Gênesis 18
18
Tsru Hixikatshriwa Hoyakalu Hiyrunu Hepi Anjo-ne Hakanhayehixyawaklu Abraão Piranapni
1Tsru Hixikatshriwa Hoyakalu hakanhayehitlu Abraão tsru hahmunakakastsi Manre tshinkaluru. Abraão tenda nikalumta kamhikolupji swa htuplahamerekanata.
2Htunohiyhaleta waneya retna mapa jejine walestsi yopkakatshine. Rexinixkana riphaptote swa ruchpak-hasuklemxya, rasukanwakatna waneya hsatómiha haté tshiji.
3Waneya wane htshina:
— Nutsrukate, hektutu yineru pma mikahwakkanuklunupno, nanjityi pma miknohachaxyawakanupno hita ptowrerno.
4Hitshitanno honhatshi nwapakjixanu waneya hixa ptowrunekhi himukata herokalejixitanu waneya xye hahmuna chehi hmana himukata hapnanunrexya.
5Hyanwakatno hita ptowrerno hiyáhoni nwapanru pa hixanu hniklerupa waneya hapnanuyakatanu wane hixatshrihi himukata yaleta. Ruhitna wanna:
— Haté hehe, hanukta ptshinanwu wane pixanu.
6Hiyáhoni Abraão chinpotu tenda-pji hya wane htshinro Sara:
— Chinipotu, mapa yahotlu trigo pahi pwapanu phayapahiru; pkanyakanru waneya pjimanru pão.
7Waneya rasukanwakatna hiprane, hnuretlu satu boi whene poptshi hitu mukatalu. Waneya reneklu htowreru hiyáhoni Abraão towreru yatka hchireta nijitutletlu boi whenni.
8Ranikkoxlu manteiga, leite, boi whenni halpokojixikolni waneya wale psoluka wannastsi rutaka. Waneko hyopkaka wannastsi hahmuna hmana wanna nikka pchinika.
9Waneya repomhaluna Abraão:
— Ha Sara, phanunro, hanhe tya?
Waneya ruhita:
— Wala hawla tenda-pji twa.
10Waneya satu wanna wan-tshina:
— Halikaka satu mhale hiknohinipa nsatkapanu pixa nwaka waneya phanunro Sara kwuhenpatka jeji twuhenetanu. Hiyáhoni Sara yijnakotlu hiphaptostsi waletji sreta twakanata.
11Abraão, Sara tsrutsolejinetkani hixo mhalenetkana hiyrun-koxa Sara hi himtuhajetatka.
12Hiyáhoni tutsolhiwatatka Sara wala nanwaka, wane ttshina wala nanwaka:
— Tsrotsolejno hita nhanuru koxa tsrutsolejitka halikakpaklahe kowhenepno npoyikowatanu?
13Waneya Tsru Hixikatshriwa Hoyakalu wan-tshinru Abraão:
— Haklu tshinanhe tutsolhiwatatka Sara wane ttshina: Halikakpaklahe kowhenepno ntsrotsolejikno?
14Rawhe pa hixanu Hoyakalu mumukatanutu? Pa mhale xye papkoko hewi nyapanutnaka Sara matuwhenetanu jejipni.
15Seyni Sara pikatka hiyáhoni tweyawatatka. Wane ttshina:
— Hike, hi nutsolhiwatatka.
Seyni wale wan-tshinro:
— Hehe, putsolhiwatatka halikaka.
16Waneya jejine wane hpalniyatkana. Sodoma tshinikowaka poktshi nwaka hyihatna. Abraão wannayma mnuru runhamtka pchinikna.
17Waneya Tsru Hixikatshriwa Hoyakalu wla tshina:
— Nyohimaxyerhe Abraão nkamhapirreru tshinanu?
18Klu tshinanu Abraão honukla hixo neru hirupni hiyrunu himukatatshripni hiyrun-koxa ptowru tshijne hajeru kihlewaka htshinkona wale tshinanu.
19Klu tshinanu nnuretlu wale hiwhenene ruykoxyawaka hiyrun-koxa nuretlu walepji hajene hinatshripa ruykoxyawakapa Tsru Hixikatshriwa Hoyakalu hatnu hapote romkahixyawakapna, potukalune hiyrunu himata yanatshine htshinkona. Wane hixkalunepni Tsru Hixikatshriwa Hoyakalu himukata hakanhakakletlu ptowru pirana potuko htshinakanaxyawaklu Abraão.
20Waneya Tsru Hixikatshriwa Hoyakalu wane pnute htshina:
— Sodoma, Gomorra muhlenu sejire mixkowatatka. Hmixkowpotutatka rumtuknuna.
21Hiyáhoni wane ntshina nserpikanu, netapanna ho wane pa hektunuklahe rixjetna ho hike nix-jemlesejirexyawakna pixka. Wane hmixkanunklunupna nimatanu.
22Waneya jejinestsi hyopkakakanaxiniwa Abraão ruprotakamtatkana waneya Sodoma poktshi nwaka hyatkana. Halikaka Abraão hitukatka Tsru Hixikatshriwa Hoyakalu hetanuya.
23Waneya Abraão kayehikatkalu Tsru Hixikatshriwa Hoyakalu waneya wla htshinru:
— Halikaklahe pnikatanna potukalune, hektuneyma?
24Cinquenta yine potukalune Sodoma poktshi hwini pnikaterhe wale poktshi cinquenta yine pejnu potukalune tshinanrahe ho puchoterhe?
25Hikeklu wane pixanru potukalune puylaxyawaka hektuneyma. Potukalune hektune hma kahwajikolupna. Hi koxa wane rixa ptowru mayxaklu hetatshri xye tshijne hajeru seyni pixa potukalu pkamhanu.
26Waneya Tsru Hixikatshriwa Hoyakalu wla tshinru Abraão:
— Cinquenta yine pejnu potukalune nukchijinipa wale poktshiya nuchotanru wale poktshi hajene ptowruneka cinquenta yine potukalune tshinanu.
27Waneya Abraão yanumatatnaka wla htshina:
— Petanno xawakni, nukchiklu Tsru Hixikatshriwa Hoyakalu nyinumaxyawaka seyni hitni kajpa pahi pixkalutuchano ho tshitshi pahi pixkalutuchano.
28Seyni hmahaxinipa cinco yine potukalune cinquenta hmixkanuklunupna pnikaterhe wale poktshi psoluka cinco mhaxyawak-tshinanu tsonu? Waneya Tsru Hixikatshriwa Hoyakalu wla tshina:
— Quarenta e cinco yine potukalune tsonu nukchijinipa waneya hi nnikatanru wale poktshi.
29Waneya Abraão hiynumatatnaklu wla htshinru:
— Ha quarenta yine potukalune tsonu rixini?
Waneya Tsru Hixikatshriwa Hoyakalu wla tshinru:
— Quarenta pejnu tsonu tshinanu hi nnikatanru.
30Waneya wla htshinru Abraão:
— Ha Tsru Hixikatshriwa Hoyakalu hi pahkanno waneya nyanumatanutnaka. Trinta yine tsonu potukalune wane pukchijinipa pnikaterhe?
Waneya wla htshinru:
— Hi nnikatan-koxlu trinta tsonu nukchijinipa.
31Waneya wla htshinatka Abraão:
— Ha hetanu nutajnawa niynumaxyawaklu Tsru Hixikatshriwa Hoyakalu hiyáhoni xawakni vinte tsonu pukchijinipa?
Waneya Tsru Hixikatshriwa Hoyakalu wla tshinru:
— Vinte tsonu nukchijinipa koxa hi nnikatanru.
32Waneya Abraão wla tshinru:
— Ha Tsru Hixikatshriwa Hoyakalu hi payokanno xawakni tsonu nyanumatanutka. Ha xawakni dez tsonu wane pukchijinipa?
Waneya Tsru Hixikatshriwa Hoyakalu wla tshinru:
— Dez tsonu wane nukchijinipa hi nnikatanna.
33Waneya hajeyri Abraão hali hiynumletkalu Tsru Hixikatshriwa Hoyakalu yatka waneya Abraão yatka hipjiru.
Nke Ahọpụtara Ugbu A:
Gênesis 18: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil