Gênesis 9
9
Hoyakalu Kojirexyalu Noé Piranapni
1Hoyakalu kihlewaka htshinanwakaxyawaklu Noé hiwhenen-koxa hiyáhoni wla htshinatkana:
— Hwuhenewatanu, hixolewatanu, htsepotanru tshiji.
2Ptowru nikalu pikanhi hixa, hixa hamlenu tshinanu, tshiji hajeru, kamejirune teno hajer-koxa; ptowruko tshij-hoho yapatshri, ptowru chima mar powha hwatshri koxa, hixa tenekko htowuxyawakaplo.
3Ptowru yanatshri, hiwekatshri hixa renekko hixa hnikleru rixyawakapa; wane nix-henekletatkahi ptowru hixatshri hitaklu pixka xawakni ptowru nikalu nenekanhi.
4Seyni nikalu hraha hi hnikanru klu tshinanu hihraha honra nikalu hiwejinri.
5Nujhayehitanhi hixa hrahni yineru hiwekkakatshri. Hiyáhoni hanuruktako nikalu hiylaxinru yineru wale koxa ruylatko. Hiyrunu yineru satu yineru ruylaxini wale koxa hijhalu ruylaxikowakatka.
6Katukta yineru ruylata yine hiylatanru hiylalewatatshri. Wane rixko klu tshinanu Hoyakalu kamhatkana yine waleko hyáholu potuko hkamhiyna.
7Seyni hwuhenewatanu, hixolewatanu; hipalatanu tshij-hohoya, htsepotanru tshiji.
8Wane koxa htshinru Hoyakalu Noé wale whenen-koxa:
9— Hiyáhoni hetanu, nunkaklexyahi hixa, hixa klopichane koxa nunkaklexya,
10hiyrunu ptowru hiwekatshri nunkaklexya hixaymalune koxa; kamejirune, nikalu campo hajeru, nikalu hocha hajeru, tsro kanawatlo hichpajikatshri hiyrun-koxa ptowru hixatshri tshiji hajeru nunkaklexya.
11Ntshinyawakatkahi: hikeklu hohne hnikatko ptowru nikalu hahyekachalu tshinanpakotnaka, hi koxa hahyekachalu nikatanru tshiji.
12Waneya wane htshina Hoyakalu:
— Xye hetkaluru nenekanhi nunkaklexyahi waleni hixa, hitayma wtshinkajyawaka hiyrun-koxa ptowru hiwekatshri hixayma hwatshri, hixa klopichanepa haté xawakni pnut-hohne hiwekatshinetka.
13Hiyáhoni nkamhanro sato kchi tenhohne mkoh-hoho; xyekni hetkalurupa tshiji nunkaklexinritka.
14Wane rixanu pa hohne tenhohne mkohi nakanhakajinipa tshij-hohoya rakanikanro kchi tenhohne mkohi hohoya.
15Hiyáhoni nuchinikanru nunkakletanru, ntshinyawak-mitshi hita pixayma hiyrun-koxa ptowru nikalu hiwekatshri. Hiyáhoni honha hi runanutka rahyekachaxyawakpatka, ptowru nikalu hma nikaxyawakanpatka.
16Kchi honra tenhohne mkohi twanu; waneya nexiniplu nuchinkanru nunkakletleru hike rixiniko mnikawnakatupa, hita Hoyakalno hiyrunu ptowru hixatshri hiwekatshri, ptowru nikaluyma tshij-hoho hwatshri tshinanu ntshinyawakatka.
17Waneya wane htshinru Hoyakalu Noé:
— Hiyáhoni xyekatkani nunkakletleru hetkaluru hitayma, ptowru hiwekatshriyma tshij-hoho hwatshri.
Noé Whenene Piranapni
18Noé whenene tsro kanawatlo hichpajikatshinni wannani Sem, Cão, Jafé. Cão tshinkaluru, Canaã tshinkaluru hirni.
19Nyi Noé whenene mapna: nyi psoltshijneko tsepotanu.
20Noé jitaklewakleru hiyáhoni hsana hkamha. Rutaklo uva.
21Vinho-ha katshhalo ruratka rimetatka hiyáhoni malechkopitkalu rukoluhpatka lona-pji hitokote.
22Waneya Cão tshinkaluru, Canaã tshinkaluru hiru, rexinixkalu ruru mamkatu rixyawaka runkakna himolene jejine maleka hwakanatatshine.
23Waneya Sem tshinkaluru hiyrunu Jafé tshinkaluru haniklu satu mkatshri waneya hitji sretna rutakluna waneya hitji sretako hyiyna hi wane hyihatna seyni ruchyachkopitluna rurna.
24Waneya riknohpohayehitatka Noé vinho-ha rimatyehixnatkawa Noé klu hkamhiylu hituru hepurtshi.
25Wane htshina:
— Hi kihlepatkalu Canaã tshinkaluru; hiyáhoni himolene towrerune towrerpatkani wale.
26Waneya wane pnute Noé halpokotokanuxnawa, wla htshina:
— Himalwutkalurni Tsru Hixikatshriwa Hoyakalu, Sem tshinkaluru Hoyakalute. Hiyáhoni Sem towutanru Canaã.
27Hoyakalu tserutkakanru Jafé tshinkaluru tshijne hiyáhoni Sem lona-pjikaka rawjetanu Jafé hiyrunu Canaã htowutanna.
28Noé hahyekachalu pnutetka riwekawa trezentos e cinquenta mhale.
29Raptowrure hohne Noé novecentos e cinquenta mhale waneya rupnanatka.
Nke Ahọpụtara Ugbu A:
Gênesis 9: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil