Luk 14
14
Yeesu wirɗiɗ ƴaar na faan riifɗiɗ
1Wa nikee ŋ mbehi na iɗsiɗkohse, Yeesu ɓeeɗkuusa kañam ŋ kahan kilifa Farisen. Wa a ree, ɓooɓa ŋ ɗiska feerkeeɗa ɗe baahiɗ. 2Ƴaar na faan riifɗiɗ nikka ŋ fikiice. 3Yeesu meekissa Farisen ca na jangɗohoh caŋ waasiŋ Musaa ne : « Andi waasi teyɗohiɗ ne ɓo' wiriɗ kosaayiɗ ŋ mbehi na iɗsiɗkohse wala ? » 4Waaye ali ɓo' lofɗi ɗe ; a ɓayya kosaayɗa, a wiriɗta ɗe, a woosa ɗe ne a kaɗaat. 5Ƴutta, Yeesu woosa ɓa ne : « E ya ɓa nga ɗu, a yi kuɓkiŋ ɗe wala inoh fiŋ ɗe keenan ŋ naac ŋ mbehi na iɗsiɗkohse, a jaaruu ɗe puliɗ ? » 6Ali ɓo' minɗi ɗe lof ŋ woo keem.
Findi ɓoyi ɓeeɗku kañam joy mand
7Ŋ ineem, Yeesu hotta findi ɓooɓa ɓeeɗku kañam tansukohee ɗisik ci uup baah ne ɓa ɓoof nga, a jangiɗta ɓa inii : 8« Ɓo' ɓeeɗuk ɗa kañam kilook ɗah, kina kaɗ fu ɓoof ŋ ɗiski uup baah ; miniɗ nik ne ɓoyi uup ɗa eɗu cir namiɗ ɓeeɗku nga. 9Ƴaari ɓeeɗuk ɗu, a hay ɗah, a hey ɗa woye ne : “ Ona ƴaarii, a ɓoof. ” Teemb ndeem fu hey kee ɓoofa ŋ finhoora finhoora, ŋ ineem fu hey njoofe. 10Waaye fu ɓeeɗku kañam ŋ kilook ɗah, kaɗa fu ɓoofa ŋ finhoora. Ƴaari ɓeeɗuk ɗa hay ɗah, a hey ɗa woye ne : “ Ƴaariŋ ngo haya, fu ɓoof ŋ fikiiri. ” Teemb ndeem, a hey ɗa yakɗe ŋ fiki ɓooɓi fu ɓoof na ɓa jen. 11Laam ɓo' nu meeɓ haf ce ɗah, a hey ruhsiɗasse, te ɓo' nu ruhsiɗ haf ce ɗah, a hey meeɓse. »
E ñakiɗ ci ɓeeɗkaah kañam
12Ƴutta, Yeesu woosa ƴaara ɓeeɗkee ɗe kañam ne : « Fu eɗohee ñakit wala ñamsuk#14:12 ñamsuk : weɗ kañam ki na niin. ɗah, kana ɓeeɗuk nawleeciŋ ɗa, taambɗoh ciŋ ɗa, ɓaah ciŋ ɗa wala raakiɗ ci fu gen na ɓa ; ɓa miniɗ ɗa nam ɓeeɗuk ne ɓa wirind ɗa ineem. 13Waaye fu eɗohee kañam ɗah, ɓeeɗka ñakiɗ ci, na ɓeendkiɗ ci na lafñiɗ ci na fuuliɗ ci. 14Ɓa minanɗi ɗa wa wirind, a Kooh na hee ɗa wa wirnde ŋ mbeha aa hee hultiɗohe yurhiɗ ci, tahha po fu hey sume. »
Ɓeeɗkohiŋ kañam ki
15Ƴaar ngaŋ ɓa ñamee na Yeesu kerahha ineem, a woosa ɗe ne : « Ɓoyi na hee ñame ŋ kañam kiŋ Nguuriŋ-Kooh, a hey sume. » 16Yeesu loffa ɗe ne : « Ƴaar gapeen ɓo' laayiɗ kañam keeh-keeh. 17Wi kañam ki ƴut, a woosa ñaamiŋ ɗe ne a kaɗaat ɓeeɗka ƴaaɓa. 18Yaa nu nga ɗah, waakka naafkoha ; ya koc woosa ne : “ Woya kilifaaniŋ ɗa ne, ŋ han rom yohon te ŋ joyiɗa kaɗ marka, a ɗaasaat to. ” 19Ƴaar wiiriis woosa ɗe ne : “ Ŋ rom inoh ndaŋkiyaah, ceɗ ŋ waaɗ kaɗ marka andi ca hey mine guur, a ɗaasaat to. ” 20Raakka ya woo ɗe ne : “ Ŋ han kilook ɓitiɓ, weɗi tah po ŋ minanɗi hay. ”
21Ñaama wiirukka ŋ kilifaaniŋ ɗe, heɗ kahni, a woosa ɗe in ceem jen ; yeem ayrukka, a woosa ñaami ne : “ Ara kaɗ ŋ cohohaaci na mbeeddaaci, fu haytoh ñakiɗ ci, na ɓeendkiɗ ci na fuuliɗ ci na yiiɓoh ci. ” 22Wi a kaɗ po a hayya, a woosa kilifaani ne : “ Ini fu nakohee haɓɗuuɗ, waaye kahni ris riifɗi. ” 23Heɗ kahni woosa ɗe ne : “ Kaɗa ŋ waas ca na yohon ca, ɓo' nu fu hot ɗah, tuma po a hay, ne kahni riif. 24Ñam na woyee ɗu wa, ali ɓo' ƴoohanɗi ŋ kañam ki ngaŋ ɓooɓa ŋ koc ɓeeɗuk ! ” »
Ya ɓa min nik taalubeeniŋ Yeesu
25Yeesu kooɗissa waasiŋ ɗe, mboolo laayiɗ hunnda na ɗe, a yurhiɗkohha na ɓa, a woosa ɓa ne : 26« Ɓo' nu waaɗ hay nga so ɗah, a joyiɗ to waaɗ waaɗi uup wi a waaɗ baab ɓa na yaay ɓa, ɓitiice, kuɓuuciŋ ɗe, taambɗoh ciŋ ɗe, po haf ce sah, wala a minanɗi nik taalubeeniŋ ngo. 27Ɓo' nu degukɗi kurwaani a joy daaƴohu, a ñaakee nga so ɗah, a minɗi nik taalubeeniŋ ngo.
28Ɓo' nga ɗu waaɗ tufkiɗ taɓah jimimim ɗah, a ɓoofanɗi, a marak, a kind ini a raak, andi wa heya mine reehiɗ e ? 29A tumɗi ineem, a yipa po ƴut, a minuu wa kurkiɗ ɗah, ɓooɓi na hee wa hote hey ɗe ƴene ; 30ɓa woyee ne : “ Ƴaari cambiɗ taɓahi waaye a minɗaa reehiɗ ! ”
31A yinde buur na hee raake hiñohoh junni-ndaŋkiyaah (10.000) a kee aasa ŋ hiñoh na buur morom ce ya raak hiñohoh junni-ndaŋkiyaah-kanak (20.000) te a ɓoofuu a marak andi ɓiŋ ɗe hey mine ɓaŋ buura na hee ɗe keene ? 32A hot ne a minɗaa ɗah, a hey woosohe ŋ buura yinoora ŋ ɗiska a nik, a meekis ɗe ini a waaɗ ne jam raak. » 33Yeesu degga nga ne : « Wa mand ɗaa, ali ɓo' minɗi nik taalubeeniŋ ngo nga ɗu, ne a faɗɗi in ci a raak jen ɗah.
34Ee, meɗa, wa in baahiɗ, waaye meɗa kaɗ po wa jemisɗi ɗah, wa min jemɗohissu na ye ? 35Wa raakiɗɗi kehƴi njiriñ te wa minanɗi kotar, wa hee hey mbetse. Ɓo' nu raak nof kerhoha ɗah, a kerhaat. »
ទើបបានជ្រើសរើសហើយ៖
Luk 14: YM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc