिज़्याव मिँ ज़ ताज़्या, परमेस्वरए उपुरूसनी जर्मिज़्याव परमेस्वरए उमीं ज़ ताज़्या। 7ङा नँलाई, ‘साःरोल जर्मिउ ताके,’ है ङादींवनी अचम्ब तातानी। 8बतास मनी जोदा बान्या उयुँ लिज़्या, होदा ज़ बाज़्या। नोए ओर्गा ते थास्ज़्या, खाली कातानी उहुज़्याव, काना ओबाज़्याव लिन्या सुए ज़ मासैंर। परमेस्वरए उपुरूसनी जर्मिज़्यावर ब हितावर ज़ ताज़्यार,” है दोक्यो।
9हाःत ज़ निकोदेमसए, “आव नपाँज़्याव कै जैद ओताज़्याव?” है ओदोक ते, 10येसुए, “नँ इस्राएलीराए यागुर्बा ताद ब नाः कै जैद नमासैंज़्याव? 11ङा नँलाई साचो है ङादींज़्या, गे जो गेसैंज़्या हो ज़ गेपाँज़्या, जो गेरँःज़्या हो ज़ गेरासथैज़्या। खाली ङा ङासैंव ङारँःव भरी है ङादाचिक जे जेमापतिनाए। 12आव मानुवाताव पाँ है ङादाचिक जेमापतिनाकिन, स्वर्गताव पाँर है ङादाचिक झन कातानी जेपतिरिज़्याव? 13स्वर्गनी हुव ङा मिँ मिन्सिउकिन आव मानुवानी स्वर्गत बाव सु ज़ माले। 14किताव मोसाए बनल पितले घुल जैद तङ्गैद ओरायो,#गन्ती २१:४-९ हिताव ज़ ङा मिँ मिन्सिउ ब तङ्गैसिउ परिरिज़्या। 15है जैद जो जोराए ङालाई यायुँ हुप्ज़्या, हो होराए अजम्बरी जुनी दैन्या लेर।
16“परमेस्वरए आव मानुवाताव मिँरालाई उयुँ नाद तोबोका तोबो ओज़ा ब याएक्यो। है जैद जोए नो ओज़ालाई उयुँ हुप्ज़्या, नो कै मै माताद अजम्बरी जुनी दैन्या ले। 17परमेस्वरए ओज़ालाई मानुवाताव मिँरालाई खेम्न्याए जूँनी उपरींव माःक, बुरू मानुवाताव मिँरालाई बाँचैन्याए जूँनी उपरींव ची। 18है जैद जोए ओज़ालाई उयुँ हुप्ज़्या, होए परमेस्वरए ओसजा दैन्या माले। फरी जोए परमेस्वरए ओज़ालाई उयुँ माहुबे, होए तोबोका तोबो परमेस्वरए ओज़ालाई उयुँ ओमाहुबोए ज़ परमेस्वरनिकाव सजाल परिधुके। 19परमेस्वरए मिँरालाई ओराफाल्ज़्याव आनी ज़ तारिज़्या — आव मानुवाल ओज़ाए ओक्याँत ज़गै जैद नैव। मिँर ते झन याय़ेन माचाव ओतावए नो ज़गैलाई देखा चुम चुमोलाई यामन लागिके। 20जोए माचाव य़ेन दोज़्याव, होए ज़गैवलाई सोद ‘ङापाहा बाया’ लिद ओछ्याचेए ज़गैवदा माहुइ। 21फरी जोए साचो य़ेन दोज़्याव, होए ‘ङाय़ेन भरी परमेस्वरनी ज़ ताव घरैंःक’ लिद ज़गैवदा हुज़्या।”
ऱील सछैंज़्याव यूहन्नाए येसुए उजूँनी ओपाँव
22आव भरी ओतावत येसु उसिसरास यहूदिया खन्दल बाद नोरास जाँवा पै नल ज़ लिद नलाव मिँरालाई ब ऱील यासछैंक्यो। 23यूहन्नाए मनी सालीम छ्योकाव एनोन यादोज़्याव पोक ओरासछैंज़्याव, काराव ल्यो ताकिन नक ऱी सर्बा ज़ उलिज़्याव। मिँर ओल्योक हुद ऱील यासछैंसिज़्याव। 24हाःक पै यूहन्नालाई झ्यालखानाल यामाझाःताव।
25नो बेलाक ज़ यूहन्नाए उसिसर तोबो यहूदीस सछैंसिन्याए जूँनी याखर्लेसिज़्याव। 26नोर यूहन्नाए ल्योक हुद, “गुर्बा, यर्दन भै होफताव नँस लिज़्याव सतैंद नयासिउ मिँए ब ऱील यासछैंज़्याव। झन प़ाइँ होए ओल्योक ज़ बाज़्यार,” है यादोक ते, 27यूहन्नाए, “परमेस्वरए ओमाएकिन सुए ज़ काता ज़ मादैधुव। 28नोए उजूँनी ङापाँव पाँ जे ब थैद जेनै। हाःक ज़, ‘ङा ख्रीस माःक, ङा ते होए ओङ़ा ओङ़ा परींसिउ मिँ,’ है ङादाचिउ ची। 29किताव बिह्याल ल़ुज़ालाई लाँज़्याव ब्याहोल्या ताज़्या, स़ोनो ब्याहोल्याए ओलाप्क च्याँःसिज़्यावए ओनैं ब्याहोल्याए ओर्गा थैद रेंज़्या, हिताव ज़ ङा मनी आव पाँर थैद ङायुँ होलाँ ताज़्या। 30ओल झन यादा ज़ तानाव परिज़्या, ङा ते मेदा ज़ तानाव परिज़्या।
31“रूतिन हुव प़ाइँए तर्ताव ज़ ताज़्या। आव मानुवाताव मिँर ते मानुवानी ज़ ताद मानुवाताव पाँ ज़ दोज़्यार। स्वर्गनी हुव प़ाइँए ङ़ैताव ज़ लिज़्या। 32नोए स्वर्गताव ओथैव उरँःव भरी प़ाइँलाई ज़ ओरासथैक ओपाँ सुए ज़ मापतिर। 33ओपाँ भैंःज़्यावर ते परमेस्वर साचो ज़ लिज़्या लिद यासही छाप याझाःव मिताव ज़ लिज़्या। 34काराव ल्यो ताकिन परमेस्वरए उपरींव मिँ परमेस्वरए ओपाँ वाज़ पाँज़्या। नोए ओक्याँत परमेस्वरए ओल उपुरूस मागोइँद धोल पोगोल ज़ थुदिज़्याव। 35है जैद स्वर्गताव ओबाबुए ओज़ालाई मया दाद प़ाइँ उकुइत ज़ याद नैव। 36जो जोराए ओज़ालाई यायुँ हुप्ज़्या, नोर अजम्बरी जुनी दैन्यार ताज़्यार। फरी जो जोराए ओज़ाए ओपाँ माभैंःर, नोराए अजम्बरी जुनी दैन्या मालेर, झन परमेस्वरए उरिस चोवर ताज़्यार,” है यादोक्यो।
Nke Ahọpụtara Ugbu A:
यूहन्ना 3: NKham
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2015, Wycliffe Bible Translators, Inc. All rights reserved.