SAN MATEO 4
4
Laqtsꞌintanukal ni Jesús
(Mr. 1:12-13; Lc. 4:1-13)
1Ex va chuncha ni Espíritu va lhaꞌalcha lakakꞌavin ni Jesús para ancha ni xaꞌukxtin aqmoqxnuꞌ kalaqtsꞌintanul ni Jesús.
2Ex ni Jesús jantu kavayl aqtꞌuy pꞌuxaun julchan kun aqtꞌuy pꞌuxaun jatatsꞌisin. Taval va chavanilcha. 3Ex ni aqmoqxnuꞌ va talakanunil ni Jesús para kalaqtsꞌintanul, va junil:
—Incha laqsaval Sasꞌatꞌa Dios kꞌatꞌi ex ni aniy chiyux kꞌamakꞌatꞌi pan.
4Ex ni Jesús qaltayl, va naul:
—Yu tsꞌoqkanta la ixchivinti Dios najun: “Qayntaun lapanaki, jantu vamun ixvayti kaputsukul. Va maqskꞌiniy kaputsukul tachun ni chivinti yu najun ni Dios.”
5Ex va chuncha ni aqmoqxnuꞌ va lhaꞌal ni Jesús laka putaulan Jerusalén yu taꞌan ixnavin Dios, va mukꞌal ixꞌaqstiꞌ ni ay lakatajtan, 6va junil:
—Incha laqsaval Sasꞌatꞌa kꞌatꞌi ni Dios, va kꞌaltꞌujnu ni aniy. La ixchivinti Dios yu tsꞌoqkanta va najun:
Ni Dios kalaklhijunaꞌ ni ixmayulnin para katalhistakni.
Yuꞌuncha katatsꞌapastukkꞌan la ixmakakꞌan,
va para jantu kꞌatꞌaꞌalhitꞌi la minchꞌajaꞌ laka chiyux.
7Ex chuncha ni Jesús va junil:
—Vachuꞌ najun la ixchivinti Dios: “Jantu aqtaun kalaqtsꞌintꞌanutꞌi ni Dios miJalhachimoꞌonuꞌ incha laqsaval kamakayaꞌ yu najun.”
8Ex va chuncha ni aqmoqxnuꞌ va aaqtaun lhaꞌanchoqol ni Jesús lakataun aspajun taꞌan ayaj talman. Ancha masuniꞌol tachun oqxlaqlhuu yu taꞌalinta lakamunukpaꞌ kun tachun ixkꞌusixtukꞌan. 9Ex ni aqmoqxnuꞌ va junil ni Jesús:
—Ni kitꞌin incha kꞌintꞌaꞌaqtsꞌoꞌoqtꞌaniyeꞌe y kꞌintꞌoꞌoyayeꞌe tus kakxtaqniꞌoyan tachun ni aniy yu kmasuniyan.
10Ex ni Jesús va junil:
—Uxintꞌi Satanás, va kapiticha. La ixchivinti Dios najun: “Kꞌatꞌoꞌoyatꞌi vamun miJalhachimoꞌonu Dios yu alintachal laktꞌiyan, y vamun yuꞌ kꞌatꞌapꞌatsꞌanin.”
11Ex va chuncha ni aqmoqxnuꞌ va makaul ni Jesús. Taminchal ixmayulnin Dios, va taꞌaqtayjulcha ni Jesús.
Ni Jesús aqtaynil laqputeꞌeniꞌ ixchivinti Dios xalakatꞌun Galilea
(Mr. 1:14-15; Lc. 4:14-15)
12Va manukal laka pachꞌin ni Juan. Tejkan kꞌatsal ni Jesús va anchoqol xalakatꞌun Galilea. 13Astan makaul ixputaulan Nazaret, va al tsukunuꞌ Kapernaum, taun putaulan yu va ukstsꞌuniy ixkilpaꞌ lakamar. Ancha va xalakatꞌun ni Zabulón ali Neftalí. 14Laqsaval chuncha tapasal va para laqsaval kaval yu tacha istsꞌoqta ni Isaías yu maqancha ixlaqputeꞌey ixchivinti Dios, va naul:
15Yu xalakatꞌun Zabulón kun Neftalí,
yu ukstsꞌuniy lakamar, yu tukuktachal ni laꞌaxkan Jordán,
yu ancha laka Galilea, va taꞌan tavilanal yu jantu Israelitas kataval.
16Ni lapanakni yu ixtatiꞌukxuyanal ni laka putsꞌisniꞌ va laktasunil taun ay maklku,
Ni anchanu lapanakni yu ixtavilanal taꞌan ixmalkꞌiknitacha ni lhinin,
va yuꞌuncha jalakmapulkunilcha ni anchanu maklku.
17Ex va chuncha ni anchanu julchan va exnicha aqtaychal laqputeꞌey ixchivinti Dios ni Jesús. Va ixnajun:
—Kꞌamapꞌaxatꞌikcha mijatapastakꞌatkꞌan, ixlhachimoꞌon ni Dios va ukstsꞌuniycha lakaminta.
Ni Jesús va jalakjuntaꞌil pumatꞌati lapanakni yu xachꞌapanan jatanti
(Mr. 1:16-20; Lc. 5:1-11)
18Ex va chuncha ni Jesús va ixkiltaukꞌajꞌanta ixkilpaꞌ lakamar Galilea, ancha laktemal pumatꞌuy tꞌalaqaunin. Yu qayntaun va Simón vachu va yuꞌ yu ixjunkan Pedro, yu aqayntaun va Andrés ixjunkan. Yu anchanuꞌ tꞌalaqaunin va xachꞌapanan jatanti ixtajunita. Va ixtatꞌajun mujunun ixchꞌoqxkꞌan lakxkan. 19Ex Jesús va lakjunil ni anchanu joꞌakna:
—Chavay kilatꞌamiucha ni kitꞌin. Chavay tꞌemayatꞌik va jatanti pero kitꞌin kaklamakayau para kalaktꞌematꞌik lapanakni.
20Ex ni anchanu joꞌakna va niman tamakaulcha ixchꞌoqxkꞌan, va tatꞌaꞌalcha ni Jesús.
21Taval tejkan va ukstsꞌuniykaꞌ ixtaꞌanta, ni Jesús va aaqtaun jalaktemachoqol pumatꞌuy tꞌalaqaunin, yu istsꞌalan ni Zebedeo ixtajunita. Yu qayntaun va Jacobo ixjunkan, yu ixpꞌisaqa ixjunkan va Juan. Va ixtꞌatꞌajumanal ni laka barco kun ixpaykꞌan. Va ixtatꞌajun laꞌoxinin ni ixchꞌoqxkꞌan. Ex ni Jesús vachuꞌ lakjuntaꞌil. 22Ex ni yuꞌuncha vachucha tamakaul ixpaykꞌan kun ixlhitapatsakꞌan, va tatꞌaꞌalcha ni Jesús.
Ni Jesús va lhuvaj lapanakni jalakmalanil
(Lc. 6:17-19)
23Ni Jesús va tus tiꞌukxuntayaꞌol ni talakachux xalakatꞌun Galilea, yu taꞌan laka putaulanaxna, va ixjamalaninin taꞌan ixtataqxtoꞌa ni Israelitas. Va ixlaqputeꞌey yu ox chivinti yu masuy tacha lhachimoꞌonun ni Dios. Vachuꞌ yu tapuchux taqanꞌati yu ixtalhitꞌajun ni lapanakni va tus ixlajkꞌuchꞌuꞌojoy. 24Ex yu xalakatꞌun Asiria va tus talakachux takꞌatsaniꞌol yu lajꞌay lhitapatsa makal ni Jesús. Ex ni yuꞌuncha va talhiminil yu tapuchux ni ixtamaqanlqajnan ixtaqanꞌatikꞌan tacha yu lakaxkati ali yu ixtalhitꞌajun yu jantu lajꞌox espíritus ali yu lokos ali yu niy panchꞌix y kujchoqoy, ex ni anchanu taqanꞌanin va tus ixlajkꞌuchꞌuꞌojoy ni Jesús. 25Ex chuncha lhuvaj lapanakni tatꞌaꞌal yu machaqan xalakatꞌun Galilea, ali yu xalakatꞌun Decápolis ali yu laka putaulan Jerusalén vachu yu xalakatꞌun Judea, vachu yu machaqan takuktachal ni xalaꞌaxkan Jordán.
Nke Ahọpụtara Ugbu A:
SAN MATEO 4: tpt
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2004,Wycliffe Bible Translators, Inc. All rights reserved.