Mataafa Uumata 24
24
Hemitta Hisaaqi
1Yaahiwwe we piisa Aprihaami' sake ka daashe. Aprihaami' qoota para lekayta kallaade malla, akata kere. 2Ka kuyyaata takkaayye, orxaytase' xaadi a wa qapa piisa mukinnooti' kide, “Kupeettiyyo qara harka qapado. #24:2 kupeetta qara harka qapata aata orra Iprutinni xaxa pursama in qapnini'i akkinni 3Ka akka tuparra orroose a Kene'aani an oppa kala oppa innaayyo'e a' heminini'i, maxxa Waaqase piita ka moonta uumen ana' xaxado. 4Ka piita an oppa dalade opa aane ka daltaytinno oppaayye innaayyo' haantota qinsado.”
5Orxaytase ka kaassade ka kide, “Oto enentose ana olli arepa deena tiittooyye, hela amman innaattin piitase a atti deyyo oppa dalatte opan aana?”
6Aprihaami ka kide, “Akka eyyepa innaayyonne a oorrini tooytaado. 7A piita an oppa dalade oppa ka tikinno oppa ana sookshe ka kippeeta ana' daashe ka kide, ‘Piisse are kitto sanynyeetaayti in daasha,’ Yaahiwwe Waaqa moonta'e ke tura desa erkampattootaadi erka, akka eeyyeeyye, innaayyo'e, haantota qinsatta. 8Oton enentase'e ke olli deena tiitaayye, atti' xaxoosen a' xaxatte ke qara in kayan. Ma xoori pakkanna eeyyepa innaayyo in oorshan.” 9Orxaytase ka oori kupeetta Aprihaami qara harkaadi qapade ka akka wa isha' kide piisa kodo'e xaxade.
10Orxaytase ka kaalla poqallaadi oppa kudan qeede ka meeha a poqallaadi oppa a papaxxaara piisa qeede ka qara' fee'e ka piita Mosoppotaamiyaati katamasene a Naakoori kara kala opa aane. 11Ete pora seka aane kamma a letta kalaakalaawteeye, a iskatta pisha annooyye piitase' kaye. Ka a katama karopa in kullinin mali laka tula ela pisha kapa'e, kaallasene akka kilpallane' kode. 12Ka qinsade ka kide, “Oo Yaahiwwe, Waaqase a Aprihaami, akka awwe waan kamma' de'e ana' qajeelisso ka poqallaayyo Aprihaami'i xoonaatti akkisso'en ke qinsanni. 13Amma anti are eloose a pisha kapa'en qa'ade, tuparra piitooseti pisha oraapattaa'e de'aneey, 14Enenta an isheetta' kido'e, ‘Okta lekkisado ka pisha ana ikkishe,’ Ikka kiito'e, ‘Dooshe ka kaallaatti kuli in ikishaay,’ enentose tooy isase a orxaytaayti Hisaaqi rexxite a koddito. Pora asse pahonnen akka poqallaayyo Aprihaami xoonitto upnaada.”
15A isha afaappa Waaqa qinsatta in dikkinniniiyyi, Ripiqa okta kaakisatte ka deete. Isheetta enenta Paatu'eeli. Paatu'eeli, inna a opa Aprihaami, a Naakoori iskatteetaadi Milka oppa xaayade. 16Enentose enenta issin kitto ka aren akata xarjaallitteeta. Ka elase karopa lekkatte ka pisha oktaappa oraapatte ka fayyatte. 17Orxaytase ka isheetta kapopa jarjartan aane ka kide, “Tupara! oktaayti qara xata pisha shakkaya ana ikkishe.”
18Isheeetta ka kiite, “Poqallaay, dooshe” Ka oktase lekkisate ka ishi' qapte. 19Ka ete isha ike kiiteewwe, “Haka kaallaatti kuli paknaane'e ana pisha ishootta oraapaay, areppa' tawe.” 20Ka eennow pishasene a okta kara qapta mirka a oppa kaalla ikinnaan karopa tuqte ka haka kaallasene piisa faaknaane'e, ela kara jarjartan pisha oraapte. 21Isha akka Yaahiwwe wa kamma aane ishi' dikkinno taaki dikkinni in kinnin upnaata'e, jawi kide ka tooyaaw tooyni.
22Ete kaallasene paken kammaayye, orxaytase madawa warqeeta a ulsuma kiraameta keni mina cco qeede ka napahatoppa isheetta' kode. Ka jira warqeeta lakki a ulsuma kiraameta dippa ka kunda takka kaya harka mina isheetta hidde. 23Ka isheetta kaassade ka kide, “Ata atti a enenta ayno? Ana' lelen, hela tikaayshinaayye pora an oppa mukno icaada?”
24Isheetta ka kiite, “Anti an enenta Paatu'eeli. Paatu'eeli'iw, isase a Milka Naakoori' xaayte. 25Tikinnooyye pora oppa kaalla mukan ka oha a daman kuli eeyye' pure ka pora ishina oppa muktan nefo ica.”
26Isha ka oori kilpiippade ka Yaahiwwe' sakatade. 27Ka kide, “Yaahiwwese jaalala dukaatatin ana dikade, Waaqase a Aprihaami a kalataysamo. Yaahiwwe ana tura' qate ka hella a opa Poqallaayyo kapopa anan de'eey.”
28Sekkammaayye, enentase ka tikopa keerte ka qootoseti desa aayyaasso ka orra kapa co piisa' lelte. 29Alawase a Ripiqa Laapa kidammo ka elase a kapa orxaytase a Aprihaami co kapoopa keere. 30Isha wa malla keere nefo, warqeetase a napahata isho jiraasene a harka enentaaysho mina akke ka wa namase ishetta' kide piisa dakaye. Ete aaneeyye, namase a ela pisha kapa kaalla kapa qa'anno akke. 31Ka ishi' kide, “Atti, nama a Yaahiwwe ke' sake, maana'e are lakoppa' qa'atte? Ke ka kaallaatti kuli in pora mukitta harmisheey, xooye tikopa anna.”
32Namase ka tikopa kulle. Laapa ka kaalla qara fee'isa lekkishe ka oha ishootta' katte. Ka orxaytase isho orra olli co'e, pisha a loqqaan jaqadane' daashe. 33Ete damta dehaysheneeyye, orxaytase ikide, “An waan kamma erkame' lelo mali, damta an damo.” Laapa ka kide, “Lelen ka.”
34Isha ka kide, “Anti an orxayta Aprihaami. 35Ha Yaahiwwe akata poqallaayyo' sake ka isha teyaantayshe. Ka xelloota kahirra ka a telalla ka a lo'alla ka pirrewwa ka warqewwa ka orxaya a diira ka a iskatta ka harrewwa ka kaalla lekaya ishi' daashe. 36Iskatteeta poqallaayyo Saara ka keranta kela poqallaayyo inna diirta' xaayte. Ikka wa qapa piisa innaseneti' daashe. 37Poqallaayyo ka ana xaxacciise ka kide, ‘Piisse a Kene'aani an oppa co oppa innaayyo'e, haantota in qinsadan. 38Ma xoori sanynyeetinno ka firinno oppopa aane ka eeyye innaayyo' haantota qinsado.’ 39An ka poqallaayyo kaassade ka kide, ‘Oto enentose ana olliiyyi deena tiitto attan kiisha?’ 40Isha ka ana' kide, ‘Yaahiwwese an awta piisa ishan kallaanninno ke olli erkampattootaadi erka, ikka poraayti ke' qajeelissa. Akka tika aappinno ka a sanynyeetinno oppa innaayyo' haantota qinsatta. 41Oton sanynyeetiyyo kapopa anta, ishootta ka an ke enenta an daanno kidan ka ke dawran pattaayye xaxa ana' kalte kela pahata.’
42“Anka awwe an eloose a pisha kapopa deenooyye, qinsade ka kide, ‘Yaahiwwe! Waaqa poqallaayyo a Aprihaami, awwe waan kamma' de'e ana' qajeelshe. 43Anti eloose a pisha kapa'en qa'adeey, enenta an oto pisha' deetooyye ishi' kido'e, ‘Oktaayti qara xata pisha shakkaya ana ikkishe,’ 44Ikka kiito'e, ‘dooshe, kaallaatti kulin ke' ikishaay.’ Tooy enentose Yaahiwwe isheetta inna poqallaayyoti reexa dikatte, a koddito. 45Eten afaappa qinseeta an dikkinnin, Ripiqa ka okta kaakisatte ka pisha' deete. Ka elase karopa lekkatte ka pisha oraapatte. Anka isheetta' kide, ‘Tupara! pisha shakkaya ana' ikkishe?’ 46Ikka jarjartan okta lekkisatte ka kiite, ‘Ikke, kaallaatti kulin iksha.’ Anka ikke, ikka kaallaayyo kuli ikisse. 47Anka ishetta kaassade ka kide, ‘Ata atti a enenta ayno?’ Isheetta ka kiite, ‘Anti an enenta Paatu'eeli, isase a Milka Naakoori' xaayte.’ Anka oori madawa napahatoppa'e ka jira harka quda isheetta' kode. 48Ka kilpiippe ka Yaahiwwese akkan inna poqallaayyoti haantota qinsado tika inna opa poqallaayyoti opa nakaytan anan de'e, Yaahiwwe a poqallaayyo a Aprihaami Waaqaysade ka kalataysade. 49Amma oton ippoqallaayyo jaalannittan ka isha xasassa heentan taaki a' heennin, olkela ana' lela. Anti ka pora an anno opa alle' aano.”
50Laapa isho Paatu'eeli ka kidene, “Sede wa Yaahiwwe oppa ca'eey, ino waan kiina an qapno. 51Ripiqa sede are kittooy, qeede ka ishin aane. Ikka akka Yaahiwwe' kide mina'e, haantota inna poqallaatti' koddito.” 52Orxaytase a Aprihaami ete wa kidene dakayeeyye, ikilpiippade ka Yaahiwwe' sakatade. 53Ka sira a warqeeta isho a dakara oppa tumame ka mehadda a kalsatta kuli qeede ka Ripiqa' daashe. Ka alawa Ripiqa isho aayyaasso kuli' mehadda heraan kokkoka' daashe.
54Sekkammaayye orxaytase a Aprihaami isho orra isha olli co oori damta damen ka ikkayta kuli qara' iken ka eeyye'ew oppa muken. Ete parri xa'eneeyye, orxaytase itoola opa Ripqaati' kide, “Isqara ino xaasha, an ka poqallaayyo kapopa tiitaawo.” 55Alawaadi isho aayyaasso ka ishi' kidene, “enenta a ino kapa kuyyaata kudan mina' kitto pirto ka kuli'i ollin antaneey.”
56Isha ka kide, “Yaahiwwe waan kamma de'e i'ana' qajelsheey, anan jarshan; ana' saka an ka poqallaayyo kapopa tiitaawo.”
57Ishootta ka oorshen ka kidene, “Into ino enenta haleeno ka wa kiinitta afaadippa dakayna.” 58Ka Ripiqa halen ka kidene, “Hela namoose olli anta ihheenta?”
Isheetta ka kiite, “Aa, in heena.”
59Sekkamma oori ikka Ripiqa akka ampattoota a xatta isheetta ampatte ollin orxaytase a Aprihaami ka orra isha olli co ollin aanane'e, oppa' salen. 60Ka Ripiqa' saken ka kidene, “Enentinno, tumma dale ka lekaado, sanynyeetaayti ka saarto ka saapanna tuullito ka xeela paarkaalaadi kuli lehatto.”
61Sekkammaayye Ripiqa ka iskatta isheetta olli aano ollin harmisaden. Ka kaalla qara kukkuti'en ka orxaytase a Aprihaami olli anta' xa'en. Orxaytase a Aprihaami pora asse pahonne Ripiqa qeede ka ishin kale.
62Sitiiyyi Hisaaqi Nekepipa kase ka koommaytase a oppa ela a “Pi'erla haayro'i” kidammo co opa aane. 63Kuyyata takka kalakalaayye, ete oppa dikanno ka lakan desa paata tooynooyye, kaalla a lake desa deena'e akke. 64Ripiqa ete Hisaaqi akkiteeyye, kaala qara alle lekkatte. 65Ka orxaytase a Aprihaami kaasatte ka kiite, “Ata ini ayno qindinno opa deeni?” Orxaytase ka kide, “Ini poqallaayyo Hisaaqinni.” Isheetta ka oori ennow kukubbaan ilda qara dekatte.
66Orxaytase ka wa kodde piisa Hisaaqi' torre. 67Hisaaqi ka oori ripiqa qeede ka tukkana a aayyaasso a Saara kelopan kale; ikka iskatteetaadi koddite. Ikka isheetta jaalade ka ise a toota ayyaassoti malla nyarrahe nefo oppa xasa oorsade.
Nke Ahọpụtara Ugbu A:
Mataafa Uumata 24: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye