Luqaasi 24
24
Yesuusi akkima tootoppa xa'e
Maati 28:1-10; Maari 16:1-8; Yoha 20:1-10
1Iskattase ka shittootase a harmisade qapade, ka torpaappa kuyyaata paayyotati, sampateeyye paraappan hawlase kapopa aane. 2Ka shilase hawlase tura' dufen, a alle tura sukume akken. 3Ma xoori ete hawlase karopa kulleneeyye pukka a Poqalla Yesuusin akkine. 4Ete sedeppa qawwaawaappa caaneeyye; tin nama lakki a mehadda warwarra kalsade de'e ka ishootta kapa qa'ade; 5ete iskattase a kata fuure ka piitan xata tooyannooyye; orrase i'ishootta kide “Maana'e caattampayta orra a le'e kara faanittan? 6Isha aree in co! i'e! Akelilaayye cooyye, wa ishina kide matte oorsada. #Maati 16:21; 17:22-23; 20:18-19; Maari 8:31; 9:31; 10:33-34; Luqa 9:22; 18:31-33 7Isha i'ishina kide ‘Inna a nama juppoolaya turopa tuukkama ka fannisama, ka kuyyaata sessattati tootoppa xa'a’ Isha parpaaccisni.”
8Iskattase ka qaaletase a Yesuusi matte oorsade. 9Ka hawlase kapa tiitaawe ka tamaarewwasene a Yesuusi kudan ka takka isho a ata haseeti sede lelen. 10A sede erkamampaya' lele nefo, Maariyaami Mekdelitteeta ka Yohanna ka Maariyaami aayya opa Yayqoopi ka iskatta pila nefo ishootta qudaayye caaw. 11Ishootta xoori, qoota sede paapeelta ishootta pahanaatte malla, iskattase qara in teyyanne. 12Ma xoori Peetiroosi ixa'e ka hawlase kapopa keere; ete eeyye kaye ka xata kide ka tooynooyye, ohaatase qaaha xaynaata qora talpa oppa dawamte pukkasetin maren a poraadippa kitto akke. Ka wa kodde oppa qawwaawe ka tikopa kale.
Yesuusi akka tamaarewwaadi lakki tura akkaade
Maari 16:12-13
13Awwsetiiyyi orra Yesuusi kamma anno oppaayye, nama lakki paleeta Emaahuusi kidammitto ka Yursaalami kapa desa kilomeetireeta kudanka lakki mina' kitto sekitto opa kalli. 14Ishootta ka wossen kodde piisa xaashen ka oppa torraanni. 15Ishootta ete sede haasawannaan ka oppa torraannaaneeyye, Yesuusi mattaadi'i ishootta kapopa de'e ka ishootta olli anta paayye. 16Ma xoori ishootta ildaassotinni eyye isha tooyni diisheey, ayno, akkima kodde upnaatta in ettaninne. 17Isha ka ishootta kide, “A anta qara kittaneeyye, wossen a oppa torraannittane maana?” Ishootta ka nyarrahen ka oppa ollin qa'aden. 18ishootta oppa nama takka Qeleyoobba kidammo ka ishi kide, “Hela ke pattan piisseti xaykitta ka wa a kuyyawwosen kara Yerusaalami kodde in upnini?”
19Yesuusi ka ishootta kide, “Ata wossen maana?” Ishootta ka ishi oorshen ka kidene, “Waasene Yesuusise a Naasirati qara kodde'enne? Isha xuumampayta a fuula Waaqa ka a orra piisa tura qaaleta ka kodaan kokkooka. 20Saarra a qeesewwa isho saarraanno ka firteeta tootati isha tuukken ka fannisen. 21Ino allu in kippanninna ka kiininna ‘Isha Isira'eeli furada.’ a koddito ma, a se piisa kodditeeyye, awwe kuyyaata sessatta. 22Amma laadi iskatta demo a inoppa co ino qawwayshe, ishootta awwe parappanne hawla kapopa aanen. 23Ma xoori pukkaadi in teyne ma i'oren ka kiini, “Erkampattowwa kiina'e, ‘Isha icaade!’ en kelashaatoppan akkine. 24Ino oppaayye orra demo ka hawwlase kapopa aane, ikka akka iskattase kide qara koddite, ma xoori Yesuusi in akkine.”
25Yesuusi ka ishootta kide, “Ishina a matte paata qapnaani in kinnini, karittaayshin ka wa xuumampaya haasawadene piisa amana kapa sekaade! 26Kiristoosi rakkoose piisa teyyatta ka ulfeenaadippopa kalta isha parpaaccisni in kittoo?” 27Ka se kammaayye mataaffa Muuse isho a xuumampayaati paayye ka wa qootaadi desa mataaffa qulqulloota oppa lelame piisa takka takka ishootta la'ayshe.
28Ishootta ete paleetase a opa annaan kapa dehaadeneeyye, Yesuusi a tarpo ka aano pahanaade. 29Ishootta xoori a kuttati isha naappaden ka kidene, “Amma letta nefo idumte ka ishishshipte qara kittaay, are ino kapa muke.” Semmalla isha ka oori ishootta kapa' mukitta'e tika kelopa kulle. 30Ka ishootta olli damta kute'e. Ka laaqqoota qeede ka qara Waaqa kalataysade ka oppa moosse ka ishootta daashe. 31Sitiiyyi ildaasso ka panamen, ikka akka Yesuusi kodde upaden. Isha xoori eennow ildaasso tura dapade. 32Ishootta ka olli kidene, “An poroppa kinnooyye, ikka ino lellooyye ka mataaffase a qulqulloota ino taqqasnoo ka ino la'annooyye, karittinno a apitta mina kupani in co?”
33Ishootta ka saatese oppaayyeew xa'en ka Yursaalamipa tiitaawen ka eeyyeeyye tamaarewwasene kudanka takka isho orra a ishootta quda co a pora takkopa ollopa oore akken. 34Ishootta ka ishootta kiini “Poqalla Yesuusi dukaatanne tootoppa xa'e ka Simooni tura akkaade!”
35Tamaarewwasene lakki ka xaayshoti desa wa poroppa kodde ka ete Poqalla Yesuusi laaqqoota moosseeyye akka isha upaden ishootta torren.
Yesuusi akkima tamaarewwaadi tura akkaade
Maati 28:16-20; Maari 16:14-18; Yoha 20:19-23; koda 1:6-8
36Ete ishootta sede haasawattaappa caaneeyye, Yesuusi mattaadi'i otantaaysho oppa qa'ade ka ishootta kide, “Nakayta a ishina koddo!”
37Ishootta xoori a kaarayya akkinaane ishootta pahanaate ikka tatammaqen ka harmo fuuren. 38Yesuusi xoori i'ishootta kide, “Maana malla tammaqnittan ka karittaayshin karan xata dikatta lakki qapnaannittan? 39Harkaayyo isho loqqaayyo tooyya ka akkan ana upnaada; ka ana quda qappada ka ana tooyya. Akka ana akkinittan mina'e, kaarayya dakinta ka lafta in qapaneey.”
40Ka ete asse kide kammaayye, harkaadi isho loqqaadi ishootta akkishe. 41Ishootta xoori, xasootta ka oppa qawwaawa a koope qaran xaate'e, ikki isha in amannin; Yesuusi ka ishootta kaassade ka kide, “Wa a dammaane iqaptane?” 42Ishootta ka murkuja a waaten shakkayta ishi daashen. 43Isha ka teyyade ka fuulaaysho tura' dame.
44Yesuusi ka ishootta kide, “Eta an ishin olli cooyye, isase an ishina kide “Wa qootiyyo desa seera a Muuse daasame oppa taafame ka mataaffa xuumampaya isho a masmuureta oppa taafame piisa dikkatta parpaaccisni tooy sede.”
45Ka se kammaayye, akka mataaffasene a qulqulloota matte qapnaatta ettanshane'e, matta ishootta' pane. 46Ka ishootta kide, “Kiristoosi akkima rakkado ka kuyyaata sessattatiiyyi tootoppa xa'o, xattaaw taafamte. 47Akkimse mina'ew, maxxaadin, juppootoppa ooreta ka haseenta juppoota akkatta, Yursaalami paayyatte piitaddaappa samayta piisa torramto ilelamte. 48Sede piisa'e ishina kan a maakkiyya. 49Tin anti, kippeetase a Aappinno ishina daashen, ishina erka; ishna haka moonte xata hupna akka ohaata mina uwwisannittan kara'e, katama Yursaalami kara jara.” #koda 1:4
Yesuusi akka moontopa fayyade
Maari 16:19-20; koda 1:9-11
50Se kamma Yesuusi katama Yursaalami karaayye tamaarewwaadin sooke ka haka Pittaaniyaati ishoottan aane; ka, eyye harkaadi xaashe ka ishootta sake. #koda 1:9-11 51Ka ete ishootta saknooyye, ishootta kapa xa'e ka moontopa fayyade. 52Ishootta ka ishi sakataden ka xasootta kuttan Yursaalamipa tiitaawen. 53Ka Waaqaaw kalataysanni, umma kuyyaata piisa tika qulqulloota kelaayye dapni in caan.
Nke Ahọpụtara Ugbu A:
Luqaasi 24: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye