Malgo 12
12
Gingan gi bisad byambi mu gilaaŋ
(Maday 21:33-46; Luug 20:9-19)
1Ibun Yees gayandag gubalees mu bingan: «Muud mos gagun gilaaŋ gya viin. Gagizyedees lupaaŋ mumbiim, gasiim zuun lumos mumbad gugaman mbeeŋ ya viin, ibun gaduuŋ nzo yaleey mumbad gugilaŋanan. Gungoy galeed gilaaŋ gu myoog mi bisad mumbad ba gifudeen, ibun nde gagib. 2Daaŋ nsuŋ yigudogol mbeeŋ yagug, gadum musad mos gulu baad ba fudeneeg gilaaŋ mumbad gawool gul baa mbeeŋ yi maduug mu gilaaŋ gya viin. 3Gaanz bafudeen gilaaŋ ba mugam, bamubul se, bamufudul myoog. 4Ibun gabadumeen gisad gyambaan, baman mubul mu mudwe ande gu muduug. 5Gadum lyaag gisad gyambaan, wun ba muzwe. Ibun gungoy gaduum lyag baad bavul, gaanz babul bambaan, ibun bazwe ban bambaan. 6Munga gilaaŋ gasaal gag ande muud mos wun wagal mwaan ande wu luzol. Gamudum gunsug ya baa abooz ibun gagiwalgeen ndaa: “mukyeleg bulumuzidis mwaan ame.” 7Gaanz bafudeen gilaaŋ baŋunanaan baa ye baa: “Dal muud wasaal munga gilaaŋ! Tweneen, dumuzwaan, ibun bilaaŋ nga bisaal bya biis!” 8Ba mugam, ba muzwe ibun bamupiinz gunze yi gilaŋ gya viin.
9Ibun munga gilaaŋ gya viin kii gasal? Gawiy ndebeen, gazwa baad ba fudenege gilaaŋ mween ibun galeed gilaaŋ gya viin gul bafudeen bambaan. 10Loo ladaaŋ gele masonog maa:
“Mudoy wa piinz binduuŋ nzo
wawiy guun lugamaga nzo.
11Gulu Mfum wazol ndubun,
ibun yileen nsil paan ya ngidig gu miis mya biis#12:11 Mig 118.22-23.!”»
12Bamfum babangaŋ a Nzaam, balooŋ ba nsig ande bambud a baad bagamaag pil yi gugam Yees, mumbad bu bayaab ndaa gamada gingan gini mumbad abaa. Gaanz bawugaag boom bwa baad, gyagin bamubomon ibun bawen gabaa.
Gidal gibafud gulu Sezal
(Maday 22:15-22; Luug 20:20-26)
13Gungoy badum ndamb yi Bafalize ande baad ba Elod gulu Yees mumbad bamubwisis mu ndag yande been. 14Bawiy, bamulees ndaa: «Looŋ, dayaab ndaa nze wulene muud wa kyeleg, ibun uwugaag boom bwa baad, pamb lo uponoog luse, Gaanz wuloŋogo nzil ya Nzaam mukyeleg ayooz. Nsig ya biis buyabala leed nzil mu gufud gidal gya Sezal ee loo? Gumalomon dafed gufud ee loo?» 15Gaanz Yees bugayaab ndaa baleen baad babukaaf, gabalees ndaa: «Mumbad akii labala ndegeen mweed? Ilutweleen nziim yimos yi gibende mumbad yigidal. 16Bamudweleen, ibun gabawuful ndaa: «Luse la naa ande bison bya naa labala deel ha? Bamufuduleen ndaa: «La Sezal»,! 17Ibun Yees gabalees: «Luleed gulu Sezal bini bili bya Sezal, lyaag gulu Nzaam bini bili bya Nzaam. Ibun bamuyidig ngol nsil mu mvud ya Yees.
Gyuuf gimos mumbad lufudumug lubafwa
(Maday 22:23-33; Luug 20:27-40)
18Ibun Basaduseyo, ban badeyiga ndaa lufudumug loo lulu, bawiy gulu Yees, ibun ba muwufuul: 19«Looŋ, Mose gasonog mumbaag biis ndaa: “De paaŋ wa bagaal wa muud mos wafi ibun wasis mugaaz, gaanz loo gamabud baan ande nde, muud wun gafwed gugweel mugaaz wumasiis paaŋ ande, mumbad ga mubudeen baan. 20Yaloo, gwagal ande bapaaŋ babagal nsambwaal. Wunu wateeg gagweel mugaaz, gafi gaanz loo gabud baan. 21Ibun wun wayool se gagweel mukaad wun wasis paaŋ ande, gaanz nde se gafi loo gasiis baan. Myasalam gidees gimos ande wa daad. 22Abaa nsambwaal bagweel mugaaz mween, abooz bafi, loo basala bud baan. Gungoy mukaad mween se gafi. 23Ibun mugilum gi gufudumug bafwa, mukaad mween gagal wa naa mukab la baa nsambwaal? Pambu loo ababooz nsambwaal bu bamugweel! 24Yees gabafuduleen ndaa: «Been labili, pamb lo, loo layaab Masonog dolo ngol ya Nzaam. 25Ibun mu giluum baad bafumug mukab lubafwa, babagal ande bakaad loo bagugweleen lyaag, gaanz bagugal nga dupuuŋ dwa gu tal. 26Ibun mumbad lufudumug la baad bafi, loo gele ladaaŋ mu buug la Mose, maamb man mamulees Nzaam mu mfun yi mudi wun walemeeg mbaa, gaanz loo gaswiim: “Nguleen Nzaam wa Abalaham, Nzaam wu Izag, lyaag Nzaam wa Yagob.” 27Nzaam loo gili Nzaam wa baad bangafwa, gaanz gileen Nzaam wa baad bamooy. Luleen mu kaab lugifu nsil.»
Nsiig yanga lig mfun ngol
(Maday 22:34-40; Luug 10:25-28)
28Looŋ lumos mu kaab la balooŋ bansig, wun wubawug mun gusanaan teemb. Ibun lugadeel ndaa Yees gabafuduleen mamvud mapiim, gapusaan mumbiim a Yees ibun ga muwuful ndaa: « mukaad lu mansiig amooz, kii nsiig yimalig mfun mukaad la man amoonz?» 29Yees gafudul: «Dal nsig yimalig mfun ayi: “Isalel; wuug piim! Mfum gili Nzaam wabiis, gileen gag mos#12:29 mfum gileen mfum wabiis,mfum.. 30Muzol Mfum Nzaam anze mu mudim a nze awooz, mu mooy anze awooz, mu manuuŋ manze amooz ande mu ngol anze ayooz.” 31Yayool ayi : “Muzol paaŋ anze nga nzebeen#12:31 Lev 19.18..” Nsig yambaan yimalig mi amya myeel loo yili. 32Ibun Looŋ la nsiig gamulees: «Wu mawagal piim Looŋ, wuma wagal mukyeleg ndaa: Mfum Nzaam gili gag mos, ibun wambaan nga nde loo gilene#12:32 Gufwanas ande Loŋ 4.35.. 33Gumuzol gu mudim anze awooz, mu nduuŋ anze ayooz, lyaag mu ngol anze ayooz, ibun guzol paaŋ anze nga nzebeen, byabiin bileen ande mfun yavul gulig mu gufufeen Nzaam magab ande gumuwa magaab amooz#12:33 Oz 6.6..» 34Daaŋ Yees gadeel ndaa Looŋ la Nsig gafudul gyuuf ande nduuŋ ayooz, gamulees ndaa: «Nze loo wuleen gibaal ande gi Mfum gya Nzaam.» Gungoy mvuud yin, loo muud wameg lyaag mu gumufulul gyuuf.
Mesiya ande Davil
(Maday 22:41-46; Luug 20:41-44)
35Haa Yees gagal mun gulooŋ mu lupaaŋ la nzo Nzaam, gawuful: «Kii mutiind balooŋ la nsig bansunaga ndaa Kilisid gili Mwaan a Davil? 36Pamb lo, Davil ndebeen gawagal ndubu mu nzil yi Muhuuŋ Agelel:
“Mfum Nzaam gansuun gulu Mfum ame:
Gala gugoog lame lu gibagal,
dii gunsya bamben banze gunsiin amiil myanze#12:36 Mig 110.1..” 37De ndebeen David gamubilaga “Mfum”: Ibun kii mutiind Mesiya gafed gal lyaag Mwaan ande? Baad bavul bamuwugaag mu gyees.
Yees gagebes gibug gya baad mumbad balooŋ bansig
(Maday 23:1-36; Luug 20:45-47)
38Mu malooŋ mande galooŋag baad ndaa: «Lugyeeb gulu balooŋ bansig, bazologo gwalig ande mamveel maley, bazologo babawe mbod yilugum mu bihan bimayuul baad bavul. 39Bazologo gugal a biid bya teeg mu manzo ma bisaam bi bayuda ande bihan bilugum mu makiinz. 40Baluglaga biim bi mifiil mi bakaad, lyaag basyaga bisaam byaleya ley mumbad gufud baad. Bawool ndol yangol nsil.
Magab maleed mufiil wu mukaad wa nsugam
(Luug 21:1-4)
41Yees gabwanzen gutwaal gi saanz gi magab, ibun gadalaag mutiind wasyaag baad nziim mu gisaanz gimagab. Bamvwaam bavul basyaag nziim yavul. 42Mukaad mos wu mufiil wansugam, gawiy gasi nziim mafalaŋ mool ma bibende magagalama mu nzo nde. 43Ibun Yees gabiil balongoog bande gabalees ndaa: «Ya wululees nsil mukyeleg, mukaad wu mufil wa nsugam gamaleed ziim gulig baad abooz bamasya ziim mu gisaanz gimagaab. 44Pamb lo, baad abooz bamaleed nziim yibagog galaya mfun, gaanz nde labeen gugon gwande, gamaleed abyooz bigagal a bya, bigal abya mfun mu guziiŋeen.»
Nke Ahọpụtara Ugbu A:
Malgo 12: noq
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 The Seed Company in coordination with Association Congolaise de Traductions de la Bible