Yohaannisi 2
2
Yesuusi akkima piita Kelilaati katama Qaanati sankulta hemitta oppa akkaade
1Kuyyaata sessattatiiyyi, katamasene a Qaana piita Kelila kara caatiiyyi sankulta hemitta'e ca. aayya a opa Yesuusi nefo ka eeyyew kitta 2Yesuusi isho tamaarewwaadi kuli ka sankultose a hemitta oppopa halaamen.
3Ete sankultase a hemitta oppaayye taadeta wayneeta piramteeyye, aayya a opa Yesuusi i Yesuusi kiite, “Ha taadeta wayneeta ipiraden.”
4Yesuusi ka isheetta kide, “Aayye! waan koda ana lelaa a ettanisso! Etaayyo in dehaanneey.”
5Sitiiyyi aayyaasso ka orxaya eyye caati kiite, “Wa isha ishina kiina koda.”
6Yihutaata, qoota taanteta jaqqaysuma qapto malla, kaanewwa a dakaappa kodame lehi eyye ca. Kaanewwosen ka matta mina pisha okkota lakki taaki sessa qapanni. #2:6 “kaaneta” kaaneta orra ayihuta takka, pisha nitiroota dippa taaki qaropeela qapanni.
7Yesuusi ka orxayaseneeti kide, “Kaanewwosene oppa pisha immaka” Ishootta ka immaken ka afaappan kakkayen 8Sekkammaayye Yesuusi ka orxayaseneeti kide, “amma oori muudda ka saara sankultati daasha” Ishootta ka qeeden ka daashen 9Saarase a sankulta ete pishasene taadeta wayneeta opa pursame afaan tooyyeeyye, pora ishi de'en in upnaanne, orxaya pisha oraape xoori i'upan. Saarase a sankulta ka aappa a hemitta hale ka ishi kide,
10“Nama piisa, paayyota'e taadeta wayneeta a paxaara dehanni ka oto orrase damta halaame iko kammaayye kuli, a neeqa dehanni, atti xoori taadetase a wayneeta paxaara'e haka ammati jarisse?” 11Yesuusi piita Kelilaati katama Qaana kara'e wa orra qawwanna oppa wossin orra qawwanna a paayyota kode ka seden ulfeenaadi akkishe. Tamaarewwaadi ka isha amanenen. #2:11 “wa olsa paha” mataafa akirikki qaraayye kodadda olsa pahae “milikkita” kiini. 12Sekkammaayye Yesuusi aayyaasso ka hellaasso isho tamaarewwaadi olliiyyi katama Qifirnahoomi opa xata lekkade ka eyye kuyyawwa lamaya piren. #Maati 4:13
Yesuusi akkima orra tika qulqulloota kela paata katanno ka heraanno alle daane
Maati 21:12-13; Maari 11:15-17; Luqa 19:45-46
13Qoota xayso nessuma a qaran tarpeeta a orra Yihuta kela' foolsatte malla, Yesuusi katama Yurusaalami opa aane. #sooka 12:1-27 14Ka orra tika qulqulloota karaayye xormada ka kaharra ka elela katanno isho orra eyye qa'e kaajaa purinno akke,
15ka watarootoppa qajjeeta kode ka orrase piisa kahirra isho xormadasene ollinni tika qulqulloota kara sookshe. Ka kaaja orrase purinnooti alle' fide. Ka tarabbeessaasso alle kara kakkalshe. 16Ka orra elela katannooti kide, “Sene piisa alle are kara maysha ka tika aappinno tika urmalaati in kodan!” 17Sitiiyyi tamaarewwaadi ka akka taafamte ka kiinitto, “Qoota tikaaytiti desa Yoota an qapo a apitta mina ana kupe” Matte oorsaden. #mas 69:9
18Sekkammaayye ukkumampaya a Yihuta ka Yesuusi kidene, “Atti sede koda'e akkima hupna ukkumeeta qapto wa orra qawwanna maana ino akkissa?”
19Yesuusi ka ishootta kide, “Ishina tikoose a qulqulloota qitqishsha, anti kuyyaata sessa kara in qupaay.” #Maati 26:61; 27:40; Maari 14:58; 15:29
20Ishootta ka ishi kidene, “Tikoose a qulqulloota qupa'e para kunda afuri lehi qeetteey, atti atta kuyyaata sessa kara'ew qupta?” 21Yesuusi xoori sede a tika qulqulloota kide, qoota dakintaaditi desa haasawade. 22Semmalla awta Yesuusi tootoppa xa'eyye tamaarewwaadi akka turan isha, sede haasawade matte oorsaden ka wa mataafa qulqulloota oppa' taafame isho qaaleta a Yesuusi haasawade amanen. 23Eta a xayso nessuma a qaran tarpeetatiiyyi wossene orra qawwanna, a Yesuusi Yursaalami kara cooyye kode qoota akken malla, orra lekayta isha amane. 24Ma xoori Yesuusi, qoota orra piisa upo malla, ishootta in amanne. 25Isha qoota wa karitta nama kara ca piisa upo malla, qoota namati desa akka nama takka nefo ishi' lelo parpaaccisni in kitto.
Nke Ahọpụtara Ugbu A:
Yohaannisi 2: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye