Gênesis 12
12
Hoyakalu Towuxyawakaplu Abrão Piranapni
1Tsru Hixikatshriwa Hoyakalu hinkakatkalu Abrão mitshi:
— Puchpajinixkalu ptshijne, pimolene tskalaya, puchpajinixkalu purupji, pyanwakatanru tshiji nekhixyapyi.
2Pixa nkamhinri hixo pixyawakapa. Nuhlehchinikanutanyi pixa hiyrunu pixa npohiwahiwakkakanyi Abrão. Pixa tshinanu pimrine hihlehchinikanutko.
3Katukta hihlehchinikanutanyi pixa Hita hihlehchinikanutanna wanna hiyrun-koxa katukta hektuwaka htshinanwakatyi pixa Hit-koxa hektuwaka ntshinanwakatna wanna. Ptowru neruka xye tshiji hajene hihlehchinikanutka pixa tshinanu.
4Waneya Abrão yatka htshina towutlexyawaklu Tsru Hixikatshriwa Hoyakalu wane potuko hya Abrão. Ló koxa himotsatlu. Setenta e cinco mhaletkalu Abrão Harã tshinikowaka ruchpajyatka.
5Abrão hanikna waleyma hyiywakna hhanunro Sarai, Ló repuru whene, hiyrunu ptowru rejnunkate rimwanru hiyrun-koxa ptowru rayinetene Harã tshijne rukchijinine ranikamta. Hyanna Canaã tshiji nwaka. Waneya rapokna.
6Waneya Abrão koprumtlu wale tshiji haté Siquém tshinikowaka Moré tshinkaluru mun-yehi. Waneklu Canaã-nerune wane tshijne rawakanatna.
7Seyni Tsru Hixikatshriwa Hoyakalu hakanhayehitlu Abrão waneya wane htshinru: — Pixa klopichane nenekanu xye tshiji. Waneya wane hkamhiylu Abrão satu altar Tsru Hixikatshriwa Hoyakalu tshinanu rakanhayehitjeru.
8Waneya wane riknohamta hipjitkaka yehi hyamta Betel tshinikowaka tkatshi hichpajyawaka sreta nwaka. Waneya wane rutakapjita nikalumta kamhikolu pji. Betel tshinikowaka tkatshi himxijyawaka sreta Ai tshinikowaka tkatshi hichpajyawaka sreta hanikajite hpanawaxya. Waneya wane altar hkamhiya Tsru Hixikatshriwa Hoyakalu rimalwuxyawaka tshinanu.
9Waneya Abrão wane hichpajyatnaka Nequebe tshinikowaka nwaka hyamta.
Abrão Egito Hyinri Piranapni
10Waneya tsru natshi wale tshijne hakanhiya; hiyáhoni Abrão Egito tshijne nwaka hya wane rawyawakapa klu tshinanu tsru natshi potuko hakanha wale htshijneya.
11Egito tshijnestsi rapojinixka hi howukatkalu, Abrão wan-tshinro hhanunro Sarai:
— Petanu, nimatyi pixa kihleyi.
12Waneya Egito-nerune hexinipyi wla htshinanna: “Twu hhanunro” waneya hita ruylatanna seyni pixa hi ruylatanna.
13Hiyáhoni wane ptshininwa repurno, waneya ramotannona pixa tshinanu hiyrun-koxa kihlewaka hkamhinnona pixa ramotle tshinanna. Hiyáhoni hi ruylatannona.
14Waneya rapojinixka Abrão Egito tshijne, egito-nerune hetlo Sarai kihle hojiro tixyawaka.
15Waneya rexinixkalona Sarai Faraó yehi towrerune runkakluna Faraó kihle potuklo Sarai htshinruna; waneya ranikatkalona Sarai Faraó yehi twiywakpatka.
16Waneya wala tshinanu Faraó kihle hixlu Abrão hiyáhoni wane rixa yoptoletluna Abrão prane carneiro-ne, wakane, porone, htowrerune jejine, htowrerone suxone koxa, porone suxone, camelo-ne koxa.
17Seyni Tsru Hixikatshriwa Hoyakalu (Teno Hajeru) hapnokatlu Faraó rayinetene koxa. Tsru hahijewaktshiyma rapnokaxyana Sarai Abrão hnunro tshinanu.
18Waneya Faraó tomhalu Abrão waneya wane htshinru:
— Kluhe pixatkano? Haklu tshinanhe hi puhle hinkakletno phanunro tixyawaka?
19seyni wane ptshinno pepuro tixyawaka? Wale tshinanu nkonyi nhanunro tixyawakapa. Xawakni petanu twutkani phanunro, panikanro pyanutka.
20Waneya Faraó towutna rayinetene jejine Abrão nwaka hyana rimapyawakpatkana Abrão hiyrun-koxa hhanunro hiyrunu ptowru rimwalerna.
Nke Ahọpụtara Ugbu A:
Gênesis 12: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil