LUKE 17
17
Pasar Dosa
(Mat 18.6-7, 21-22; Mrk 9.42)
1Jesus nang di bara murid-I, “Kayuh adi bada daya bidosa taŭn-i re agi, pak mbŭh raru payah-i di sianŭ adi bada-i jadi! 2Mbŭh kana dŭ inŭh kambŭi ayŭh dog taran ka darŭm rawŭt ngga tibande batuh kisar dog mŭŭng di tungo-i, so ayŭh bada ndi so ngara adi sŭ ati bidosa. 3#Mat 18.15 Ingat meh, ani anŭ adi angān ndai!
“Kambŭi jurud ngan ndai dosa, nang ayŭh; ka kambŭi ayŭh mite apun, apun ayŭh. 4Kambŭi ayŭh bidosa di tunduh ngan pikuju kari darŭm ndi andu, ka tiap kari ayŭh mandŭg tudu angān nang, ‘Aku mite apun’, angān dŭh siŭn dŭh apun ayŭh.”
Pasar Pinyabah
5Bara pinyuruh nang di Tuhan, “Bada pinyabah ami tagap.” 6Tuhan nam, “Kambŭi angān biyŭn pinyabah mati ndi sirah ruwang sabi, angān tungang nang di tŭngŭn ara ati, ‘Dimbut ka purun adŭp mu di rawŭt!’ ayŭh re tunda pinganang ngan.
Kraja Daya-Gaji
7“Nyamtadar-i ndi so angān biyŭn daya-gaji adi majak puan kah kingat biri. Kan ayŭh maad so ŭmŭh, agi kah angān bada ayŭh rikas mandŭg ka guru man? 8Taŭn dŭh! Angān nang, ‘Sidia pinguman ku,’ kidŭ-i; ‘nēn piraka mu adi bisig ka nguan aku man; ripas anŭ kuu bisa man.’ 9Daya-gaji dŭh-i biguna di puji darŭm-i tunda pritah, dŭh kah? 10Simŭnŭ gŭh angān, kan angān ko ndai sopŭrŭg kayuh adi patut angān ndai, nang, ‘Ata daya-gaji adŭ; ata batur ndai kraja ta.’ ”
Jesus Pibua Simŭng naan Daya adi Naman andam Kurit adi bisā
11Darŭm Jesus panu nuju Jerusalem, Ayŭh panu kadŭg baat tana Samaria ngga Galilee. 12Ayŭh aŭn mŭrŭt ndi anak kupo kan-I bidapŭd ngga simŭng naan daya adi naman andam kurit adi bisā. Ngara mijog so jo 13ka nyirais bagan, “Jesus! Tuan! Masi di kieh!”
14 #
Lev 14.1-32
Jesus kiris ngara ka nang, “Panu di ka bara imam ka bada ngara natu pinyibua ngan.”
Darŭm ngara panu, ngara bua.#17.14 BUA: Tingga 5.12-14. 15Kan ndi so ngara kinyam adŭp-i mbŭh bua, ayŭh pari buang kibās Tapa ngga sirŭŭn bana. 16Ayŭh sidikang buang mutu di kaja Jesus, buang-i nggen trima kaseh di Ayŭh. Daya anŭ daya Samaria. 17Jesus minyu, nang-I, “Agi simŭng naan daya dog pibua; kamaki adi prii naan? 18Mani siati adi daya bangsa bŭkŭn, ayŭh sadi adŭ adi pari di nggen trima kaseh di Tapa?” 19Ka Jesus nang di ayŭh, “Makat ka panu meh; kuu mbŭh bua sabab kuu sabah di Aku.”
Tapa Mandŭg di Mritah
(Mat 24.23-28, 37-41)
20Kada daya Pharisee siken Jesus, “Sinde Tapa mandŭg di mritah?”#17.20 Sinde Tapa mandŭg di mritah; Anŭ inŭh so tigŭrŭ bang piminyu: Pritah Tapa. Pinyinam-I inŭh, “Pinyipritah Tapa#17.20 Pinyipritah Tapa; Anŭ inŭh so tigŭrŭ bang piminyu: Pritah Tapa. dŭh-i piguru ngga tandā tandā adi tungang dog kiris. 21Mating daya re bisa nang, ‘Tingga, ta rah-i’ puan kah, ‘Jeh rah-i no’; sabab Tapa mbŭh piguru mritah#17.21 Tapa mbŭh piguru mritah; anŭ inŭh so tigŭrŭ bang piminyu: Pritah Tapa. di ruang ngan”#17.21 di ruang ngan; puan kah: di dupan ngan; puan kah: re nyirŭgŭh tatŭng di dupan ngan.
22Ka-I nang di bara murid-I, “Tipuh-i re mandŭg kan angān gruwŭn adŭp ngan tungang kiris ndi so andu Anak Manusia, pak angān dŭh re kiris-i. 23Re agi daya nang di angān, ‘Tingga no, dijeh!’ puan kah, ‘Tingga ta, digiti!’ Dŭhnyah angān ruah di jiroh-i. 24Nimun kijat mikirab di rangit, ka nyekar so ndi parad rangit ndŭg parad mandi rangit, simŭnŭ gŭh Anak Manusia re di tipuh-I. 25Pak Ayŭh dŭh siŭn dŭh an diŭ kinyam pinyusah bās ka dog tirawan daya di jaman ati. 26#Tib 6.5-8 Nimun adi mbŭh jadi di jaman Noah, simŭnŭ gŭh re di tipuh Anak Manusia. 27#Tib 7.6-24 Sopŭrŭg daya man nok, ka dari dayung banan sawan, ndŭg ka andu anŭ adi ngga Noah mŭrŭt ka darŭm batra; ka uba mandŭg, pirŭnggŭd sopŭrŭg ngara. 28#Tib 18.20—19.25 Ayŭh re mun di jaman Lot. Sopŭrŭg daya man nok, bidagang, nyipurun ka piramin. 29Di andu Lot bu so Sodom, apui ngga mirirang mūn so rangit ka siŭ sopŭrŭg ngara. 30Simŭnŭ inŭh kayuh re di andu Anak Manusia dog pinandŭng.
31 #
Mat 24.17-18; Mrk 13.15-16 “Di andu anŭ, daya adi di tibung ramin dŭh siŭn mūn ka darŭm ramin di tambit kayuh-i; simŭnŭ gŭh daya adi di ŭmŭh dŭh siŭn pari ka ramin. 32#Tib 19.26 Ingat, ani adi mbŭh jadi di sawŭn Lot! 33#Mat 10.39, 16.25; Mrk 8.35; Luk 9.24; Jhn 12.25 Asi asi adi suba an nyiramat asŭng-i re kinanyap-i; asi asi adi kinanyap asŭng-i re dapŭd asŭng-i siramat. 34Di ngarŭm anŭ, Aku kidaan di angān, agi duwŭh naan daya samah bŭŭs di ndi pangō: ndi naan re dog tambit, sianŭ ndi re dog tingge. 35Duwŭh naan dayung ngisar gandom: ndi naan re dog tambit, sianŭ ndi re dog tingge. [ 36Duwŭh naan dari re nyiraja di teya: ndi naan re dog tambit, ndi naan re dog tingge.]”#17.36 Agi kada rapi-surat dŭh nambah ayat ati (tingga Mat 24.40).
37Murid murid Jesus siken Ayŭh, “Diki, Tuhan?”
Jesus nam, “Di barang yŭn agi tadang, diginŭ manuk volcha agi mupuh.”
ទើបបានជ្រើសរើសហើយ៖
LUKE 17: TBVONT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Hakcipta - Today's Biatah Version New Testament © The Bible Society of Malaysia, 2003.