YOHANES 1
1
Ṛengetanna apan mangngonggolu wiakka
1Su paarorone, tantal᷊anna runia taambe niriaddi, Ṛengetanna udde piate.
Ṛengetanna udde su sambau ringannu Ruata
wuṛṛu Ṛengetanna udde uasul᷊ungngu Ruata.
2Ro'en paarorone i Tou su sambau ringannu Ruata.
3Sarangkanambone niola'a sulal᷊ummi Tou,
wuṛṛu wuassu al᷊awo'u apan piate,
tawe saran sambau apan inola'a tawedi Tou.
4Ṛengetanna udde punnu wiakka,
wuṛṛu wiakka udde mannemakka taumata.
5Semakka udde lullansiangnga sulal᷊ummu ararandumma,
wuṛṛu ararandumma tawe maapadumma si Tou.
6Nirumantate taumata apan nirolokku Ruata,
aranne i Yohanes.
7I tou nirumanta mammasingkattu asasemakka udde,
tadea'u anambon taumata mangngimanna.
8I tou sassane wal᷊ine asasemakka udde,
i tou tumba'u mabawal᷊one.
9Semakka tutune apan mannemakka anambon taumata,
nirumanta su runia.
10Ṛengetanna piate su runia,
runia niola'a sulal᷊ummi Tou,
arawe runia tawe maaillal᷊a si Tou.
11I Tou nirumanta su wanua-Ne sassane,
arawe pabbawala-Ge maddiri manarimmatti Tou.
12Arawe pia lai taumata apan manarimmatti Tou
wuṛṛu mangngimanna si Tou;
i mangitou nionggol᷊annu taṛṛino maola'a ana'u Ruata,
13apan niasungkangnga wal᷊ine wuassu taumata,
ana waugu wiakka wakku udde punnene wuassu Ruata.
14Ṛengetanna naola'e taumata,
I Tou uatana'a su wallatti ite,
wuṛṛu i ite suete naasilo awawantu-Ge.
Awawantuga udde suete sinengkammi Tou
Ana'u Iamangnga tinggassa.
Sulal᷊ummi Tou i ite naasilo Ruata
wuṛṛu darangngu-Ne si ite.
15I Yohanes nirumanta naola'a tatiala-Ne,
i tou mammasingkatta:
“Ete i Tou indi apan ta'u iwabbatti'a:
I Tou sarun rumanta, nasal᷊immuri wuassia'u,
arawe magewal᷊anna wuassia'u,
ana waugu tantal᷊anna i ya'u taambe,
i Tou nirumantate.”
16I Tou napenen darangngu;
tawe illol᷊one,
i Tou mangngal᷊amatta si ite.
17Tita Mawu, nisengkammi ite wuassi Musa.
Arawe darangngu wuṛṛu tatal᷊antupu Ruata
niapaal᷊iatta'a sulal᷊ummi Yesus Kristus.
18Tawe saran sangkatou apan suete naasilo Ruata,
tumba'u ana'u Iamangnga tinggassa,
apan uasul᷊ungngu Iamangnga wuṛṛu uaaukka atonna ringanni Tou.
Ete i Tou apan napaal᷊iatta'u Iamangnga si ite.
Tatialan Yohanes
(Mat. 3:1-12; Mrk. 1:1-8; Luk. 3:1-18)
19Manga piaṛṛa'u Yahudi su Yerusalem nandolokku manga imam wuṛṛu manga taumatan Lewi inai ringanni Yohanes wuṛṛu naiwal᷊o si tou, “I'o indi isai?”
20I Yohanes nanga'u atonna-tonna, “I ya'u wal᷊ine Ratum Punnu Sal᷊amatta.”
21“Amungkangngu aroddi, i'o isai?” aiwal᷊o mangitou. “Apa i'o i Elia?”
“Wal᷊ine,” sasimbakki Yohanes.
“Apa i'o sangkatou Nabi?” aiwal᷊o mangitou apia.
“Wal᷊ine,” sasimbakki tou.
22“Amungkangngu aroddi, wal᷊oa'e si yami isai i'o indi,” unni mangitou, “tadea'u i yami wotongnge sumimbakka aiwal᷊o manga taumata apan nandolokki ami. Apa wisaranu su ola'u ririnu sassane?”
23I Yohanes sinumimbakka, “Ete i ya'u apan niapaasingkatti Nabi Yesaya:
‘Taumata apan u'al᷊iata su wadda'a:
Rataṛṛa'e lal᷊anna amatannu Mawu.’ ”
24Manga taumata apan nirolokku taumatan Farisi, 25naiwal᷊o, “Amungkangngu i'o wal᷊ine Ratun Punnu Sal᷊amatta, wal᷊ine i Elia, wal᷊ine lai sangkatou Nabi, anio i'o mannaṛṛani?”
26I Yohanes sinumimbakka, “I ya'u mannaṛṛani ringannu ua'e. Arawe su pattangnganni yamiu pia taumata apan tawe aillal᷊anni yamiu. 27I Tou nirumanta sal᷊immurine wuassia'u, arawe mamu'a tal᷊in sapatu-Ne lai ya'u tawe wotongnge.”
28Sarangkanambone udde nariaddi su Betania, samba'an ra'in Sal᷊ukku Yordan, su tampan Yohanes mannaṛṛani.
Ana'u Domban Ruata
29Su allo tiṛṛabbine, i Yohanes naasilo Mawu Yesus nirumanta ringanni tou. See i Yohanes nabbisara, “Pa'ellega, eteudde Ana'u Domban Ruata apan namappassa rosan runia indi. 30Ete i Tou apan ta'u iwabbatti'a apan nirumanta murine wuassia'u, arawe maggewal᷊anna wuassia'u, ana waugu ya'u taambe niasungkangnga, i Tou uddete su runia. 31Su paarorone, ya'u wagga isai i Tou udde. Sumbal᷊i ya'u nirumanta mannaṛṛani ringannu ua'e, tadea'u taumatan Israel maaillal᷊a si Tou.”
32I Yohanes nangagillu lai tatiala indi, “I ya'u naasilo Ghaṛṛahon Ruata niumonto'a ere manu'a merpati wuassu langitta see nangintaṛṛo si Tou. 33Tempo udde i ya'u ta'e wagga isai i Tou. Arawe Ruata apan nandolo'u manaṛṛani ringannu ua'e suete nabbisara si ya'u, ‘Napawe i'o maasilo Ghaṛṛahon Ruata niumonto'a, see matana'a mangintaṛṛo su sangkatou, ete i Tou apan manaṛṛani ringannu Ghaṛṛahon Ruata.’ 34I ya'u suete naasilo sassane,” unni Yohanes, “wuṛṛu ya'u mangonggolu tatiala manungku ete i Tou Ana'u Ruata.”
Manga mallal᷊aṛṛenggennu Mawu Yesus paarorone
35Su allo tiṛṛabbine i Yohanes su tampa udde lai ringannu ruang katou mallal᷊aṛṛenggenne. 36Napawe i tou naasilo Mawu Yesus sinumabbi, i tou nabbisara, “Pa'ellega! Eteudde Ana'u Domban Ruata.”
37Ruang katou mallal᷊aṛṛenggenni Yohanes naaringikka manga watti'a udde, see inaite tinumantalongnga Mawu Yesus. 38Mawu Yesus nanaile su liudde, wuṛṛu naasilo si mangitou uatantalongnga si Tou, i Tou naiwal᷊o, “Yamiu maddea'a apa?”
I mangitou sinumimbakka, “Rabi, Rabi uatana'a suapa?” (Wisara ‘Rabi’ atappasanne huru.)
39“Wette pa'ellege sassane,” unnu Mawu Yesus. I mangitou inaite su sambau ringanni Tou ma'ellega suapa i Tou uatana'a. Orassa udde puulle appatta wawallo. Allo udde i mangitou uatana'a su sampunna ringanni Tou.
40Sangkatou su wallatti tarua apan suete naaringikka apa apan iwabatti'i Yohanes wuṛṛu see inaite tinumantalongnga Mawu Yesus, eteudde i Andreas, tuṛṛangngi Simon Petrus. 41Mal᷊iha-l᷊ihakka i Andreas naddea'a si Simon, tuṛṛangnge, wuṛṛu nabbisara si tou, “Yami suete nassomba Mesias!” (Mesias nassul᷊ungngi Kristus, eteudde: Ratum Punnu Sal᷊amatta.) 42I Andreas nanguntudi Simon ringannu Mawu Yesus.
Mawu Yesus nanutuda si Simon, see nabbisara, “I'o Simon, ana'i Yona. I'o sarun isago i Kefas.” (Kefas uasul᷊ungngi Petrus, atappasanne: wowom batu.)
Mawu Yesus namaggo si Filipus wuṛṛu si Natanael
43Su allo tiṛṛabbine Mawu Yesus naṛṛawessa inai watukku Galilea. I Tou nassombam Filipus, wuṛṛu nabbisara si tou, “Wette tantalongke si Ya'u!” 44I Filipus inasapputanne wuassu Betsaida, eteudde tampa atatanaanni Andreas wuṛṛu i Petrus. 45I Filipus nassomba Natanael wuṛṛu nabbisara si tou, “Yami suete nassomban taumata apan iwabal᷊o Musa sulal᷊ummu Wuken Titan Ruata, wuṛṛu niapaasingkattu manga nabi. I Tou eteudde Mawu Yesus wuassu Nazaret ana'i Yusuf.”
46Arawe i Natanael sinumimbakka, “Wotongngewe sambau apapia rumanta wuassu Nazaret?”
“Wette pa'ellega sassane,” sasimbakki Filipus.
47Mawu Yesus naasilo si Natanael nirumanta, see nabbisara su ola'i tou, “Pa'ellega, udde taumatan Israel tutune. Tawe awusune i tou.”
48“Ereapa Iamangnga maaillal᷊a si ya'u?” aiwal᷊o Natanael su Mawu Yesus.
Mawu Yesus sinumimbakka, “Tantal᷊anna i Filipus taambe namaggo si'o, i Ya'u naasilote si'o su al᷊ungngu alu ara udde.”
49“Iamangnga Huru,” unni Natanael, “Iamangnga eteudde Ana'u Ruata! Ete Iamangnga Ratum walahannu Israel!”
50Mawu Yesus nabbisara, “I'o mangngimanna, tumba'u ana waugu i Ya'u nabbisara manungku i Ya'u naasilote si'o su al᷊ungngu alu ara udde? Manga inolaanna apan maggewal᷊anna wuassu inolaanna udde sarun asiloannu!” 51Mawu Yesus nabbisara apia, “Atonna, pangimante, i'o sarun maasilo langitta mawu'a, wuṛṛu manga mala'ekattu Ruata uapapal᷊ele ringannu Ana'u Taumata.”
@ LAI 2003