Maruku 1
1
Pakisédri si déndomia ki Yuhani
(Matai 3.1-12; Luka 3.1-18; Yuhani 1.19-28)
1Vlakɨdra ki Ticomtia,#1.1 Iké na buruenɨ na sulatɨ tédra na <<Vlakɨdra ki Ticomtia>>. Yésu Kirisito ku Hukuing sikiorudru ni ka tuminia. 2Ku maburosi Isaiya asulutadra ka tumékné:
Ku Ticomtia masobɨka:
Cɨngɨla, nuruma kɨkɨ koluli;
kidri ka kemanima ku thamɨdalene swa, dorne ku dadɨranɨ su.
3Ico ukoko iké na rborbo:
Kiaké Pɨlɨngɨ dadɨranɨdra,
kula sukuru dadɨranɨ nunkaradra dodavce!
4Pormo, ki Yuhani iké rborbo mɨngbolɨ, pababano pséndri na ico, si latilila prabu#1.4 <<ki Yuhani iké rborbo mɨngbolɨ, pababano pséndri na ico, si latilila prabu>> iké druma na buruenɨ sulatɨ tuméné <<ababano késéndri Yuhani pormo iké rborbo mɨngbole, prabu>>., <<Mumu ka mungépela si ktormana, ababano késéndri, Ticomtia ka novaramadria psaila mu.>> 5Madro siliké Yudai makatékaninga si angurubua Yérusalrim ico mukuné mua tulucubungadra ki Yuhani. Rɨsamia ngirigu iyo mia ku psailadra; ki Yuhani liké Yordan drɨkrele pababano pséndridria ngurubuanɨnga.
6Ki Yuhani sémamɨne ku ubalɨdra rigi na kipingi, sitɨbɨthɨ na kɨlécé, akanadra tɨnasieke si ɨsɨbɨdra na velo. 7Latilila musobaka, <<Iku nukuné mangkwa ibirlanɨ ka skaragredra urbatekwa, kumili tekethene wakɨrng overa tkapɨdra ka ipawanɨ. 8Saké kɨkɨ na acɨlé pababano pséndri mwa, kidri ka nusarkéma na Séré pababano pséndri mwa.>>
Képababano késéndri si kipéleva ki Yésu na
(Matai 3.13--4.11; Luka 3.21-22; 4.1-13)
9Ku itɨkalemane, ki Yésu ka saliké Galrilri Nazarethe mukuné, ki Yuhani ka sukénga Yordan drɨkrele pababano psédrédria. 10Yésu siliké cɨlé adringi mbuolɨ sucɨngɨlɨnga walɨbɨnga tɨbɨlɨnga, Séré ka tumé na bugo mdide iké buetɨdra. 11Iké na siliké tɨbɨlɨnga mkuné midide, musobaka, <<Musu ka mathariali na Vlakɨ, madɨlamɨ kɨkɨ swa.>>
12Séré ka supuibungunga Yésu na mwa ruborobo mia. 13Tékanidria ka mthéptele na vienɨ, mélevadria na satang, terɨsɨ na makagulugulénga, makasi iké koludra na Pɨlɨngɨ garɨ olekebedria.
Udolu ngithɨptɨ na kékakangɨ ki Yésu
(Matai 4.12-22; Luka 4.14-15; 5.1-11)
14Ki Yuhani pdanɨningadria tɨkerkerenga ɨlɨbɨ, Yésu amua Galrilri prabu Hukuing ni Ticomtia. 15Masobka tuméné, <<Amuanga ku vienɨ, dédadra ki Ticomtia, delémanga mukuné si mungépela séngiaro tkabɨkanɨ Hukuing.>>
16Ki Yésu angtuluru Galrilri tɨbaru tibila dodavce, cɨngɨlɨ drusa na iké tɨbaru kékakangɨ oré, amani ki Simon si gilidria sovlé Anderé. 17Ki Yésu lapobkadria, <<Nanga muksapara kua! Kɨkɨ ku nudurumamua pikilivu kékakangɨ na ico.>> 18Suribungunga bongu ku arédra gia kɨsapara Yésu na.
19Ikédvélé ku tadvadvacadra, Yésu la cɨngɨlɨ vlakɨdra ki Zebedai Yakobu si gilidria sovlé Yuhani; iké avangɨ garɨ pasɨkskɨtɨ arédra. 20Ki Yésu ka la doludria, susibilinga maminia si sidepɨnia piké avangɨ, sugianga ksapara Yésu na.
Sesa ico ku muderapɨdria na gɨralɨ
(Luka 4.31-37)
21Kini muidranga cɨkɨlɨ Kaparnaum; muidranga tébarbarvia na vienɨ, ki Yésu modanɨ tika tisarbubua na Yudai ico brubrudria. 22Ku ubiciringi sububurudra ki Yésu rɨsaliya mɨrɨkɨmɨ, malémɨcɨ na kɨcɨnga prɨvké, si iku drumanɨnga ubrubru Sésio na singsi ka masikiulanɨ.
23Knénga, tisarbubua na Yudai ico iké sesa na modɨrapɨdria na gɨralɨ, la thɨpɨrɨ musobaka, 24<<Nazarethe ki Yésu, nakusu pɨtépungu nɨma? Mukné kuripiniamia? Urugu kɨkɨ ku aracɨsu; musu ka amani Ticomtia garɨ ku maragerenga mabulanga na Pɨlɨngɨ!>>
25Yésu ka laurudria ku gɨralɨ, <<Kicibɨna, ribunga siliké kɨné ico ku buetɨni mbalɨte!>>
26Gɨralɨ laradria ico mornavne plɨglɨgrɨ, la psakuranga ngingiecɨ, sugianga svagédria. 27Rɨsaliya mɨrɨkɨmɨ, mbakɨbaka, <<Nakuni tunimia? Tédrala tuménia na abiciringamde sarkikéni! Ikénia kɨcɨnga prevké tumianiamia na gɨralɨ, ku gɨralɨ ka singiaronia!>>
28Iku, aracɨdra Yésu ka ispielɨ iké makatékaninga Galrilri.
Pakragragi madro ico na macemɨ ki Yésu
(Matai 8.14-17; Luka 4.38-41)
29Ku gidranga svagé tisarbubua na Yudai ico, mwa dadra ki Simon si Anderé, ki Yakobu si Yuhani ka angresɨ mwa. 30Asiradra Simon ku nindria macemɨ drongdrange, ébare iké tibingcɨngɨ; ku muidra ki Yésu, latila Yésu na skacemne ni. 31Ki Yésu amua cɨnglɨdria, labilibilidria rimédra, rodrengedria picikele. Ku adrengdrangadra ka tédranga, sucikelenga mra péngcɨgɨ ku ikaingadria.
32Ku msamɨsmɨninga, turedrɨbɨ dranga na avé, mukani ɨmɨcɨdria ku mangululanɨe na cemɨne si amuadria mderape gɨralɨ na ico mwa tulucubungadra ki Yésu; 33Cɨkcɨklɨdra ku makaiconga mukani, isarbu iké bilingtava tulucubunga. 34Ki Yésu pakargagidria ku madro masikiulanɨ cemɨne na ico, lapigiadria ku madro na gɨralɨ. Musadra ipusobakbaka madria ku gɨralɨ, tulune ni ka urgu acikini miya.
Iké Galrilri déndomia
(Luka 4.42-44)
35Misienɨnga na mierɨ, ubliliesɨla, ki Yésu ka suciklenga, svagé danɨ, mua tékadra na rborbo, ikédria sukbu. 36Ki Simon si sɨterɨsadra sugianga mwa silipedria. 37Ku mkunudranga ka masobka, <<Angrubua silepeswa!>>
38Ki Yésu ka masobka, <<Tuwa ku mididali na cɨkɨcɨkɨlɨ, kukédria tékadra iké déndomia, amani ku matkadrɨngé tukunianeli tlunɨni.>>
39Lakemani ki Yésu dodavce ngiculunga Galrilri, iké maka tisarbubua na Yudai ico déndomia, si lapgiya na makurathɨ gɨralɨ.
Pakragragi ku magɨthagɨthe cemɨne na ico
(Matai 8.1-4; Luka 5.12-16)
40Iké sesa na magɨthagɨthe cemɨne na ico, mukani mwa tulucubungadra ki Yésu, pokuru ktubidria musobaka, <<Ina iyo misu, nuduruma musu ptibulakwa.>>
41Ki Yésu ka magucudria#1.41 <<magucudria>> iké druma na buruenɨ sulatɨ tuméné <<mangicici drɨdrɨmdra ma>>., oprace rimédra depɨ msobaka, <<Iyomakɨkɨ, nukbulamanga musu!>> 42Ki magɨthegɨthe buetɨdra ka susvagéngadria, si sukubulanga. 43Ki Yésu ka suribungunga setɨdrɨdria, laptapɨdrɨngɨ tumiadriamia, 44Musobaka, <<Adra itilila na makaiconga, gianga mua cɨngɨlɨ ku sidepɨ na lɨgɨsɨ, nicenglɨnga ptapɨdrɨngɨ, si lakɨngiaro ku tumiayiadra ki Mosi bui ptramegarɨ na makainunga, plrigu ptapɨdrɨngɨ na ico mabulanga musumia.>>
45Makasi ikené ico gidranga ka, ugia kcapanenga tilila ku tumanɨdra, sukédra Yésu ka idurunga muwa cɨkɨcɨkɨlɨ mbabuboelɨ, sukédranga iké rborobo; tumamadra madro siliké makatékaninga mukuné silipedria.
Nke Ahọpụtara Ugbu A:
Maruku 1: Maolin23
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© The Bible Society in Taiwan, 2023