Gênesis 38
38
Judá Hiyrun-Koxa Tamar Piranapni
1Waneya waneklu papko Judá tshinkaluru hichotna himolene. Hyatka satu yineru adulão-neru Hira hiwakatletatshri pji hwatka.
2Judá hetlo sato suxo canaã-neru whene Suá tshinkaluro. Hhanunrotlo.
3Tmichiwata, jeji tmatkakatka. Er rutakhiwakatlu.
4Waneya tmichiwatatnaka, tmatuwheneta jejni. Onã tutakhiwakatlu.
5Waneya tmichiwatatnaka, jeji tmatkakanatka. Selá tutakhiwakatlu. Quezibe tshinikowaka hmatuxyatka.
6Waneya Judá makloji rukchika Tamar hiwakatletatshro hiwhene tsrujru tshinanupa Er tshinkaluru hhanunroxyawakaplo.
7Seyni Tsru Hixikatshriwa Hoyakalu hetanu hektutni Judá whene tsrujru Er tshinkaluru. Hiyáhoni Tsru Hixikatshriwa Hoyakalu hiylatanatkalu.
8Waneya Judá whene Onã tshinkaluru htowuta, wla htshinru:
— Pimoleni hnunro phanunrotanu pwuhenewkakanro pimolni whene hkahwajikolupa.
9Seyni Onã hahxatlu himolni klu tshinanu rimaxnawa tmatkaklerumkapa hi wale whene hkahwakko. Hiyáhoni ptowru katako pnu rixyaholexinmaklo himolni hnunro tshijiko pnu rixkajnawa, whentshine hma menejyawakanuplu himolni.
10Seyni xye hkamhaleru hi rukchikhihlenutatka Tsru Hixikatshriwa Hoyakalu hiyáhoni wale koxni ruylatatka.
11Waneya Judá wla tshinro Tamar himekanunro:
— Hipnahnurutatshro pixinwa purupji pya haté htseruwninipa noturu Selá.
Wane htshina klu tshinanu hpikatka xye hiwhene koxa himukata hipnaletanu. Hiyáhoni Tamar yatka, turupji twatka.
12Waneya wane pnuteyaka Judá hnunro Suá tshinkaluru whene hipnanatka. Waneya riknohinixka hwamonuwnale Judá kankatka ovelha-ne jiwchitatshine Timna tshinikowaka nwaka rimatletleru Hira tshinkaluru adulamita-neruyma.
13Waneya tunkakka Tamar wla ttshinka:
— Haha hetanu phimatjiru kankatka Timna nwaka hiprane ovelha-ne hjiwchixyawakapa.
14Waneya hipnahnurutatshro hitakleru mkatshri tkochpaka. Temkatatka kasamalu tuchyahojixnawa waneya mkatshri tsapowajnawa. Waneya Enaim tshinikowaka jihlokawakle hinaple ttuplatatka Timna tshinikowaka hwahapotatshri stsi. Wane tixa klu tshinanu tetlu tsrutkalu Selá seyni hi tenekka thanuruxyawakaplu.
15Waneya rexinixkalo Judá waleho kapoklewakleroni wala klu tshinanu tuchyahojixnawa.
16Hi rimathetlo himekanunro tixyawaka hiyáhoni wala nwaka hyatka hatnu hapoya waneya wla htshinro:
— Puna, nkatshpekapanyi.
Seyni wala wla tshinru:
— Klunerhe penekanno pkatshpejyawakapno?
17Waneya wale wla tshinro:
— Ovelha whene noprane xkehi hajeru satu nyokananwakatanyi.
Waneya wala wan-tshinru:
— Penejenohe satu pa hixanu punkakletleru nma yoptotkanu pchinika?
18Waneya wale wla tshinro:
— Klunerhe nenekanyi nunkakletleru himaxikolepa?
Waneya wala wla tshinru:
— Phiwaka marca-tyehi penekanno hitsluymako hiyrun-koxa pkanojere panikamtanru penekanno.
Waneya walekaka reneklo. Waneya hkatshpeklo, tmichiwata waleyma.
19Waneya tpalnatka, tyatka. Tohoji hichyale tkochpakatka hiyrun-koxa tomkalu hipnahnurutatshroko hitakleru tutakatnaka.
20Waneyakni Judá satu ovelha whene hyokanata rimatletleru adulamita-neru ymamka hyoptoxyawakamkapatkalu hiwaka marca-tyehi hiyrunu hkanojere renejyalo mitshi seyni hi rukchiklo.
21Waneya wale poktshi hajene repomhayehitlo, wla htshina:
— Hanurohe kapoklewaklero Enaim nwaka ya hapotatshristsi tuplajekanatatshro?
Waneya wanna wla tshinru:
— Seyni hewi hi twa kapoklewaklero.
22Waneya hsatokatka Judá nwaka waneya wla htshinatkalu:
— Hi nukchiklo hiyrun-koxa jejine wale poktshi hajene hinkakno kapoklewaklero hikeklu wane hwatka.
23Waneya Judá wla tshina:
— Haté hehe nenejyalo tumutukanutka wma patetjekajyawakanupa. Klu tshinanu halikaka hit-honra ovelha whenemka nyokananwakatlo seyni hi pukchiklo.
24Waneya três ksuru hetko hiknohinixka runkakka Judá, wla htshinka:
— Pimekanunro Tamar hapoklewatatka hiyrun-koxa timichitkatka tapoklewle tshinanu.
Waneya Judá wla tshina:
— Panikanro maleka tyoxijikowakapa.
25Waneya maleka tanikkoklunutka thimatjiru nwaka tyokantokanuta, wla ttshinakjixa:
— Xye hejnunkatetatshrikni michitno. Punkaklewaxinno xye hiwaktshi marca-tyehi hitsluyma katunnihe hiyrun-koxa xye kanojertshi katunni?
26Waneya Judá wan-tshina walenu rixyawaka waneya wla htshina:
— Wala hita yohnikpotuknuro klu tshinanu hita hi heneklo noturu Selá thanuruxyawakapa.
Waneya Judá hikeklu rumumkatkalo.
27Waneya tmatkakpiraxinixkana towhenene hepirune tosat-hajene.
28Waneya ttshinowaxinixka satu hapka matumyota waneya tshinowatatshro hislahatshro serolu tsalu tostumyonotatlu. Walamka wla ttshinatka:
— Xyekni mitshikananu matutatshri.
29Seyni hkoskanotatka waneya himole matutatka. Hiyáhoni wla ttshinatka:
— Hanhe pixa hikchikaswaleta puchpajyawaka? Hiyáhoni xawakni pixako ptshinanu. Wale tshinanu Perez rutakhiwakatka.
30Waneya wane pnute himole serolu tsalu hostukanruru matutatka. Wale Zerá hitakhiwakatka.
Nke Ahọpụtara Ugbu A:
Gênesis 38: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil