انجیلِ مَتّی 8
8
شَفِی مِردِ جذامی
1وختی عیسی وَ کُو اومَه دومِن، جَماعَتَلِ زیادی وَ دینِش رونَه وابی‌یِن. 2مِنِه ای موقَع مِردی جذامی اومَه طِیش وِ جِلوش زونی زَه وِ گُت: «ای آقا، اَر بِخِی ایتَری مِنَه شفا بِئی.» 3عیسی دَسِ خِشَه دراز کِه، وَش دَس نَها وِ گُت: «ایخوام؛ شفا بِگِه!» هَمو دَقَه، وَ جذام شفا گِرُت. 4اوسِه عیسی وَش فرمایش کِه: «حَواسِت بو که در موردِ یِه وَ کسی چیئی نَگِی، بِرَه خِتَه وَ کاهن نشون بییِه وِ او پیشکِشی نَه که موسی امر کِردِه، تقدیم کُ تا وَشون نِشون بییِه که شَفا گِرُتی‌یِی.»
ایمون یِه افسرِ رومی
5وختی عیسی رَت مِنِه شهرِ کفرناحوم، یِه افسرِ رومی اومَه طِیش وِ بِی التماس 6وَش گُت: «ای آقا، غلامُم فلج مِنِه حونَه خوسییِه وِ مَهلی درد ایکَشِه.» 7عیسی وَش گُت: «مِ ایام وُ وِّ نَه شفا اییُم.» 8امّا افسر جواب دا: «آقا، لیاقَت نیارُم وَ حونَم بییِی. فقط کلامی بِگُ که غلامُم شفا ایگِرِه. 9سی‌یِکِه مِ خُوم مِردی یَم زِرِ اقتدارِ کسی دَ. سربازَلی هم زِرِ اقتدارِ خُوم دارُم. وَ یکی ایگُم "بِرَه،" ایرَه، وَ یکیدَه ایگُم "بیو،" ایا. وَ غلامِ خِم ایگُم " یِنَه وَجا بیار،" وَجا ایارِه.» 10عیسی وختی گَپَلِ وِّ نَه اِشنُفت، حیرت‌زَیَه وابی وُ وَ کَسَلی که وَ دینِش اییومَن، گُت: «وَراسی، وَ ایشا ایگُم، ایطو ایمونی حتی مِنِه اسرائیل هم نَدییِمِه. 11وَ ایشا ایگُم که خیلی‌یَل وَ شرق و غرب ایایِن وِ مِنِه پادشایی آسمون بِی ابراهیم و اِسحاق و یعقوب وَ سَرِ یِه سُفرَه ایشینِن، 12امّا اولادَلِ ای پادشایی وِردایَه ایابون وَدَر مِنِه تاریکی، جِیئی که گِریوَه وِ دندون‌کِریچَه هِسی.» 13اوسِه وَ او افسر گُت: «بِرَه! طبقِ ایمونِت وَت دایَه ایابو.» مِنِه هَمو دَقَه غلامِش شفا گِرُت.
شَفِی خَسی پِطرُس وِ خیلی‌یَلِ دَ
14وختی عیسی رَت وَ حونۀ پطرس، خَسی وِّ نَه دی که تُو کِردِه وِ مِنِه جایَه. 15عیسی دَسِشَه گِرُت وِ تُوش بَند اومَه. او زن وَریسا وِ مشغولِ پذیرایی وَ عیسی وابی.
16تَنگِ پَسین، خیلی وَ دیوزَدَه‌یَلَه آوُردِن طِیش وُ وِّ بِی کلامِ خُوش روحَلَه وَشون کِه وَدَر وِ تَمومِ مریضَلَه شفا دا. 17وَ ای ترتیب، پیشگوییِ اِشعیایِ پیغمبر وَ اَنجوم رَسی که:
«وِّ دَردَلِ ایما نَه وَگِرُت
وِ مریضی‌یَلِ ایما نَه وَ خُوش گِرُت.»
بَهِی پیروی وَ عیسی
18وختی عیسی دی عِدۀ زیادی طِیش جَم وابی‌یِنِه، امر کِه: «بِرِیم اولَتِ دریاچَه.» 19اوسِه یکی وَ معلملِ تورات اومَه طِیش وِ گُت: «ای استاد، هر جا بِرِی، وَ دینِت ایام.» 20عیسی جواب دا: «رواَیَل کِر دارِن وِ باهِندِه‌یَلِ آسمون چال دارِن، امّا سی کِرِ انسان جِی سر نَهایَن نی.» 21شاگردی دَ وَش گُت: «ای آقا، بِل اَوَل بِرَم وِ بُومَه نِگَه کِنُم وِ بعدَ مُردَنِش کِنِمش زِرِ گِل.» 22امّا عیسی وَش گُت: «وَ دینِ مِ بیو وِ بِل تا مُردِه‌یَل، مُردِه‌یَلِ خِشونَه کِنِن زِرِ گِل.»
آروم کِردنِ تیفونِ دریا
23اوسِه عیسی سُوارِ قایقی وابی وِ شاگردَلِش هم وَ دینِش رَتِن. 24یِه دَفَه مِنِه دریا تیفونِ سختی اومَه، طوری که نِزیک بی موجَل، قایقَه غرق کِنِه. امّا عیسی وَ خُو بی. 25پَ شاگردَل اومَن دیارِش کِردِن وِ گُتِن: «ای آقا، داریم غَرق ایابِیم؛ نجاتِمون بییِه!» 26عیسی جواب دا: «ای کم‌ایمونَل، سیچه زَلَتون ایرَه؟» اوسِه وَریسا وُ وَ بای وِ موجَل نهیب زَه وِ هَمَه جا آروم وابی. 27اونگَل حیرت‌زَیَه وَ یَک ایپُرسییِن: «یِه دَ کی یَه؟ حتی بای وِ موجَل هَم وَش اطاعت ایکِنِن!
شَفِی دِتا مِردِ دیوزَیَه
28وختی که عیسی رَسی وَ وِلات جَدَری‌یَل، که اولَتِ دریاچَه بی، دِتا مِردِ دیوزَیَه که وَ قَبرسون اییومَن وَدَر، عیسی نَه دییِن. او دِتا ایقَه خطرناک بییِن که هیشکَه نیتَرِس وَ او رَه رَی وابو. 29اونگَل قیرَه زَن: «تِ چِکارِ ایما داری، ای کِرِ خدا؟ مَه اومِی‌یِی تا نِهِی وختِ قرار وابی‌یَه عذابمون بیی؟» 30یِچِی اوبالتَرِشون گَلۀ گَپویی وَ خوکَل ایچَردِن. 31دیوَل بِی التماس وَ عیسی گُتِن: «اَر ایکِنیمون وَدَر، بِسیمون کُ مِنِه گَلۀ خوکَل.» 32عیسی وَشون گُت: «بِرِیت!» دیوَل اومَن وَدَر وِ رَتِن مِنِه خوکَل وِ تموم گلَه وَ سَرازیریِ تِلی مِنِه دریاچَه هجوم بُردِن وِ مِنِه اُو هلاک وابی‌یِن. 33خوک‌چَرونَل دَرَتِن، وِ رَتِن وَ شهر وِ تَمومِ ای جَریانَه، مخصوصاً اوچیئی نَه که سی او دیوزَدَه‌یَل اتّفاق اُفتایَه بی، سی مردم تعریف کِردِن. 34اوسِه تمومِ مردمِ شهر سی دییَنِ عیسی اومَن وَدَر وِ وختی وِّ نَه دییِن وَش التماس کِردِن که وَ وِلاتِشون بِزَنِه وَدَر.
ទើបបានជ្រើសរើសហើយ៖
انجیلِ مَتّی 8: SLB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company