Kutoma 17
17
Chidzindikiro cha chiverano
1Pikhali Abramu pyaka makumafemba na pifemba pyakubalwa, MBUYA adamuonekera mbalonga mbati, “Ine ndine Mulungu Wamphamvu zonsene. Iwe wathema kundivera, pontho ndzidzi onsene phata pyakulungama. 2Ndinati ndichite nawe chiverano mbandikupasa pidzukulu pizinji.” 3Abramu adalamba, tenepo Mulungu adalonga mbati, 4“Ndikuchita nawe chiverano ichi lero: iwe unati ukhale kholo ya madzinza azinji. 5Dzinako hinakhalave Abramu tayu, mbwenye Abrahamu,#17.5 Abrahamu: Dzina yeneyi ikuveka ninga ya Chiheberi kulonga kuti, “Kholo wa madzinza azinji.” thangwi ndakuchitisa kukhala kholo wa madzinza azinji.#Arom. 4.17. 6Ine ndinati ndikupase pidzukulu pizinji, pontho anango mwa iwo anakhala mafumu. Iwe unakhala na pidzukulu pizinji pyakwanga mwakuti pinakhala madzinza.
7“Chiverano changachi ndinati ndichikhazikise kuti chikhale chiverano chakukhala na kukhala pakati pa iwe na ine, pontho na pidzukulu pyako mpakana mifendu yonsene inafuna kudza m'tsogolo. Ine ndinakhala Mulungu wako, pontho Mulungu wa pidzukulu pyako.#Lk. 1.55. 8Ine ndinati ndipereke dziko yonsene ya Kanani inakhala imwe ninga alendo leroyi kuti ikhale yako na ya pidzukulu pyako. Dzikoyi inakhala ya pidzukulu pyako kwenda na kwenda, pontho ine ndinakhala Mulungu wawo.”#Mab. 7.5.
9Tenepo Mulungu adalonga kuna Abrahamu mbati, “Iwe pabodzi na pidzukulu pyako pyonsene mifendu inafuna kudza m'tsogolomo monsene mwathema kutawirambo kukoya chiverano chasasanya ine na imwe. 10Chiverano changa na iwe, pontho na pidzukulu pyako pya m'tsogolomo ntchakuti: Mamuna onsene athema kugwandwa nsonga yachimuna.#Mab. 7.8; Arom. 4.11. 11-12Kutomera lero kwenda m'tsogolo mwana wamamuna onsene athema kugwandwa nsonga yachimuna angamala nsiku zisere zakubalwa, kuthimiza penepo mabitchu onsene akubalwa m'nyumba mwako penu na onsene akuchita kugulwa kubulukira kuna munthu wachilendo. Chenechi chinakhala chidzindikiro cha chiverano pakati pa iwe na ine. 13Mamuna onsene athema kugwandwa. Chenechi chinakhala chidzindikiro chakuchitwa pamanungo kuonesa kuti chiverano chasasanya ine na iwe ntchakukhala na kukhala. 14Mamuna onsene okhonda gwandwa hanayeswa mbodzi wa anthu anga tayu, thangwi iye hadakoye chiverano chasasanya ine naye tayu.”
15Mulungu adalonga pontho kuna Abrahamu mbati, “Iwe wathema kuleka kumchemera mkazako Sarai; kutomera lero, kwenda m'tsogolo dzinache inakhala Sara. 16Ine ndinati ndimtsanzayise, pontho ndinakupasa mwana wakubalwa na iye. Ndinati ndimtsanzayise, pontho anakhala mama wa madzinza azinji, pontho pakati pa pidzukulu pyache panabuluka mafumu a anthu.”
17Abrahamu adalamba, kwache adatoma kuseka mbalonga yekha ene mbati, “Ayi akulumwe, nkhukwanisikadi kuti mamuna wa pyaka dzana pyakubalwa kubala mwana? Apo Sara wa pyaka makumafemba pyakubalwa nkhukwanisika kubala mwana?” 18Natenepo Abrahamu adamvunza Mulungu mbati, “Mwatani kumuleka pyache Ishimaele kuti akhale nyakutambira mtsanzayiso kubulukira kuna imwe?”
19Mbwenye Mulungu adatawira mbati, “Nkhabe! Mkazako Sara anakubalira mwana, pontho unamthula Isake.#17.19 Isake: Dzina yeneyi m'Chiheberi nkhulonga kuti, “Iye ambaseka.” Ine ndinakhazikisa chiverano changa pana iye na pana pidzukulu pyache kwenda na kwenda. 20Ndava kupempha kwako pya Ishimaele, natenepo ine ndinamtsanzayisa, pontho ndinampasa ana azinji na pidzukulu pizinji. Iye anakhala baba wa mafumu khumi na awiri, pontho ndinamchitisa kukhala dzinza ikulu. 21Mbwenye ndinakhazikisa chiverano changa pana Isake mwanako ule anabalwa na Sara pandzidzi ninga uno chaka chamangwana.” 22Pidamala Mulungu kulonga na Abrahamu, iye adabuluka pana Abrahamu.
23Nsiku yonthoyo Abrahamu adakwata mwanache Ishimaele na amuna onsene adabalwa m'nyumba mwache mule, pontho na amuna onsene adagula iye, mbaagwanda nsonga zawo zakumaso ninga mudampangira Mulungu. 24Abrahamu akhali na pyaka makumafemba na pifemba pyakubalwa pikhagwandwa iye, pontho 25Ishimaele, mwanache, akhali pyaka khumi na pitatu pyakubalwa. 26Abrahamu na mwanache Ishimaele adagwandwa nsonga nsiku yontho-yonthoyo 27pabodzi pene na amuna onsene a m'nyumba mwa Abrahamu kuthimizapo ale akubalwa m'nyumba mwache penu akuchita kugulwa adagwandwa nawo pabodzi.
Nke Ahọpụtara Ugbu A:
Kutoma 17: SenaMw
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Bible Society of Malawi