Kutoma 13
13
Kuphadzana kwa Abramu na Loti
1Abramu adabuluka kumpoto kwa dziko ya Iguputo pabodzi pene na mkazache na pyonsene pikhali na iye, pontho Loti adenda naye pabodzi, mbafika kuthando yatchetcha ya Negebu. 2Abramu adafuma pyakwanga. Akhali na pifuyo pontho siliva na golidi. 3Tenepo iye adabuluka kuthando yatchetcha ya Negebu mbafamba mbuto na mbuto kwendera ku Betele. Iye adafika pambuto, ile ikhali pakati pa Betele na Ai, kule kukhadamanga iye misasache pakutoma pale, 4pontho kule kukhadamanga iye guwa yakuperekerapo nsembe. Kweneko Abramu adapembedza MBUYA.
5Loti akhafamba na Abramu ule akhalimbo na mikumbi ya pifuyo, pontho akhali na banjache na anyabasache. 6Mbwenye pakhali nkhabe mbuto yakukwana ya mpovu mwakuti anthu awiri ale hadakwanise kukhala pabodzi tayu, thangwi onsene uwiriawo akhali na pifuyo pizinji pyakwanga. 7Natenepo mapoko-poko adalamuka pakati pa amakabuswa a Abramu na a Loti. Pandzidzi wenewo Akanani na Aperizi akhakhalambo m'dzikomo.
8Tenepo Abramu adalonga kuna Loti mbati, “Ife ngubaleathu, natenepo paleke khala mapoko-poko pakati pa iwe na ine, penu pakati pa amakabuswako na amakabuswanga. 9Ayi dziko yonseneyi hunaiona iwe tayu? Apo, tende tiphadzane pyathu. Ngakhala iwe unaendera kumabzere, inembo ndinaendera kumadyo; ngakhala iwe unaendera kumadyo, inembo ndinaendera kumabzere.”
10Loti adakwiza maso ache mbaona kuti phedi yonsene ya Yorodani kwendera ku Zoari ikhali na madzi azinji ninga Munda wa MBUYA,#13.10 munda wa MBUYA: yeneyi ndi dzina inango ya Munda wa Edeni. penu ninga dziko ya Iguputo. Ndzidzi wenewo MBUYA hakhadadzati kuvunga mizinda ya Sodomu na Gomora.#Kut. 2.10. 11Natenepo Loti adasankhula phedi yonsene ya Yorodani kuti ikhale yache. Tenepo adabuluka mbafedzera kukhundu yakumabulukiro dzuwa. Enewo ndiye akhali maphadzaniro ache a amuna awiri ale. 12Abramu adakhala m'dziko ya Kanani, mbwenye Loti adakhala paphedi ya pakati pa mizinda, mbamanga msasache chifupi na Sodomu, 13mzinda ule anthu ache akhali akuipa, pontho akudawika pamaso pa MBUYA.
Abramu afedzera ku Hebroni
14Pidamala Loti kuphadzana na Abramu, MBUYA adalonga kuna Abramu mbati, “Kubulukira pana iwepo, kwiza maso ako mbuyang'ane kumpoto, kumwera, kumabulukiro dzuwa na kumadokero dzuwa. 15Dziko yonsene inaona iweyi ndinati ndiipereke kuna iwe na kuna pidzukulu pyako mbikhala yako kwenda na kwenda.#Mab. 7.5. 16Ndinati ndikupase pidzukulu pizinji pyakuti nkhabe munthu anakwanisa kupilengesa pyonsene tayu. Pinainjipa ninga tchetcha ya padziko yapansi mwakuti ngakhala munthu anakwanisa kulengesa tchetcha padziko yapansi, penepo pidzukulu pyako pinakwanisika kulengeswambo. 17Chinchino ndoko ufambe kuzungulira dziko yonseneyi towera uione, thangwi ndikufuna ndikupase dziko yonseneyi.” 18Natenepo Abramu adathukusa misasache mbakakhala chifupi na miti yakupambulika yamthundu ya ku Mamure kuluwani ya Hebroni. Kweneko adamangako guwa yakuperekerapo nsembe kuna MBUYA.
Nke Ahọpụtara Ugbu A:
Kutoma 13: SenaMw
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Bible Society of Malawi