УблапӀэ 2
2
ЯтӀонэрэ шъхьэр
1Джаущтэу уашъори, чӀыгури, зэкӀэ ахэмэ ащыӀэ пстэури къэгъэшӀыгъэ хъугъэ.
2Яблэнэрэ мафэм ехъулӀэу Тхьэм Ӏофэу ышӀэщтыгъэр ригъэкъуи, яблэнэрэ мафэм Ежь зэкӀэ Ӏофэу ышӀагъэмэ ауж гупсэфыгъо уахътэ зыфишӀыжьыгъ. 3Тхьэм ынэшӀу щифагъ яблэнэрэ мафэм, мэфэ лъапӀэуи ар ышӀыгъ, сыда пӀомэ а мафэм Ар гупсэфым хэтыгъ: къэгъэшӀын къэгъэхъуным иӀоф Ащ ыухыгъ. 4Джары уашъомрэ чӀыгумрэ Зиусхьанэу#2:4 Зиусхьан – Тхьэм изэрэщыт къызэрыпӀон плъэкӀыщт амалхэм ащыщ. Адыгэ гущыӀэу зиусхьаным мэхьанэу иӀэм зэфэмыдэ джурт гущыӀитӀумэ къарыкӀырэр къеты. Апэрэ гущыӀэмкӀэ – Яхуа – Тхьэм ыцӀэ къыраӀо, ащ къикӀырэр: егъашӀэм щыӀэ зэпытыр. – ЯтӀонэрэр – Адонай – Тхьэр зэрэлъэрыхьыр, Ар зэрэфэшӀыгъэр мэхьанэу иӀ. Тхьэм ахэр къызигъэшӀыгъэхэ уахътэм афэгъэхьыгъэ къэбарыр.
Ӏэдэн чъыгхатэр
5Зиусхьанэу Тхьэм чӀыгумрэ уашъомрэ къызигъэшӀыгъэхэ уахътэм шъоф куандэ гори, шъоф уци джыри чӀыгум тетыгъэп, сыда пӀомэ Зиусхьанэу Тхьэм джыри чӀыгум ощх къыгъэкӀогъагъэп, чӀыгур алэжьынэу цӀыфхэри щыӀагъэхэп. 6ЧӀы чӀэгъым пахъэу къычӀэкӀырэм чӀыгур ыгъэшъокӀыщтыгъэ ныӀэп. 7ЕтӀанэ Зиусхьанэу Тхьэм цӀыфыр чӀыгум исапэ хишӀыкӀыгъ, щыӀэныгъэм ижьыкъащэ ыпэбзыймэ аритӀупщыхьи, цӀыфым псэ ыгъотыгъ.
8Тыгъэ къокӀыпӀэмкӀэ щыӀэ Ӏэдэн чъыгхатэ Зиусхьанэу Тхьэм щигъэтӀысхьи, цӀыфэу къыгъэшӀыгъэм ар псэупӀэ фишӀыгъ. 9Зиусхьанэу Тхьэм чӀыгум чъыг зэмылӀэужыгъо пстэури къыхигъэкӀыгъ, ятеплъэкӀэ дахэхэу, апытхэр дэгъухэу; чъыгхэтэ гузэгум щыӀэныгъэр къэзытырэ чъыгрэ, шӀумрэ емрэ къэозгъашӀэрэ чъыгрэ къыдигъэкӀагъэх.
10Ӏэдэн псыхъор къичъыщтыгъэ, ащ чъыгхатэр ыгъэшъокӀыщтыгъэ, етӀанэ плӀэу зигощыщтыгъэ. 11Ахэмэ ащыщэу зым ыцӀэр Пишэн, ащ дышъэ зэрылъ Хьауилэ чӀыгур къеухьэ. 12А чӀыгум идышъэ дэгъу, ащ щыӀэх мэ ӀэшӀу зыпихрэ мыстхъуи, мыжъо лъапӀэу оникси. 13ЯтӀонэрэ псыхъом ыцӀэр Гъыхъон; ащ хэгъэгоу Куш къеухьэ. 14Ящэнэрэ псыхъом ыцӀэр Тигр#2:14 Тигр – ижъырэ джуртыбзэкӀэ къызэраӀорэр: Хъыдэкъэл., ар Ашур итыгъэкъокӀыпӀэкӀэ мачъэ. ЯплӀэнэрэ псыхъор Ефрат.
15Зиусхьанэу Тхьэм цӀыфым Ӏэдэн чъыгхатэм псэупӀэ щыритыгъ ар ылэжьынэу ыкӀи къыухъумэнэу. 16ЦӀыфым мыщ фэдэ унашъо фишӀи, риӀуагъ: «Мы чъыгхатэм дэт сыд фэдэрэ чъыги къыпыкӀэрэр пшхын уфит, 17ау шӀумрэ емрэ къэозгъашӀэрэ чъыгым къыпыкӀэрэр умышхы, сыда пӀомэ ар пшхымэ, а мэфэ дэдэм шӀокӀыпӀэнчъэу улӀэщт».
18Зиусхьанэу Тхьэм ыӀуагъ: «ЦӀыфым изэкъоныр дэи. Сэ ащ ежь епэсыгъэу ӀэпыӀэгъу къыфэзгъэхъун». 19Зиусхьанэу Тхьэм чӀыгум хишӀыкӀыгъэх зэкӀэ шъоф хьакӀэ къуакӀэхэр, ошъогу бзыухэр. Ахэр цӀыфым къыфищагъэх ышӀэным пае ахэмэ ар зэряджэщтыр. Псэушъхьэ пэпчъ цӀыфыр зэреджагъэр ыцӀэу къытенагъ. 20ЗэкӀэ былымхэм, ошъогу бзыухэм, шъоф хьакӀэ къуакӀэхэм цӀыфым цӀэ афиусыгъ, ау цӀыфым ежь епэсыгъэу ӀэпыӀэгъу къыфэхъун ахэмэ ахигъотагъэп. 21Джащыгъум Зиусхьанэу Тхьэм чъые пытэ цӀыфым къышъхьарищи, ащ ыцагэмэ зы къахихыгъ, ар зыдэщытыгъэ чӀыпӀэр пкъышъолкӀэ ыгъэкӀыжьыгъ. 22ЦӀыфым къыхихыгъэ цагэм Зиусхьанэу Тхьэм бзылъфыгъэр хишӀыкӀи, цӀыфым дэжь ар къыщагъ. 23ЦӀыфым къыӀуагъ:
«Джы мыр сэ скъупшъхьэ щыщ къупшъхь,
спкъышъол щыщ пкъышъол;
ащ зэреджэщтхэр „бзылъфыгъ“#2:23 Хъулъфыгъэр – ижьырэ джуртыбзэкӀэ къызэраӀорэр: иш, бзылъфыгъэр – ишша.,
сыда пӀомэ хъулъфыгъэм хахыгъ».
24Ащ къыхэкӀыкӀэ хъулъфыгъэм яти яни ыбгынэнхэшъ, ишъуз гъусэ фэхъущт, ахэри зы хъущтых. 25ТӀури, хъулъфыгъэри бзылъфыгъэри, пцӀэнагъэх, ау укӀытэщтыгъэхэп.
Nke Ahọpụtara Ugbu A:
УблапӀэ 2: АдыТГ
Mee ka ọ bụrụ isi
Kesaa
Mapịa
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fig.png&w=128&q=75)
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Институт перевода Библии, 2002-2023