Mataafa Uumata 20
20
Aprihaami isho Apimeleki
1Aprihaami Mamireeyye xa'e ka piita Nekepi opa kotaane ka aroota Qaadesi ka a Asoori kara' safare. Ka piita Keraaraati shakkayteeta' kallaade. 2Ka a eeyye kalooyye, iskatteetaadi Saara' kiide, “Ishetta alawtiyyo.” Nuqusa Keraara Apimeleki ka Saara kamma orra erke, ikka ishi qeeden. #uuma 12:13; 26:7 3Halkeetta takkaayye, Waaqa olsaappanne Apimeleki' kide, “Iskatteeta diirta qapto' teyyatteey, ittoota.”
4Apimeleki qoota isheetta quda in kaynin malla ikide, “Hela poqallaayyo, orra dapa in qapnini patta' pirta? 5Isha ana kide'e, ‘Ha isheetta alawtiyyo,’ Isheetta kuli ka kiite, ‘Isha alawiyyo.’ anti ka isheetta teyyade diisheey, wa neeqa isha'e, an dikanne.”
6Waaqa ka olsaappanneew ishi' kide, “Atti akka dikatta neeqa a' qapnin in upa. Ka sede malla akka isheetta quda a' kaynini ka juppoota a' koonini ke dawre. 7Amma nefo iskatteeta laayyo oorshe. Isha' qootan xuumampayta malla, ike malla qinsadaay, a' tooto. Ma oton isheetta oorissa diissaayye, akkima' tooto, wa' qapta piisa ka piramane'e upnaado.”
8Apimeleki ka parri paraappan xa'e ka saarraadi a isha olli koda koona piisa ollopa hale ka wa olsaan dakaye piisa ishootta' torre. Orrose ete sede dakayeeyye akata tatammaqe. 9Sekkammaayye, Apimeleki ka Aprihaami hale ka kide, “Ata inna, maana ino' koote? Xawwi maanan ke tura mihishe akka ana ka orriyyo qara wa asse paha' koote? Wa nama apari nama qara' kooni in kinnini ana qara' koote. 10Xawwi innayti maana' dikatte ka wa asse paha' koote?”
11Aprihaami ka kide, “Anti in kide, orrose are kalo, Waaqa fuuri in cooy, takka punu iskatteetiiyyo malla ana ishsha. 12Isheetta aren keeton alawtiyyo, aayyaannon karkar diisheey, aappinno takkaaw. 13Anti ka awta Waaqa tika toolinnotiiyyi ana sookinnooyye isheetta' kide, ‘Poran oppopa anninno piisa oppaayye, isha alawiyyo kide.’”
14Sekkammaayye Apimeleki ka Saara Aprihaami alle oorshe. Ka kahirra ka horeeta ka orxaya diira ka a iskatta kuli ollin ishi' daashe. 15Ka isha' kide, “Piitiyyo are keturaayye kittaay, pora a ke' aako oppa' kallaatta i'ettanissa.” 16Ka saara' kideewwe, “Akka dapa a' qapnin orra ke akkino piisa akka upnaado'e, pirreeta kuman alawaayti' daashe; akka dukaata qapto orra piisa akkeey.”
17Sekkammaayye Aprihaami ka Apemeleki Waaqa qinsade. Waaqa ka Apimeleki ka iskatteetaadi ka orxayaadi piisa tooyyade, ikka xaaya paayyen. 18Deyyo'e qoota iskatteetase a Aprihaami Saara minan xaate'e, Yaahiwwe iskatta tika Apemeleki kara co piisa qaraaye xaaya dawre.
Nke Ahọpụtara Ugbu A:
Mataafa Uumata 20: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye