Luk 21
21
Ɓitɓa ñakɗa na ina a eɗoh.
1A Yeesu woo po a jaɗtukka kotii, a hotta ɓi heɗ alal ɓekeeɗa kopor ca ɓa eɗoh wuu Kooh ŋ ɗiska na ɓekohse kopora ŋ Kahan Kooh. 2A nammba hot ɓitiɓ ñakiɗ yi ƴaar ce kaan ; yeem ɓekeeɗa nga hanjar kanak ƴin findi pistiriñ. 3Yeesu woosa ne : « Ñam na woyee ɗu wa te wa keeh, ini ɓitɓi ñakɗii eɗoh weɗ uup ciŋ ɓinooɓi jen. 4Laam findi ɓa hend jen, ɓa eɗoh ini ɓa etohɗi ŋ raak-raakiŋ ɓa, waaye a yi, ŋ ñaki a ñak a eɗoh ini a raakee pesoha jen. »
In ci raakan
5Ƴutta, ɓi ɓo' laaseeɗa Kahan Kooh moɗ sagu atoh ca moɗohngaan ca wa haɓɗohu na in ca na eɗohse wuu Kooh nga. Yeesu loffa ɓa ne : 6« Ɗu hotiɗ in cii jen e ? Jamano hey haye ali atoh tasanɗi ŋ ɗafuk atoh ŋ ndii, ca jen ca hey yahrohse. »
7Ɓa meekissa ɗe ne : « Jangɗohohi, in ceem na hee raake kiɗa ? Te wa ye na hee teeɓohe ne in ceem ca ɗi heeɗa raake ? » 8Yeesu loffa ne : « Wortukaat muuƴɗu laam ɓo' laayiɗ hey haye, ɓa kooɗ tiikiŋ ngo ɓa woyee ne ɓeɗ Mucɗohi Gapohse, ɓa namee woo ne jamanooni reyiɗ ; kinaat ɓa taambiɗ ŋ ineem. 9Kaɗ po ɗu kerah ɓi hiñoh yakak, wala ɗu kerah ɓi yoond ɗah, kinaat jaahiɗ ; in ceem joy joy raak paaɗ, waaye nikanɗi ne a Adina na reehe. »
10Yeesu degga nga ne : « Kur hey hiñohe na kur morom wa, buur hey hiñohe na buur morom ce. 11Kehƴi hey yoondɗuke keeh-keeh ŋ ɓi ɗisik laayiɗ te ŋ kur laayiɗ aɗ na kosaay ci kaɓkohan hey raake nga. Ɓi in tiitɗohiɗ hey raake ; te ŋ eel ci ɓi in feyohiɗ hey hotke nga.
12Waaye bala in ceem raakan, ɗu hey ambse, ɗu torhiɗu, ɗu ɓayu ŋ sinaagog ci ne ɗu atte'u, ɗu rangu ŋ kaso ; ɗu ɓayu ŋ fiki ɓi buur na ɓi goornoor saguuso. 13Ineem hey tahe po ɗu min ndo seede ŋ fikiiɓa. 14Waaye ambaat inii ŋ haf ciŋ ɗu : Ɗu joyɗi feyu ŋ findi ɗu joy ngeloh. 15Laam e mi onan ɗu liiɓohaaɗ moɗiɗ po ali ɓo' ŋ ɓi sang ɗu minanɗi ngel na ɗu.
16Baab ciŋ ɗu, na yaay ciŋ ɗu, na taambɗoh ciŋ ɗu, na ɓaah ciŋ ɗu na nawleeciŋ ɗu ɓeɗ ambɗukan ɗu, raakiɗ sah ɓi na hee apse nga ɗu. 17Ɓooɓi jen hey ɗu sange saguuso. 18Waaye ɗu ñakanɗi sah findi uup ƴissuut ŋ haf ciŋ ɗu. 19Ɗu amb ndengiɗ ɗah, ɗu hey rahse kipes kiŋ ɗu.
20Ɗu hot ɓi hiñohoh laayiɗ ndeeriɗ Yerusalem ɗah, teemb ndeem inhaat ne ɗumbuukiŋ wa usisɗi. 21Wa ree ɗah, ɓooɓi wa raakan ŋ Yudee, ɓa saandohaat ŋ tangooca, wa raak ɓa ŋ ɗooƴ Yerusalem ɗah, ɓa pulaat nga, ɓi waa hee raake ŋ bilaf fa, ɓa kanaat dokuk ŋ Yerusalem. 22Ŋ mbeh ceem, Kooh hey wirnde ɓo' nu nga tumohaaɗ ciŋ ɗe laam in ci woyu ŋ Fiis ci Hooliɗ ci jen joy joy raak. 23Mas ɓitiɓ ci na hee nike rook ŋ jamanooneem na ɓapɗoh ci ! Tiis miskiɗ hey raake ŋ kur ki, Kooh hey teeɓe ɓooɓi ayrukiŋ ɗe. 24Ɓo' laayiɗ hey apse na ndang, ɓum tumu ñaam ŋ kur ci cinooci jen. Ɓooɓi nikɗi Yawuut hey daksohe Yerusalem po mbaɗna jamanooniŋ ɓa mitan.
25Ɓi in hey hotke ŋ nohi, na caɓni na hor ci, te ŋ kehƴi, ɗuuɗiŋ cookmi na ginaah ciŋ wa hey feye ɓooɓi po ɓa inhissuu in ci ɓa haɓɗan. 26Hatil ci nik ŋ eel ci hey yoondɗasse, ŋ ineem ɓooɓi hey liiɓe ŋ in ci raakan ŋ kehƴi, wa hey ɓa tahe reɓ kaan sagu tiit. 27Teemb ndeem ɓa hey hote Kuɓkiŋ ɓoyi hayee ŋ eel, a hun na hatil, na yaki keeh-keehi a yak. 28In ceem jen camb ɗah, jaɗtukaat, ɗu tufuk ; raakan faɗsuukiŋ ɗu reɓiɗ. »
29Yeesu degga nga ne : « Markaat ndun mbaa kidig ci cinooci, 30ca kifsee ɗah, ɗu na jaare inah ne rehi usisɗi ɗiski wa nik. 31Wa mand ɗaa, ɗu nam hot in ceem ɗah, inhaat ne Nguuriŋ-Kooh usisɗi. 32Ñam na woyee ɗu wa te wa keeh, ɓooɓiŋ adinaani woti kurkohanɗi nga jen te in ceem jen raakɗi. 33Eel ci na kehƴi hey coote waaye woo ciŋ ngo moosanɗi cootoh.
34Tumaat ndaangka, kinaat tum kipes kiŋ ɗu an na laar te kinaat apuk ŋ in ciŋ Adina mbaa mbeheem hey ɗu mbipe ; 35wa hey mbipe ɓooɓiŋ kehƴi jen. 36Kinaat neeh, genaat kiim Kooh, ɗu min raak hatil mucoha ŋ in ceem po Kuɓkiŋ ɓoyi hay ɗah, ɗu min tufuk ŋ fikiice. »
37Ŋ mbeh ceem, noh reesa ɗah, Yeesu jangɗohee ŋ Kahnaŋ Kooh, waaye wek ree ɗah, a kaɗ nika ŋ tangoora na woyse Tangooraŋ-Oliiw-ca. 38Ɓooɓa jen meeɗta kaɗ nga ɗe ŋ Kahnaŋ Kooh na ɓaaɓ-teel ne ɓa sikɗuk ɗe.
ទើបបានជ្រើសរើសហើយ៖
Luk 21: YM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc