Luk 22
22
Yudaa na kilifaaca ŋ ambuukiŋ Yeesu
1Feeti na woyse Paak, wiŋ mbuuruuci raakaaɗi lawiir ci, nikee reɓeeɗa. 2Kilifaacaŋ seeƴkiɗoh caŋ waasiŋ Musaa na jangɗohoh caŋ wa waakeeɗa findi ɓa hee apɗukohe Yeesu waaye ɓa neƴƴoheen ɓooɓa. 3Seytaani aassa Yudaa yi na woyse Iskaryot ; Yudaa yeem, a ɓaahee ŋ Apootar ci ndaŋkiyaah na kanak ci (12). 4A kaɗta kerhiɗoha na kilifaacaŋ seeƴkiɗoh caŋ waasiŋ Musaa na ɓaŋ ɓooɓa niiɗe Kahnaŋ Kooh ŋ findi a joy ɓa eɗndoh Yeesu ; 5ɓa summba nga lool, ɓa gappa ɗe eɗ kopor. 6Yudaa teyɗukka, a sekɗoheeɗa findi a eɗndohan ɓa ɗe te mboolnda maasuu.
Paakiŋ Yeesu mirndoh
7Wa feetaŋ Mbuuruuci raakaaɗi lawiir ci ree, ŋ mbehi mbaaliŋ Paaki joy hoosohu, 8Yeesu woossa Piyeer na Saaŋ, a woosa ɓa ne : « Kaɗaat ɗu haɓɗiɗa ɓoo kañam kiŋ Paak ci.#Pula 12:3,9 » 9Ɓa meekissa ɗe ne : « Kilifaani, fu waaɗ ne ɓoo haɓɗohana ŋ nde ? » 10A woosa ɓa ne : « Sikɗukaat to : Ɗu kaɗ po ɗu aasee kur ka ɗah, ɗu hey cohe na ƴaar ɓayiɗ meeme masuɓ. Ñaakɗaat ɗe po kahna aa hee aasohe, ɗu nam aas nga. 11Ɗu woo heɗ kahnaam ne : “ Jangɗohohi woo ne wa nde ɗiski a joy ñamoh mbaaliŋ Paak, a yi na taalubeeciŋ ɗe ? ” 12A hey ɗu teeɓe tuuƴ angiɗ ŋ ɗafuk kahna na in ci joy nik nga, ɗu kooɗkiɗohan kañam ki ndaam. » 13Taalubeeca kaɗta, ɓa raakohha in ceem ɗaa findi Yeesu woyohee ɓa, ɓa kooɗkiɗta kañam kaŋ Paak.
14Wa wahtuuni kañam ki joy ñamohu ree, Yeesu na Apootar ci jen ɓooffa ne ɓa ñam, 15a woosa ɓa ne : « Ŋ waaɗeen ɓaah na ɗu kañam kii lool, bala miskiɗiŋ ngo. 16Laam ŋ woo ne, ŋ heyɗaa ñamisse po mbaɗna ini Paak tokis keeh-keeh raakan ŋ Nguuriŋ-Kooh. »
17A ɓayya kaas, a corkiɗta Kooh, a woosa ɓa ne : « Ɓayaat kaasii, yaa nu nga ɗah an nga. 18Ñam na woyee ɗu wa, ŋ heyɗi anisse masuɓ reseñ po mbaɗna Nguuriŋ-Kooh hayan. » 19Ƴutta, a ɓayya mbuuru, a corkiɗta Kooh, a poɓtohhaa, a eɗta ɓa wa, a woosa ɓa ne : « Wii wa faaniŋ ngo, wi eɗohu wuu ɗu, hey ɗah tumaat inii, ɗu naandsukohee so wa. »
20Wa ɓa ñam po ƴutta, a nammba ɓay kaas, a woosa ɓa ne : « Kaasii, weɗ ñif miŋ ngo. Ñif miŋ ngo hey aamse wuu ɗu, te weɗ Kooh na hee tufkiɗohe Ambtiɗohiŋ ɗe Asi#22:20 Ambtiɗohi Koc na wi Asi : teerndiŋ Kooh, wa ɓak kanak. Ɓaki koc, ini amboh ŋ Tawreetiŋ Musaa, na woo ciŋ woosuuɗ ci na Sabuur, weɗ na woyse Fiis ciŋ Ambtiɗohi Koc. Cum ɗah, wa teeku Ambtiɗohi Maañiɗi. Ŋ jamanoocaam, Nikiɗi Kooh ambtiɗohee na cuuɓiŋ Israayel, taamboh ŋ woosuuɗi Musaa. Ɓaki kanakɗoh, weɗ na woyse Injil. Wa na woye ŋ Ambtiɗohi Asi Kooh tufkiɗ ŋ harmban ce na ɓooɓi jen taamboh ŋ Mucɗohi a Gapohee, Yeesu Kiristaa (Ɓi Rom 11:27; 1 Korenta 11:25; Heber ci 8). na ɗu. 21Te kat, ɓoyi na hee so wore yii na so ndii ne ɓoo ñam. 22Wa keeh ne Kuɓkiŋ ɓoyi hey kurke nga findi Kooh woyoha, waaye mas ɓoyi na hee ɗe eɗndohe ŋ ɓi sang ɗe ! » 23Taalubeeciŋ ɗe meeksoheeɗa ŋ harmban ɓa ɓoyi na hee tume ineem nga ɓa.
Ya ɓa uup nik kilifa ?
24Woo nammba kuruk ŋ harmban ɓa, ɓa taastiɗohee ne yinde uup nik kilifa nga ɓa. 25Yeesu woosa ɓa ne : « Buur ciŋ kur ci na uupee ɓooɓiŋ ɓa doole te kilifaaci teek haf ɓa tumoh baahiɗ ci. 26Waaye wa joyɗi nikoh ɗaa nga ɗu. Ɓoyi uup nik kilifa nga ɗu, a mandaat na ɓoyi uup ƴissuut ; te ɓoyi adug nga ɗu, mandaat na ɓoyi na taambkohe. 27Ɓoyi ɓoof ñame na ɓoyi na taambkohee ɗe, ya ɓa uup nik kilifa nga ɓa ? A ɓoyi na ñame haa e ? Moona mi yii ŋ harmban ɗu findi ɓoyi na taambkohe. 28Po wi ɗu risiɗ na so ŋ miskiɗiŋ ngo, 29weɗ tah ŋ oniɗ ɗu Nguuri findi Baabiŋ ngo onoh ho wa. 30Tahha po ɗu hey ɓaahe na so ɓoo ñamee, ɓoo anee ŋ Nguuriŋ ngo. Ɗu hey ɓoofe ŋ ɓoofoha-buur ne ɗu adgoh cuuɓ ciŋ Israayel ndaŋkiyaah na kanak ci (12). »
Yeesu dengiɗ Simong Piyeer
31Yeesu woosa Simong Piyeer ne : « Simong ! Simong ! Sikɗuka ! Seytaani woyiɗ po a onuuɗ ne a min ɗu bisir findi pees. 32Waaye ŋ kiimɗiɗ ɗa ne fu faɗuu kosi fu kos, te fu hayis nga so ɗah, ndengɗa kosiŋ ƴaaɓi tas. » 33Piyeer woosa ɗe ne : « Kilifaani, ŋ teyɗukiɗ hun na ɗa ŋ kaso po ŋ apu na ɗa sah. » 34A loffa ɗe ne : « Piyeer, ñam na woyee ɗa wa, weki woti bala siiki leehkan ɗah, fu hey woye waas kaahay ne fu inahɗi so. »
35Ƴutta a woyissa ɓa ne : « Wa ŋ tuuƴ ɗu, raakaaɗi kopor, na saak, na ñafaɗ, ɗu ñakeen in e ? » Ɓa woosa ɗe ne : « Ɓoo ñakeeɗi in. » 36A woosa ɓa ne : « Waaye ɗiski wa nik, ɓo' nu raak kopor, mbaa saak ɗah, a ɓayaata. Te ɓo' nu raakɗi ndang ɗah, a toonaat paltooniŋ ɗe a rom ; 37Laam ñam na woyee ɗu wa, ini Fiis ci Hooliɗ ci woo, an : “ Ɓa ambiɗ ɗe findi ɓo' yurhaaɗi. ” Ineem raakan nga so. In ci fiisu ŋ ini kaɗ nga so jen ca ɗii raak. » 38Weɗi taalubeeciŋ ɗe woyoh ɗe ne : « Kilifaani, ndang kanak ceɗɗi. » A woosa ɓa ne : « Wa doyiɗ. »
Kiimaŋ Yeesu ŋ Tangooraŋ-Oliiw-ca
39Wa Yeesu puloh ŋ ndaam, a kaɗ Tangooraŋ-Oliiw-ca findi a meeɗa tumoh, taalubeeciŋ ɗe ñaakiɗta ɗe. 40Wa a ree ɗiska, a woosa ɓa ne : « Kiimaat Kooh a ndengiɗ ɗu, po ɗu keenuu ŋ fiir. » 41A ussa ɓa ini ree njaf atoh, a ƴekka, a kiimeeɗa, 42an : « Baab, fu waaɗa ɗah, usɗiɗ to kaasiŋ miskiɗii ; waaye wa kanaat nik waaɗ-waaɗiŋ ngo, wa nikaat findi fu waaɗoha. » [43Malaaka pulohha Eel ci, teeɓukka ɗe, ɓaatta ɗe hatil. 44Ŋ tiisi a nikohee weem, Yeesu uupeeɗa kiim Kooh, opiŋ ɗe siiteeɗa ŋ kehƴi haa ñif.] 45Wa a ƴut kiim, a kurukka, a kaɗta ŋ taalubeeciŋ ɗe, a raakka ɓa neeheeɗa sagu tiisi ɓa nikohe. 46A woosa ɓa ne : « Wa ye tah ɗu neehe ? Kurkaat ɗu kiim Kooh a ndengiɗ ɗu po ɗu keenuu ŋ fiir. »
Yeesu ambuuɗ
47Wa Yeesu woyee na taalubeeciŋ ɗe, mboolo reyeeɗa. Yudaa yi adgohee wa, a ɓaahee ŋ Apootar ci ndaŋkiyaah na kanak ci (12) ; a reɓpa ŋ Yeesu ne a kañiɗ ɗe, a foon ɗe. 48Waaye Yeesu woosa ɗe ne : « Yudaa, fu na eɗohe Kuɓkiŋ ɓoyi sangiɗ ciŋ ɗe na foon e ? » 49Wa taalubeeci hunee na Yeesu hot ŋ ini na hee raake, ɓa woosa ɗe ne : « Kilifaani, ɓoo puliɗ ndang ciŋ ɓoo e ? » 50Rek, yino nga ɓa ƴoɓpa ñaam ŋ ñaam caŋ seeƴkiɗoha yakka po nofiŋ ɗe ñaahmi nguɗta. 51Waaye Yeesu woosa ɓa ne : « Faɗaat, wa doyiɗ. » A ammba nofiŋ ƴaari, a wiriɗta ɗe. 52Ƴutta, a woosa kilifaacaŋ seeƴkiɗoh ca na ɓaŋ ɓooɓa niiɗee Kahan Kooh na yakak ca, ɓooɓa hee ɗe ambe jen ne : « Ɗu joyiɗ hay ndii na ndooɗ na ndang po maa ŋ rokoh e ? 53Moona neeh cii jen ŋ nikee na ɗu ŋ Kahan Kooh te ɗu ambɗi so. Waaye a wahtuuniŋ hatiliŋ ñuusi ree, wiŋ ɗu. »
Piyeer taaskiɗ Yeesu
54Wa ɓa amb Yeesu, ɓa ɓayeeɗa ɗe kahan seeƴkiɗoha yakka, Piyeer nikee ñaakɗeeɗa ɗe usiɗ ŋ finhoora. 55Wa ɓa ree, ɓa fuuɗta yongkaah ŋ ɗooƴ kahna, ɓa willaa. Piyeer ɓooffa ŋ harmban ɓa. 56Komaaki cafaƴ nikeen nga, a ɓaahee ŋ ñaam ca, a hotta Piyeer ŋ jaalɗaŋ yongkaaha, a marakka ɗe baahiɗ, a woosa ne : « Na ƴaarii, a hunee na ɗe. » 57Waaye Piyeer taasukka an : « A'aa ɓoyi ! Ŋ inahɗi ɗe de' ! » 58Wa degga ƴissuut ɓo' wiiriis hotta ɗe, woosa ɗe ne : « Fu nam ɓaah ŋ ƴaaɓeem. » Piyeer loffa ne : « Muk ƴaari ! Ŋ ɓaahɗi nga ɓa ! » 59Wa degga ini ree wahtu, ƴaar wiiriis ndengiɗtaa ne : « Wa hooliɗ to ne ƴaarii nikee na ɗe, a nam gen Galile. » 60Waaye Piyeer woosa ɗe ne : « Ca' ƴaari ! Ŋ inahɗi sah ini fu waaɗ woo. » A woyee woo rek, siika leehukka. 61Yeesu Heɗi heelukka, marakka ɗe ; Piyeer jaarra naandsuk ina a woyee ɗe ne : « Ŋ weki woti, bala siiki leehkan ɗah, fu hey yo taaske waas kaahay. » 62Piyeer pulla, fuɗeeɗa fuɗ miskiɗ.
Yeesu ŋ yaah ɓooɓa sang ɗe
63Ŋ ini kaɗ ŋ Yeesu, ɓooɓa niiɗee ɗe nikee njembteeɗa ɗe, ɓa laɓeeɗa ɗe ; 64ɓa ɗippa has ciŋ ɗe, ɓa meekseeɗa ɗe ne : « Nik ne fu woosuuɗ ɗah, woya ɓoyi laɓ ɗa ! » 65Te ɓa degɗeeɗa ɗe ɓi ɓaseeh laayiɗ nga.
66Wa Kooh wiis, yakak caŋ cuuɓi cohha na kilifaacaŋ seeƴkiɗoh caŋ waasiŋ Musaa na jangɗohoh caŋ wa. Ɓa nakohha komu Yeesu ŋ fiki saangnaŋ ɓa, 67ɓa meekissa ɗe ne : « Woya ɓoo, a fu Mucɗohi Gapohse e ? » A loffa ɓa ne : « Ŋ woo ɗu wa ɗah, ɗu heyɗi wa kose muk ; 68te ŋ meekis ɗu ɗah, ɗu heyɗi lofe. 69Waaye inhaat ne ini amboh woti Kuɓkiŋ ɓoyi hey nike ŋ yaah-ñaahmiŋ Koohi Min. » 70Ɓa jen ɓa woosa ɗe ne : « Kon fu Kuɓkiŋ Kooh e ? » A woosa ɓa ne : « Ɗu woyiɗa. » 71Ɓa woosa ne : « Ɓoo etohis seede ye ? Ɓoo kerhootiɗa ŋ nguɓiŋ ɗe. »
ទើបបានជ្រើសរើសហើយ៖
Luk 22: YM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc